Matɔŋinɔkɔ maŋ 3

1“Gbala kuthagba ka maleka wo dethiteke biya bi ka Masaala beŋ ka mɛti ba ka Sadisi ba dɔma, na “Huseri haŋ huna haŋ haŋ baŋ hu ŋaye ka wundɛ wo iŋ yinɛŋ bisɔŋ-biye bi ka Masaala beŋ mɛnɛ sosɛŋ bisɔŋ-biye beŋ. Yaŋ kɔthɛŋ ba beŋ ni baŋ; awa yaŋ yuyeŋ beŋ si tɛpiya ba beŋ niyɔ biya bipethɔy, kɛrɛ kumaŋ bitukɛ bina beŋ. 2Huna, thɔhɔŋ e beŋ kahinuwa sii bayete ba pɛyɛtɔy beŋ baŋ haliko ba be tha niye tuke nayeŋ. Yaŋ kute ba dɔma na ba thanki beŋ niya baŋ beŋ ka hɛ bathankinuwɛ ka kɔtɔkɔy ka Masaala wokiyaŋ woŋ. 3Siyuwaŋ ba thanki nde beŋ thaninuwo baŋ iŋ ba yuye beŋ baŋ; putiyɔŋ bɛŋ e beŋ sikina sɔkɔrɔ hakɛŋ bakendeŋ baŋ. Mɛnɛ beŋ tha thɔhɔ, yaŋ kɔŋ key kendeŋ ka nɔŋ batuwaŋ, awa beŋ sa hintiŋ nthɔŋ kɔthɔ lɔkɔ ba yaŋ kaaye baŋ. 4Kɛrɛ haaŋ hɛ beŋ kiŋ hintiŋ iŋ biya bithahuwɔy ka mɛti ba ka Sadisi bi bɔhɛ hintiŋ muthɔɔ namɛŋ muŋ natharaŋ. Awa bindɛ bina nɔŋ kaande iŋ yaŋ e thɔɔ muhuhɛ napooŋ, baa bindɛ asisande ba nɛŋ niyɔ. 5Bindɛ bi punku kɔɔ wukahɛ-kahɛ ka lanɛya baŋ beŋ, bi kɔŋ gbɛkita mupithi muhuhɛ nɔŋ muŋ muŋ siiya awa yaŋ sa puuthu ŋakeŋ namɛŋ ŋaŋ ka buku wo ka bipethɔy beŋ woŋ. Yaŋ kɔŋ gbonkoy nagberekethe ba bindɛ ka kɔtɔkɔy ka Fandaŋ woŋ mɛnɛ ka malekɛŋ nama beŋ ba dɔma na bikiyaŋ bina bindɛ. 6“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi haŋ ka makɔmandeŋ ma ka biya bi ka Masaala beŋ maŋ. 7“Gbala kuthagba ka maleka wo dethiteke biya bi ka Masaala beŋ ka mɛti ba ka Filadɛlifiya ba dɔma, na “Huseri haŋ huna haŋ haŋ baŋ hu ŋaye ka wundɛ wo sɛɛ ŋaye ka Masaala ka woŋ e ndɛ hɛlɛŋ niyɔ wɔ seŋa. Wundɛ kiŋ iŋ saapa hu ka Dauda haŋ nde, awa naa wundɛ pɛthi biyo haŋ, wɔ sa huŋ punku lɔŋa; naa ndɛ lɔŋ biyo haŋ wɔ sa huŋ punku pɛtha. 8Yaŋ kɔthɛŋ ba thanki beŋ niya baŋ. Yaŋ kɔthɛŋ ba dɔma na beŋ kiŋ iŋ sɛmbɛ bathahuwɔy; kɛrɛ beŋ yeme mathanani niŋ maŋ, awa beŋ tha buuhu ba beŋ yama niya lanɛya. Yaŋ pɛthiyɛ bena biyo ka kɔtɔkɔy kendeŋ, hu sa wɔ punku lɔŋa. 9Ponaŋ kuiha, yaŋ kɔŋ bena tepe ba biya bi ka kiki ba ka Sithani baŋ beŋ, bahothiŋ bi dɔmɔkɔy beŋ na biYusu bina bindɛ mahɛŋ ma bindɛ ka nɛŋ. Yaŋ kɔŋ ni ba bindɛ kaa e bindɛ ka putɔ ka kɔtɔkɔy ka ŋathaki ndeŋ ŋaŋ. Bindɛ fooma bi kɔŋ kɔthɔ ba dɔma na yaŋ athimo bena. 10Saathɛ ba na mɛyi beŋ yamari wokiyaŋ wo ka niya muyuŋ baŋ woŋ, yaŋ kɔŋ nɛnɛ ni ba beŋ thana kuta masibo ka lɔkɔ ba ka kugbɛrɛŋɛŋ ba see kafaydo baŋ ba si gbɛriŋina biya bi kafaydo beŋ fooma. 11Yaŋ kɔŋ key tete. Bohitaŋ wukahɛ-kahɛ ba iŋ beŋ baŋ, wuna sa wɔ bena tuutu nɛmuiŋ ndeŋ bi ka punka haŋ beŋ. 12Yaŋ kɔŋ ni wo punku woŋ kuthulu ka banka ba ka Masaala baŋ, awa wundɛ sa kɛndɛ pɛyɛŋ hali. Yaŋ kɔŋ gbali ka kɔtɔ nama koŋ keŋ ku ka Masaala wokiyaŋ woŋ koŋ iŋ keŋ ku ka mɛti ba ka Masaala wokiyaŋ woŋ baŋ, mɛti ba ka Yɛrusalɛmi baŋama ba thuhu baŋ ŋaye ka Masaala ka ariana. Yaŋ kɔŋ hɛlɛŋ gbali keŋ niŋ kuŋama koŋ ka kɔtɔ nama koŋ. 13“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi haŋ ka makɔmandeŋ ma ka biya bi ka Masaala beŋ maŋ. 14“Gbala kuthagba ka maleka wo dethiteke biya bi ka Masaala beŋ ka mɛti ba ka Leyodisiya ba dɔma, na “Huseri haŋ huna haŋ haŋ baŋ hu ŋaye ka wo dɔma woŋ na Amiina, wo yɔhɔy niyo lanɛya woŋ e hɛlɛŋ niyɔ maseri maseŋa, wo mathere ma ka ntha yo ntha ki yeheni Masaala. 15Yaŋ kɔthɛŋ ba thanki beŋ niya baŋ; beŋ ka bithɛbɛ, beŋ ka bitɔɔkɛ. Yaŋ thimoŋ ba beŋ niyɔ bɛyi banthe, bithɛbɛ maa bitɔɔkɛ. 16Kɛrɛ saathɛ ba na beŋ bithɛbɛ maa bitɔɔkɛ e beŋ niyɔ nawumpuraŋ, yaŋ bathɔi ba bena thutha ka hothi niŋ haŋ. 17Beŋ tepe ba dɔma, na ‘Dinhaŋiŋ bina miŋ bi thankɛ nagburu; awa miŋ panketa ntha yo ntha.’ Kɛrɛ beŋ kɔita ba dɔma na biya bimayɛini bina beŋ, biya bi ka nkinikiniŋ, bamɔnɛŋ, bi mankɔi thaaya, mɛnɛ bi kɔɔyɛ bunthu. 18Huna, yaŋ yeli bena ba beŋ yama boyte boy buyɔhɔy, haliko beŋ be niyɔ dinhaŋiŋ. Beŋ hɛlɛŋ boya muthɔɔ muhuhɛ mu beŋ gbɛkitɔkɔ ba pututa bunthu ndeŋ bakuyaahu baŋ. Boyaŋ hɛlɛŋ tɛɛni ba thiya ka thaaya ndeŋ thaŋ, wuna beŋ kutu. 19Bi thimo yaŋ beŋ bina yaŋ toŋine hakɛŋ namɛŋ baŋ e yaŋ bindɛ gbasiŋita wuna bindɛ dinkɔ. Huna, sikinaŋ sɔkɔrɔ hakɛŋ ndeŋ baŋ iŋ thathukuma ndeŋ thaŋ fooma. 20Ponaŋ kuiha, yaŋ kooyeŋ ka biyo haŋ e yaŋ kɔ gbɛdiŋa; mɛnɛ wɔ yo wɔ yuye thampa niŋ thaŋ e ndɛ pɛtha biyo haŋ, yaŋ kɔŋ biyande ka banka nama baŋ e yaŋ thɔma iŋ wundɛ, awa ndɛ kɔŋ thɔŋ iŋ yaŋ. 21Wundɛ wo punku kɔɔ wukahɛ-kahɛ ka lanɛya baŋ woŋ, yaŋ kɔŋ niŋ dunkune mayoho ba dɔŋɔ iŋ yaŋ ka yensi niŋ haŋ, nɔŋ na punke nthɔŋ yaŋ na e yaŋ hɛ dɔŋɔ iŋ Fandaŋ woŋ ka yensi nama haŋ. 22“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi ka makɔmandeŋ ma ka biya bi ka Masaala beŋ maŋ.”

will be added

X\