Matɔŋinɔkɔ maŋ 22

1Maleka woŋ toŋine nde hɛlɛŋ yama mankɔ ma ka mandi ma dunkuŋ sii baŋ maŋ, e mɛŋ kɔ maleke nɔŋ sɛnkɛ womɛthɛ, e mɛŋ kɔ fuŋa ŋaye ka yensi hu ka Masaala haŋ mɛnɛ Taka Wohatiyɛ woŋ, 2e mɛŋ kɔ bula mateete ka gboŋa ba ka mɛti bamandiŋ baŋ. Kuwaŋ ndo kuwaŋ ka mankɔ maŋ kuyeŋ ku dunkuŋ sii baŋ koŋ ku kiŋ kɛndɛ. Kuyeŋ koŋ koŋ baŋ ku kɔŋ tiŋ mutiŋ dɔŋɔ kɔhi iŋ kaye ka nina haŋ; ku kɔŋ tiŋ hanthe ka sɛnkɛ yo sɛnkɛ. Awa bompa nama buŋ buna biya bi ka ŋakuyɛkɛŋ ŋa kafay woŋ beŋ puyo. 3Ntha yo ntha ki thiyiyɛ Masaala danka sa kuta ka mɛti bamandiŋ baŋ baŋ. Yensi hu ka Masaala haŋ mɛnɛ hu ka Taka Wohatiyɛ woŋ haŋ hu kɔŋ niyɔ ka mɛti bamandiŋ baŋ, awa bawaliŋ nama beŋ bi kɔŋ niŋ ni kubatho. 4Bi kɔŋ kutu yethi nama haŋ, awa keŋ kukɛnama koŋ ku kɔŋ gbala ka thayethi namɛŋ thaŋ ka thinthi ka bunihiŋ buŋ. 5Huyɛ baŋ sa nda kɛndɛ niyɔ, awa bindɛ sa nɔŋ nda niyɔ mumɔɔli kufiyo maa waŋ ba ka kaŋ woŋ baŋ, baa Mariki wo Masaala woŋ kɔŋ niyɔ waŋ bakɛnamɛŋ, awa bi kɔŋ kɛrɛŋ nɔŋ gbakuiŋ ba kɔy yo kɔy. 6Kɛna dome yama maleka woŋ, na “Thampɛŋ thaŋ thaŋ baŋ seŋa awa thɛŋ ayɔhɔ ba piitoko. Awa Mariki wo Masaala wo dunkunɛ Yina nama woŋ ka banabiŋ beŋ, ndɛ na ŋindɛ maleka nama woŋ ba toŋine bawaliŋ nama beŋ ba tete niyɔ ka wuthurɔy wuŋ baŋ.” 7Yisɔs tepe, na “Pona kuiha, yama tete see woŋ ka wuthurɔy wuŋ baŋ! Mayehitɔkɔ ma kɔŋ niyɔ ka bi putiyɔ thampɛŋ tha ka hunabi tha ka buku woŋ baŋ thaŋ.” 8Yaŋ Yɔni, yuyɔkɔy e yaŋ kutiyɔkɔ bɛyiniŋ baŋ baŋ fooma. Awa naa thanki yaŋ bɛŋ yuyɔkɔ e yaŋ bɛŋ kutiyɔkɔ, yaŋ ŋɔti ka ŋathaki ŋa ka maleka wo toŋine yama bɛyiniŋ baŋ baŋ woŋ, awa yaŋ niye niŋ kɔ niye kubatho. 9Kɛrɛ ndɛ dome yama, na “Ba wuŋ ni! Bawali wo ka Masaala na yaŋ na nthɔŋ yi na, awa yaŋ kiŋ nɔŋ na nde nthɔŋ mbɛnda ndeŋ banabiŋ beŋ na, awa mɛnɛ biya bi yɛrɔkɔy thampɛŋ tha ka buku woŋ baŋ thaŋ beŋ. Niya Masaala na kubatho!” 10Awa ndɛ dome yama na “Ba kɔsɔŋ thampɛŋ tha ka hunabi tha ka buku woŋ baŋ thaŋ ka gbundu, baa lɔkɔ baŋ thuriye ba bɛyiniŋ baŋ baŋ fooma niiye baŋ. 11Wɔ yo wɔ wo nɛnɔy, wundɛ kaayeŋ ka kɔtɔkɔy ka nɛnɔ haŋ; awa wɔ yo wɔ wo ni bɛyiniŋ bapothuwɛ, yɔkɔŋ wundɛ be key ka kɔtɔkɔy ka niya bɛyiniŋ bapothuwɛ baŋ. Wɔ yo wɔ woyɔhɔy, yɔkɔŋ wundɛ be key ka kɔtɔkɔy ka niya bayɔhɔy baŋ; awa wo ka kufɛŋ ku ka Masaala koŋ, yɔkɔŋ wundɛ be key ka kɔtɔkɔy ka niyɔ wɔ ka Masaala.” 12Yisɔs dome, na “Pona kuiha! Yama see woŋ ka wuthurɔy wuŋ baŋ! Yaŋ kɔŋ diŋ kuthunkuŋ niŋ koŋ ka saa ba si thunkuna wɔ yo wɔ ba bɛyiniŋ ba thanki wundɛ niya baŋ. 13Yama mathɛrɛŋ maŋ mɛnɛ mapeye maŋ, womayoŋ woŋ mɛnɛ womankɛ woŋ.” 14Biya bi looyi ŋahɔli namɛŋ ŋaŋ e bindɛ ŋɛŋ mɛthina bi kɔŋ yehitɔkɔ wumandiŋ, awa bindɛ bina niyɔ iŋ mayoho ba thɔma mutiŋ mu timɛ ka kuyeŋ ku dunkuŋ sii baŋ koŋ, mɛnɛ ba daŋiyande ka biyo hu ba biyande ka mɛti bamandiŋ baŋ haŋ. 15Kɛrɛ hɛŋ mɛti bamandiŋ baŋ, biya bi ni beŋ nɔŋ ŋatheŋ mɛnɛ bi ni thakanka, bi ni ŋabɛini ŋahakuwande mɛnɛ bi kɔri biyamɛti beŋ, bi ni dekɛŋ kubatho beŋ mɛnɛ bahothiŋ beŋ ka gbonkiya mɛnɛ ka mani, bindɛ bina niyɔ hɛŋ mɛti baŋ. 16“Yaŋ Yisɔs, yama ŋindɛ maleka niŋ woŋ ba koyiŋa bɛyiniŋ baŋ baŋ kendeŋ, bendo makɔmandeŋ ma ka biya bi ka Masaala beŋ. Yaŋ ŋaye nde ka bɔnsɔŋ ba ka Dauda baŋ; yama sosa wo kuputhɔ ku kaŋ wobɛndɛ-bɛndɛ woŋ.” 17Yina wo ka Masaala woŋ mɛnɛ wo ba yento woŋ, bindɛ dome, na “Saaŋ!” Wɔ yo wɔ wo yuyɛ haŋ haŋ baŋ yɔkɔŋ ndɛ be hɛlɛŋ nɛŋ dɔŋ, na “Saaŋ!” Wɔ yo wɔ wo kaho kumbɛ ndɛ sɛɛŋ; wundɛ yɛrɔkɔyŋ mandi ma dunkuŋ sii baŋ maŋ nɔŋ munkii. Mu kiŋ ba wɔ yo wɔ wo thimo. 18Yaŋ Yɔni yeli wukahɛ-kahɛ wɔ yo wɔ wo yuyɛ thampɛŋ tha ka hunabi tha ka buku woŋ baŋ thaŋ: mɛnɛ wɔ yo wɔ ndinti ntha yo ntha ka thɛŋ, Masaala kɔŋ ndinti kasarɛŋ ba toŋino ka buku woŋ baŋ ka thinthi ka kugbasaŋati ku ka wɔ bɛina. 19Awa mɛnɛ wɔ yo wɔ kɔŋ gbinkinande ntha yo ntha ŋaye ka thampɛŋ tha ka hunabi tha gbalo ka buku woŋ baŋ thaŋ, Masaala kɔŋ gbinkinande kufɛŋ kukɛnama ka mutiŋ mu ka kuyeŋ ku dunkuŋ sii baŋ koŋ mɛnɛ kufɛŋ nama ka mɛti bamandiŋ baŋ, mu toŋino ka buku woŋ baŋ. 20Wundɛ wo ni maseri ba bɛyiniŋ baŋ baŋ woŋ fooma ndɛ kɔŋ dɔŋ, na “Hunɔndi yaathi! Yaŋ kɔŋ see ka wuthurɔy wuŋ baŋ!” Yaŋ Yɔni dome, na haliko wu niyɔ nɛŋ. Saa, Mariki woŋ Yisɔs! 21Haliko makutiyɛ ma ka Mariki woŋ Yisɔs maŋ ma niyɔ iŋ womo woma.

will be added

X\