Matɔŋinɔkɔ maŋ 21

1Kɛna kute yaŋ ariana woŋama mɛnɛ kafay woŋama. Ariana wotiyɔ woŋ mɛnɛ kafay wotiyɔ woŋ piriŋe, awa mankɔ mamɛɛti maŋ piriŋe hɛlɛŋ nɛŋ. 2Awa kɛna kute yaŋ mɛti bamandiŋ ba ka Masaala baŋ, bɛna mɛti ba ka Yɛrusalɛmi baŋama baŋ, ba si thuhu ŋaye ka ariana ka Masaala ka, ba kosinoko nɔŋ yɛrɛmɛ wo ba yento wo gbɛkitɔkɔy mupithi muyɔhɔy ba peyeto ka wandama. 3Yaŋ yuye thampa tha ŋatɛ ka thinthi tha be fuŋ ka yensi haŋ tha tɛpɛ ba dɔma, na “Ka tete kɛna ntiŋ Masaala key ka niya yikiya iŋ biyamɛti! Wundɛ kɔŋ dɔŋɔ iŋ bindɛ, awa bi kɔŋ niyɔ biya bikɛnama. Masaala ka yɛthɛ nama gbeeŋ ndɛ kɔŋ niyɔ iŋ bindɛ, awa wundɛ kɔŋ niya kubatho iŋ bindɛ. 4Wundɛ kɔŋ puuthu manɛɛni maŋ fooma ka thaaya namɛŋ thaŋ. Tuka sa nɔŋ nda niyɔ, boka ka nda, maa berina, maa wuthoonɛ, baa bɛyiniŋ batiyɔ baŋ piriŋe fooma.” 5Kɛna dome wo dɔŋɔy ka yensi haŋ woŋ, na “Ka tete kɛna ntiŋ yaŋ ni ntha yo ntha wuŋama!” Wundɛ dome hɛlɛŋ yama, na “Gbala haŋ haŋ baŋ, baa thampɛŋ thaŋ thaŋ baŋ seŋa awa thɛŋ ayɔhɔ ba thɛŋ piitoko.” 6Awa kɛna dome ndɛ, na “Wuŋ thiŋe! Yama mathɛrɛŋ maŋ mɛnɛ mapeye maŋ, womayoŋ woŋ mɛnɛ womankɛ woŋ. Ka wɔ yo wɔ wo kaho kumbɛ, ndɛ na yaŋ dunkune mayoho maŋ ba thiiye ka nthondi ki ka mandi ma dunkuŋ sii baŋ kiŋ wu ka iŋ thunkuna kɔbiri. 7Wɔ yo wɔ wo punku kɔɔ wukahɛ-kahɛ ka lanɛya baŋ, wundɛ kɔŋ biyɔ wuŋ baŋ ŋaye kiyaŋ; yaŋ kɔŋ niyɔ Masaala nama, awa wundɛ kɔŋ niyɔ hatiŋ. 8Kɛrɛ biya bi ni banɛnɔy beŋ bi kɔŋ niyɔ iŋ kufɛŋ ka buu bumandiŋ bu tɔɔki iŋ sɔlifa bu thɔyande iŋ mankɔ mamandiŋ, buna tuka hukaye haŋ. Bapayɔyŋ beŋ, bi teeti lahiri bakɛnamɛŋ baŋ beŋ ka Kraist, bi ni bɛyiniŋ banɛnɔy-nɛnɔy beŋ ba pothinɔkɔ, bakɔriŋ biya beŋ, bi ni ŋabɛini ŋahakuwande beŋ, bi ni thakanka beŋ, bi ni dekɛŋ ŋabatho beŋ, mɛnɛ bi kɛrɛŋ hothi beŋ fooma, biya beŋ beŋ baŋ fooma bi kɔŋ niyɔ kɛndɛ ka buu buŋ.” 9Maleka wunthe ka malekɛŋ bisɔŋ-biye bi nde iŋ thasomba thasɔŋ-thaye tha thiŋo nde kasarɛŋ basɔŋ-baye bamankɛ baŋ see kiyaŋ e dɔma, na “Saa, awa yaŋ kɔŋ yina toŋine wo ba yento woŋ, wo nda wɔtɔ ka Taka Wohatiyɛ woŋ.” 10Yaŋ boho iŋ Yina wo ka Masaala woŋ, e maleka woŋ yama ka tuta ka kusɛri kuthɔɔkuwɛ-thɔɔkuwɛ ka thinthi. Wundɛ toŋine yama mɛti ba ka Yɛrusalɛmi, bɛna mɛti ba ka Masaala baŋ, ba si thuhu ŋaye ka ariana ka Masaala ka. 11Bɛŋ kɔ maleke iŋ yiki ba ka Masaala baŋ, awa maleke hu bɛŋ maleke haŋ athɔyande iŋ raka hukahɛ mɔlɔŋ, nɔŋ raka hu dɔma haŋ na yasapa, humɛthɛ natharaŋ nɔŋ sɛnkɛ. 12Mɛti baŋ baŋ ba kiŋ iŋ thatha bamandiŋ, bathɔɔkuwɛ-thɔɔkuwɛ ka thinthi, ba iŋ thabiyo thasɔŋ-thaye iŋ malekɛŋ bisɔŋ biye bi iŋ gbɛthɛŋ ba ka thabiyo thaŋ thaŋ. Ka thabiyo thaŋ thaŋ, ŋakeni ŋa ka bɔnsɔni kɔhi iŋ baye ba ka siya ba ka Isirɛli baŋ ŋaŋ gbalo kɛndɛ. 13Thabiyo thataati tha kiŋ ka kuwaŋ ndo kuwaŋ ku ka thatha baŋ: thabiyo thataati ka kaŋ woŋ fuŋe ka, thataati yɔnkɔ huthome haŋ naa yi siseke ka kaŋ woŋ fuŋe ka, thataati yɔnkɔ hupɔkɔdɔ haŋ, awa thataati kuwaŋ kupothi koŋ. 14Thatha ba ka mɛti bamandiŋ baŋ thoyo ka thinthi ka tharaka kɔhi iŋ thaye thabukuyuwɛ, ka gbalo ŋakeŋ ŋa ka baseriŋ kɔhi iŋ biye bithɔɔkɔ bi ka Taka Wohatiyɛ woŋ beŋ. 15Maleka wo gbonkiye yama woŋ kiŋ nde iŋ kugbɔkɔdi kuboy ba thubuta mɛti bamandiŋ baŋ, thabiyo tha kɛndɛ thaŋ, mɛnɛ thatha ba kɛndɛ baŋ. 16Mɛti bamandiŋ baŋ ba kiŋ iŋ ŋapɛpɛ ŋanaŋ ŋa nanthe ka ŋarina mɛnɛ ka thɔkuwa. Kɛna thubutu maleka woŋ mɛti bamandiŋ baŋ e bɛŋ tɛŋa ŋaragba wulu wunthe e kɛmɛ kasɔhi ka thɔkiyande, ka ŋarina mɛnɛ ka thɔɔkuwa ka thinthi. 17Maleka woŋ thubutu nde hɛlɛŋ thatha baŋ e bɛŋ tɛŋa bɔha kɔnthɔ kataati ka thɔɔkuwa ka thinthi, ŋaye ka muthubute mu nde wundɛ thubute muŋ. 18Thatha baŋ yehinuwo nde ŋaye ka tharaka tha dɔma yasapa thaŋ, awa mɛti baŋ bɛŋ yehinuwo nde ŋaye ka boy bumɛthɛ, bumɛthɛ natharaŋ nɔŋ sɛnkɛ. 19Tharaka thabukuyuwɛ tha ka thatha ba ka mɛti bamandiŋ baŋ thaŋ gbɛkito nde wuyɔhɔy iŋ tharaka tha kahɛ mɔlɔŋ thahakuwande. Raka humayoŋ haŋ huna dɔma yasapa, humɛthɛ natharaŋ. Huthaye haŋ huna dɔma safaya, hu mabilu nɔŋ kuthahinɛ koŋ. Hutaati haŋ huna dɔma akati, hu sɛnkirɛ. Huthanaŋ haŋ huna dɔma ɛmɛralidi, hu nɔŋ bompa budethɛ buŋ. Husɔhi haŋ huna dɔma ɔnikisi, humɛthɛ humaleke. Husɔŋ-hunthe haŋ huna dɔma karanɛliyaŋ, hupothɛ. Husɔŋ-thaye haŋ huna dɔma kuwatisi, hu nɔŋ yɛlo. Husɔŋ-kataati haŋ huna dɔma bɛrili, hu maleke nɔŋ bompa budethɛ buŋ. Husɔŋ-thanaŋ haŋ huna dɔma topasi, yɛlo womaleke. Hukɔhi haŋ huna dɔma talisidɔni, nɔŋ humanko hudethɛ. Hukɔhi iŋ hunthe haŋ huna dɔma tɔkuwɔsi, hu mabilu nɔŋ kuthahinɛ koŋ. Hukɔhi iŋ thaye haŋ huna dɔma amɛthisi, hu niyɛ maŋ pothita. 21Thabiyo kɔhi iŋ thaye thaŋ yehinuwo ŋaye ka tharaka tha kahɛ mɔlɔŋ tha dɔma na pɔrili; biyo yo biyo yehinuwo ŋaye ka raka hunthe. Gboŋa baŋ ka mɛti bamandiŋ baŋ kaake yehinuwo ŋaye ka boy bumɛthɛ nɔŋ sɛnkɛ womɛthɛ. 22Yaŋ tha nde kutu banka o banka ba saraka baŋ fuŋuno ka Masaala ka mɛti bamandiŋ babɛina, baa ka yɛthɛ namɛŋ gbeeŋ Mariki woŋ Masaala wo biyɛ sɛmbɛ baŋ fooma mɛnɛ Taka Wohatiyɛ woŋ bindɛ bina banka ba niye kubatho baŋ. 23Mɛti baŋ thimota kaŋ woŋ maa sɛnkɛ ba bɛŋ bende, baa yiki bamandiŋ ba ka Masaala baŋ bɛna bɛŋ bende, awa Taka Wohatiyɛ woŋ na mumɔɔli mu ka mɛti babɛina. 24Biya bi kafay woŋ beŋ bi kɔŋ kaande ka waŋ ba ka mɛti babɛina, awa gbakuiŋ bi kafay woŋ beŋ bi kɔŋ kati hudinhaŋiya namɛŋ haŋ kɛndɛ. 25Thabiyo tha ka mɛti bamandiŋ baŋ thaŋ tha kɔŋ yiŋ thapɛthɔy; thɛŋ sa manka hali, baa huyɛ baŋ sa kɛndɛ niyɔ. 26Yiki mɛnɛ hudinhaŋiya mu ka ŋakuyɛkɛŋ ŋa ka fai woŋ ŋaŋ mu kɔŋ sisa ka mɛti baŋ. 27Kɛrɛ ntha yo ntha ki be mɛthi ka kɔtɔkɔy ka Masaala kiŋ sa biyande ka mɛti bamandiŋ baŋ, maa wɔ yo wɔ wo ni bɛy bakuyaahu maa wo kɛrɛŋ hothi. Yɔkɔŋ bi ŋakeŋ namɛŋ ŋa gbalo ka buku wo ka Taka Wohatiyɛ, wo ka gbalo ŋakeŋ ŋa ka bi kutɛ sii baŋ beŋ, bindɛ bina kɛndɛ biyande.

will be added

X\