Matɔŋinɔkɔ maŋ 20

1Kɛna kute yaŋ maleka si thuhu ŋaye ka ariana wo bɔhɛ ka yɔnkɔ saapa hu pɛthi ka tha nde kuyɛkɛŋ koŋ mankande kɛ mɛnɛ yɔlɔnkɔiŋ badimbɔy-dimbɔy. 2Wundɛ bohe yaarɔ woŋ wo nde wokɛkɛŋ wotiyɔ-tiyɔ woŋ, wo Sithani Wayi Womandiŋ woŋ, e ndɛ niŋ lɔŋa iŋ yɔlɔnkɔiŋ ba thaninɛŋ wulu wunthe. 3Maleka woŋ yele niŋ ka tha nde kuyɛkɛŋ koŋ mankande kɛ e lɔŋa kɛndɛ, e wundɛ kɛndɛ kahitina iŋ mayinki, wuna sa nɔŋ nda wundɛ thɔkɔŋ biya bi ka siyani ba kafay woŋ baŋ beŋ haaŋ yɔkɔŋ thaninɛŋ wulu wunthe woŋ daŋande. Naa thɛŋ daŋande, wundɛ kɔŋ kaŋa ba wuthurɔy. 4Kɛna kute yaŋ thayensi mɛnɛ bi dɔŋɔy ka thɛŋ beŋ bi si dunkuno sɛmbɛ ba kɔnsiŋina. Yaŋ kute hɛlɛŋ yinɛŋ bi ka bi thoŋo nde thankaha beŋ saathɛ ba na ni nde bindɛ maseri ba Yisɔs mɛnɛ ba na koyoŋ nde bindɛ thampa tha ka Masaala thaŋ. Bindɛ tha nde ni kubatho maama wobaŋɔy woŋ maa deka nama woŋ, bindɛ tha niyɔ iŋ thɛnkɛy wo ka maama wobaŋɔy woŋ ka thayethi namɛŋ thaŋ ka thinthi ka bunihiŋ buŋ maa ka thɛnkɔ namɛŋ thaŋ. Bindɛ duu nde ka niyɔ iŋ sii e bindɛ kɛriŋa iŋ Kraist nɔŋ gbakuiŋ ba thaninɛŋ wulu wunthe. 5Ŋayi ka tuka humayoŋ haŋ huna haŋ haŋ, awa bitukɛ bibintheŋ bi pɛyɛ beŋ tha niyɔ iŋ sii haaŋ yɔkɔŋ naa daŋande thaninɛŋ wulu wunthe woŋ thaŋ. 6Mayehitɔkɔ mɛnɛ thaduba thamandiŋ mu kɔŋ niyɔ ka bi thiyita ka ŋayino ka tuka humayoŋ haŋ haŋ. Tuka hukaye haŋ sa niyɔ iŋ sɛmbɛ ka thinthi kɛnamɛŋ; bi kɔŋ niyɔ bafodeni bi ka Masaala mɛnɛ bi ka Kraist, awa bi kɔŋ kɛrɛŋ iŋ wundɛ ba thaninɛŋ wulu wunthe. 7Naa thaninɛŋ wulu wunthe woŋ thaŋ daŋande, Sithani kɔŋ kaŋa ŋaye ka yeeli nama woŋ. 8Awa wundɛ kɔŋ fuŋ ba kaa kaŋ thɔkina biya bi ka siyani ba kɔɔyɛ ma sɔkinɔkɔ Masaala na baŋ ba pankande kafay wobunthu woŋ baŋ fooma, ba dɔma baŋ na Kɔki mɛnɛ Makɔki. Sithani kɔŋ bindɛ sisi ka tha banthe fooma ba tɔŋa kuyombo, awa bi kɔŋ bɔyi nɔŋ thɛkɛyaŋ hu ka gbaraŋ ba ka mankɔ maŋ haŋ. 9Bindɛ gbanthande kafay woŋ fooma e bindɛ pɛnkande fooma ka niye nde biya bi ka Masaala beŋ yikiya kɛ mɛnɛ mɛti ba thimo-thimo wundɛ baŋ. Kɛrɛ buu thuhe ŋaye ka ariana e buŋ bindɛ tɔɔnuwa. 10Kɛna yelo Wayi Womandiŋ wo thɔkinɛ nde bindɛ woŋ ka buu buŋ mɛnɛ sɔlifa wotɔɔki woŋ bu thɔyande iŋ mankɔ mamandiŋ maŋ, ka yelo nde maama wobaŋɔy woŋ kɛ mɛnɛ banabi wo bahothi woŋ; awa bi kɔŋ kɛndɛ niyɔ thɔrɔ gbɛɛŋ iŋ piri-piri ba kɔy yo kɔy. 11Kɛna kute yaŋ yensi humandiŋ huhuhɛ napooŋ mɛnɛ wo dɔŋɔy ka huŋ woŋ. Kafay woŋ mɛnɛ ariana woŋ kiti kupɛnkintiyande nama koŋ, awa bindɛ tha nda kuta hɛlɛŋ. 12Kɛna kute yaŋ bitukɛ beŋ, bi dunkuno yiki mɛnɛ bi be dunkuno yiki, bi kooye ka kɔtɔkɔy ka yensi haŋ. Bukuiŋ petho, awa kɛna petho hɛlɛŋ buku wohɛna. Wundɛ na buku wo ka bi iŋ sii baŋ beŋ. Bitukɛ beŋ konsiŋino ŋaye ka ba thanki nde bindɛ niya baŋ fooma, ba gbalo nde ka bukuiŋ beŋ beŋ baŋ. 13Kɛna dunkuŋ mankɔ mamɛɛti maŋ bituke nde ka mɛŋ beŋ. Tuka haŋ mɛnɛ ka Tiyɛ dunkuŋ hɛlɛŋ bitukɛ bi nɔŋ iŋ bindɛ beŋ. Beŋ beŋ fooma konsiŋino ŋaye ka ba thanki nde bindɛ niya baŋ. 14Kɛna yelo Tuka mɛnɛ ka Tiyɛ ka buu bumandiŋ bu nɔŋ mankɔ mamandiŋ maŋ buŋ. Buu bumandiŋ buŋ buŋ buna kooye ba tuka hukaye haŋ. 15Wɔ yo wɔ wo keŋ nama ku tha gbala ka buku wo ka bi iŋ sii baŋ beŋ, wundɛ kɔŋ yɛla ka buu bumandiŋ-mandiŋ bu nɔŋ mankɔ mamandiŋ maŋ buŋ.

will be added

X\