Matɔŋinɔkɔ maŋ 2

1Wundɛ key ka kɔtɔkɔy e dɔma, na “Gbala kuthagba ka maleka wo dethiteke biya bi ka Masaala beŋ ka mɛti ba ka Ɛfɛsɔsi ba dɔma, na “Huseri haŋ huna haŋ haŋ baŋ hu ŋaye ka wundɛ wo bɔhɛ sosɛŋ bisɔŋ-biye beŋ ka yɔnkɔ nama huthome haŋ, wundɛ wo kaande mateete ma ka mutute mumɔɔlini musɔŋ-muye mu yehinuwo maŋaye ka boy muŋ. 2Yaŋ kɔthɛŋ wali ba thanki beŋ niya baŋ; yaŋ kɔthɛŋ yɔlɔkɔ hu yɔlɔkɔy beŋ wukahɛ haŋ iŋ muyuŋ bakendeŋ baŋ. Yaŋ kɔthɛŋ ba dɔma na beŋ sa mɛkɛŋ biya binɛnɔy beŋ ba niyɔ ka mateete makendeŋ, iŋ na gbɛrɛŋɛŋ beŋ bi dɔmɔkɔ beŋ na baseriŋ bithɔɔkɔ bi ka Mariki woŋ bina bindɛ mahɛŋ ma bindɛ ka nɛŋ, awa beŋ kute ba dɔma na bahothiŋ bina bindɛ. 3Yaŋ kɔthɛŋ ba dɔma na bendo ni muyuŋ thɔrɔiŋ baŋ saathɛ ba kiyaŋ, awa beŋ tha thamɔ. 4Kɛrɛ yaŋ kiŋ iŋ bɛyi banthe ma sɔkinɔkɔ bena: beŋ thimota nda yama nɔŋ na nde mayoŋ na. 5Siyuwaŋ na nde beŋ mayoŋ na beŋ tha niye niiye ka maniyɔ ma beŋ niye hakɛ, e beŋ sikina sɔkɔrɔ hakɛŋ ndeŋ baŋ awa e beŋ niya waliŋ ba yenke nde beŋ niya baŋ. Mɛnɛ beŋ tha sikiŋ sɔkɔrɔ hakɛŋ ndeŋ baŋ, yaŋ kɔŋ key kendeŋ ka e yaŋ ka gbɔnina mutute mumɔɔli ndeŋ muŋ ka makooye nama maŋ. 6Kɛrɛ bɛy banthe bɛna ni beŋ ba yaŋ bena gbuŋunu, beŋ athambo maniyɔ ma ka biya bi yeŋ Nikɔleyɔsi na beŋ maŋ nɔŋ na thambo yaŋ mɛŋ na. 7“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi haŋ ka makɔmandeŋ masɔŋ-maye ma ka biya bi ka Masaala beŋ maŋ. “Ka bindɛ bi punkɛ kɔɔ wukahɛ-kahɛ ka lanɛya baŋ beŋ, yaŋ kɔŋ bindɛ dunkune mayoho ba thɔma mutiŋ mu ka kuyeŋ ku ka sii baŋ ku mukɛ ka muthuu mu ka Masaala muŋ. 8“Gbala kuthagba ka maleka wo dethiteke biya bi ka Masaala beŋ ka mɛti ba ka Sumerina ba dɔma, na “Huseri haŋ huna haŋ haŋ baŋ hu ŋaye ka wundɛ wo mathɛrɛŋ maŋ mɛnɛ mapeye maŋ woŋ, wundɛ wo thankɛ tuka woŋ e ndɛ hɛlɛŋ duwa ka niyɔ iŋ sii. 9Yaŋ kɔthɛŋ thɔrɔiŋ bakendeŋ baŋ; yaŋ kɔthɛŋ ba beŋ niyɔ bamɔnɛŋ, kɛrɛ halisa bendo dinhaŋiŋ! Yaŋ kɔthɛŋ bɛyiniŋ banɛnɔy ba beŋ tɛpiya baŋ iŋ bi dɔmɔkɔy beŋ ba bindɛ niyɔ biYusu, kɛrɛ bindɛ ka nɛŋ. Sithani na biyɛ kiki namɛŋ baŋ. 10Baŋ payɔ nambara yo nambara ba bena pɛnki. Poniyaŋ nuŋ kuiha, Wayi Womandiŋ wobɛina kɔŋ thiyi binɔndi ka beŋ ka yeeli ba bena gbɛriŋina. Thɔrɔiŋ ndeŋ baŋ ba kɔŋ niyɔ ba gbɛɛni kɔhi. Kaaŋ ka kɔtɔkɔy ka niya yama lanɛya haŋ nɔŋ na thanki beŋ niya lahiri na, hali wu pɛnkaŋ nthɔŋ bena ba koro, yaŋ kɔŋ bena dunkune nɛmu wo ka sii baŋ woŋ ba kuthunkuŋ kukendeŋ. 11“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi haŋ ka makɔmandeŋ masɔŋ-maye ma ka biya bi ka Masaala beŋ maŋ. “Ka bindɛ bi punkɛ kɔɔ wukahɛ-kahɛ ka lanɛya baŋ beŋ, bindɛ sa niyɔ ntha ka tuka hukaye haŋ. 12“Gbala kuthagba ka maleka wo dethiteke biya bi ka Masaala beŋ ka mɛti ba ka Pɛkamɔŋ ba dɔma, na “Huseri haŋ huna haŋ haŋ baŋ hu ŋaye ka wundɛ wo bɔhɛ silanhi babilɛ ŋawaŋ ŋaye ŋaŋ baŋ. 13Yaŋ kɔthɛŋ ba dɔma na ka niye yi yikiya kɛ kɛna doŋe Sithani ka yensi nama hu ka hugbakine haŋ. Kɛrɛ yi key ka kɔtɔkɔy ka niya yama lanɛya, awa yi tha peyi ba yama niya lanɛya hali ka lɔkɔ ba koro Antipasi wo nde ni maseri mayɔhɔy ba yaŋ woŋ, kɛndɛ ka niye Sithani yikiya kɛ. 14Kɛrɛ yaŋ kiŋ iŋ bɛyiniŋ bayete ma sɔkinɔkɔ bena: biya binɔndi bi kiŋ ka beŋ bi yemɛ mathanani ma ka Belami wo thaninuwɛ Balaki na ba niya na biIsirɛli beŋ niye hakɛ maŋaye ka thɔma muthɔma mu fuŋuna saraka ka dekɛŋ beŋ muŋ, mɛnɛ ba niya ŋabɛini ŋahakuwande. 15Ka gboŋa banthe babɛina, beŋ kiŋ hɛlɛŋ iŋ biya ka mateete makendeŋ bi yemɛ mathanani ma ka biya bi yemɛ Nikɔleyɔsi na beŋ maŋ. 16Sikinaŋ sɔkɔrɔ hakɛŋ bakendeŋ baŋ. Mɛnɛ huŋ kutɛ, yaŋ kɔŋ tete key e yaŋ ka dekiya ma sɔkinɔkɔ biya bibɛina beŋ beŋ baŋ iŋ silanhi ba fuŋ ka hothi niŋ haŋ baŋ. 17“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi haŋ ka makɔmandeŋ masɔŋ-maye ma ka biya bi ka Masaala beŋ maŋ. “Ka bindɛ bi punkɛ kɔɔ wukahɛ-kahɛ ka lanɛya baŋ beŋ, yaŋ kɔŋ bindɛ haŋ ŋatoŋ ŋa ŋaye ka ariana ŋanununɔy ŋaŋ. Yaŋ kɔŋ hɛlɛŋ dunkune womo woma ka bindɛ raka huhuhɛ, ka gbalo keŋ kuŋama ku sa wɔ hɛna punku kɔthɔ yɔkɔŋ wo dunkuno huŋ woŋ. 18“Gbala kuthagba ka maleka wo dethiteke biya bi ka Masaala beŋ ka mɛti ba ka Thaiataira ba dɔma, na “Huseri haŋ huna haŋ haŋ baŋ hu ŋaye ka Hati ka Masaala wo thaaya tha nɔŋ buu bumaye woŋ wo ŋathaki nama ŋa maleke woŋ nɔŋ huyɛ hubirasi hugbɔkɔy. 19Yaŋ kɔthɛŋ wali ba thanki beŋ niya baŋ, thimo ndeŋ haŋ, yɔhɔ ndeŋ niyo lanɛya haŋ, wali ndeŋ baŋ, mɛnɛ muyuŋ ndeŋ baŋ. Yaŋ kɔthɛŋ ba dɔma na beŋ niyeŋ wuyɔhɔy ayaŋ ba mayoŋ nde. 20Kɛrɛ yaŋ kiŋ iŋ bɛy ma sɔkinɔkɔ bena: beŋ mɛkɛŋ hati woyɛrɛmɛ wo dɔma Yɛsɛbɛli wo dɔmɔkɔy woŋ na banabi na wundɛ. Wundɛ kɔŋ thanani e kɔ thɔkina bawaliŋ bikiyaŋ beŋ ba niya ŋabɛini ŋahakuwande mɛnɛ ba thɔma muthɔma mu fuŋuna saraka ka dekɛŋ beŋ muŋ. 21Yaŋ dunkune niŋ malɔkɔ ba sikina sɔkɔrɔ hakɛŋ nama baŋ, kɛrɛ ndɛ ka ba pɛya ŋabɛy ŋaŋ. 22Bɛna, yaŋ kɔŋ niŋ tayi ka hinsi ka ndɛ iŋ bi niyɛ ŋabɛy beŋ iŋ wundɛ niyiye thɔrɔ wumandiŋ. Yaŋ kɔŋ tete ni wuŋ baŋ, yɔkɔŋ bindɛ sikiŋ sɔkɔrɔ bɛyiniŋ banɛnɔy ba ni bindɛ baŋ iŋ wundɛ. 23Yaŋ kɔŋ hɛlɛŋ nɛŋ kɔri bi yemɛ niŋ beŋ, awa makɔmandeŋ ma ka biya bi ka Masaala beŋ maŋ fooma bi kɔŋ kɔthɔ ba dɔma na yama wɔ kɔthɛ masiyini ma ka biyamɛti iŋ thathukuma namɛŋ thaŋ. Yaŋ kɔŋ tɛnkiniyɛ womo woma ba thanki ndɛ niya baŋ. 24“Kɛrɛ binɔndi ka beŋ, bendo biThaiataira beŋ, tha yeŋ mathanani manɛnɔy maŋ maŋ baŋ; beŋ tha thani mu dome biya bihɛna beŋ muŋ, na ‘gbundu basuŋɔi ba ka Sithani baŋ.’ Yaŋ kɔŋ bena tepe ba dɔma na yaŋ sa tutu doni yo doni bahɛna kendeŋ, 25kɛrɛ bohitaŋ wukahɛ-kahɛ ba iŋ beŋ baŋ haaŋ yaŋ nɔŋ saa. 26Ka bindɛ bi punkɛ kɔɔ wukahɛ-kahɛ ka lanɛya baŋ beŋ, e bindɛ kaa ka kɔtɔkɔy ka niya ba thimo yaŋ baŋ haaŋ ka mapeye maŋ, yaŋ kɔŋ bindɛ dunkune mayoho mamanthe ma kute yaŋ ŋaye ka Fandaŋ woŋ maŋ: Yaŋ kɔŋ bindɛ dunkune mayoho ka thinthi ka biya bi be ni Masaala na kubatho beŋ, ba bindɛ kɛriŋiyɛ iŋ kugbɔkɔdi kuhuyɛ, ba bindɛ teetuwa nɔŋ ka wɔ tambi sokoro. 28Yaŋ kɔŋ hɛlɛŋ bindɛ dunkune sosa wo kuputhɔ ku kaŋ woŋ. 29“Yindo iŋ ŋaiha ba yuyɛ, poniyɛ kuiha hu Yina wo ka Masaala woŋ tɛpi ka makɔmandeŋ ma ka biya bi ka Masaala beŋ maŋ.

will be added

X\