Matɔŋinɔkɔ maŋ 19

1Naa daŋande wuŋ kɛndɛ, yaŋ yuye kutɔŋa nɔŋ kutɔŋa ku ka sɛthɛ bamandiŋ ka ariana. Bindɛ tepe ba dɔma, na “Miŋ gbuŋunuwɛŋ Masaala na! Kisi ntuŋ baŋ ŋaye ka Masaala ntuŋ woŋ. Wundɛ na biyɛ yiki mɛnɛ sɛmbɛ. 2Kukɔnsɔŋɔŋ nama koŋ seŋa awa kuŋ athumbu! Wundɛ thonkine wɔ yɛrɛmɛ wo taititoko namo nama wo nde teeti kafay woŋ iŋ ŋabɛini nama ŋahakuwande ŋaŋ. Masaala gbasiŋite niŋ baa ndɛ thanki nde kɔɔruwa bawaliŋ bi ka Masaala beŋ.” 3Kɛna yele hɛlɛŋ sɛthɛ baŋ thampa e bindɛ dɔma, na “Miŋ gbuŋunuwɛŋ Masaala na! Hiti hu fuŋ ka mɛti bamandiŋ batɔɔki baŋ ŋate ka thinthi ba kɔy yo kɔy!” 4Bakalani kɔnthɔ kaye iŋ binaŋ beŋ mɛnɛ maamiŋ bipethɔy bibinaŋ beŋ puutuwɔy e bindɛ niya Masaala wo dɔŋɔy nde ka yensi haŋ woŋ kubatho e bindɛ dɔma, na “Amiina! Miŋ gbuŋunuwɛŋ Masaala na.” 5Kɛna fuŋ kutɔŋa ku ka thampa ka yensi haŋ tha tɛpɛ ba dɔma, na “Bendo bawaliŋ nama beŋ fooma, gbuŋunuwaŋ Masaala na, bendo payɔy niŋ beŋ fooma, bi dunkuno yiki beŋ mɛnɛ bi be dunkuno yiki beŋ.” 6Kɛna yuye yaŋ kutɔŋa nɔŋ ka sɛthɛ bamandiŋ gbonkoy, nɔŋ kutɔŋa ku ka kugbarasi, nɔŋ ka nthankɛŋ hɔɔri. Yaŋ yuye bi si dɔŋ, na “Miŋ gbuŋunuwɛŋ Masaala na, baa Mariki wo Masaala ntuŋ wo iŋ sɛmbɛ ka thinthi woŋ nthɔŋ nda fooma, kɔŋ kɛrɛŋ. 7Miŋ yehitɔkɔiŋ wumandiŋ-mandiŋ; miŋ dunkuneŋ niŋ yiki, baa lɔkɔ baŋ tɛŋ ba ka kuyɛntande ku ka Taka Wohatiyɛ woŋ koŋ baŋ, awa wo ba yento woŋ thanki kɔsinɔkɔ yɛthɛ bakɛnama ba kuyɛntande koŋ. 8Wo ba yento woŋ thanki nda dunkuno thika bahuhɛ bamaleke-maleke ba gbɛkitɔkɔ.” Thika bahuhɛ baŋ baŋ kooye mathɔyande ba bɛyiniŋ bayɔhɔy ba ni nde biya bi ka Masaala beŋ baŋ. 9Kɛna dome yama maleka woŋ, na “Gbala haŋ haŋ baŋ; mayehitɔkɔ ma kɔŋ niyɔ ka bi thiyo ba penkitiye ka thɔma hu ka kuyɛntande ku ka Taka Wohatiyɛ woŋ koŋ.” Awa maleka woŋ ndinti ka thinthi ka bɛina e dɔma, na “Thampɛŋ thaseŋa tha ka Masaala thaŋ thɛna thaŋ thaŋ baŋ.” 10Kɛna ŋɔti yaŋ ka ŋathaki ŋakɛnama ŋaŋ ba niŋ niya kubatho. Kɛrɛ ndɛ tepe yama ba dɔma, na “Ba wuŋ ni! Wɔ na yaŋ wo ni wali ka nanthe iŋ yi, mɛnɛ ka nanthe iŋ mbɛnda beŋ bi bɔhɛ wukahɛ-kahɛ nɔndi ba tɔŋɔŋ Yisɔs baŋ. Masaala na yi ba niya kubatho.” Nɔndi ba tɔŋɔŋ Yisɔs baŋ bɛna dunkune nde banabiŋ beŋ sɛmbɛ. 11Kɛna kute yaŋ na pɛthɔy ka ariana, awa soo wohuhɛ napooŋ na kute yaŋ kɛndɛ. Wo nde niŋ tutɔ woŋ na dɔma Wɔ Woyɔhɔy Niyo Lanɛya mɛnɛ Wɔ Seŋa woŋ; ka mathumbɛ kɛna konsiŋine ndɛ e ndɛ kɔ dekiya ŋayombo ŋaŋ. 12Thaaya nama thaŋ nde nɔŋ kulampitha ku buu, awa ndɛ tutekeŋ nde nɛmuiŋ bibɔyɛ ka yaha nama haŋ. Wundɛ kiŋ nde iŋ keŋ ku gbalo ka kɔtɔ nama koŋ, kɛrɛ wɔ ka wo kɔthɛ kuŋ yɔkɔŋ ndɛ na kɔthɛ kuŋ. 13Kuhɔli ku thooye nde wundɛ koŋ muluno nde ka wasi, awa keŋ nama koŋ kuna, na “Thampa tha ka Masaala thaŋ.” 14Bayomboiŋ bi ka ariana beŋ yeme niŋ ka kaa bi tutɔy sooni bihuhɛ napooŋ e bindɛ gbɛkitɔkɔ mupithi mumɛthɛ muhuhɛ napooŋ. 15Silanhi babilɛ-bilɛ bɛna fuŋɛ ka hothi nama haŋ, awa bɛna ndɛ punke biya bi ka siyani ba niŋ sɔkinɔkɔ baŋ beŋ. Wundɛ kɔŋ bindɛ kɛriŋiyɛ iŋ kugbɔkɔdi kuhuyɛ, awa ndɛ kɔŋ bɔdɔbɔdɔŋ mutiŋ muŋ ba yehinuwa mampa ka kuma bamandiŋ ba mathoŋ ma ka Masaala maŋ toŋino baŋ, Masaala wo iŋ sɛmbɛ ka thinthi woŋ nthɔŋ nda fooma. 16Ka kuhɔli nama koŋ mɛnɛ ka yɛlɛ nama haŋ, keŋ gbalo nde kɛndɛ. Keŋ koŋ kuna koŋ koŋ baŋ, na “Gbaku wo ka gbakuiŋ woŋ mɛnɛ Mariki wo ka marikiŋ woŋ.” 17Kɛna kute yaŋ maleka kooye ka kaŋ woŋ. Wundɛ gbonkoy iŋ thampa tha ŋatɛ ka bɛtiŋ fooma bi nɔŋ yibani bi keŋ ka kuthahinɛ koŋ ka thinthi beŋ e dɔma, na “Saaŋ thuŋande ka tha banthe ba thɔma humandiŋ hu thiyi Masaala haŋ! 18Saaŋ e beŋ si thɔma ŋakɔtɔ ŋa ka gbakuiŋ beŋ ŋaŋ, bayahɛŋ mɛnɛ kurugbani namɛŋ beŋ, ŋakɔtɔ ŋa ka sooni mɛnɛ bi bindɛ tutɔ beŋ, ŋakɔtɔ ŋa ka biya fooma, mbaayiŋ mɛnɛ kɔɔrɔiŋ, biya bi dunkuno yiki mɛnɛ bi be dunkuno yiki beŋ.” 19Kɛna kute yaŋ maama wobaŋɔy woŋ mɛnɛ gbakuiŋ bi kafay woŋ beŋ mɛnɛ bayomboiŋ namɛŋ beŋ thuŋande ka tha banthe ba dekiya kuyombo ma sɔkinɔkɔ wo tutɔy ka soo woŋ mɛnɛ ma sɔkinɔkɔ bayomboiŋ nama beŋ. 20Kɛrɛ maama wobaŋɔy woŋ diŋo iŋ kuyombo ka nanthe iŋ banabi wo bahothi wo bare nde kɔ niya bɛyiniŋ bathakaba ka thaaya tha ka maama wobaŋɔy woŋ. Maŋaye ka bɛyiniŋ bathakaba baŋ baŋ thokine na nde wundɛ bi iŋ thɛnkɛy wo ka maama wobaŋɔy woŋ mɛnɛ bi niyɛ kubatho deka wo ka maama wobaŋɔy woŋ beŋ. Maama wobaŋɔy woŋ mɛnɛ banabi wo bahothi woŋ, bindɛ biye yelo bipethɔy ka buu bu tɔɔki buŋ iŋ sɔlifa bu thɔyande iŋ mankɔ mamandiŋ maŋ. 21Bayomboiŋ namɛŋ beŋ kooruwo ka silanhi ba fuŋɛ ka hothi hu ka wo tutɔy nde soo woŋ haŋ; awa bɛtiŋ beŋ fooma thɔŋ nde ŋabeli namɛŋ ŋaŋ ti punke bindɛ.

will be added

X\