Matɔŋinɔkɔ maŋ 16

1Kɛna yuye yaŋ thampa tha ŋatɛ ka thinthi tha be fuŋ ŋaye ka banka ba Masaala niyo kubatho kɛ baŋ. Thampa thaŋ dome ka malekɛŋ bibisɔŋ-biye beŋ, na “Kaaŋ e beŋ ka koŋa thasomba thasɔŋ-thaye tha thiŋo iŋ mathoŋ ma ka ka Masaala maŋ kafay woŋ.” 2Maleka womayoŋ woŋ key e ka koŋa somba nama haŋ ka fai woŋ ka. Kɛna ŋuuruwo bi iŋ thɛnkɛy wo ka maama wobaŋɔy woŋ beŋ, bi niyɛ deka nama woŋ kubatho beŋ, munki munɛnɔy muthoonɛ-thoonɛ. 3Maleka wobiye woŋ koŋe somba nama haŋ ka mankɔ mamɛɛti maŋ. Mandi maŋ pothe nɔŋ wasi ba ka wɔ tukɛ, awa ntha yo ntha ki iŋ sii ka mankɔ mamɛɛti maŋ tuku. 4Kɛna koŋe maleka wotaati woŋ somba nama haŋ ka mankɔiŋ maŋ mɛnɛ ka nthondiŋ ki ka mandiŋ maŋ kiŋ, awa kɛna sikiyɔkɔy mandi maŋ wasi. 5Kɛna yuye yaŋ maleka wo iŋ gbɛthɛŋ ba ka mandiŋ maŋ woŋ baŋ si dɔŋ, na “Yindo womɛthɛ woŋ, e yi niyɔ hɛ, e yi niyɔ nde, yi athumbu ka ŋakɔnsɔŋɔŋ ŋa yi kɔnsɔŋɔŋ ŋaŋ! 6Biyamɛti thanki tɔŋa kɛkɛŋ wasi ba ka biya bi ka Masaala beŋ mɛnɛ ba ka banabiŋ beŋ baŋ, awa nɛna yi thanki bindɛ dunkune wasi ba bɛŋ thiiye. Mani namɛŋ mɛna. 7Awa yaŋ yuye ka saraka baŋ fuŋuno ka Masaala kɛ ka si gbonkoy e kɛndɛ dɔma, na “Yaathi, yindo Mariki wo Masaala wo ka thinthi woŋ nthɔŋ nda fooma, kukɔnsɔŋɔŋ nda koŋ seŋa e kuŋ hɛlɛŋ niyɔ kuthumbɛ!” 8Kɛna koŋe maleka wobinaŋ woŋ somba nama haŋ ka kaŋ woŋ, awa kaŋ woŋ mekino ba tɔɔnuwa biyamɛti iŋ wulu-wulu nama ba nɔŋ buu baŋ. 9Biyamɛti toonuwo iŋ wulu-wulu ba nɔŋ buu baŋ baŋ, e bindɛ yaka keŋ ku ka Masaala wo iŋ sɛmbɛ ka thinthi ka kasarɛŋ baŋ baŋ woŋ. Kɛrɛ bindɛ tha sikiŋ sɔkɔrɔ hakɛŋ namɛŋ baŋ e bindɛ niya Masaala na yiki. 10Maleka wosɔhi woŋ koŋe somba nama haŋ ka yensi hu ka maama wobaŋɔy woŋ haŋ. Kɛna lɔŋande huntuma humandiŋ-mandiŋ ka hugbakine hu ka maama wobaŋɔy woŋ haŋ, awa e biya ŋaaka thahiliŋ namɛŋ thaŋ baa wuthoonɛ wuŋ. 11Kɛna yaki bindɛ Masaala wo ka ariana woŋ baa wuthoonɛ wuŋ mɛnɛ muŋurɛ muŋ, kɛrɛ bindɛ tha sikiŋ sɔkɔrɔ ŋaye ka gboŋɛŋ namɛŋ banɛnɔy baŋ. 12Kɛna koŋe maleka wosɔŋ-wunthe woŋ somba nama haŋ ka mankɔ mamandiŋ ma dɔma Yufiretisi maŋ. Mandi maŋ duthu, ba dɛŋa gboŋa ba gbakuiŋ bi see beŋ ŋaye ka kaŋ woŋ fuŋe ka. 13Kɛna kute yaŋ mbayiŋ bitaati bi ŋaye ka Sithani ka, bi thɔyande iŋ ŋabɔnkɔŋ, bi si fuŋ ka hothi hu ka yaarɔ woŋ haŋ, ka hothi hu ka maama wobaŋɔy woŋ haŋ, mɛnɛ ka hothi hu ka banabi wo bahothi woŋ haŋ. 14Bindɛ bina mbayiŋ bi ni bɛyiniŋ bathakaba beŋ bi ŋaye ka Sithani ka beŋ. Mbayiŋ bitaati beŋ beŋ baŋ key ka gbakuiŋ bi kafay woŋ beŋ, ba bindɛ ka thuŋunande ka tha banthe ba kuyombo koŋ ka lɔkɔ bamandiŋ ba ka Masaala wo ka thinthi woŋ nthɔŋ nda fooma baŋ. 15Mariki woŋ tepe, na “Pona kuiha! Yaŋ kɔŋ see nɔŋ batuwaŋ! Mayehitɔkɔ ma kɔŋ niyɔ ka wɔ wo yaŋ pɛnki wothɔhɔy, awa e ndɛ thuruntiyeke muthɔɔ nama muŋ, wuna sa ndɛ kaande bunthu e ndɛ kuta kuyaahu ka sɛthɛ!” 16Kɛna sisi mbayiŋ beŋ gbakuiŋ beŋ ka tha banthe ka tha ka dɔma ka huyuŋ hu ka biYusu beŋ haŋ na Amakɛdɔŋ. 17Maleka wosɔŋ-biye woŋ koŋe somba nama haŋ ka kufeŋaŋ koŋ. Kɛna fuŋ thampa thatɔɔkɛ ŋaye ka yensi haŋ ka banka ba Masaala niyo kubatho baŋ. Thampa thaŋ tepe, na “Wuŋ thiŋe!” 18Kɛna fuŋ ŋawali-waliŋ, nthankɛŋ kɔ hɔɔruwa, awa e kuyɛkɛŋ koŋ thɛnina wumandiŋ. Kabi naa yehinuwo nde kafay woŋ kuyɛkɛŋ koŋ thenineta hɛ nɛŋ; awa thɛnina haŋ haŋ baŋ huna yamɛ nɛnɔ ba thɛnina yo thɛnina! 19Mɛti bamandiŋ baŋ hakande dɔŋɔ kataati, awa e mɛtiŋ babukuyuwɛ ba ka ŋakuyɛkɛŋ fooma teetuwɔ. Kɛna siyi Masaala ba mɛti bamandiŋ ba dɔma Babilɔŋ baŋ e ndɛ niya ba bɛŋ thiiye mampa ma ka kɔɔpu nama haŋ maŋ, mampa ma ka mathoŋ nama maŋ. 20Thathiki thaŋ fooma piriŋe; ŋasɛri ŋaŋ fooma piriŋe. 21Thooni babukuyuwɛ-bukuyuwɛ badimbɔy-dimbɔy nɔŋ paka bɛki wunthe ŋɔte biya ŋaye ka kuthahinɛ koŋ. Biya beŋ yaki Masaala na saathɛ ba kasara ba ka thoo baŋ, baa kasara bathoonɛ-thoonɛ bɛna.

will be added

X\