Matɔŋinɔkɔ maŋ 14

1Yaŋ dethe awa kɛna kute yaŋ Taka Wohatiyɛ kooye ka kusɛri ku dɔma koŋ na Saiyɔŋ; wundɛ kiŋ nde iŋ biyɛthɛŋ wuluiŋ kɔhi iŋ biye dɔŋɔ kɔhi iŋ kaye bi iŋ keŋ ku ka Taka Wohatiyɛ woŋ mɛnɛ ku ka Fandama koŋ e ŋɛŋ gbalo ka thayethi namɛŋ thaŋ ka thinthi ka bunihiŋ buŋ. 2Kɛna yuye yaŋ thampa ŋaye ka ariana tha thɔyande nɔŋ kugbarasi, nɔŋ nthankɛŋ kina hɔɔri. Kutɔŋa ku ka thampa thaŋ koŋ athɔyande hɛlɛŋ nɔŋ ka bayakaliŋ haŋ ŋatuteŋ namɛŋ. 3Kɛna ŋaye biyɛthɛŋ wuluiŋ kɔhi iŋ biye dɔŋɔ kɔhi iŋ kaye, e bindɛ ka kɔɔ ka kɔtɔkɔy ka yensi haŋ, ka maamiŋ bibinaŋ bipethɔy beŋ, mɛnɛ ka bakalani beŋ; e bindɛ sɔŋa kuiŋa kuŋama ku sa wɔ yo wɔ punku kɔthɔ, yɔkɔŋ biya beŋ beŋ baŋ bi bakiŋo beŋ ŋaye kafay woŋ, bindɛ bina kuŋ punku sɔŋa. 4Biyɛthɛŋ beŋ beŋ baŋ bindɛ bina punkɛ kɔsina yɛthɛ namɛŋ baŋ wumɛthɛ ba thana tikitande mutayi iŋ yɛrɛmɛ yo yɛrɛmɛ; awa bindɛ kɔita ba yɛrɛmɛ hali. Bi kɔŋ yemande Taka Wohatiyɛ woŋ kamo kama ka ndɛ kaaye. Beŋ beŋ bakiŋo nde maŋaye ka mateete ma ka biyamɛti, awa bindɛ bina see niyɔ mutiŋ mumayoŋ mu dunkuno ka Masaala mɛnɛ ka Taka Wohatiyɛ woŋ. 5Bindɛ tha kɛrɛŋ hothi, awa bindɛ tha kututa kɛrɛ. 6Kɛna kute yaŋ maleka si keŋ ka kufeŋaŋ koŋ iŋ Huseri Huyɔhɔy hu kɔy yo kɔy haŋ ba huŋ koyiŋa ka biya bi dɔŋɔy kafay woŋ beŋ, ka biya bi ka siyani fooma, bi ka bɔnsɔni fooma, bi ka thayuni fooma, mɛnɛ bi ka ŋakuyɛkɛŋ fooma. 7Kɛna gbonkoy wundɛ iŋ thampa tha ŋatɛ ka thinthi e dɔma, na “Payɔŋ Masaala na e beŋ niŋ dunkune yiki; baa lɔkɔ baŋ tɛŋ ba ndɛ konsiŋine biyamɛti baŋ. Niyaŋ niŋ kubatho, ndɛ wo yehinuwɛ ka ariana woŋ, kafay woŋ, mankɔ mamɛɛti maŋ, mɛnɛ nthondiŋ ki ka mandiŋ maŋ kiŋ.” 8Maleka wohɛna wo yemɛ maleka wo yenke tete fuŋa woŋ dome, na “Bɛŋ ŋɔti! Mɛti bamandiŋ ba ka Babilɔŋ baŋ ŋɔti! Bɛŋ ni ba biya thiiye mampa nama makahɛ-kahɛ ma ni ba biya niyɔ kufiyo ba niya kubɛy.” 9Maleka wohɛna wotaati woŋ yeme wobiye woŋ e ndɛ dɔma ka thampa tha ŋatɛ ka thinthi, na “Wɔ yo wɔ wo ni kubatho maama wobaŋɔy woŋ mɛnɛ deka nama woŋ, e ndɛ niyɔ iŋ thɛnkɛy nama woŋ ka yethi nama haŋ ka bunihiŋ buŋ ka thinthi, maa ka yɔnkɔ nama haŋ, 10wundɛ kɔŋ thiiye mampa ma ka Masaala maŋ, mampa nama ma ka mathoŋ, ma ŋutu ndɛ ka kɔɔpu nama haŋ ma tha tikitinando iŋ mandi hali. Awa bi niyɛ wuŋ beŋ fooma bi kɔŋ yɛla ka buu mɛnɛ ka sɔlifa wotɔɔki ba niyɔ muthoonɛ ka kɔtɔkɔy ka malekɛŋ bi ka Masaala beŋ mɛnɛ ka kɔtɔkɔy ka Taka Wohatiyɛ woŋ. 11Hiti hu ka buu bu bindɛ tɔɔni buŋ hu kɔŋ ŋati ka thinthi ba kɔy yo kɔy. Kuhemuwe sa niyɔ ka gbɛɛŋ woŋ maa ka piri-piri woŋ ba bi ni kubatho maama wobaŋɔy woŋ mɛnɛ deka nama woŋ, mɛnɛ wɔ yo wɔ wo kutɛ thɛnkɛy ba ka keŋ nama koŋ baŋ.” 12Wuŋ baŋ thɔnthɔŋɔŋ biya bi ka Masaala beŋ ba niya muyuŋ, bi mɛyɛ yamariŋ ba ka Masaala baŋ, awa e bindɛ kaa ka kɔtɔkɔy ka niya Yisɔs na lanɛya haŋ. 13Kɛna yuye yaŋ thampa ŋaye ka ariana tha tɛpɛ ba dɔma, na “Gbala wuŋ baŋ: Mayehitɔkɔ ma kɔŋ niyɔ ka bi tuke ka bɔhande namɛŋ haŋ iŋ Mariki woŋ there nda hɛ haaŋ ka wuŋ key.” Yina wo ka Masaala woŋ mɛyi, na “Nɛna huŋ yaathi! Bi kɔŋ hɛmi maŋaye ka wali namɛŋ bakahɛ baŋ, baa bi kɔŋ kutu kuthunkuŋ ku ka wali namɛŋ baŋ koŋ.” 14Yaŋ dethe, awa kɛna kute yaŋ wuruma huhuhɛ napooŋ, awa wo dɔŋɔy ka wuruma haŋ woŋ athɔyande iŋ hati ka wɔ e tutɔkɔ nɛmu woboy ka yaha nama e bɔha wɔrɔthɔ wobilɛ ka yɔnkɔ nama. 15Kɛna fuŋ maleka wobinaŋ ka banka ba Masaala niyo kubatho baŋ e berina iŋ thampa tha ŋatɛ ka thinthi e dɔma ka wo dɔŋɔy nde ka wuruma haŋ woŋ, na “Ŋone wɔrɔthɔ nda woŋ, baa lɔkɔ baŋ tɛŋ; kafay woŋ tɛŋ lɔkɔ ba ŋono.” 16Kɛna yili wo dɔŋɔy ka wuruma haŋ woŋ wɔrɔthɔ nama woŋ, awa kafay woŋ ŋono fooma. 17Kɛna kute yaŋ maleka wosɔhi si fuŋ ka banka ba Masaala niyo kubatho kɛ baŋ ka ariana, awa wundɛ kiŋ nde hɛlɛŋ iŋ wɔrɔthɔ wobilɛ. 18Kɛna fuŋ maleka wosɔŋ-wunthe ka saraka baŋ fuŋuno ka Masaala kɛ, wo iŋ gbɛthɛŋ ba ka buu buŋ baŋ. Wundɛ gbonkoy iŋ thampa tha ŋatɛ ka thinthi ka maleka wo iŋ wɔrɔthɔ wobilɛ woŋ e dɔma, na “Thonkiyande wɔrɔthɔ nda woŋ mutiŋ mu mampa maŋ yehinuwo muŋ ŋaye ka pɔtha muŋ. Thonkande muŋ ka muŋ kɛ ka dumgbu ba ka muthuuni muŋ baŋ kafay woŋ, baa muŋ pothe!” 19Huna yile maleka woŋ wɔrɔthɔ nama woŋ kafay woŋ, e thonkande mutiŋ muŋ ŋaye ka ŋayeŋ ŋaŋ, e muŋ yɛla ka kuma bamandiŋ ba yehinuwo ba muŋ pothe baŋ ŋaye ka bɔdibɔdina muŋ, ba mathoŋ ma ka Masaala maŋ toŋino baŋ. 20Bɔdibɔdina haŋ ka kuma bamandiŋ baŋ niye nde hɛŋ ka mɛti bamandiŋ baŋ, awa kɛna fuŋ wasi ka mutiŋ muŋ potho kɛ e bɛŋ bula nɔŋ mankɔ bɛrɛ ba ŋaragba kɛmɛ kaye ka thɔɔkuwa, awa bɛrɛ ba bɔha hanthe ka suŋɔ.

will be added

X\