Matɔŋinɔkɔ maŋ 11

1Kɛna dunkuno yaŋ kuyeŋ ku thɔyande iŋ kuyeŋ kuthubute, e yaŋ domo, na “Kaa e yi ka thubuta banka ba Masaala niyo kubatho baŋ mɛnɛ bɛsɛ ba wundɛ fuŋuniyo saraka baŋ, awa e yi kɔnda biya bi ni kubatho kɛndɛ beŋ. 2Kɛrɛ ba thubutu gbada hu ka banka ba Masaala niyo kubatho baŋ haŋ, baa huŋ dunkuno ka biya bi be ni Masaala na kubatho beŋ, bi kɔŋ nɔŋ gbɛsɛŋ mɛti ba ka Masaala baŋ ba sɛnkɛni kɔnthɔ-kanaŋ iŋ biye. 3Yaŋ kɔŋ nɔŋ ŋindi baseriŋ niŋ biye bi thɔɔyɛ yaba babɛkiŋ, awa bi kɔŋ nɔŋ ni hunabi ba hura wulu wunthe e kɛmɛ kaye iŋ kɔnthɔ kasɔŋ-hanthe.” 4Baseriŋ bibiye beŋ bindɛ bina ŋayeŋ ŋaye ŋaɔlifisi ŋaŋ mɛnɛ mumɔɔli muye mu kɔɔyɛ ka kɔtɔkɔy ka Mariki wo kafay woŋ. 5Awa mɛnɛ wɔ kɔŋ yɔli ba bindɛ niya muthoonɛ, buu bu kɔŋ fuŋ ka thahothi namɛŋ thaŋ e buŋ teetuwa hadeni namɛŋ beŋ; awa ka gboŋa baŋ baŋ wɔ yo wɔ wo yɔli ba bindɛ niya muthoonɛ kɔŋ kɔra. 6Biya beŋ beŋ baŋ bi kiŋ iŋ sɛmbɛ ba lɔŋa kuthahinɛ koŋ, koyoŋ be tha niyɔ ka lɔkɔ ba bindɛ ni hunabi ba Masaala. Bi kiŋ hɛlɛŋ iŋ sɛmbɛ ka thinthi ka mandiŋ maŋ, ba mɛŋ sikina wasi; bi kiŋ hɛlɛŋ iŋ sɛmbɛ ba sisa kasara yo kasara siiya ti lɔkɔiŋ ba thimo bindɛ. 7Naa bindɛ thanki koyiŋa huseri namɛŋ haŋ, maama wobaŋɔy wo fuŋ ka tha kuyɛkɛŋ koŋ mankande ka kɔŋ dekeyi ma sɔkinɔkɔ bindɛ. Wundɛ kɔŋ bindɛ punku ka dekiya haŋ e bindɛ kɔɔruwa. 8Ŋabeli namɛŋ ŋaŋ ŋa kɔŋ ŋɔɔkɔ ka gboŋa bathanthɛ ba ka mɛti bamandiŋ-mandiŋ baŋ, ka yanto nde Mariki namɛŋ woŋ ba tuka kɛ. Ka thayiŋ, keŋ ku ka mɛti babɛina kuna dɔma ka Sɔdɔmi, maa ka Iyipiti. 9Biya bi ka bɔnsɔni fooma, siyani, thayuni, mɛnɛ ŋakuyɛkɛŋ bi kɔŋ dethi ŋabeli namɛŋ ŋaŋ ba gbɛɛni bitaati iŋ ka teete, awa bindɛ sa mɛkɛŋ ba bindɛ mankuwo. 10Biya bi kafay woŋ beŋ bi kɔŋ yehitɔkɔ ba tuka hu ka biya bibiye beŋ beŋ haŋ. Bi kɔŋ ni yakaliŋ ba huŋ e bindɛ tɔŋitiyande munkii, baa banabiŋ biye beŋ beŋ baŋ bina yamɛ sisa nambara ka biyamɛti. 11Naa daŋande gbɛɛni bitaati beŋ iŋ ka teete, hɛma hu ka sii baŋ haŋ ŋaye ka Masaala ka e huŋ bindɛ thɔɔ. Bindɛ ŋaye ka kɔɔ; awa bi kutɛ bindɛ beŋ fooma wuŋ niyɔy bindɛ gbɛki wumandiŋ. 12Kɛna yuye banabiŋ bibiye beŋ thampa tha ŋatɛ ka thinthi ka ariana tha si dɔŋ, na “Saaŋ ka thinthi dondo!” Naa hadeni namɛŋ beŋ bindɛ dethi, bindɛ ŋate ka thinthi ka ariana ka wuruma. 13Ka wuthurɔy wubɛina kuyɛkɛŋ koŋ thɛnɛŋ wumandiŋ-mandiŋ; e kufɛŋ kukɔhi ku ka mɛti babɛina teetuwɔ, awa biya wuluiŋ bisɔŋ-biye bina koro. Biya bi pɛyɛ beŋ thooyo gbɛki wumandiŋ e bindɛ gbuŋunuwa bukuya hu ka Masaala wo ka ariana woŋ haŋ. 14Nkinikiniŋ kikiye kiŋ daŋande, kɛrɛ kitaati kiŋ ki kɔŋ tete see ka wuthurɔy wuŋ baŋ! 15Maleka wosɔŋ-biye woŋ hoŋe kuthuthu nama koŋ, awa kɛna fuŋ thampɛŋ tha ŋatɛ ka thinthi ka ariana tha tɛpɛ ba dɔma, na “Hugbakine hu kafay woŋ haŋ see nda niyɔ hugbakine hu ka Mariki ntuŋ woŋ mɛnɛ Banikisi wo ni nde wundɛ lahiri woŋ, awa ndɛ kɔŋ kɛrɛŋ ba kɔy yo kɔy!” 16Kɛna puutuwɔy bakalani bikɔnthɔ-kaye iŋ binaŋ bi doŋe Masaala na ka kɔtɔkɔy beŋ e bindɛ niŋ niya kubatho, 17e bindɛ dɔma, na “Mariki wo Masaala wo biyɛ sɛmbɛŋ fooma woŋ, Masaala wo hɛ woŋ iŋ wo nde wuthɔɔkitɛ woŋ! Miŋ thiyi yina maamo ba wuŋ niyɔ na yi sekithe sɛmbɛ nda bamandiŋ baŋ awa yi key kaŋ kɛriŋa! 18Biya bi be yina ni kubatho beŋ thɔɔyɛ ka mathoŋ, baa lɔkɔ ba yi thooye ka mathoŋ baŋ tɛŋ, lɔkɔ ba bitukɛ beŋ konsiŋino baŋ. Lɔkɔ baŋ tɛŋ ba yi thunkune bawaliŋ nda beŋ bi banabiŋ beŋ, mɛnɛ biya bikɛnda beŋ fooma, bi yina ni kubatho beŋ, biya bi dunkuno yiki beŋ mɛnɛ bi be dunkuno yiki beŋ. Lɔkɔ baŋ tɛŋ ba ba teetuwe biya bi teetuwɛ kafay woŋ beŋ!” 19Banka ba ka Masaala baŋ petho nde ka ariana, awa kuma ba ka mayukunande maŋ baŋ iŋ Masaala kuto nde kɛndɛ. Awa kɛna fuŋ ŋawali-waliŋ. Kuthahinɛ koŋ kɔ kinkira, nthankɛŋ kɔ hɔɔruwa, kuyɛkɛŋ koŋ kɔ thɛnina, e thooni babukuyuwɛ kɔŋ ŋɔta.

will be added

X\