Matɔŋinɔkɔ maŋ 10

1Kɛna kute yaŋ maleka wohɛna womandiŋ si thuhu ka pothi kafay woŋ ŋaye ka ariana. Maleka wobɛina wo gbekito wuruma e hiyo harama niŋ pɛnkande ka yaha; yethi nama haŋ niyɔ nɔŋ kaŋ woŋ, awa ŋathaki nama ŋaŋ ŋabukuyuwɛ nɔŋ ŋathulu ŋa ka buu. 2Wundɛ boheŋ nde kuthagba kuyete ku iŋ magbali ku pɛmpiŋinɔy ka yɔnkɔ. Wundɛ thiye nde kuthaki nama kuthome koŋ ka mankɔ mamɛɛti ka e kupɔkɔdɔ koŋ niyɔ ka thithɛ ka. 3Awa kɛna thiyi ndɛ iŋ thampa tha ŋatɛ ka thinthi tha nɔŋ ka yaadi kunkuru. Naa thiyi wundɛ, nthankɛŋ kisɔŋ-kiye kiŋ kina mɛyɛ kaŋ kunkura. 4Naa thanki nthɔŋ kiŋ gbonkiya nafeu, yaŋ bathɔi ba gbala. Kɛrɛ yaŋ yuye thampa tha be fuŋ ka ariana tha tɛpɛ ba dɔma, na “Kɔsina ka gbundu ba thanki nthankɛŋ kisɔŋ-kiye kiŋ gbonkiya baŋ; ba bɛŋ gbali!” 5Awa maleka wo kute yaŋ kooye ka mankɔ maŋ woŋ mɛnɛ ka thithɛ ka yentheŋeŋ yɔnkɔ nama huthome haŋ ka ariana 6e wundɛ gbiŋa ka keŋ ku ka Masaala wo kɔy yo kɔy woŋ, wo yehinuwɛ ka ariana woŋ, kafay woŋ, mankɔiŋ maŋ, mɛnɛ ntha yo ntha ki ka muŋ. Maleka woŋ dome, na “Wuŋ sa nda nambi! 7Kɛrɛ ti nthɔŋ maleka wosɔŋ-biye woŋ hɔŋ kuthuthu nama koŋ, tɛna Masaala ni bɛyiniŋ ba ka madɛɛnki nama magbundu maŋ, nɔŋ na tepe nde wundɛ na ka bawaliŋ nama beŋ, bi banabiŋ beŋ.” 8Awa thampa tha yuye yaŋ tha si gbonkoy thaŋ ŋaye ka ariana gbonkitiyande yama hɛlɛŋ e thɛŋ yama tepe, na “Kaa e yi ka bɔha kuthagba ku iŋ magbali ku pɛmpiŋinɔy koŋ ka yɔnkɔ hu ka maleka wo kɔɔyɛ ka mankɔ maŋ woŋ iŋ ka thithɛ ka.” 9Huna kaaye yaŋ ka maleka woŋ e yaŋ niŋ ka thɔnthiŋina ba ndɛ yama dunkune kuthagba kuyete koŋ. Kɛna dome ndɛ yama, na “Sɛkitha kuŋ e yi kuŋ thɔma; ku kɔŋ thimɔ ka hothi nda haŋ nɔŋ tɔŋɔ, kɛrɛ ku kɔŋ niyɔ nagbayiŋ ka kotho nda haŋ.” 10Yaŋ bohe kuthagba kuyete koŋ ka yɔnkɔ nama haŋ e yaŋ kuŋ thɔma, awa kuŋ niyɔy kuthimɔy ka hothi niŋ nɔŋ tɔŋɔ. Kɛrɛ naa ŋune nthɔŋ yaŋ kuŋ, kuŋ niyɔy nagbayiŋ ka kotho niŋ haŋ. 11Kɛna domo yaŋ, na “Yɔkɔŋ yi be ni hunabi hɛlɛŋ ba biya bi ka siyani babɔyɛ, ŋakuyɛkɛŋ ŋabɔyɛ, mɛnɛ thayuni thabɔyɛ, mɛnɛ ba gbakuiŋ namɛŋ beŋ.”

will be added

X\