Matɔŋinɔkɔ maŋ 1

1Buku woŋ baŋ na ba matɔŋinɔkɔ ma ka bɛyiniŋ ba see ka niyɔ ka wuthurɔy wuŋ baŋ ma dunkune nde Masaala Yisɔs Kraist na e ndɛ mɛŋ tɔŋina ka bawaliŋ nama beŋ. Awa wundɛ ni ba bɛyiniŋ baŋ baŋ kothiyo maŋaye ka ŋinda maleka nama woŋ ka Yɔni bawali nama woŋ. 2Wundɛ Yɔni wobɛina na gbalɛ kuna ku ka bɛyiniŋ fooma ba thanki ndɛ kutiyɔkɔ baŋ. Wundɛ gbale thampa tha ka Masaala tha niyiyɛ Yisɔs Kraist maseri thaŋ. 3Wɔ wo ni buku woŋ baŋ karaŋ kɔŋ yehitɔkɔ, awa biya bi kɔŋ yehitɔkɔ bi poniyɛ kuiha e bindɛ kɔsina ka thathukuma namɛŋ thaŋ thampɛŋ tha ka hunabi tha gbalo ka buku woŋ baŋ thaŋ, baa malɔkɔ maŋ thuriye ma bɛyiniŋ baŋ baŋ niiye fooma. 4Yaŋ Yɔni yama gbalati bena, bendo biya bi ka Masaala bi kɔmande ka mɛtiŋ babasɔŋ-baye ba ka kuyɛkɛŋ ku dɔma koŋ na Esiya. Haliko beŋ kuta makutiyɛ mɛnɛ mathɛbɛ ma ŋaye ka Masaala wo hɛ woŋ, wo nde woŋ, wo nɔŋ hɛlɛŋ niyɔ woŋ, mɛnɛ hɛlɛŋ nɛŋ ma ŋaye ka yinɛŋ bisɔŋ-biye bi kɔɔyɛ ka kɔtɔkɔy ka yensi nama haŋ beŋ, 5mɛnɛ ŋaye ka Yisɔs Kraist, wo maseri ma tɛŋɛ ba niyo lanɛya maŋ, Hati nama womayoŋ wo ŋayino ka tuka haŋ woŋ, wo hɛlɛŋ niyɔ bakɛrɛŋ ba gbakuiŋ bi kafaydo beŋ fooma. Wundɛ athimo mina, awa maŋaye ka wasi nama ba toŋe wundɛ ka tuka nama haŋ, ndɛ bakaŋ mina ŋaye ka sɛmbɛ ba ka hakɛŋ bakɛntuŋ baŋ. 6Wundɛ ni mina bafodeni ka hugbakine nama haŋ bi niyiyɛ Masaala wo Fandama woŋ wali. Haliko yiki mɛnɛ sɛmbɛ ba niyɔ iŋ Yisɔs Kraist ba kɔy yo kɔy! Amiina. 7Dethaŋ hɛ wundɛ si see iŋ thawuruma thaŋ. Womo woma kɔŋ niŋ kutu, thiyitaŋ bi yɔminuwɛ niŋ beŋ. Awa biya bi ka siyani ba kafaydo baŋ beŋ fooma bi kɔŋ bereŋ ba na wundɛ see. Nɛna wuŋ niiye yaathi! Amiina. 8Mariki woŋ Masaala na tɛpɛ, na “Yama mathɛrɛŋ maŋ mɛnɛ mapeye maŋ.” Wundɛ wo iŋ sɛmbɛŋ fooma woŋ, ndɛ na hɛ woŋ, wo nde woŋ, mɛnɛ wo see woŋ. 9Yama Yɔni na, wo wɛnda ndeŋ woŋ, awa saathɛ ba na bɔhande yaŋ iŋ Yisɔs, yaŋ niyɔ iŋ kufɛŋ iŋ beŋ ka kuthithi ku ka nambarɛŋ ba ka bi nda ka hugbakine nama haŋ beŋ. Yaŋ deŋo nde ka thiki hu dɔma haŋ na Patimɔsi saathɛ ba na yaŋ koyoŋ thampa tha ka Masaala thaŋ mɛnɛ nɔndi ba ni Yisɔs maseri baŋ. 10Ka lɔkɔ babɛina ba ka Mariki woŋ baŋ Yina wo ka Masaala woŋ na nde yama kɛriŋiyɛ. Kɛna yuye yaŋ thampa thatɔɔkɛ, tha thɔyande iŋ thampa tha ka kuthuthu tha si yama gbonkiye mahɛŋ. 11Thampa thaŋ tepe yama, na “Gbala bɛyiniŋ fooma ba yi see ka kuta baŋ e yi tɔŋita buku wobɛina ka makɔmandeŋ masɔŋ-maye ma ka biya bi ka Masaala beŋ maŋ ka mɛtiŋ baŋ baŋ: ka Ɛfɛsɔsi, Sumerina, Pɛkamɔŋ, Thaiataira, Sadisi, Filadɛlifiya, mɛnɛ ka Leyodisiya.” 12Yaŋ sikiyɔkɔy mahɛŋ ba detha wo yama gbonkitiyande woŋ. Kɛna kute yaŋ mutute mumɔɔlini musɔŋ-muye mu yehinuwo maŋaye ka boy mu kooye. 13Ka mateete ma ka mutute mumɔɔlini muŋ muŋ baŋ kɛna kooye wɔ wo thɔyande iŋ hati ka wɔ wo thɔɔyɛ kuhɔli kuthɔɔkuwɛ e kuŋ tɛŋa ka thagbɔsɔ nama thaŋ, e ndɛ yukɔkɔ mbumbusa ki yehinuwo ka boy ka kanka nama baŋ. 14Bɔɔyɛ bu ka yaha nama haŋ buŋ buhuhɛ napooŋ nɔŋ pɔmpɔŋ, awa e thaaya nama thaŋ niyɔ nɔŋ buu bumaye. 15Ŋathaki nama ŋaŋ niyɔ nɔŋ huyɛ hubirasi hu kelino ka buu e huŋ gboko wuyɔhɔy. Awa thampa nama thaŋ niyɔ nɔŋ kugbarasi. 16Wundɛ boheŋ nde sosɛŋ bisɔŋ-biye ka yɔnkɔ nama huthome haŋ, e silanhi babilɛ ŋawaŋ ŋaye kɔ fuŋa ka hothi nama haŋ. Yethi nama haŋ kɔ maleke nɔŋ kaŋ wo hatɔ teete. 17Naa kute yaŋ niŋ, yaŋ ŋɔti ka ŋathaki ŋakɛnama ŋaŋ nɔŋ wɔ tukɛ. Kɛna tute wundɛ yama yɔnkɔ nama huthome haŋ e ndɛ dɔma, na “Ba payɔ! Yama mathɛrɛŋ maŋ mɛnɛ mapeye maŋ. 18Yama wohɛmɛ woŋ! Yaŋ tuku nde, kɛrɛ kumaŋ yaŋ niyɔy nda iŋ sii ba kɔy yo kɔy. Yaŋ kiŋ iŋ masaapɛŋ ma ka mayoho maŋ ba kɛriŋiyɛ tuka haŋ mɛnɛ ka Tiyɛ ka. 19Gbala bɛyiniŋ ba kute yi ba si niyɔ baŋ, ba hɛ niyɔ baŋ mɛnɛ ba nɔŋ niyɔ baŋ. 20Ya gbundu wo ba sosɛŋ bisɔŋ-biye bi kute yi yaŋ bohe ka yɔnkɔ niŋ huthome haŋ beŋ, mɛnɛ ba mutute mumɔɔlini musɔŋ-muye mu yehinuwo maŋaye ka boy muŋ: sosɛŋ bisɔŋ-biye beŋ bina malekɛŋ bisɔŋ-biye bi ka makɔmandeŋ ma ka biya bi ka Masaala beŋ maŋ ka mɛtiŋ basɔŋ-baye baŋ, awa mutute mumɔɔlini musɔŋ-muye muŋ muna makɔmandeŋ masɔŋ-maye maŋ.”

will be added

X\