Filimɔŋ 1

1Yama Pɔli na, wo thiyo ka yeeli ba saathɛ ba na yaŋ niyiyɛ Kraist Yisɔs na wali. Timothi, wo wɛnda ntuŋ woŋ, thɔɔtɔy yama ka gbala kuthagba koŋ koŋ. Yaŋ gbale kuthagba koŋ koŋ ka nyathiki ntuŋ woŋ mɛnɛ wɛnda ntuŋ woŋ ka wali baŋ Filimɔŋ, 2iŋ Afiya wɛnda ntuŋ woyɛrɛmɛ woŋ, mɛnɛ ntɔ ntuŋ wo dekey wukahɛ ba niyiyɛ Kraist na wali woŋ Akipɔsi, mɛnɛ biya bi ka Masaala bi thuŋuyande ka banka nda baŋ beŋ. 3Haliko Masaala, Fanda ntuŋ woŋ, mɛnɛ Mariki ntuŋ woŋ Yisɔs Kraist toŋine bena mathimo e dunkune bena mathɛbɛŋ. 4Wɛndaŋ woŋ Filimɔŋ, timo tima ti yaŋ kɔ niye kuraminɛ, yaŋ kɔŋ yina kɔ thiiti e yaŋ thiya Masaala na maamo ba yi. 5Ba yaŋ yuye ba yi thimo biya bi ka Masaala beŋ fooma, awa e yi niya Mariki woŋ Yisɔs na lanɛya. 6Kuraminɛ kukiyaŋ koŋ ku kiŋ ba mabohinande makɛntuŋ maŋ nɔŋ balanɛyani, mɛ be punku ba sisa makɔthɔ masuŋɔy ka thaduba yo thaduba tha kute miŋ ka siini bakɛntuŋ baŋ ŋaye ka bɔhande ntuŋ haŋ ka Kraist. 7Wɛndaŋ wo thimo yaŋ woŋ, yaŋ kiŋ iŋ mayehitɔkɔ mamandiŋ iŋ kaha thukuma humandiŋ baa yi athimo biya bi ka Masaala beŋ. Yi kahaŋ thathukuma tha ka biya bi ka Masaala beŋ thaŋ fooma. 8Ba kolo baŋ baŋ yaŋ, nɔŋ wɛnda ka kubɔri ku ka Kraist, yaŋ kɔŋ niyɔ iŋ thunka hutɛŋɛ ba yina niya yamari ba niya ba sisande yi ba niya. 9Kɛrɛ ba saathɛ ba na thimo yaŋ yina, saanuŋ yaŋ ba yina niya yamari, yaŋ dunkune yina mathɔnthɔŋɔŋ. Yaŋ ni wuŋ baŋ hali na niyɔy wuŋ yaŋ yama Pɔli, baseri wo ka Kraist Yisɔs, awa e hɛlɛŋ thiyo ka yeeli ba saathɛ ba na yaŋ niŋ niyiyɛ wali. 10Huna, yaŋ kɔŋ yina see ka theteke ba Onisimɔsi, wo hati wokiyaŋ woŋ gbeeŋ ka Kraist. Ka lɔkɔ ba yaŋ ka yeeli woŋ, yaŋ see nde sikiyɔkɔ fandama ka kubɔri ku ka Kraist. 11Ka lɔkɔ banthe nde, ndɛ ka nde munahaŋ ka kuwaŋ kukɛnda, kɛrɛ ka tete ndɛ kiŋ nda munahaŋ ka kuwaŋ kukɛnda iŋ ka kuwaŋ kukiyaŋ. 12Ka tete, yaŋ kɔŋ hɛlɛŋ niŋ tɔŋɔti kɛnda, awa yaŋ thimoŋ niŋ iŋ thukuma niŋ haŋ fooma. 13Yaŋ kɔŋ nde thimo ba niŋ kɔsina kiyaŋ ba lɔkɔ ba yaŋ ka yeeli do saathɛ ba Huseri Huyɔhɔy haŋ, haliko wundɛ be yama mase ka niya bɛyiniŋ ba thimo nde yi ba yama mase baŋ. 14Halisa, yaŋ thimota ba pithita yina ba yama mase, kɛrɛ yaŋ kɔŋ thimo ba yi wuŋ niya kuyankaŋ ŋaye ka mamɛy makɛnda. Huna sa yaŋ niye bɛy yo bɛy, yɔkɔŋ na yi mɛy. 15Lɔkɔ hɛ, wu kɔŋ niyɔ Onisimɔsi thokiye nde bena ba malɔkɔ mathurɔy, ba haliko beŋ be niyɔ hɛlɛŋ iŋ wundɛ ba malɔkɔ timo tima. 16Awa ka tete ndɛ ka nda hɔkɔŋ waayi nagbɛti, kɛrɛ wo yamɛ nda ba waayi, baa ndɛ kiŋ nda wɛnda ntuŋ ka Kraist. Ndɛ kiŋ kolo ka kuwaŋ kukiyaŋ. Mbu ntiŋ hɛlɛŋ ka kuwaŋ kukɛnda, ka kufɛŋ ku ka niyɔ waayi iŋ ka niyɔ wɛnda ntuŋ ka Kraist? 17Bɛna, mɛnɛ yi simekeŋ yama ba yaŋ niyɔ ntɔ nda, yɛrɔkɔ niŋ nɔŋ na nde yi yama yɛrɔkɔ na. 18Mɛnɛ wundɛ ni yina bɛy yo bɛy, maa ndɛ thohite yina ntha yo ntha, tepe yama ba wuŋ thunkuna. 19Dondo, yaŋ kɔŋ dɛ gbali iŋ yɔnkɔ hukiyaŋ haŋ: Yaŋ, Pɔli, yaŋ kɔŋ yina thunkuŋ. Yaŋ ka nda ba yina simina ba dɔma na yi kiŋ iŋ dɔɔnthɔ ba sii bakɛnda baŋ ba yama thunkuna. 20Bɛna, wɛndaŋ woŋ, yaandi niyiyɛ yama wuŋ ba saathɛ ba Mariki woŋ. Nɔŋ wɛndaŋ ka Kraist, yehina yama thukuma. 21Yaŋ niyeŋ kulanɛya ba yi yama ka putiyɔ, na yaŋ toŋite kuthagba koŋ koŋ. Yaŋ gbalite yina ka kɔthɔ ba yi ka niya wuyamɛ ba wu thɔnthɔŋɔŋ yaŋ yina wuŋ. 22Ka malɔkɔ manthe mabɛina, kɔsiniyɔkɔ yama makonko, babiyɛ yaŋ tuteŋ thukuma ba dɔma na Masaala kɔŋ ni yaabi ŋaraminɛ ŋakendeŋ fooma, e yaŋ hɛlɛŋ dunkuno kendeŋ. 23Ɛpafarasi, wo ka yeeli do iŋ yaŋ woŋ saathɛ ba Kraist Yisɔs, toŋite bena ŋamaani, 24mɛnɛ bintɔni ntuŋ ka wali baŋ beŋ Maki, Aritakɔsi, Demasi, mɛnɛ Luku. 25Haliko Mariki woŋ Yisɔs Kraist toŋine bena mathimo.

will be added

X\