biFilipay beŋ 4

1Mbɛndaŋ bi thimo yaŋ, yaŋ kiŋ iŋ kufiyo kumandiŋ ba bena kutiyɔkɔ. Beŋ ni ba yaŋ niyɔ iŋ mayehitɔkɔ mamandiŋ, awa beŋ ni hɛlɛŋ ba yaŋ bukuinɔkɔ ba beŋ. Huna mbɛndaŋ beŋ, ndintaŋ kɔɔ wukahɛ ka sii ba kute beŋ baŋ ka Mariki woŋ. 2Yuodiya mɛnɛ Sintiki, yaandi, yaŋ theteke bena ba beŋ bohinande ka Mariki woŋ nɔŋ na wɔ iŋ wɛndama woyɛrɛmɛ bohiniyande. 3Awa yi hɛlɛŋ gbeeŋ, yindo ntɔ niŋ wo yɔhɔy niyo lanɛya ka wali baŋ, yaŋ thimoŋ ba yi mase yɛrɛmɛŋ beŋ beŋ baŋ, baa bindɛ ni nde wali wukahɛ nagbaŋ iŋ yaŋ ka nanthe ba gbanthinande Huseri Huyɔhɔy haŋ, mɛnɛ hɛlɛŋ Kɛmɛnti, awa mɛnɛ ntɔni niŋ bi ni yaŋ wali ka nanthe beŋ, bi ŋakeŋ ŋakɛnamɛŋ ŋa nda ka buku wo ka Masaala wo ka bipethɔy beŋ woŋ. 4Haliko beŋ niyɔ iŋ mayehitɔkɔ timo tima ka Mariki woŋ. Yaŋ kɔŋ hɛlɛŋ huŋ tɛpi: yehitɔkɔŋ! 5Tɔŋinaŋ maniyɔ mathɛbɛ ka wɔ yo wɔ, baa Mariki woŋ kɔŋ see ka wuthurɔy wuŋ. 6Baŋ niyɔkɔ yaagba ba ntha yo ntha, kɛrɛ ka ŋaraminɛ fooma ŋa beŋ ni, thɔnthiŋinaŋ Masaala na ba mu thimo beŋ. Thɔnthiŋinaŋ niŋ iŋ thathukuma tha ka thiya niŋ maamo. 7Awa mathɛbɛ ma ka Masaala maŋ, ma yamɛ ka thinthi ba makɔthɔ ma ka wɔmɛti maŋ, ma kɔŋ kɔsɔŋ thathukuma ndeŋ thaŋ, mɛnɛ hɛlɛŋ masiyini makendeŋ maŋ wu pankɔy bɛy ka bohinande hu bohinande beŋ iŋ Kraist Yisɔs haŋ. 8Mbɛndaŋ beŋ, saanuŋ yaŋ ba gbanthina, niyaŋ ba thathukuma thakendeŋ thiŋo iŋ bɛyiniŋ bayɔhɔy baŋ, ba sisande ba solo baŋ, bɛyiniŋ banɔndi, bayiki, bathumbɛ, bamɛthɛ, bathimiyo, mɛnɛ bayɔhɔy ka yuyɛ baŋ. 9Thiyaŋ ba thanki beŋ thanuwa baŋ ka mani, ba kute beŋ baŋ maŋaye kiyaŋ ka magbonkoy niŋ mɛnɛ maniyɔ niŋ maŋ. Awa Masaala wo dunkune mina mathɛbɛ woŋ, ndɛ kiŋ iŋ beŋ. 10Ka bohinande hu bohinande yaŋ iŋ Mariki woŋ haŋ ka sii bakiyaŋ baŋ, yaŋ kiŋ iŋ mayehitɔkɔ mamandiŋ ba wuŋ niyɔ na beŋ hɛlɛŋ atute yama thukuma wumandiŋ. Yaŋ tha tɛpi ba wuŋ niyɔ na beŋ tuteta nde yama thukuma, kɛrɛ hɛɛra bɛna ka nde iŋ beŋ ba wuŋ niya. 11Yaŋ tha tepe haŋ haŋ ba wuŋ niyɔ na beŋ dethe yama gbothontiŋ, baa wɔ na yaŋ wo thanuwɛ ba tɛŋina ka bɛyi yo bɛyiŋ ka ntha yo ntha wu iŋ yaŋ. 12Yaŋ kiŋ nde bamɔnɛ, awa yaŋ kiŋ nde dinhaŋi. Yaŋ thanki nde thanuwa gbundu ba ka niyɔ wɔ tɛŋinɛ kamo kama, iŋ timo tima. Yando tɛŋinɛ, niyɔŋ yando thimbɔy maa yando kaho kɔnthɔ, yaŋ niyɔy iŋ wubɔyɛ maa niyɔy iŋ wuyete. 13Yaŋ punkeŋ niya bɛy yo bɛymaŋaye ka Kraist wo dunkune yama punka haŋ woŋ. 14Awa wuŋ yɔhɔy nde ba beŋ yama mase ka thɔrɔ niŋ baŋ. 15Beŋ gbeeŋ bendo biFilipay beŋ, beŋ kɔthɛŋ nagberekethe ba wuŋ niyɔ na kabi ka mathɛrɛŋ ma ka kukɛwandi ku ka Huseri Huyɔhɔy haŋ maŋ, ka lɔkɔ ba pɛyɛŋ yaŋ ka Masidoniya, makɔmande ma ka biya bi ka Masaala mahɛna tha yama mase, yɔkɔŋ beŋ nagbɛti, bena nkɛɛ yama, awa e yaŋ kuta munahaŋ mɛnɛ mɔnɛ ka nanthe iŋ beŋ. 16Hali na nde yaŋ ka Thɛsalonaika, beŋ toŋite nde yama kumase wu yamɛ hanthe. 17Wuŋ ka ba dɔma na munkiy muthɔ muna thimo yaŋ hɔkɔŋ ba kuta kendeŋ, kɛrɛ yaŋ thimoŋ ba kuta mutiŋ muyɔhɔy mu ni ba beŋ kuta munahaŋ. 18Yaŋ kute kuthunkuŋ ku tɛŋɛ yama, awa yaŋ thimbɔy. Yaŋ bohe kutɔŋɔti ku toŋite beŋ yama koŋ ka Ɛpafurodaitɔsi. Kutɔŋɔti kubɛina niyɔy saraka ba thimɔy huru ka Masaala ku yeroko iŋ ku yehinuwɛ niŋ thukuma. 19Awa Masaala wokiyaŋ woŋ kɔŋ bena dunkune fooma mu thimo beŋ ka hudinhaŋiya nama haŋ, mɛnɛ ka yiki nama baŋ, maŋaye ka Kraist Yisɔs. 20Haliko Masaala wo Fanda ntuŋ woŋ dunkuno yiki kɔy yo kɔy kuhantheŋ. Amiina. 21Maaniyɛ yama kɛndɛ fooma biya bi ka Masaala beŋ, bi nda kɛndɛ ba Kraist Yisɔs beŋ. Mbɛndaŋ ntuŋ bi iŋ yaŋ dondo beŋ maaŋ bena fooma. 22Biya bi ka Masaala beŋ dondo maaŋ bena fooma, yame ntiŋ bɛy biya bi ni wali ba Gbaku wo ka Romaŋ woŋ beŋ. 23Haliko makutiyɛ ma ka Mariki woŋ Yisɔs Kraist maŋ ma niyɔ iŋ beŋ fooma.

will be added

X\