biFilipay beŋ 3

1Mbɛndaŋ beŋ, saanuŋ yaŋ ba gbanthina kuthagba koŋ koŋ, niyɔŋ iŋ mayehitɔkɔ ba na thanki nda beŋ niyɔ iŋ mabohinande iŋ Mariki woŋ. Wuŋ ka yama bɛyi yo bɛyi ba hɛlɛŋ bena duwa ka tepe hu thanki nde yaŋ bena gbalita haŋ, awa wu kɔŋ niyɔ wuyɔhɔy ba beŋ mɛnɛ yaŋ ni hɛlɛŋ wuŋ. 2Niyaŋ kuthɛgbɛ ba biya binɛnɔy beŋ, bi ni beŋ nɔŋ ŋatheŋ. Niyaŋ kuthɛgbɛ ba biya bi teeti kɔtɔ koŋ beŋ. 3Mina biya bi ka Masaala bi thiyo ka nkaŋ kinɔndi kiŋ beŋ; wuŋ ka biya bihɛna beŋ beŋ, baa mindo ni Masaala na kubatho maŋaye ka Yina wokɛnama woŋ, awa e miŋ niyɔ iŋ mayehitɔkɔ ka Kraist Yisɔs, awa miŋ niyeta lanɛya bɛyiniŋ ba niya ka kɔtɔ koŋ baŋ saanuŋ wɔ ba niyɔ kisi. 4Hali na wuŋ na yaŋ gbeeŋ kiŋ iŋ saabu ba niye yaŋ lanɛya ka kɔtɔ koŋ hɛlɛŋ nɛŋ. Mɛnɛ wɔ hɛna siyi ba dɔma na ndɛ kiŋ iŋ saabu ba niye ndɛ lanɛya ka kɔtɔ koŋ, yaŋ yameŋ saabuiŋ ba wɔ bɛina. 5Yando thiyo ka bintɔni niŋ ka gbɛɛŋ wo tɛŋinɛ kasɔŋ-kataati woŋ. Wɔ wunthe na yaŋ ka biIsirɛli beŋ, ka bɔnsɔŋ ba ka Bɛnyamiŋ baŋ, woHiburu na yaŋ, wo mpoo iŋ biHiburu beŋ. Ka kɔsina Siraŋ ba ka biYusu beŋ baŋ, yando woFaresi na yaŋ. 6Awa yaŋ kiŋ iŋ nde kufiyo kumandiŋ ba niya Masaala na kubatho, wuna biyɛ yaŋ nde kɔ niya thɔrɔ biya bi ka Masaala beŋ. Yaŋ ni nde sɔbɛ ti peye yɔla hu ka wɔmɛti ba niyɔ wɔ wothumbɛ maŋaye ka putiyɔ yamari wo ka Siraŋ baŋ woŋ, kɛrɛ hali nde ka yaŋ boho thɛkɛ ba wumɛɛsɛ. 7Bɛyiniŋ baŋ baŋ fooma ba siyi nde yaŋ baŋ na ba kɔŋ yama sisiyɛ munahaŋ, ka tete yaŋ kɔthɛŋ nda na bɛŋ sa yama sisiyɛ munahaŋ saathɛ ba ni Kraist baŋ. 8Wuŋ ka hɔkɔŋ bɛyiniŋ baŋ baŋ bathɔ, kɛrɛ yaŋ sikiŋ sɔkɔrɔ bɛyiniŋ fooma saathɛ ba ntha ki yamɛ kahuwa mɔlɔŋ. Yaŋ ni wuŋ ba haliko yaŋ be kɔthɔ Kraist Yisɔs na, Mariki niŋ woŋ. Saathɛ ba kɛnama deŋe na yaŋ bɛy yo bɛy kuwaŋ. Yaŋ dethe nda muŋ nɔŋ muyɔpɔŋ mu yelo ka muru ka, ba haliko nthuŋ yaŋ be niyɔ iŋ Kraist, 9awa e yaŋ bohinande iŋ wundɛ. Yaŋ ka iŋ nda mathumbɛ ka yɛthɛ bakiyaŋ, mathumbɛ na ba putiyɔ Siraŋ baŋ. Yaŋ kiŋ nda iŋ mathumbɛ ma dunkuno yaŋ iŋ Masaala maŋaye ka niya Kraist na lanɛya haŋ. Awa mathumbɛ maŋaye ka Masaala maŋ ma kɔŋ kuto ka lanɛya. 10Ba kɔthɔ Kraist na nagbɛti huna kɔthɛ yaŋ, mɛnɛ ba kɔthɔ wumandiŋ sɛmbɛ ba ka ŋayi nama ka tuka haŋ, haliko yaŋ be doŋe nanthe iŋ wundɛ ka nambarɛŋ nama baŋ, awa yaŋ be tuke nɔŋ na tuke ndɛ na. 11Yaŋ kiŋ iŋ kukahe thukuma ba wuŋ niyɔ na Masaala kɔŋ yama ŋayaŋ ka tuka haŋ e yaŋ kuta sii. 12Wuŋ ka ba dɔma na yaŋ thanki nda punka, maa wɔ mɛthɛ na nda yaŋ, kɛrɛ yando dekiyɔkɔ wukahɛ nagbaŋ ba punka tɛŋa ka mapeye ma tɛŋ nde Kraist Yisɔs maŋ, ma punke ndɛ ba yaŋ niyɔ hɛ wɔ kɛnama. 13Mbɛndaŋ beŋ, yaŋ siyuweta ba dɔma na yaŋ thanki nda punka, kɛrɛ bɛybanthe ba yaŋ ni, namo nama na wuŋ niye, yaŋ kɔŋ piitɔ bɛyiniŋ fooma ba yama mahɛŋ, awa e yaŋ niya sɔbɛ bakiyaŋ ba pɛnka ba yama kakɔtɔkɔybaŋ. 14Huna yaŋ thare toloŋ ba pɛnka mapeye maŋ ba haliko ba punka kuta kuyehiteke koŋ, ku yama Masaala thiye koŋ maŋaye ka Kraist Yisɔs ba kuta sii ba ka thinthi baŋ. 15Huna miŋ fooma mindo hakiyando nda ba yema Kraist na beŋ, miŋ kiŋ nda ba niyɔ iŋ masiyi mamanthe mabɛina. Kɛrɛ mɛnɛ wunthe ka beŋ kiŋ iŋ masiyi mahɛna, Masaala kɔŋ ni ba wɔ bɛina wuŋ metho. 16Nama o nama na wuŋ niye, miŋ kayɛŋ ka kɔtɔkɔi ba kɔsina sirani ba bare miŋ yema baŋ. 17Mbɛndaŋ beŋ, yemitɔŋ yama. Miŋ thanki bena dɛŋiyɛ mathɔyande mayɔhɔy ma beŋ yeŋ. Huna yemitɔŋ bi yemɛ mɛŋ beŋ. 18Yaŋ tepe nde bena haŋ haŋ lɔkɔiŋ babɔyɛ, awa yaŋ kɔŋ hɛlɛŋ huŋ tepe bena iŋ manɛɛni. Binɔndi bi kiŋ mateete makendeŋ bi niyo iŋ siini bakɛnamɛŋ hadeni bi ka tuka hu ka Kraist ka kuyeŋ kubariŋande koŋ haŋ. 19Biya bibɛina beŋ beŋ bi kɔŋ thanke ka yahanama, baa ŋafiyoiŋ ŋa ka ŋakɔtɔ ŋakɛnamɛŋ ŋaŋ na bindɛ niyiyɛ wali. Bi kɔŋ bukuineke ba sisande bindɛ ba niyɔ kuyaahu baŋ, awa siini bakɛnamɛŋ ba kiŋ hɔkɔŋ ba niyɔ kufiyo munkiŋ mu ka faido muŋ. 20Kɛrɛ miŋ, hulasiriya hukɛntuŋ hu kiŋ ka ariana, awa miŋ kɔŋ yumbu ba kuta Banikisi ntuŋ woŋ, Mariki woŋ Yisɔs Kraist, ba saa maŋaye ka ariana, 21wundɛ wo si thikipi ŋakɔtɔ ŋakɛntuŋ ŋa ka huwɔmɛtiya haŋ ŋaŋ e ndɛ ŋɛŋ niya nɔŋ kɔtɔ nama ku hakande iŋ biyamɛti koŋ. Sɛmbɛ babanthe babɛina ma punku sise ntha yo ntha ka kɛriŋa nama haŋ.

will be added

X\