Mathiyu 5

1Naa kute Yisɔs na pɛnkande niŋ sɛthɛ baŋ, ndɛ dunkɔy ka kusɛri koŋ ka thinthi. Naa dɔŋɔy ndɛ kɛndɛ, kɛna see bakarandeni nama beŋ niŋ pɛnkiyande. 2Kɛna sɛsi ndɛ ba thaninuwa biya beŋ ba dɔma, na 3“Mayehitɔkɔ ma kiŋ ka bi kɔthɛ beŋ ba dɔma na bi kiŋ ba kuta kumase ka Masaala, baa bindɛ bina biyɛ huybakine hu ka ariana haŋ. 4“Mayehitɔkɔ ma kiŋ ka bi boki beŋ, baa Masaala kɔŋ bindɛ thaayi. 5“Mayehitɔkɔ ma kiŋ ka bi thathinɔkɔy beŋ, baa Masaala kɔŋ thiŋiŋ lahiri ba ni ndɛ bindɛ baŋ. 6“Mayehitɔkɔ ma kiŋ ka bi iŋ kufiyo ba niya mathumbɛ nɔŋ na wɔmɛti kaho kɔnthɔ iŋ kumbɛ, baa Masaala kɔŋ bindɛ thimbiŋ. 7“Mayehitɔkɔ ma kiŋ ka bi kutiyɛ biya bihɛna nkinikiniŋ beŋ, baa Masaala kɔŋ bindɛ kutiyɛ nkinikiniŋ. 8“Mayehitɔkɔ ma kiŋ ka bi mɛthɛ thathukuma beŋ, baa bi kɔŋ kutiyɔkɔ Masaala na. 9“Mayehitɔkɔ ma kiŋ ka bi thiyi mathɛbɛ beŋ, baa bi kɔŋ thiya mpati bi ka Masaala. 10“Mayehitɔkɔ ma kiŋ ka bi niya thɔrɔ beŋ saathɛ ba mathumbɛ, baa bindɛ bina biyɛ huybakine hu ka ariana haŋ. 11“Mayehitɔkɔ ma kiŋ ka bendo biyamɛti yaki beŋ, e bindɛ bena kɔ niya thɔrɔ, awa e bindɛ bena kɔ tɛpiyɛ bɛyiniŋ fooma bahothi saathɛ ba kiyaŋ. 12Yɔhɔŋ thathukuma awa e beŋ yehitɔkɔ, baa beŋ kiŋ iŋ kuthunkuŋ kumandiŋ ka ariana, baa nɛna niyo nde banabiŋ bi kɔtiyɔkɔi nde bena beŋ thɔrɔ iŋ biyamɛti. 13“Beŋ athɔyande nɔŋ mɛɛti ma ba biyamɛti fooma, kɛrɛ mɛnɛ mɛɛti maŋ piriŋiŋ wuthimɔy wukɛnama wuŋ, nama nda mɛŋ niye ba mɛŋ thimɔ? Mɛŋ sa nda yɔhɔ ba bɛyi o bɛyi, yɔkɔŋ nthɔŋ nda ba mɛŋ yelo ka biyamɛti mɛŋ yaathuwe iŋ ŋathaki namɛŋ ŋaŋ. 14“Beŋ athɔyande hɛlɛŋ nɔŋ waŋ ba ka faydo baŋ. Mɛti ba thoyo ka kusɛri ka thinthi, bɛŋ sa punku nununo. 15Wɔmɛti o ka wo bohoŋ mumɔɔli e muŋ pututa kuma. Kɛrɛ ndɛ kɔŋ muŋ tutu ka ntha, awa e ndɛ muŋ kiya ka banka baŋ mateete ka muŋ dunkune waŋ ka banka baŋ fooma. 16Niyaŋ ba waŋ ndeŋ baŋ tɔŋinɔkɔ ka biyamɛti, wuna bindɛ kutu bɛyiniŋ bayɔhɔy ba beŋ ni baŋ, awa bindɛ thunkunuwa Fanda ndeŋ wo ka ariana woŋ. 17“Baŋ siyi ba dɔma na yaŋ see ka thɔnkina Sirani ba ka Musa baŋ mɛnɛ mathanani ma ka banabiŋ beŋ maŋ. Yaŋ tha see ka thɔnkina muŋ, kɛrɛ yaŋ see ka thiŋina muŋ. 18Yaŋ kɔŋ bena tepe nɔndi baŋ. Hanimaa ka ariana iŋ ka fay woŋ ka kiŋ hintiŋ, siraŋ ba yamɛ nthɔŋ nda mɛɛsa baŋ ka Sirani baŋ, ba kiŋ ba kosino. Ba kiŋ ba kosino haaŋ ka mapeye ma ka fay woŋ maŋ. 19Wɔ o wɔ wo sa putiyɔ yamari womɛɛsɛ ka yamariŋ baŋ baŋ, awa e ndɛ thaninuwa biya ba yema gboŋa babɛina, wɔ bɛina sa niyɔ iŋ makooye ka huybakine hu ka ariana haŋ. Kɛrɛ wo bɛŋ putiyɔ e ndɛ bɛŋ thaninuwa, wɔ bɛina na womandiŋ ka huybakine hu ka ariana haŋ. 20Yaŋ tepe bena, yɔkɔŋ mathumbɛ makendeŋ maŋ daŋande ma ka bikarimɔkɔiŋ bi ka Siraŋ baŋ beŋ mɛnɛ biFaresini beŋ. Mɛnɛ huŋ kutɛ, beŋ sa punku biyande ka huybakine hu ka ariana haŋ. 21“Beŋ thanki nde yuyɛ biyamɛti bi si nde tepo ba dɔma, na ‘Ba kɔri wɔmɛti; awa wɔ yo wɔ wo kɔri, ndɛ kɔŋ kɔnsiŋina.’ 22Kɛrɛ yaŋ tepe bena ba dɔma na wɔ yo wɔ wo thɔɔ ka mathoŋ wumandiŋ ba ntɔ nama, ndɛ kɔŋ kɔnsiŋina. Wɔ o wɔ wo yaki ntɔ nama na, ndɛ kɔŋ sisa ka kaama woŋ. Awa wɔ yo wɔ wo dɔŋ ntɔ nama na, na ‘Wɔ thɔkɔi na yi,’ ndɛ kɔŋ yɛla ka buu bu ka yahanama buŋ. 23Huna mɛnɛ yi key ka bɛsɛ ba fuŋune saraka baŋ ka Masaala ba dunkuna munkii mukɛnda muŋ, awa e yi kɔthɔ ba dɔma na yi ni ntɔ nda na wunɛnɔy, 24pɛya munkii mukɛnda muŋ ka bɛsɛ baŋ, awa e yi kaa ba yehinuwa wunɛnɔy wu mateete makɛnda wuŋ iŋ ntɔ nda. Awa e yi ntiŋ saa ba si dunkuna munkii nda muŋ ka bɛsɛ baŋ. 25“Bɔha wo katɛ yina ka kaama woŋ hunyathikiya. Ndɛ wo yina ka dunkuŋ ka bakɔnsɔŋɔŋ woŋ, awa bakɔnsɔŋɔŋ woŋ yina dunkuna ka wo dethiteke kaama woŋ, awa badethiteke kaama woŋ yina thiya ka yeeli woŋ. 26Yaŋ kɔŋ yina tepe nɔndi baŋ, yi sa fuŋ kɛndɛ gbɔ, yɔkɔŋ yi thunkuŋ sɛnti womankɛ woŋ. 27“Beŋ thanki nde yuyɛ biyamɛti bi si nde tepo ba dɔma, na ‘Ba ni kubɛi iŋ yɛrɛmɛ wo yɛntɔi iŋ wɔ hɛna.’ 28Kɛrɛ yaŋ tepe bena, wɔ yo wɔ wo dethi yɛrɛmɛ wo ka wɔ hɛna e ndɛ niyɔ iŋ kufiyo ba ŋɔɔ iŋ wundɛ, wɔ bɛina thanki nda niya kubɛi iŋ wundɛ ka thukuma nama haŋ. 29Mɛnɛ hooya nda huthome haŋ ni ba yi niya hakɛ, fuŋuna huŋ, e yi huŋ yɛla. Wu kɔŋ yina niyɔ hita ba piriŋina ntha kinthe ka kɔtɔ kukɛnda koŋ ayaŋ ba kɔtɔ kukɛnda koŋ fooma yelo ka yahanama. 30Awa mɛnɛ yɔnkɔ nda huthome haŋ ni ba yi niya hakɛ, thoŋa huŋ, e yi huŋ yɛla. Wu kɔŋ yina niyɔ hita ba piriŋina ntha kinthe ka kɔtɔ kukɛnda koŋ ayaŋ ba kɔtɔ kukɛnda koŋ fooma yelo ka yahanama. 31“Wuŋ tepo nde hɛlɛŋ ba dɔma, na ‘Wɔ o wɔ wo baŋaŋ wɔtɔ nama, wɔ bɛina kiŋ ba dunkune woyɛrɛmɛ woŋ kuthagba ku iŋ magbali ma tɔŋɔŋ ba dɔma na bindɛ paŋande.’ 32Kɛrɛ yaŋ tepe bena, wɔ yo wɔ wo baŋaŋ wɔtɔ nama na, mahɛŋ ma wo yɛrɛmɛ woŋ tha ni kubɛi, ndɛ ni ba woyɛrɛmɛ woŋ niya kubɛi mɛnɛ ndɛ key yɛnta iŋ wathe wohɛna. Awa wɔ yo wɔ wo yɛnti yɛrɛmɛ wo baŋino ka gboŋa baŋ baŋ siiya, wɔ bɛina ni kubɛi awa ndɛ teeti kuyɛntande kutiyɔ koŋ. 33“Beŋ yuye nde hɛlɛŋ na tepo wuŋ ka biya bimayoŋ beŋ ba dɔma, na ‘Wɔ ba teeti lahiri ba thanki ndɛ gbiŋiyɛ ka Mariki woŋ ba niya. Wɔ bɛina kiŋ ba niya ba thanki ndɛ niya lahiri baŋ.’ 34Awa yaŋ tepe bena, baŋ hintiŋ nthɔŋ gbiŋ hali. Baŋ gbiŋ ka ariana, baa kɛna yensi hu ka Masaala haŋ. 35Maa ka faydo, baa dɛna Masaala kiye ŋathaki nama ŋaŋ. Maa ka Yɛrusalɛmi, baa mɛti ba ka Gbaku wo yamɛ gbakuiŋ woŋ bɛna. 36Awa wɔ bɛiŋ gbiŋ yaha nama, baa wɔ ka wo punku niya ba mbɔɔyɛ nama kinthe huha maa kiŋ bɔlɔ. 37Bɛyi o bɛyi ba wɔ gbonkoy ba niyɔyŋ ‘ndo’ maa ‘ade.’ Bɛyi o bɛyi ba nda ndinta kɛndɛ, bɛŋ ŋaye ka Wɔ Nɛnɔi woŋ. 38“Beŋ yuye nde na tepo wuŋ, na ‘Naa wɔ tambe ntɔ nama na hooya, ndɛ kɔŋ nɛnɛ tamba hooya. Awa naa wɔ thinke ntɔ nama na thithi, ndɛ kɔŋ nɛnɛ thinka thithi.’ 39Kɛrɛ yaŋ tepe bena, baŋ tɛnkɛŋ banɛnɔy ka bi bena ni banɛnɔy beŋ. Mɛnɛ wɔ thoroŋ yina ka kuwaabu kuthome koŋ, dapiniyande niŋ kuwaabu kupɔkɔdɔ koŋ, ndɛ be hɛlɛŋ yina thoroŋ. 40Awa mɛnɛ wɔ ni yina sɔkɔ ba yaba nda bakaake baŋ, mba ŋutiyɛ nda niŋ kuhɔli koŋ. 41Awa mɛnɛ wɔ pithite yina ba niŋ pɛɛta kuragba kunthe, kata niŋ ŋaragba ŋaye. 42Dunkuneŋ wɔ yo wɔ wo bena yawute, awa baŋ baŋanti wɔ yo wɔ wo bena theete ntha yo ntha. 43“Beŋ yuye nde na tepo wuŋ ba dɔma, na ‘Thimo binyathikiŋ bikɛnda, awa e yi thambo bihadeni bikɛnda.’ 44Kɛrɛ yaŋ tepe bena, thimoŋ bihadeni bikendeŋ, awa e beŋ niyiyɛ ŋaraminɛ bi bena ni thɔrɔ beŋ, 45huna beŋ niyɔ mpati bi ka Fanda ndeŋ woŋ ka ariana. Yemitɔŋ bayɔhɔy ba ka Masaala baŋ, wo niyɛ ba kaŋ nama woŋ tɔŋinɔkɔ ka biya bi ni banɛnɔy beŋ mɛnɛ ka bi ni bayɔhɔy beŋ. Awa Masaala toŋite koyoŋ woŋ ka bithumbɛ beŋ mɛnɛ ka bisikɔi beŋ. 46Mɛnɛ beŋ thimo hɔkɔŋ bi thimo bena beŋ, mbɛ kuthunkuŋ ku beŋ kutu? E nɛŋ kutɛ bahakɛŋ bi tha sikiŋ sɔkɔrɔ hakɛŋ bakɛnamɛŋ baŋ beŋ ni? 47Awa mɛnɛ beŋ kɔ maaŋ hɔkɔŋ bintɔni ndeŋ beŋ, nama hakiyande beŋ iŋ biya bihɛna beŋ? E nɛŋ kutɛ bi be ni Masaala na lanɛya beŋ ni? 48Yɔkɔŋ beŋ be niyɔ biya bi thankinuwɛ ka niya bayɔhɔy nɔŋ na Fanda ndeŋ wo ka ariana woŋ na.

will be added

X\