Mathiyu 28

1Naa daŋande malɔkɔ ma biYusu beŋ hemuwe maŋ, naa tɛŋ wuŋ kuputhɔ ku kaŋ ka Sɔnde sanka, Mariyama wo ka mɛti ba ka Makadala mɛnɛ Mariyama wowuntheŋ woŋ key ba ka detha ka yoma hu ka Yisɔs haŋ. 2Saanuŋ bindɛ ba tɛŋa kɛndɛ, kuyɛkɛŋ koŋ thɛnɛŋ nde kɛndɛ wubɔyɛ, awa maleka wo ka Mariki woŋ na thuhɛ nde maŋaye ka ariana e ndɛ si binkilina raka haŋ ka biyo hu ka yoma haŋ, e ndɛ dɔŋɔ ka huŋ ka thinthi. 3Awa maleka wobɛina wo nde maleke napelipeli nɔŋ kuwaliwaliŋ, awa yaba ba thooye nde ndɛ baŋ bahuhɛ napooŋ. 4Bi nde ni yoma haŋ kantha beŋ thooyo payɔ humandiŋ e bindɛ thɛna nagbirigbiri. Kɛna ŋɔɔkɔy bindɛ nalonthoŋ nɔŋ biya bitukuwɛ bina ŋɔɔkɔy. 5Maleka woŋ dome ka yɛrɛmɛŋ beŋ beŋ, na “Baŋ payɔ, yaŋ kɔthɛŋ ba dɔma na beŋ kɔŋ dethi ba Yisɔs wo koro ka kuyeŋ kubariŋande koŋ woŋ. 6Ndɛ ka dondo baŋ. Ndɛ ŋayino ka tuka haŋ nɔŋ na tepe nde nthɔŋ ndɛ na. Saaŋ hɛ dethi du ŋoye nɔŋ ndɛ do. 7Kaaŋ yako e beŋ ka tepe bakarandeni nama beŋ ba dɔma, na ‘Ndɛ ŋayino ka tuka haŋ, awa ndɛ kɔŋ bena kɔtiyɔkɔ ka bompi wo ka Kalili, kɛna beŋ niŋ kute.’ Siyuwaŋ hu thanki yaŋ bena tepe haŋ.” 8Huna yɛrɛmɛŋ beŋ beŋ pɛyɛŋ ka yoma ka yako e bindɛ kaa biyɛhitɔkɔy wubɔyɛ halisa bi iŋ payɔ. Bindɛ thare ba ka tepe bakarandeni bi ka Yisɔs beŋ. 9Kɛrɛ naa bindɛ key, Yisɔs penke bindɛ e ndɛ dɔma kɛnamɛŋ, na “Maaŋ bena.” Naa kute bindɛ Yisɔs na, bindɛ fooma see niŋ bohi ŋathaki e bindɛ niŋ niya kubatho. 10Kɛna dome Yisɔs kɛnamɛŋ, na “Baŋ payɔ. Kaaŋ e beŋ ka tepe mbɛndaŋ beŋ ba bindɛ kaa ka Kalili. Kɛna bindɛ yama ka kute.” 11Naa yɛrɛmɛŋ beŋ beŋ key ba ka tepe bakarandeni beŋ, kurugbani binɔndi bi nde ni yoma haŋ kantha beŋ key ka mɛti ba ka Yɛrusalɛmi. Bindɛ tepe bafodeni bibukuyuwɛ beŋ bɛyiniŋ fooma ba thankɛ niyɔ baŋ. 12Awa kɛna dɔŋɔy bafodeni bibukuyuwɛ beŋ mɛnɛ bakalani bibayahɛŋ beŋ makutande ba dɛɛnka na bindɛ siseke niya. Naa thankaŋ bindɛ makutande maŋ, bindɛ fuŋuŋ kɔbiri wobɔyɛ e bindɛ niŋ dunkuna ka kurugbani beŋ. 13Bindɛ tepe kurugbani beŋ ba dɔma, na “Kaaŋ kaŋ tepe biya beŋ ba dɔma, na ‘Bakarandeni bi ka Yisɔs beŋ see tuwe kubeli koŋ huyɛ baŋ naa ŋɔyɛ miŋ ka nine.’ 14Awa mɛnɛ bakɛrɛŋ woŋ yuye huŋ, miŋ kɔŋ bena gbonkiyiyɛ wuyɔhɔy na sa beŋ kute kugbasaŋati.” 15Kurugbani beŋ bohe kɔbiri woŋ e bindɛ niya nɔŋ na thanki bindɛ nunkunoko na. Awa kuna koŋ koŋ baŋ gbanthande fooma ka biYusu beŋ. There ka lɔkɔ babɛina haaŋ ka lɔkɔ ba yaŋ gbale baŋ. 16Bakarandeni kɔhi iŋ wunthe beŋ key ka bompi wo ka Kalili woŋ, e bindɛ ka dunkɔ ka kusɛri ku toŋine nde Yisɔs bindɛ koŋ ba bindɛ kɛndɛ kaa. 17Awa naa kute bindɛ niŋ kɛndɛ, bindɛ ni niŋ kubatho, kɛrɛ halisa binɔndi ka bindɛ kikiŋe ba ndɛ. 18Yisɔs thuriye bindɛ e ndɛ dɔma kɛnamɛŋ, na “Yaŋ thanki dunkuno sɛmbɛŋ fooma ba ka ariana mɛnɛ ba ka faido baŋ. 19Huna kaaŋ ka fay woŋ fooma e beŋ ka sikina biya bi ka siyani baŋ fooma bakarandeni bikiyaŋ, awa e beŋ bindɛ biye biye hu ka Masaala haŋ ka keŋ ku ka Fandaŋ woŋ, yando Hati Woŋ, mɛnɛ Yina wo ka Masaala woŋ. 20Awa e beŋ bindɛ thaninuwa ba niya bɛyiniŋ fooma ba thanki yaŋ bena niya yamari baŋ, awa yaŋ kɔŋ niyɔ iŋ beŋ lɔkɔiŋ fooma haaŋ ka mapeye ma ka lɔkɔ ba ka fai woŋ baŋ.”

will be added

X\