Mathiyu 27

1Kuputhɔ ku kaŋ sanka-sanka, bafodeni bibukuyuwɛ beŋ mɛnɛ bakalani bibayahɛŋ beŋ fooma ka biya beŋ kɔmande ka tha banthe ba dɛɛnka na bindɛ niŋ kore. 2Bindɛ niŋ lɔŋa iŋ yɔlɔnkɔiŋ ba niŋ kata ka Pailɛti ka wo ŋindo nde ba niyɔ bakɛrɛŋ iŋ biRomaŋ beŋ woŋ. 3Naa kute Yudasi, wo niyɛ Yisɔs na gbɔŋ ka hadeni nama woŋ, ba dɔma na Yisɔs thonkino, ndɛ sikinande masiyi nama maŋ. Kɛna duutu ndɛ kɔbiri wosiliba wo kɔnthɔ kataati woŋ ka bafodeni bibukuyuwɛ beŋ mɛnɛ bakalani bibayahɛŋ beŋ. 4Huna dome ndɛ kɛnamɛŋ, na “Yaŋ ni hakɛ ba niya wɔ wo pankɔy bɛyi woŋ gbɔŋ ba ndɛ koro.” Naa yuye bindɛ huŋ, huna dome bindɛ kɛnama, na “Hukɛntuŋ kutɛ, huŋ pɛyɛ kɛnda.” 5Kɛna yele Yudasi kɔbiri woŋ kɛkɛŋ ka banka bamandiŋ ba ka Masaala baŋ e ndɛ fuŋa e ka yantɔkɔ ba kɔrɔkɔ. 6Bafodeni bibukuyuwɛ beŋ sekithe kɔbiri woŋ, e bindɛ dɔma, na “Wuŋ kiŋ ma sɔkinɔkɔ Siraŋ bakɛntuŋ baŋ ba thiya kɔbiri woŋ baŋ ka kɔbiri woŋ kosino ka banka ba ka Masaala baŋ, baa kɔbiri wo tɔŋɛ wasi na, wo niyɛ ba lamgba wunthe koro.” 7Kɛna dɔŋɔy bindɛ makutande ba na bindɛ siseke niya kɔbiri woŋ baŋ. Bindɛ bohinande ba boya kai hu ka bayeheni thasokoro thaŋ woŋ ba mankuwe thahinɛŋ. 8Wuna biyɛ bi kɔŋ kɛndɛ dɔŋ, na “Kai hu ka wasi baŋ haŋ.” Haaŋ hɛ nɛna kɛndɛ thiyo. 9Wuŋ baŋ niyɔy haliko hu tepe nde banabi woŋ Yɛrɛmaya haŋ hu be thiŋ. Ndɛ tepe nde ba dɔma, na “Kɔbiri wosiliba wo kɔnthɔ kataati sekitho, awa mɔlɔŋ baŋ baŋ thanki nde nda deŋo iŋ biya binɔndi bi ka Isirɛli ba tindɛ niŋ niye gbɔŋ. 10Awa bindɛ sekithe kɔbiri wobɛina e bindɛ boya kai hu ka wo yeheni thasokoro thaŋ woŋ, nɔŋ na ni nde nthɔŋ yama Mariki woŋ yamari na.” 11Kɛna kiye bindɛ Yisɔs na ka kɔtɔkɔy ba konsiŋino iŋ Pailɛti wo ŋindo nde ba niyɔ bakɛrɛŋ iŋ biRomaŋ beŋ woŋ. Wundɛ thɔnthɔŋɔŋ Yisɔs na ba dɔma, na “E yina gbaku wo ka biYusu beŋ woŋ?” Yisɔs mɛyiyɛ niŋ ba dɔma, na “Na tepe nda nɛŋ yi.” 12Hali na thanki nde nda bafodeni bibukuyuwɛ beŋ mɛnɛ bakalani bibayahɛŋ beŋ niŋ fuŋutiyɛ, Yisɔs tha ni yaabi hali. 13Huna dome Pailɛti ka Yisɔs, na “E yi yuyeta na bindɛ gbonkoy bɛyiniŋ banɛnɔy baŋ baŋ fooma ma sɔkinɔkɔ yina?” 14Kɛrɛ Yisɔs tha niŋ ni yaabi, hali sɔkɔ hunthe. Huna ni bakɛrɛŋ woŋ thakaba wumandiŋ ba Yisɔs. 15Nina yo nina naa biYusu beŋ siyi malɔkɔ ma puntiyando nde bindɛ iŋ maleka woŋ, bakɛrɛŋ woŋ kiŋ nde iŋ mabari ma ka pɛniyɛ biya beŋ wɔ lɔŋɔy wunthe wo bindɛ yɛthi woŋ. 16Ka lɔkɔ babɛina, bi kiŋ nde kɛndɛ iŋ wɔ lɔŋɔy wunthe wo thinkɛ siraŋ baŋ, wo kothiyo iŋ biya beŋ fooma. Ndɛ na dɔma Yisɔs Barabasi. 17Naa kɔmande sɛthɛ baŋ ka tha banthe, Pailɛti thɔnthɔŋɔŋ bindɛ ba dɔma, na “Nkaana thimo beŋ ba peniyo? E beŋ thimoŋ Yisɔs Barabasi na maa Yisɔs wo dɔma Banikisi woŋ?” 18Ndɛ kɔthɛŋ nagberekethe ba dɔma na ka hunaŋ kɛna kate bayahɛŋ beŋ Yisɔs na kɛnama ka. 19Naa dɔŋɔy Pailɛti ka kɔnsiŋina haŋ, wɔtɔ nama ŋindi wɔ kɛnama ka ba dɔma, na “Ba ni hati lamgba wo pankɔy bɛyi woŋ baŋ ntha yo ntha, baa yaŋ aniyɔ hɛ thɔrɔ wubɔyɛ ba ndɛ ka mandɛ.” 20Kɛna tepe bafodeni bibukuyuwɛ beŋ mɛnɛ bakalani beŋ biya beŋ ba bindɛ thɔnthiŋina ba Barabasi peyeno awa e Yisɔs koro. 21Kɛna thɔnthɔŋɔŋ hɛlɛŋ Pailɛti sɛthɛ baŋ ba dɔma, na “Nkaana ka bi biye beŋ wo thimo beŋ ba yaŋ niŋ pɛyɛna?” Bindɛ mɛyiyɛ niŋ, na “Barabasi na.” 22Huna dome Pailɛti kɛnamɛŋ, na “Nama nda yaŋ ni Yisɔs na wo dɔma Banikisi woŋ?” Bindɛ fooma mɛyiyɛ niŋ ba dɔma, na “Ndɛ yantɛŋ ka kuyeŋ kubariŋande koŋ ba tuka.” 23Pailɛti thɔnthɔŋɔŋ bindɛ ba dɔma, na “Mbɛ banɛnɔy ba ni ndɛ?” Kɛrɛ bindɛ yame ntiŋ thiya masɔnkɔ, na “Ndɛ yantɛŋ ka kuyeŋ kubariŋande koŋ ba tuka.” 24Naa kute Pailɛti ba dɔma na ndɛ sa punku niya bɛyi yo bɛyi ka sɛthɛ baŋ, e ndɛ kuta soki-soki ba si see ka niyɔ, ndɛ sekithe mandi e looka thɛnkɔ nama thaŋ ka kɔtɔkɔy ka sɛthɛ baŋ e dɔma, na “Yaŋ kutɛ biyɛ gbɛthɛŋ ba ka kɔra hati lamgba woŋ baŋ. Huŋ pɛyɛ kendeŋ.” 25Huna dome sɛthɛ baŋ fooma kɛnama, na “Miŋ iŋ mpati bikɛntuŋ, miŋ kɔŋ niyɔ iŋ gbɛthɛŋ ba tuka hukɛnama haŋ.” 26Kɛna pɛniyɛ Pailɛti bindɛ Barabasi na. Naa thanki ndɛ niya ba Yisɔs tawo, ndɛ dunkuŋ niŋ ka kurugbani beŋ e ndɛ niya yamari ba bindɛ niŋ ka lɔŋa ka kuyeŋ kubariŋande koŋ e ndɛ kɛndɛ yantɔ haaŋ e kɛndɛ tuke. 27Kɛna ŋaye kurugbani bi ka bakɛrɛŋ woŋ beŋ Pailɛti e bindɛ bɔha Yisɔs na e niŋ biita ka banka nama ka, awa kurugbani beŋ fooma key pɛnkiyande Yisɔs na. 28Bindɛ ŋututu Yisɔs na yaba ba thooye nde ndɛ baŋ e bindɛ niŋ thiya kuhɔli kupothɛ. 29Bindɛ yehinuwa nɛmu maŋaye ka bathalɛŋ bibasoy e bindɛ niŋ tuta Yisɔs na ka yaha. Bindɛ dunkune niŋ kugbɔkɔdi ka yɔnkɔ huthome haŋ. Bindɛ bohe niŋ kunthuŋuyɛ e bindɛ niŋ kɔ thɔtha dɛkuiŋ ba dɔma, na “Maande, yindo gbaku wo ka biYusu beŋ woŋ. Haliko yi thɔɔkuwa sii.” 30Kɛna thuthe bindɛ niŋ, e bindɛ niŋ kanita kugbɔkɔdi koŋ e bindɛ niŋ kuŋ hɔrinuwa ka yaha haŋ. 31Naa thanki bindɛ niŋ thɔtha dɛkuiŋ, bindɛ ŋututu niŋ kuhɔli kupothinɔy koŋ, e bindɛ niŋ thiya yaba nama baŋ. Awa kɛna fuŋutu bindɛ niŋ ba niŋ ka yanta ka kuyeŋ kubariŋande koŋ ba niŋ kɔra. 32Naa kurugbani beŋ key ba ka yanta Yisɔs na, bindɛ pɛnkande iŋ hati lamgba wunthe wo dɔma na Saimɔŋ wo ŋaye ka mɛti ba ka Sairini. Kɛna pithite bindɛ hati lamgba woŋ baŋ ba kata kuyeŋ kubariŋande ku nde Yisɔs kati koŋ. 33Bindɛ tɛŋ ka tha ka dɔma na ka Kɔlɔkɔtha, wu thalintando ba dɔma, na “Ka tha ka kugbomgbokoro ku ka yaha.” 34Naa tɛŋ bindɛ kɛndɛ, wɔ wunthe dunkune Yisɔs na mampa ma tikitinuwando iŋ munki muŋalɔy ba ndɛ be thiiye. Kɛrɛ na miŋ nthɔŋ mɛŋ Yisɔs, ndɛ tha mɛŋ thiiye. 35Naa thanki kurugbani beŋ niŋ yanta ka kuyeŋ kubariŋande koŋ, bindɛ hanande yabɛŋ nama baŋ ka yɛla makoro. 36Awa bindɛ dɔŋɔy kɛndɛ ba niya Yisɔs na kantha. 37Ka thinthi ka yaha hu ka Yisɔs haŋ ka kuyeŋ kubariŋande koŋ, bindɛ kahataŋ kɛndɛ magbali ma ka thayimbɛŋ tha fuŋutiye bindɛ niŋ thaŋ, ma kɔŋ niya karaŋ nanaŋ baŋ, na “Yisɔs na woŋ baŋ, gbaku wo ka biYusu beŋ woŋ.” 38Ka lɔkɔ ba yanto Yisɔs ka kuyeŋ kubariŋande koŋ, biya biye bi tha putiyɔ siraŋ yanto nde hɛlɛŋ ka ŋayeŋ ŋabariŋande ka lɔkɔ babɛina, wunthe ka yɔnkɔ huthome hu ka Yisɔs haŋ, wunthe ka hupɔkɔdɔ haŋ. 39Ka lɔkɔ babɛina hanimaa bi daŋande nde kɛndɛ beŋ akey kaŋ yila thankaha kaŋ hɛtha Yisɔs na e gbonkiya wunɛnɔy ba wundɛ, 40e bindɛ niŋ kɔ dɔma, na “Yindo dɔmɛ nde na yi kɔŋ teeti yikiya ba ka Masaala baŋ, e yi hɛlɛŋ bɛŋ thoya ka gbɛɛŋ wo tɛŋinɛ wotaati woŋ. Mɛnɛ yina Hati ka Masaala woŋ gbeeŋ, thuha hɛ ka kuyeŋ kubariŋande koŋ e yi niyɔkɔ kisi.” 41Hali hɛlɛŋ bafodeni bibukuyuwɛ beŋ, karimɔkɔiŋ bi ka Siraŋ baŋ beŋ, mɛnɛ bakalani bibayahɛŋ beŋ athɔɔtɔy ka thɔtha Yisɔs na dɛkuiŋ e bindɛ dɔma, na 42“Ndɛ ni biya bihɛna kisi, kɛrɛ ndɛ sa punku niyɔkɔ kisi. E ndɛ kutɛ gbaku wo ka Isirɛli woŋ? Mɛnɛ ndɛ kɔŋ punku thuha ka kuyeŋ kubariŋande koŋ, miŋ kɔŋ niŋ ni lanɛya. 43Masaala na piiteke ndɛ, e ndɛ dɔma na Hati Masaala na ndɛ. Awa miŋ kɔŋ hɛ kutu mɛnɛ Masaala thimoŋ ba niŋ niya kisi.” 44Hali hɛlɛŋ biya biye bi tha putiyɔ siraŋ bi yanto iŋ wundɛ ka nanthe beŋ gbeeŋ bindɛ gbonkiye hɛlɛŋ nɛŋ niŋ. 45There ka hatɔ teete huntuma humandiŋ huna lɔŋande nde ka kuyɛkɛŋ kubɛina. Huntuma haŋ haŋ niyɔy ba wakathiŋ bitaati. 46Bɛrɛ ba wakathi wotaati woŋ, Yisɔs bereŋ iŋ thampa thatɔɔkɛ e dɔma, na “Ilai, Ilai, lama sabakathani?” wu thalintando ba dɔma, na “Masaala niŋ woŋ, Masaala niŋ woŋ, mbɛ hu baŋine yama yi?” 47Binɔndi ka biya bi kɔɔyɛ nde kɛndɛ kuwaŋ bi yuyɛ ndɛ si bereŋ beŋ, bindɛ dome, na “Hati lamgba woŋ baŋ kɔŋ thiyi Ilaiya na.” 48Wunthe ka biya beŋ thare yako e ka yɔthiŋita ntha ka mampa ma ba thanki yɔhɔ maŋ, e thɔtha kuyeŋ ka ntha kiŋ, e yekiniyɛ Yisɔs na ba ndɛ be sɔɔsi. 49Kɛrɛ bibintheŋ beŋ dome, na “Yumbaŋ hɛ, miŋ dethɛŋ hɛ mɛnɛ Ilaiya kɔŋ see ba niŋ si niya kisi.” 50Kɛna bereŋ hɛlɛŋ Yisɔs iŋ thampa thatɔɔkɛ e ndɛ ntiŋ kɔ thathina. 51Thika babimɛ ba yanto nde ba hakinande biya beŋ iŋ makonko ma ka kupɛnkintiyande ku ka Masaala koŋ, kaake ka banka bamandiŋ ba ka Masaala baŋ, saayande mateete ŋaye ka thinthi haaŋ athuhu ka pothi. Kuyɛkɛŋ koŋ thɛnɛŋ, awa e ŋathara ŋaŋ thɛɛthuwande ka thani ka nɔndi. 52Thayoma thaŋ pɛthɔ, awa biya binɔndi bi ka Masaala bi tukɛ nde beŋ ŋayino ka tuka haŋ. 53Bindɛ pɛyɛŋ maŋaye ka thayoma ka, awa naa ŋaye Yisɔs ka tuka haŋ bindɛ fuŋ ka Yɛrusalɛmi ka, ka kuto bindɛ iŋ biya bibɔyɛ. 54Naa kute bayaha wo ka kurugbani beŋ woŋ, mɛnɛ kurugbani bi iŋ wundɛ beŋ ka niya Yisɔs na kantha na thɛnɛŋ kuyɛkɛŋ koŋ mɛnɛ ba thankɛ niyɔ baŋ, bindɛ thoyo payɔ humandiŋ, e bindɛ dɔma, na “Hunɔndi yaathi, Hati ka Masaala na nde woŋ baŋ.” 55Yɛrɛmɛŋ bibɔyɛ kiŋ nde kɛndɛ ka koro Yisɔs ka bi kɔɔyɛ wuthokiye wuyete. Bindɛ bina bi yemɛ nde Yisɔs na ŋaye ka Kalili ba niŋ mase ka wali nama baŋ. 56Yɛrɛmɛŋ beŋ beŋ thɔɔtɔy Mariyama wo ŋaye nde ka mɛti ba ka Makadala, Mariyama nanda ka Yemisi mɛnɛ Yusufu, mɛnɛ nanda ka mpati bi ka Sɛbɛdi. 57Naa tɛŋ wuŋ mahɔnkɔlɛŋ, hati wathe wunthe wo bananhulu see, wo ŋaye ka mɛti ba dɔma na Arimathiya. Ndɛ kɔŋ dɔma na Yusufu, awa bakarandeŋ wo ka Yisɔs na nde hɛlɛŋ wundɛ. 58Ndɛ key ka Pailɛti ka e ndɛ niŋ ka thɔnthiŋina ba dunkuno kubeli ku ka Yisɔs koŋ ba niŋ mankuwa. Huna niye Pailɛti niŋ yamari ba ndɛ kuŋ ka dunkuno. 59Naa domo Yusufu ba ndɛ sɛkitha kubeli koŋ, ndɛ sekithe kuŋ e ndɛ kuŋ huitutuwa thika baŋama bahuhɛ. 60Ndɛ sekithe kubeli koŋ e ndɛ kuŋ ka taya ka yoma hu gbusiyo ndɛ ka kuthara koŋ nɔŋ makonko ba nɔŋ mankuwo. Naa taye ndɛ kuŋ kɛndɛ, ndɛ binkiliŋ raka humandiŋ e ndɛ huŋ ŋatha ka biyo hu ka yoma haŋ e ndɛ kɔ duwa ka mɛti ka. 61Ka lɔkɔ babɛina Mariyama wo ka Makadala mɛnɛ Mariyama wowuntheŋ woŋ bi kiŋ nde kɛndɛ, e bindɛ dɔŋɔ wusisande iŋ yoma haŋ ka tayo Yisɔs ka. 62Ka gbɛɛŋ wo yemɛ woŋ, wo biYusu beŋ hemuwe woŋ, bafodeni bibukuyuwɛ beŋ mɛnɛ biFaresini beŋ key thuŋande ka Pailɛti ka. 63Bindɛ key niŋ tepe ba dɔma, na “Hɛmɔŋ, miŋ siyi sɔkɔ hu tepe nde bahothi woŋ baŋ naa nde hintiŋ ndɛ wohɛmɛ. Ndɛ tepe nde ba dɔma, na ‘Naa yaŋ mankuwo, yaŋ kɔŋ hɛlɛŋ ŋaye ka tuka haŋ ka gbɛɛŋ wo tɛŋinɛ wotaati woŋ.’ 64Huna, niya yamari ba yoma nama haŋ ka niyo kantha haaŋ gbɛɛŋ wotaati woŋ daŋande, wuna sa bakarandeni nama beŋ niŋ ka punku tuwe e bindɛ kaa kaŋ tepuwe biya muŋ ba dɔma, na ‘Ndɛ ŋaye ka tuka haŋ,’ awa hothi hubɛina humankɛ haŋ hu kɔŋ yaŋ nɛnɔ ba hu nde mayoŋ haŋ.” 65Huna dome Pailɛti kɛnamɛŋ, na “Sɛkithaŋ kurugbani binɔndi awa niyaŋ ba bindɛ ka niya yoma haŋ kantha wuyɔhɔy.” 66Bindɛ key lɔŋ biyo hu ka yoma haŋ wukahɛ-kahɛ. Bindɛ yinthintande kulansi koŋ ka raka hu pututɛ biyo haŋ iŋ mayinki ka ŋayɔrɔ ŋaŋ e bindɛ kɛndɛ niya yamari ba banini yoma haŋ kantha beŋ kɛndɛ pɛyɔ.

will be added

X\