1 Naa bohe Yisɔs iŋ bakarandeni nama beŋ thuriye ka mɛti ba ka Yɛrusalɛmi baŋ, bindɛ tɛŋ ka mɛti ba ka Bɛthɛfɛki, ka kusɛri ku dɔma na Ɔlifisi. Kɛna ŋinde Yisɔs bakarandeni nama biye, 2 e ndɛ dɔma kɛnamɛŋ, na “Kaaŋ toloŋ ka bikidi hu siseke beŋ haŋ, awa naa beŋ tɛŋ kɛndɛ, beŋ kɔŋ kɛndɛ pɛnki mbapu wokomisa yuke iŋ hati nama. Pɛɛkaŋ bindɛ e beŋ bindɛ sisa kiyaŋ do. 3 Mɛnɛ wɔ kɔŋ bena thɔnthɔŋɔŋ ba beŋ bindɛ peeke, tepeŋ niŋ ba dɔma, na ‘Mariki woŋ na thimo bindɛ,’ awa wobiyɛ bindɛ woŋ kɔŋ bena bindɛ dunkune yako.” 4 Wuŋ baŋ niyɔy haliko ba thiŋina hu tepe nde banabi woŋ haŋ ba dɔma, na 5 “Tɛpa ka mɛti ba ka kusɛri ku ka Saiyɔŋ koŋ: Detha, gbaku nda woŋ na see kɛnda woŋ, wothathinɔkɔy e ndɛ tutɔ ka mbapu woŋ, iŋ ka hati ka mbapu.” 6 Bakarandeni beŋ key e bindɛ ka niya nɔŋ na nunkuneke nthɔŋ bindɛ Yisɔs na. 7 Bindɛ sisi mbapu wokomisa woŋ mɛnɛ hati nama woŋ ka Yisɔs. Naa sisi bindɛ mbapuiŋ beŋ, bindɛ yiinthi ŋahɔli namɛŋ ŋaŋ ka mbapuiŋ beŋ, awa Yisɔs tutɔy kɛndɛ. 8 Awa binɔndi ka sɛthɛ baŋ taayi ŋahɔli namɛŋ ŋaŋ ka gboŋa baŋ, binɔndi thiinki buyitha mɛnɛ mgbenthɛŋ e bindɛ muŋ dɛɛnka ka gboŋa baŋ ba niŋ niya yiki. 9 Awa sɛthɛ ba Yisɔs na ka kɔtɔkɔy baŋ mɛnɛ ba niŋ mahɛŋ baŋ yele thampa ba dɔma, na “Miŋ gbuŋunuwɛŋ wo ŋaye ka bɔnsɔŋ ba ka gbaku woŋ Dauda baŋ. Thaduba tha kiŋ ka wo seeye ka keŋ ku ka Mariki woŋ koŋ. Miŋ gbuŋunuwɛŋ Masaala na wo ka thinthi woŋ.” 10 Naa biyande Yisɔs ka mɛti ba ka Yɛrusalɛmi, biya beŋ fooma ka mɛti ka thɛnɔkɔi, e bindɛ dɔma, na “Mbɛ woŋ baŋ?” 11 Huna dome sɛthɛ baŋ, na “Banabi woŋ Yisɔs na woŋ baŋ, wo ŋaye ka mɛti ba ka Nasarɛthi baŋ, ka kuyɛkɛŋ ku ka Kalili koŋ.” 12 Naa wundɛ ka Yɛrusalɛmi, ndɛ biyande ka banka bamandiŋ ba ka Masaala baŋ e ndɛ kantha fooma biya bi ni gbɔŋ beŋ e bindɛ kɔ boya ka banka ba ka Masaala baŋ. Ndɛ koŋotoni thebuluiŋ beŋ fooma bi ka bi thikipi kɔbiri woŋ beŋ, awa iŋ mudoŋeŋ mu ka bi ni kukuni gbɔŋ beŋ. 13 Huna dome ndɛ kɛnamɛŋ, na “Wuŋ gbalo ka magbali ma ka Masaala maŋ ba dɔma, na ‘Banka niŋ baŋ ba kɔŋ dɔma na banka ba niye kuraminɛ.’ Kɛrɛ beŋ sikiŋ bɛŋ ka tha ka batuwani nuneke.” 14 Awa kɛna see biya bi mankɔy thaaya beŋ mɛnɛ bagbɛthɛŋ beŋ ka Yisɔs ka banka ba ka Masaala baŋ ba puyo. Awa ndɛ puyi bindɛ. 15 Bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ thɔɔyɛ ka mathoŋ naa kute bindɛ bɛyiniŋ bathakaba ba Yisɔs ni baŋ, iŋ na mpati muŋ sɔnkɔti Yisɔs na ka banka ba ka Masaala baŋ, na “Miŋ gbuŋunuwɛŋ wo ŋaye ka bɔnsɔŋ ba ka gbaku woŋ Dauda baŋ.” 16 Huna dome bindɛ ka Yisɔs, na “E yuyeŋ hu bindɛ tɛpi haŋ?” Huna dome Yisɔs kɛnamɛŋ, na “Yaŋ yuyeŋ.” Kɛna thonthiŋine Yisɔs bindɛ ba dɔma, na “E beŋ niyeta hɛ nɔŋ magbali ma ka Masaala maŋ karaŋ, ka tepe bagbali woŋ kɛ ka Masaala, na ‘Yi kɔŋ diinki mpatiyɛŋ beŋ mɛnɛ malɛɛthɛŋ ba yina gbuŋunuwa kugbuŋunu kuthankinuwɛ.’ ” 17 Yisɔs pɛyi bindɛ kɛndɛ e ndɛ kaa ka mɛti ba ka Bɛthani e ndɛ kɛndɛ ka hura. 18 Naa Yisɔs duu sanka ka mɛti ba ka Yɛrusalɛmi, ndɛ kaho kɔnthɔ ka gboŋa. 19 Kɛna kute ndɛ kuyeŋ ku iŋ mutiŋ muthɔma muŋ koŋ kuwaŋ ka gboŋa baŋ. Huna key ndɛ ka kuyeŋ koŋ ba ka detha ba mutiŋ. Kɛrɛ ndɛ tha pɛnki kɛndɛ ntha o ntha yɔkɔŋ bompa buthɔ. Huna dome ndɛ ka kuyeŋ koŋ, na “Haliko yi be tha nɔŋ nda tiŋ mutiŋ haaŋ nɔŋ nda.” Ka yako babɛina, kuyeŋ koŋ thokinɔkɔi. 20 Naa kute wuŋ bakarandeni beŋ, bindɛ ni thakaba wumandiŋ e bindɛ dɔma, na “Nama dɔmɛ kuyeŋ koŋ ku kɔŋ thokineke yako-yako na?” 21 Yisɔs mɛyiyɛ bindɛ ba dɔma, na “Mɛnɛ beŋ kiŋ iŋ lanɛya e beŋ thana niyɔ haamɛ ba niya lanɛya, beŋ kɔŋ punku niya ba ni yaŋ ka kuyeŋ koŋ koŋ baŋ. Wuŋ ka hɔkɔŋ ka kuyeŋ koŋ kuthɔ, kɛrɛ hali adɔmɛ na beŋ ka kusɛri koŋ koŋ baŋ, na ‘Gbɔnɔkɔ dondo baŋ e yi ka gbantɔkɔ ka mankɔ ka,’ wu kɔŋ punku ba niyɔ. 22 Huna mɛnɛ beŋ ni lanɛya, bɛyi o bɛyi ba beŋ thɔnthɔŋɔŋ ka kuraminɛ, beŋ kɔŋ bɛŋ niyiya.” 23 Naa biyande Yisɔs ka banka bamandiŋ ba ka Masaala baŋ, bafodeni bibukuyuwɛ beŋ mɛnɛ bayahɛŋ bi ka biya beŋ key ka Yisɔs thanani biya beŋ ka, e bindɛ niŋ ka thɔnthiŋina ba dɔma, na “Mbɛ mayoho ma yi niye bɛyiniŋ baŋ baŋ ka banka bamandiŋ ba ka Masaala baŋ, awa nkaana dunkune yina mayoho maŋ maŋ baŋ?” 24 Huna meyiye Yisɔs bindɛ ba dɔma, na “Yaŋ hɛlɛŋ nɛŋ, yaŋ kɔŋ bena thɔnthɔŋɔŋ kuthɔnthɔŋɔŋ kunthe, awa mɛnɛ beŋ kɔŋ yama ni yaabi, yaŋ kɔŋ bena tepe ka kute yaŋ mayoho ma yaŋ punke niye bɛyiniŋ baŋ baŋ. 25 Kama kute nde Yɔni mayoho ba biye biya biye hu ka Masaala haŋ? E ka Masaala maa ka biyamɛti?” Kɛna bohe bindɛ gbakila bindɛ bithɔ e bindɛ kɔ dɔma, na “Mbɛ hu miŋ tɛpi? Mɛnɛ miŋ dome, na ‘Ka Masaala ŋaye na mɛŋ,’ ndɛ kɔŋ dɔŋ kɛntuŋ, na ‘Mbu mbɛ hu tha nde beŋ niya Yɔni na lanɛya?’ 26 Mɛnɛ miŋ dome tete, na ‘Ka biyamɛti ŋaye na mayoho mabɛina,’ miŋ kɔ payɔ biya beŋ ba ba bindɛ mina ni baŋ, baa bi siyuweŋ ba dɔma na Yɔni banabi na nde.” 27 Huna meyiye bindɛ Yisɔs na ba dɔma, na “Miŋ kɔita ka ŋaye mayoho ma ka Yɔni maŋ.” Huna dome nɛnɛ Yisɔs kɛnamɛŋ, na “Yaŋ hɛlɛŋ nɛŋ yaŋ sa bena tepe ka kute yaŋ mayoho makiyaŋ maŋ.” 28 Yisɔs key ka kɔtɔkɔy e dɔma ka bafodeni beŋ mɛnɛ bayahɛŋ beŋ, na “Nama siyuwe beŋ? Wɔ wathe wunthe na nde iŋ mpati biye bibiyɛthɛŋ. Lɔkɔ banthe ndɛ tepe wokalaŋ woŋ, na ‘Hatiŋ woŋ, kaa hɛ ka niya wali ka dumgbu niŋ ka.’ 29 Hati woŋ mɛyi, na ‘Yaŋ kaayita,’ kɛrɛ naa nambe nthɔŋ wuŋ wuyete, ndɛ sikinande masiyi nama e ndɛ kaa ka niya wali baŋ ka dumgbu ka. 30 Fandamɛŋ woŋ key hɛlɛŋ ka wɛndama ka e niŋ ka tepe ba kaa ka niya wali ka dumgbu nama ka. Hati woŋ mɛyi, na ‘Papaŋ, yaŋ kɔŋ key.’ Kɛrɛ ndɛ tha key. 31 Ka mpati bibiye beŋ beŋ baŋ, nkaana niyɛ mathimo ma ka fandamɛŋ maŋ?” Huna dome bindɛ ka Yisɔs, na “Wokalaŋ woŋ na.” Huna dome Yisɔs kɛnamɛŋ, na “Yaŋ kɔŋ bena tepe nɔndi baŋ, bathuuni duthu bi dɔma ba bindɛ niyɔ bahakɛŋ beŋ mɛnɛ yɛrɛmɛŋ bi katitoko nama o nama beŋ bi kɔŋ nɔŋ yenke biyande ka Hugbakinɛ hu ka Masaala haŋ ba beŋ. 32 Yɔni wo Babiye woŋ see kendeŋ ba bena toŋine gboŋa bathumbɛ baŋ, kɛrɛ beŋ tha niŋ ni lanɛya. Kɛrɛ bathuuni duthu woŋ beŋ mɛnɛ yɛrɛmɛŋ bi katitoko nama o nama beŋ ni niŋ lanɛya. Hali naa kute nde beŋ wuŋ na, beŋ tha sikinande masiyi ndeŋ maŋ e beŋ niŋ niya lanɛya.” 33 Kɛna tepe Yisɔs bindɛ ba dɔma, na “Poniyaŋ hɛlɛŋ mbɔrɔ kihɛna kuiha. Bayɔi wunthe na thuuwɛ nde muthuu ka dumgbu nama ka e ndɛ bɛŋ pɛnkinande kunku. Ndɛ gbuse matha ka pothe mutiŋ muŋ, awa e ndɛ kɛndɛ kiya kuwera ka lamgbeŋ beŋ tutɔ ba pama dumgbu baŋ fooma. Ndɛ dunkuŋ dumgbu baŋ baŋ ka lamgbeŋ bi tepe ndɛ ba niŋ kɔsiniyɛ mutiŋ mukɛnama ba ti ndɛ see. Ndɛ key biyasi haŋ ka kuyɛkɛŋ kuhɛna napooŋ. 34 Naa tɛŋ lɔkɔ ba ka thada mutiŋ muŋ, ndɛ ŋindi bawaliŋ nama beŋ ka lamgbeŋ beŋ ba kaayiyɛ mutiŋ mukɛnama muŋ. 35 Naa kute lamgbeŋ beŋ bawaliŋ beŋ beŋ baŋ, bindɛ tawe wunthe, bindɛ kore woŋ, awa e bindɛ lɔɔpuwa wowuntheŋ woŋ. 36 Huna ŋinde hɛlɛŋ ndɛ bawaliŋ bihɛna, bi yamɛ ba bimayoŋ beŋ. Awa bindɛ ni hɛlɛŋ bindɛ na bi yenke nde ŋindo beŋ na. 37 Ka wumankɛ nagbɔŋ kɛna ŋindi ndɛ hati nama woŋ kɛnamɛŋ, e dɔma ka yɛthɛ nama, na ‘Yaŋ kɔŋ nda siyi ba dɔma na bi kɔŋ nda dunkune hati niŋ woŋ yiki.’ 38 Kɛrɛ naa kute lamgbeŋ beŋ hati woŋ, bindɛ dome ka yɛthɛ namɛŋ, na ‘Woŋ baŋ na biyɛ kɛɛ baŋ. Saaŋ miŋ be niŋ kɔri wuna miŋ biyɔ kɛɛ baŋ.’ 39 Kɛna bohe bindɛ niŋ e bindɛ niŋ fuŋuta ka dumgbu baŋ, awa e bindɛ niŋ kɔra. 40 “Nama siyuwe beŋ na wuŋ niyɔ naa wo biyɛ dumgbu baŋ woŋ see?” 41 Huna dome bafodeni beŋ mɛnɛ bayahɛŋ beŋ ka Yisɔs, na “Ndɛ kɔŋ kɔri lamgbeŋ binɛnɔy beŋ beŋ baŋ, awa e ndɛ dunkuna dumgbu baŋ ka lamgbeŋ bihɛna bi niŋ dunkune mutiŋ muŋ naa lɔkɔ baŋ tɛŋ.” 42 Huna dome Yisɔs kɛnamɛŋ, na “E beŋ niyeta hɛ nɔŋ karaŋ magbali ma ka Masaala ma tɛpɛ maŋ ba dɔma, na ‘Raka hu baŋino iŋ bathoyini beŋ haŋ, huna see niyɔ raka hu yamɛ nthɔŋ nda niyɔ waŋ ka thoya haŋ. Mariki woŋ na niyɛ wuŋ baŋ, awa bɛyi bathakaba bɛna miŋ ba wuŋ kuta.’ 43 “Huna yaŋ tepe bena, beŋ kɔŋ kanita makooye ma kute beŋ maŋ ba niyɔ ka Hugbakinɛ hu ka Masaala haŋ e mɛŋ dunkuno ka biya bihɛna bi sisi mutiŋ muyɔhɔy. [ 44 Wɔ o wɔ wo ŋote raka haŋ haŋ baŋ, ndɛ kɔŋ yɔminuwɔ. Awa mɛnɛ raka haŋ haŋ baŋ ŋote wɔ, hu kɔŋ niŋ kɔri.]” 45 Naa yuye bafodeni bibukuyuwɛ beŋ mɛnɛ biFaresini beŋ mbɔrɔiŋ kiŋ kiŋ baŋ, e bindɛ kɔthɔ ba dɔma na Yisɔs kɔŋ gbonkoy ba bindɛ, 46 kɛna yole bindɛ ba niŋ bɔha. Kɛrɛ bindɛ kɔ payɔ sɛthɛ baŋ, baa bi siyuweŋ ba dɔma na Yisɔs banabi na ndɛ.
