Mathiyu 18

1Ka lɔkɔ babɛina bɛna see bakarandeni beŋ ka Yisɔs, e bindɛ niŋ thɔnthiŋina ba dɔma, na “Nkaana yamɛ niyɔ wɔ mandiŋ ka Hugbakinɛ hu ka ariana haŋ?” 2Huna thiye Yisɔs hati woyete e ndɛ niya ba ndɛ kɔɔ mateete makɛnamɛŋ, 3e ndɛ dɔma, na “Yaŋ kɔŋ bena tepe nɔndi baŋ, yɔkɔŋ beŋ sikiyɔkɔi ka maniyɔ makendeŋ maŋ e beŋ niyɔ nɔŋ mpatiyɛŋ. Mɛnɛ huŋ kutɛ, beŋ sa punku biyande ka Hugbakinɛ hu ka ariana haŋ. 4Wɔ wo niyɔ wɔ mandiŋ woŋ ka Hugbakinɛ hu ka ariana haŋ, ndɛ na wɔ thathinɔkɔ woŋ nɔŋ hati woŋ baŋ. 5Wɔ o wɔ wo yɛrɔkɔ hati nɔŋ hati woyete woŋ baŋ ka keŋ kukiyaŋ koŋ, wɔ bɛina yɛrɔkɔy yama. 6“Mɛnɛ wɔ yo wɔ ni ba wunthe ka mpati beŋ beŋ baŋ bi niyɛ yama lanɛya beŋ ŋɔta ka hakɛ, wu kɔŋ niyɔ hita ba wɔ bɛina yantino raka humandiŋ ka nkoyo nama kiŋ e ka muluno ka mankɔ masuŋɔi-suŋɔi maŋ. 7Nambara ba kɔŋ see ka biya bi ka faido beŋ baa bindɛ thiiko ba ŋɔta ka hakɛ. Kɛrɛ nambara ka wɔ sisi kuthiiki koŋ koŋ woŋ. 8“Mɛnɛ yɔnkɔ nda maa kuthaki nda ni ba yi ŋɔta ka hakɛ, thoŋa e yi yɛla. Wu kɔŋ niyɔ hita yi ba kuta sii ba kɔy yo kɔy wu ka yɔnkɔ maa wu ka kuthaki, ayaŋ yi ba yelo ka yahanama ka buu bu sa dɔmɔ buŋ iŋ thɛnkɔ mɛnɛ ŋathaki. 9Awa mɛnɛ hooya nda haŋ ni ba yi ŋɔta ka hakɛ, fuŋuna huŋ e yi huŋ yɛla. Wu kiŋ hita yi ba kuta sii ba kɔy yo kɔy iŋ hooya hunthe, ayaŋ yi ba niyɔ iŋ thaaya thaye e yi yelo ka buu bu ka yahanama buŋ.” 10“Baŋ yethitɔ wunthe ka mpati beŋ beŋ baŋ. Yaŋ kɔŋ bena tepe, malekɛŋ namɛŋ beŋ ka ariana bina kɔɔ timo tima ka kɔtɔkɔy ka Fandaŋ wo ka ariana woŋ. [ 11Baa Hati ka Wɔ woŋ see ba niya kisi biya bipiriŋɛ beŋ.] 12“Nama siyuwe beŋ na wuŋ niyɔ ba wɔ wunthe wo iŋ takɛŋ kɛmɛ wunthe e wunthe ka bindɛ piriŋa? E ndɛ sa pɛyi bikɔnthɔ kasɔŋ-kanaŋ iŋ bisɔŋ-binaŋ beŋ ka ŋasɛri ŋaŋ e ndɛ kaa kaŋ deethuwa wo piriŋɛ woŋ? 13Yaŋ kɔŋ bena tepe nɔndi baŋ, naa ndɛ kute niŋ, ndɛ kɔŋ yehitɔkɔ ba ndɛ, e wuŋ yama ba bikɔnthɔ kasɔŋ-kanaŋ iŋ bisɔŋ-binaŋ bi tha piriŋ beŋ. 14Nɛna hɛlɛŋ wuŋ niyɔ ka Fanda ndeŋ wo ka ariana woŋ. Mathimo nama kutɛ ba wunthe ka mpati nama beŋ beŋ ba piriŋa. 15“Mɛnɛ wɛnda ka kubɔri ku ka Masaala koŋ ni yina wunɛnɔy, kaa kɛnama ka e yi niŋ ka tepe ba ni ndɛ yina baŋ ka beŋ biye. Mɛnɛ ndɛ poniyɛ yina kuiha, yi ni hɛlɛŋ ba ndɛ niyɔ wɛnda. 16Mɛnɛ ndɛ tha yina poniyɛ kuiha, diŋa wɔ wunthe maa biya biye ka kaa, wuna ‘sɔkɔ o sɔkɔ hu yi tɛpi hu be niyɔ iŋ maseri ma ka biya biye maa bitaati bi yi diŋ ka kaa beŋ,’ nɔŋ na tepe magbali ma ka Masaala maŋ na. 17Mɛnɛ ndɛ baŋaŋ ba hɛlɛŋ bindɛ poniyɛ kuiha, tɛpa huŋ ka makɔmande ma ka biya bi ka Masaala beŋ maŋ. Awa mɛnɛ ndɛ baŋaŋ hɛlɛŋ ba bindɛ poniyɛ kuiha, ndɛ niyɔyŋ ka kuwaŋ kukɛnda nɔŋ wɔ wo be ni Masaala na lanɛya na ndɛ maa bahakɛ wo tha sikiŋ sɔkɔrɔ hakɛŋ bakɛnama baŋ. 18“Yaŋ kɔŋ bena tepe nɔndi baŋ, bɛyi o bɛyi ba beŋ baŋaŋ ka faido, Masaala kɔŋ bɛŋ baŋaŋ ka ariana. Awa bɛyi o bɛyi ba beŋ yɛrɔkɔ ka faido, Masaala kɔŋ bɛŋ yɛrɔkɔ ka ariana. 19“Yaŋ kɔŋ hɛlɛŋ bena tepe ba dɔma na mɛnɛ biya biye ka beŋ niyɔy hunthe ka faido ba bɛyi o bɛyi ba bindɛ thɔnthɔŋɔŋ ka kuraminɛ bi kɔŋ bɛŋ niyiya iŋ Fandaŋ wo ka ariana woŋ. 20Ka biya biye maa bitaati niyɔ ka keŋ kukiyaŋ, yaŋ kɔŋ niyɔ iŋ bindɛ.” 21Kɛna see Pita ka Yisɔs e ndɛ niŋ thɔnthiŋina, na “Mariki, tima dɔŋɔ hu wɛndaŋ yama ni wunɛnɔy, awa tima dɔŋɔ hu yaŋ niŋ pɛniyɛ? E mɔlɔŋ ba dɔŋɔ kasɔŋ-kaye?” 22Huna mɛyiyɛ niŋ Yisɔs, na “Yaŋ sa yina tepe na dɔŋɔ kasɔŋ-kaye na yi niŋ pɛniyɛ, kɛrɛ kɔnthɔ kasɔŋ-kaye dɔŋɔ kasɔŋ-kaye na yi niŋ pɛniyɛ. 23Hugbakinɛ hu ka ariana haŋ athɔyande nɔŋ mbɔrɔ ki ka gbaku wo dɔŋɔy ba kɔthɔ ti kɔbiri wo thohite niŋ bayahɛŋ nama beŋ. 24Naa sɛsi nthɔŋ ndɛ kɔthɔ ti kɔbiri woŋ, bayaha wunthe wo thohite nde niŋ kɔbiri wo liyoni wuluiŋ-wuluiŋ siso kɛnama. 25Kɛrɛ naa tha hati lamgba woŋ niŋ punku thunkuna nanhulu baŋ baŋ, gbaku nama woŋ ni yamari ba ndɛ be niya gbɔŋ, wɔtɔ nama, mpati nama, mɛnɛ ntha yo ntha kikɛnama haliko nanhulu baŋ ba be thunkuna. 26Kɛna kunthuŋe bayaha woŋ baŋ ka kɔtɔkɔy kɛnama, e niŋ theteke, na ‘Gbaku woŋ, niya yama muyuŋ. Yaŋ kɔŋ yina thunkuŋ fooma.’ 27Kɛna kutiye niŋ gbaku nama woŋ nkinikiniŋ e ndɛ niya ba ndɛ kaa, awa ndɛ pɛniyɛ niŋ dɔɔnthɔ baŋ. 28“Kɛrɛ bayaha wowunthe wobɛina woŋ, naa bohe nthɔŋ ndɛ kaa, ndɛ pɛnkande iŋ ntɔ nama wo bayaha wo thohite niŋ liyoni kɛmɛ wunthe. Kɛna bohe ndɛ niŋ ka nkoyo kiŋ e niŋ siikita, e dɔma, na ‘Thunkuna yama dɔɔnthɔ baŋ.’ 29Kɛna kunthuŋe badɔɔnthɔ nama woŋ ka kɔtɔkɔy kɛnama e niŋ theteke ba dɔma, na ‘Yaandi, niya yama muyuŋ. Yaŋ kɔŋ yina thunkuŋ.’ 30Kɛrɛ hati lamgba woŋ tha mɛyi ba niŋ pɛniyɛ dɔɔnthɔ baŋ. Kɛna bohe ndɛ niŋ e niŋ ka thiya ka yeeli na yɔkɔŋ ndɛ thunkuŋ dɔɔnthɔ baŋ. 31Naa kute nthɔŋ ntɔni nama bi ndɛ ni wali beŋ ka tha banthe ba thanki ndɛ niya baŋ, bindɛ ni thakaba wumandiŋ, awa bindɛ key tepe gbaku namɛŋ woŋ ba thankɛ niyɔ baŋ. 32Huna thiye niŋ gbaku nama woŋ e niŋ tepe, na ‘Bawali na yi wonɛnɔy. Yaŋ thanki yina pɛniyɛ fooma dɔɔnthɔ ba yi ba yama thunkuna baŋ baa yi theteke yama. 33Yi kiŋ nde ba kutiyɛ ntɔ nda na nkinikiniŋ, nɔŋ na kutiye yaŋ yina nkinikiniŋ na.’ 34Gbaku nama woŋ thɔɔyɛ ka mathoŋ wumandiŋ, e ndɛ dunkuna niŋ ka ndɛ niyo nambara ka yeeli woŋ haaŋ yɔkɔŋ ndɛ thunkuŋ dɔɔnthɔ nama baŋ. 35“Nɛna hɛlɛŋ Fandaŋ wo ka ariana woŋ ni ka wɔ o wɔ ka beŋ, mɛnɛ beŋ tha pɛniyɛ mbɛnda ndeŋ ka thathukuma ndeŋ thaŋ.”

will be added

X\