Mathiyu 10

1Yisɔs thiyi bakarandeni nama bikɔhi iŋ biye beŋ ka tha banthe e ndɛ bindɛ dunkune sɛmbɛ iŋ mayoho ba kantha mbayiŋ binɛnɔy beŋ, mɛnɛ ba kaninande biyamɛti iŋ bindɛ, ba puya fooma nthoonani kihakuwande mɛnɛ kɔnthɔhiliŋ bi ka ŋakɔtɔ fooma. 2Ŋakeŋ ŋa ka baseriŋ bithɔɔkɔ beŋ ŋaŋ ŋɛna ŋaŋ ŋaŋ: womayoŋ woŋ na Saimɔŋ, wo dɔma Pita woŋ, mɛnɛ Anduru wɛndama; Yemisi hati ka Sɛbɛdi, mɛnɛ Yɔni wɛndama; 3Filipi, mɛnɛ Batholomiyu; Thɔmɔsi, mɛnɛ Mathiyu bathuu duthu woŋ; Yemisi hati ka Alifiyɔsi, mɛnɛ Thadiyɔsi; 4Saimɔŋ, wo nde kurugba woŋ, mɛnɛ Yudasi Isakariyɔti, wo niyɛ Yisɔs na gbɔŋ woŋ. 5Lamgbeŋ kɔhi iŋ biye beŋ beŋ bina ŋindi Yisɔs e bindɛ nunkunɔkɔ ba dɔma, na “Baŋ key ka siyani bahɛna baŋ, awa baŋ biyande ka mɛti o mɛti ba ka kuyɛkɛŋ ku ka Sameriya. 6Kɛrɛ kaaŋ toloŋ ka biya bipiriŋɛ beŋ nɔŋ takɛŋ ka siya ba ka Isirɛli beŋ baŋ. 7Kaaŋ ka niya kɛwandi ba dɔma, na ‘Hugbakinɛ hu ka ariana haŋ thuriye.’ 8Puyaŋ bithoonɔi beŋ, ŋayinaŋ bitukɛ beŋ ka tuka haŋ, puyaŋ biya bi iŋ nthoonani kinɛnɔy ki bohe ka kɔtɔ ku ka wɔmɛti koŋ ka thinthi, kaninandeŋ biya iŋ mbayiŋ. Beŋ kute wu ka iŋ mɔlɔŋ. Huna dunkuŋaŋ nɛnɛ wu ka iŋ mɔlɔŋ. 9Baŋ diŋ boyi ka kaa, baŋ diŋ kɔbiri o kɔbiri ka kaa, hali hintiŋ sɛnti wunthe baŋ niŋ thiyi ka mbumbusɛŋ ndeŋ kiŋ. 10Baŋ diŋ ponthoiŋ ka biyasi ndeŋ haŋ, baŋ diŋ yabɛŋ baye-baye, baŋ diŋ dagbalɛŋ, baŋ diŋ ŋagbɔkɔdi, baa bawali woŋ kiŋ ba dunkuno fooma mu panke ndɛ muŋ. 11“Awa mɛti o mɛti maa thabikidi o thabikidi tha beŋ biyande, dethaŋ ba wɔ wo bena yɛrɔkɔ e beŋ niŋ thɔnthiŋina ba bena niya yikiya. Mɛnɛ ndɛ yɛrɔkɔy, niyɔŋ kɛndɛ haaŋ e beŋ nɔŋ kɛndɛ fuŋa. 12Mɛnɛ beŋ biyande ka banka baŋ, maanaŋ bi beŋ kɛndɛ pɛnki beŋ. 13Mɛnɛ biya bi ka banka babɛina yɛrɔkɔy bena, dɔmaŋ, na ‘Haliko mathɛbɛ ma niyɔ dondo baŋ.’ Kɛrɛ mɛnɛ bindɛ tha bena yɛrɔkɔ, baŋ nda bindɛ maaŋ. 14Mɛnɛ wɔ yo wɔ tha bena yɛrɔkɔ, maa bindɛ tha bena poniyɛ kuiha, konkaŋ kuligbi koŋ ka ŋathaki ndeŋ ŋaŋ na beŋ kɔ kɛndɛ fuŋ, haliko wu be niyɔ maseri kɛnamɛŋ. 15Yaŋ kɔŋ bena tepe nɔndi baŋ, ka tha ka bɛina ka kɔŋ si yaŋ teetuwo iŋ Masaala ka lɔkɔ ba ka kukɔnsɔŋɔŋ koŋ baŋ adaŋande mɛtiŋ banɛnɔy ba ka Sɔdɔmi mɛnɛ ka Kɔmɔra. 16“Yaŋ kɔŋ bena ŋindi ka biyamɛti nɔŋ ka takɛŋ key ka mateete ma ka yaŋɛŋ. Bɛna niyaŋ kuthɛgbɛ hadeni bikendeŋ beŋ nɔŋ na bikɛkɛni ni kuthɛgbɛ hadeni bikɛnamɛŋ awa e beŋ niyɔ bendo thɛbɛ nɔŋ ŋarotho. 17Niyaŋ kuthɛgbɛ ba biyamɛti binɔndi beŋ, baa bi kɔŋ bena bohi e bindɛ bena kata ka kaamani beŋ, awa bi kɔŋ bena tawu ka bankɛŋ namɛŋ bathuŋuyande baŋ. 18Awa beŋ kɔŋ bɔɔluwando ka kɔtɔkɔy ka bakɛrɛni beŋ mɛnɛ ka gbakuiŋ beŋ saathɛ ba kiyaŋ, haliko ba niya maseri kɛnamɛŋ iŋ siyani bahɛna baŋ ba Huseri Huyɔhɔy haŋ. 19Naa beŋ key kiya ka kɔtɔkɔy kɛnamɛŋ ba konsiŋino, baŋ ni thɔrɔ ba hu beŋ tɛpi maa iŋ na beŋ huŋ tepe, baa Masaala kɔŋ bena toŋine hu beŋ tɛpi ka wakathi wobɛina. 20Ka lɔkɔ babɛina beŋ kutɛ gbonkiyiyɔkɔ, kɛrɛ Yina wo ka Fanda ndeŋ woŋ na gbonkoy maŋaye kendeŋ. 21“Ka lɔkɔ babɛina wɔ kɔŋ dunkuŋ wɛndama na ba ndɛ koro. Awa komisa wowathe kɔŋ dunkuŋ hati nama ba ndɛ koro, awa mpati bi kɔŋ ŋaye ma sɔkinɔkɔ biya namɛŋ, awa bi kɔŋ ni ba bindɛ koro. 22Awa beŋ kɔŋ thambiyo iŋ biyamɛti saathɛ ba kiyaŋ. Kɛrɛ wo ni muyuŋ woŋ haaŋ ka mapeye maŋ, ndɛ kɔŋ niyɔ kisi. 23Naa bindɛ ni bena thɔrɔ ka mɛti banthe saathɛ ba kiyaŋ, kitaŋ e beŋ kaa ka babantheŋ baŋ. Yaŋ kɔŋ bena tepe nɔndi baŋ, beŋ sa niye thanke kaandiyande fooma mɛtiŋ ba ka Isirɛli baŋ, wo domo Hati ka Wɔ woŋ kɔŋ see. 24“Bakarandeŋ woŋ yameta ba karimɔkɔ nama. Waayi woŋ yameta ba mariki nama woŋ. 25Atɛŋ ba bakarandeŋ woŋ niyɔ nɔŋ na karimɔkɔ nama woŋ na, awa e waayi woŋ niyɔ nɔŋ na mariki nama woŋ na. Awa naa domo mariki wo ka banka baŋ woŋ na Beelesibuli, gbaku wo ka mbayiŋ beŋ woŋ, kubɔri nama koŋ ku kɔŋ yaŋ thiyo ŋakeŋ ŋanɛnɔi! 26“Baŋ payɔ biyamɛti, baa bɛyi o ka ba pututɔy ba sa tɔŋinɔkɔ nagberekethe, maa ba nunɔkɔi ba sa kothiyo. 27Ba yaŋ bena tepe baŋ ka huntuma haŋ, ba kɔŋ nɔŋ gbonkiya hatɔ teete, awa ba beŋ yuyɛ ba si ŋɔyintoko baŋ, ba kɔŋ koyiŋa ka mɛti ka fooma. 28Baŋ payɔ bi kɔri bena beŋ, baa kɔtɔ koŋ kuna hɔkɔŋ bindɛ teeti. Bindɛ sa punku teetuwa yinɛŋ ndeŋ beŋ. Kɛrɛ payɔŋ Masaala na wo punku teetuwa yinɛŋ ndeŋ beŋ mɛnɛ ŋakɔtɔ ndeŋ ŋaŋ ka yɛlɛ muŋ ka yahanama. 29E sɛnti wunthe kutɛ sonkoiŋ biye boyo? Kɛrɛ wunthe ka beŋ beŋ baŋ sa tuku mahɛŋ ma mathimo ma ka Fanda ndeŋ wo ka ariana woŋ kutɛ. 30Hali hintiŋ bɔɔyɛ ndeŋ bu ka thankaha buŋ bu kɔndɔi fooma. 31Huna baŋ payɔ, beŋ yameŋ ba sonkoiŋ beŋ beŋ baŋ. 32“Wɔ o wɔ wo tepe biyamɛti ba dɔma na ndɛ kɔthɛŋ yama, yaŋ kɔŋ nɛnɛ nɛŋ gbonkoy ba wundɛ ka Fandaŋ woŋ ka ariana. 33Awa wɔ yo wɔ wo yama buuhu ka biya, yaŋ kɔŋ niŋ buuhu ka kɔtɔkɔy ka Fandaŋ wo ka ariana woŋ. 34“Baŋ siyi ba dɔma na yaŋ see ka sisa mathɛbɛ ka faido. Yaŋ tha see ka sisa mathɛbɛ, kuyombo kuna see yaŋ ka sisa. 35Yaŋ see ka thayinande hati wathe iŋ fandama, awa hati yɛrɛmɛ iŋ nandama, awa thamba iŋ thɔnɔ nama. 36Awa hadeni bi ka wɔ bi kɔŋ niyɔ kubɔri nama koŋ. 37“Wɔ o wɔ wo yaŋ thimo fandama na iŋ nandama e wuŋ yama ba yaŋ, ndɛ sisandeta ba yama yema. Wɔ o wɔ wo thimo mpati nama bibiyɛthɛŋ iŋ biyɛrɛmɛŋ e wuŋ yama ba yaŋ, ndɛ sisandeta ba yama yema. 38Awa wɔ wo sa sɛkɛthi kuyeŋ nama kubariŋande ku ka nambarɛŋ baŋ koŋ ba yama yema, ndɛ sisandeta ba yama yema. 39Wɔ wo yɔli ba niya sii nama baŋ kisi ka yɛthɛ nama, ndɛ kɔŋ bɛŋ piriŋiŋ, awa wo piriŋiŋ sii nama baŋ saathɛ ba kiyaŋ, ndɛ kɔŋ bɛŋ kutu. 40“Wɔ o wɔ wo bena yɛrɔkɔ, ndɛ yɛrɔkɔy yama; awa wo yɛrɔkɔy yama, ndɛ yɛrɔkɔy wo ŋindɛ yama woŋ. 41Wɔ wo yɛrɔkɔy banabi ba na ndɛ banabi, ndɛ kɔŋ kutu kuthunkuŋ ku ka banabi ŋaye ka Masaala. Awa wɔ wo yɛrɔkɔ wɔ thumbɛ ba na ndɛ wɔ thumbɛ, ndɛ kɔŋ kutu kuthunkuŋ ku ka wɔ thumbɛ. 42Awa wɔ yo wɔ wo dunkune mpati bi yama yemande beŋ mandi mathɛbɛ ba thiiye ba na bindɛ bakarandeni niŋ, yaŋ kɔŋ bena tepe nɔndi baŋ, ndɛ kɔŋ kutu kuthunkuŋ kumandiŋ.”

will be added

X\