Mathiyu 1

1Buku wo ka mbembɛŋ bi ka Yisɔs Kraist wo ŋaye ka bɔnsɔŋ ba ka Dauda baŋ mɛnɛ Ebrahim na woŋ baŋ: 2Ebrahim na nde fanda ka Aisaki, Aisaki na fanda ka Yakuba, Yakuba na fanda ka Yuda mɛnɛ mbɛndama beŋ, 3Yuda na fanda ka Pirɛsi mɛnɛ Sira bi mpuu ndɛ iŋ Tema beŋ, Pirɛsi na fanda ka Hɛsirɔŋ, Hɛsirɔŋ na fanda ka Rami, 4Rami na fanda ka Aminadabi, fanda ka Nasoŋ, Nasoŋ na fanda ka Salamoŋ, 5Salamoŋ na fanda ka Boasi wo mpuu ndɛ iŋ wɔtɔ nama Rehabi woŋ, Boasi na fanda ka Obɛdi wo mpuu ndɛ iŋ wɔtɔ nama Ruthi woŋ, Obɛdi na fanda ka Yɛsi, 6Yɛsi na fanda ka Dauda wo gbaku woŋ. Awa Dauda na nde fanda ka Silamani wo mpuu ndɛ iŋ wɔtɔ ka Yuraya woŋ, 7Silamani na fanda ka Rɛhobowami, Rɛhobowami na fanda ka Abaiya, Abaiya na fanda ka Asa, 8Asa na fanda ka Yɛhosafathi, Yɛhosafathi na fanda ka Yorami, Yorami na fanda ka Yusaiya, 9Yusaiya na fanda ka Yothami, Yothami na fanda ka Ahasi, Ahasi na fanda ka Hɛsɛkaya, 10Hɛsɛkaya na fanda ka Manasa, Manasa na fanda ka Emɔni, Emɔni na fanda ka Yosaya, 11Yosaya na fanda ka Yɛkonaya mɛnɛ mbɛndama, ka lɔkɔ ba biYusu beŋ katuwo ka Babilɔŋ iŋ kuyombo koŋ. 12Naa thanki bindɛ katuwo iŋ kuyombo koŋ ka Babilɔŋ, Yɛkonaya see mpuu Sialitɛli na, Sialitɛli na fanda ka Sɛrubabɛli, 13Sɛrubabɛli na fanda ka Abiyudu, Abiyudu na fanda ka Ɛliakimi, Ɛliakimi na fanda ka Esori, 14Esori na fanda ka Sedɔki, Sedɔki na fanda ka Ekimi, Ekimi na fanda ka Ilaiyudi, 15Ilaiyudi na fanda ka Ɛliesa, Ɛliesa na fanda ka Mathani, Mathani na fanda ka Yakuba, 16Yakuba na fanda ka Yusufu, wanda ka Mariyama, nanda ka Yisɔs woŋ, wo domo Banikisi woŋ. 17Huna mbembɛŋ beŋ nda fooma ŋaye ka Ebrahim kaaŋ ka Dauda bi kiŋ mbembɛŋ kɔhi iŋ binaŋ, awa ŋaye ka Dauda kaaŋ ka katuwo hu ka biya beŋ haŋ iŋ kuyombo koŋ ka Babilɔŋ bi kiŋ kɔhi iŋ binaŋ, awa ŋaye ka katuwo bindɛ ka Babilɔŋ ka iŋ mpoo hu ka Banikisi woŋ haŋ, bi kiŋ mbembɛŋ kɔhi iŋ binaŋ. 18Nanaŋ baŋ nɛna niiye nde mpoo hu ka Yisɔs Kraist haŋ. Yusufu na nde hathi Mariyama na, nanda ka Yisɔs, kɛrɛ ndɛ tha niŋ niye sikine wɔtɔ nama, Mariyama see mpuu hati wathe maŋaye ka Yina wo ka Masaala woŋ. 19Kɛrɛ Yusufu wo wandama woŋ, wɔ ka Masaala na ndɛ awa ndɛ thimota nde ba niŋ thiminuwa dɛkuiŋ ka biya. Huna ndɛ see siyi ba niŋ pɛna nasɔɔyi na sa biya wuŋ kothiye. 20Kɛrɛ naa ndɛ huŋ siyi ka thukuma nama haŋ, maleka wo ka Mariki woŋ see niŋ tɔŋinɔkɔ ka mandɛ, e ndɛ niŋ tepe, na “Yusufu, yindo ŋaye ka bɔnsɔŋ ba ka Dauda baŋ woŋ, ba payɔ ba sɛkitha Mariyama na nɔŋ wɔtɔ nda, baa hɔɔyɛ hu niyɔy ndɛ haŋ ndɛ kute huŋ maŋaye ka sɛmbɛ ba ka Yina wo ka Masaala woŋ baŋ. 21Ndɛ kɔŋ mpuu hati wathe awa yi kɔŋ niŋ thundu keŋ na Yisɔs, baa ndɛ kɔŋ si ni biya nama beŋ kisi maŋaye ka hakɛŋ namɛŋ baŋ.” 22Bɛyiniŋ baŋ baŋ fooma niyɔy haliko ba thiŋina hu tepe nde Mariki woŋ haŋ ka hothi hu ka banabi woŋ: 23na, “Hati bɛthɔ wo ba hɛ niyɔ iŋ wathe kɔŋ niyɔ hɔɔyɛ awa ndɛ kɔŋ mpuu hati wathe, awa ndɛ kɔŋ thunda keŋ na Imanuɛli,” wu thalintando ba dɔma na, “Masaala kiŋ iŋ miŋ.” 24Naa thɔhɔy Yusufu, ndɛ ni nɔŋ na tepe niŋ maleka wo ka Mariki woŋ na ba sɛkitha Mariyama na nɔŋ wɔtɔ nama. 25Kɛrɛ ndɛ tha niŋ kɔthɔ yɛrɛmɛ haaŋ yɔkɔŋ na see ndɛ mpuu hati wathe. Awa ndɛ niŋ thunda keŋ na Yisɔs.

will be added

X\