Maki 7

1BiFaresini binɔndi mɛnɛ karimɔkɔiŋ bi ka Siraŋ baŋ beŋ bi ŋaye ka mɛti ba ka Yɛrusalɛmi beŋ key pɛnkiyande Yisɔs na. 2Bindɛ ŋee ba dɔma na bakarandeni binɔndi bi ka Yisɔs beŋ bi kɔŋ nde thɔŋ iŋ thɛnkɔ thapothuwɛ. Wuŋ thɔyande ba dɔma bindɛ sa niye lokeke saanuŋ bindɛ ba saa ka thɔma nɔŋ na tepe dina wo ka biFaresini beŋ woŋ biya ba yenke niya. 3BiFaresini beŋ mɛnɛ biYusu beŋ fooma bi kɔŋ nde yeŋ mathanani ma thanki nde bindɛ thaninuwo maŋ iŋ mbembɛŋ namɛŋ beŋ maŋ. Bindɛ sa thɔŋ yɔkɔŋ bindɛ yenke looka thɛnkɔ namɛŋ thaŋ nɔŋ na tepe naamu wo ka dina namɛŋ woŋ na saanuŋ ba thɔma. 4Hali hɛlɛŋ ntha ki bindɛ boyi ka gbɔni baŋ niyo ka, bindɛ sa wuŋ thɔŋ yɔkɔŋ bindɛ yenke wuŋ looka. Awa bi kɔŋ hɛlɛŋ yeŋ naamuiŋ bibɔyɛ bi thanki nde bindɛ thaninuwo beŋ, ba na na looke thakɔɔpu thaŋ, karoni bathome baŋ, thasomba thaŋ, mɛnɛ ŋahinsi ŋaŋ. 5Wuna biyɛ biFaresini beŋ mɛnɛ karimɔkɔiŋ bi ka Siraŋ baŋ beŋ bi kɔŋ nde thɔnthɔŋɔŋ Yisɔs na ba dɔma, na “Mbɛ ba dɔmɛ bakarandeni nda beŋ tha yeŋ mathanani ma peyo nde miŋ iŋ mbembɛŋ ntuŋ beŋ maŋ? Mbɛ ba thome bindɛ iŋ thɛnkɔ thapothuwɛ?” 6Yisɔs ni bindɛ yaabi e tɛpa, na “Masaala tepe nɔndi baŋ ba beŋ ka hothi hu ka banabi woŋ Aisaya. Banitɔkɔiŋ bina beŋ, nɔŋ na gbale nde wundɛ, na ‘Biya beŋ beŋ bi kɔŋ yama ni yiki iŋ thahothi namɛŋ thaŋ hɔkɔŋ, kɛrɛ thathukuma namɛŋ thaŋ tha thokiye yama. 7Huna, ba gboŋ na bindɛ yama niye kubatho, baa bi kɔŋ thanani sirani ba ka biyamɛti nɔŋ sirani niŋ bɛna.’ ” 8Yisɔs key ka kɔtɔkɔy ba dɔma, na “Beŋ deŋe kuwaŋ yamariŋ ba ka Masaala baŋ saathɛ ba naamuiŋ ba ka biyamɛti baŋ. 9“Beŋ ni kele wuyɔhɔy ba kahitina mathananini makendeŋ maŋ maŋaye ka baŋina Sirani ba ka Masaala baŋ. 10Kɛrɛ Musa ni nde bena yamari ba dɔma, na ‘Thiya fanda na mɛnɛ nanda na yiki.’ Awa hɛlɛŋ, na ‘Wɔ yo wɔ wo gbonkiye fandama na maa nandama wunɛnɔy wɔ bɛina kɔŋ kɔra.’ 11Kɛrɛ beŋ thanani ba dɔma na mɛnɛ wɔ niyɔy iŋ ntha ki sisande ndɛ ba dunkune fandama na maa nandama, mɛnɛ ndɛ dome hɔkɔŋ kɛnamɛŋ, na ‘Masaala na biyɛ wuŋ,’ 12beŋ dome na kabari na wo thane niye fandama na maa nandama yiki ba bindɛ dunkune muŋ muŋ baŋ. 13Naa beŋ key ka kɔtɔkɔy ka thaninuwa biya ka gboŋa baŋ baŋ, ka lɔkɔ babɛina beŋ thanthiye thampɛŋ tha ka Masaala thaŋ. Awa bɛyiniŋ babɔyɛ bahɛna ba thɔyande iŋ baŋ baŋ ba beŋ ni.” 14Kɛna thiyi Yisɔs sɛthɛ baŋ kɛnama ka e dɔma kɛnamɛŋ, na “Ponaŋ kuiha awa e beŋ metho hu yaŋ bena see ka tepe haŋ. 15Wuŋ ka ba dɔma na muthɔma mu thɔɔ ka hothi hu ka wɔmɛti muna niŋ pothoni, kɛrɛ thampɛŋ tha niŋ fuŋ ka hothi thaŋ thɛna niŋ pothoni. [ 16Yindo thimo ba yuyɛ, pona kuiha.]” 17Naa ŋaye ndɛ ka sɛthɛ baŋ ka, ndɛ key biyande ka banka baŋ. Kɛna key niŋ bakarandeni nama beŋ thonthiŋine ba ndɛ bindɛ methine mathananini maŋ maŋ baŋ. 18Huna dome Yisɔs kɛnamɛŋ, na “E beŋ hɛlɛŋ haaŋ hɛ beŋ methota? E beŋ tha metho bɛyiniŋ baŋ baŋ? Ntha ki thɔɔ ka hothi hu ka wɔmɛti kutɛ niŋ pothoni, 19baa muŋ kaayita ka thukuma nama haŋ, kɛrɛ mu kɔŋ key toloŋ ka kotho nama haŋ awa e muŋ fuŋa.” Yisɔs methine bindɛ nagberekethe nanaŋ ba dɔma na muthɔma yo muthɔma muŋ amɛthi ba thomo. 20Awa wundɛ key ka kɔtɔkɔy e dɔma, na “Mu fuŋ ka hothi hu ka wɔmɛti haŋ muna niŋ pothoni. 21Ba kaake ka thukuma hu ka wɔmɛti, kɛna ŋaye masiyini manɛnɔy ma ni ba ndɛ niya wunɛnɔy maŋ, ba tuwe, ba kɔra, 22ba niya ŋabɛini ŋahakuwande fooma, milɛ yo, mɛnɛ ba niya bɛyiniŋ fooma banɛnɔy, ba thiminɔkɔ, ba niya bɛyiniŋ baŋayaahu, ba niyɔ iŋ hunaŋ, ba teetuwa biya ŋakeŋ, ba bukuinɔkɔ, mɛnɛ ba niya bɛyiniŋ bamathiyaani. 23Bɛyiniŋ banɛnɔy baŋ baŋ fooma ba kɔŋ ŋaye ka thukuma hu ka wɔmɛti kaake, awa muna niŋ pothoni.” 24Yisɔs pɛyɛŋ kɛndɛ e ndɛ kaa ka kirinkiri hu ka mɛti ba ka Taya. Wundɛ key biyande kɛndɛ ka banka banthe, awa wundɛ thimota ba wɔ yo wɔ kɔthɔ ba dɔma na ndɛ kiŋ kɛndɛ. Kɛrɛ ndɛ sa punku nunɔkɔ hali. 25Wɔ yɛrɛmɛ wunthe kiŋ nde kɛndɛ, wo iŋ hati woyɛrɛmɛ wo kutande iŋ wayi wonɛnɔy. Naa yuye wundɛ ba Yisɔs, wundɛ key yako e ka ŋɔta ka kɔtɔkɔy ka ŋathaki nama ŋaŋ. 26Hati woyɛrɛmɛ woŋ baŋ wundɛ ka nde woYu; wɔ na nde wo mpoo ka bompi wo ka Fonisiya ka kuyɛkɛŋ ku ka Siriya. Wundɛ theteke Yisɔs na ba kaninande wayi wonɛnɔy woŋ iŋ hati nama woŋ. 27Kɛrɛ Yisɔs ni niŋ yaabi, na “Miŋ thɛriyɛŋ hintiŋ mpati beŋ. Wuŋ yeheta ba sɛkitha muthɔma mu ka mpati beŋ muŋ ba muŋ yɛliyɛ ŋatheŋ beŋ.” 28Huna dome hati woyɛrɛmɛ woŋ ka Yisɔs, na “Hunɔndi yaathi hɛmɔŋ, kɛrɛ hali ŋatheŋ beŋ gbeeŋ bi kɔŋ ŋɔɔ ka pothi ka wo biyɛ bindɛ woŋ thome kɛ haliko ba thɛɛruwa ŋaboba ŋa ŋɔti ŋaŋ naa mpati beŋ kɔ thɔŋ.” 29Yisɔs dome kɛnama, na “Maŋaye ka yaabi bayɔhɔy nda baŋ baŋ, duwa nda ka banka nda ka, baa wayi wonɛnɔy woŋ pɛyɛŋ hati woyɛrɛmɛ woŋ.” 30Kɛna duu hati woyɛrɛmɛ woŋ ka banka nama ka e ndɛ pɛnka nda hati nama ŋoye ka hinsi ka nayeŋ, baa wayi wonɛnɔy woŋ pɛyɛŋ niŋ. 31Yisɔs pɛyɛŋ kirinkiri hu ka Taya haŋ, e ndɛ kɛriŋande hu ka Saidɔŋ haŋ, mɛnɛ hu ka Mɛtiŋ Kɔhi baŋ haŋ, e kaa ka mankɔ ma ka Kalili maŋ. 32Kɛna sisi biya hati lamgba wunthe wo babobo ka Yisɔs. Awa ndɛ punketa gbonkiya hali. Bindɛ theteke Yisɔs na ba ndɛ be niŋ tutu yɔnkɔ haliko ndɛ be pethɔ. 33Kɛna sakitɔkɔy niŋ Yisɔs ka bindɛ biye. Wundɛ key thiyi ŋathenke nama ŋaŋ ka ŋaiha ŋa ka babobo woŋ ŋaŋ, e thutha, e boheke hiliŋ hu ka babobo woŋ haŋ. 34Yisɔs dethe ka thinthi ka ariana, e daŋitɔkɔ wumandiŋ, e dɔma ka hati lamgba woŋ ka huyuŋ namɛŋ haŋ, na “Ɛfatha,” wu thalintando ba dɔma, na “Pɛthɔ ŋaiha.” 35Ka thagbɛmgbɛŋ thabɛina ŋaiha ŋa ka hati lamgba woŋ ŋaŋ pɛthɔy, hiliŋ nama haŋ pɛɛkɔy ba gbonkiya. Awa ndɛ bohe nda gbonkiya wu ka nda iŋ thɔɔrɔ. 36Kɛna yeli Yisɔs biya beŋ ba bi be tha huŋ yaŋ tepe wɔ yo wɔ. Kɛrɛ ti nthɔŋ ndɛ bindɛ kɔ yele, tɛmɛiŋ huŋ kɔ yaŋ tepe biya bihɛna. 37Awa bi yuyɛ huŋ beŋ fooma ni thakaba wumandiŋ, e bindɛ dɔma, na “Nama dɔmɛ hati wowathe woŋ baŋ kɔŋ punku niye wuŋ baŋ. Hali bi lɔŋɔy ŋaiha beŋ mɛnɛ baboboiŋ beŋ ndɛ kɔŋ ni ba bindɛ yuyɛ e bindɛ punka gbonkiya.”

will be added

X\