Maki 6

1Yisɔs pɛyɛŋ kɛndɛ e hɛlɛŋ kaa ka mɛti nama ka iŋ bakarandeni nama beŋ. 2Awa naa tɛŋ ndɛ kɛndɛ, ndɛ thanani biya beŋ ka banka bathuŋuyande ba ka biYusu beŋ baŋ ka Malɔkɔ Mahemuwe maŋ. Biya bibɔyɛ bi kiŋ nde kɛndɛ. Naa yuye bindɛ niŋ, bindɛ ni thakaba wumandiŋ e bindɛ dɔma, na “Kama kute hati woŋ kele humandiŋ haŋ haŋ baŋ iŋ ba punka niya bɛyiniŋ babukuyuwɛ baŋ baŋ? 3E kamudɛri woŋ kutɛ, hati ka Mariyama woŋ? E mbɛndama bibiyɛthɛŋ kutɛ Yemisi, Yusufu, Yudasi, mɛnɛ Saimɔŋ? E mbɛndama biyɛrɛmɛŋ kutɛ iŋ miŋ dondo baŋ beŋ?” Ba saabu baŋ baŋ huna tha bindɛ niŋ yereke. 4Huna dome Yisɔs kɛnamɛŋ, na “Banabi ka wo pankɛ yiki, yɔkɔŋ ka kuyɛkɛŋ nama mɛnɛ ka mpoo nama, mɛnɛ ka banka nama, kɛna ka wundɛ iŋ yiki.” 5Wuna biyɛ ndɛ tha punku kɛndɛ niya bɛyi bathakaba, yɔkɔŋ bathoonani binɔndi tute ma thɛnkɔ e bindɛ pethɔ. 6Wuŋ niyɔy niŋ kuthɛrɛnaŋ wumandiŋ, baa bindɛ tha niŋ ni lanɛya. Awa naa nde Yisɔs kaande kɛndɛ fooma ka mɛtiŋ baŋ, ndɛ kɔŋ nde key kaŋ thaninuwa biya beŋ. 7Kɛna thiyi Yisɔs bakarandeni nama bikɔhi iŋ biye beŋ ka tha banthe e bindɛ ŋinda ka biye-biye. Wundɛ dunkune bindɛ sɛmbɛ iŋ mayoho ba kaninande biya mbayiŋ binɛnɔy beŋ. 8Awa wundɛ ni bindɛ yamari ba dɔma, na “Baŋ diŋ ntha yo ntha ka biyasi haŋ yɔkɔŋ ŋagbɔkɔdi nagbɛti. Baŋ diŋ ŋatoŋ, maa ponthoiŋ, maa ba thiya kɔbiri ka gbootiŋ bakendeŋ baŋ. 9Thɔɔŋ dagbalɛŋ, kɛrɛ baŋ diŋ yabɛŋ baye.” 10Wundɛ tepe hɛlɛŋ bindɛ ba dɔma, na “Kamo kama ka beŋ yeroko, niyɔŋ ka banka babɛina haaŋ yɔkɔŋ beŋ fuŋ nɔŋ ka mɛti babɛina. 11Mɛnɛ beŋ tɛŋ ka tha ka sa bena biya yɛrɔkɔ, maa bindɛ tha bena poniyɛ kuiha, fuŋaŋ kɛndɛ e beŋ konka kuligbi koŋ ka ŋathaki ndeŋ ŋaŋ naa beŋ kɔ kɛndɛ fuŋ, haliko wu be niyɔ kuyeli kɛnamɛŋ ba dɔma na bindɛ tha yɛrɔkɔ thampa tha ka Masaala thaŋ.” 12Bakarandeni beŋ key kaŋ niya kɛwandi ka biya beŋ ba bindɛ fuŋa ka hakɛŋ bakɛnamɛŋ baŋ. 13Bindɛ kaninande biya mbayiŋ binɛnɔy bibɔyɛ, e bindɛ puyina bathoonani bibɔyɛ mayɔ ka thankaha e bindɛ pethɔ fooma. 14Ka lɔkɔ babɛina Hɛrɔdi wo nde kɛrɛŋ ka kuyɛkɛŋ ku ka Kalili koŋ yuye ba Yisɔs, baa keŋ ku ka Yisɔs koŋ see gbanthande ba bɛyiniŋ fooma ba ndɛ ni baŋ. Kɛna sɛsi biya binɔndi ba dɔma, na “Yɔni wo Babiye biye hu ka Masaala haŋ woŋ na ŋaye hɛlɛŋ ka tuka haŋ. Wuna biyɛ ndɛ niyɔ iŋ sɛmbɛ ba punka niya bɛyiniŋ baŋ baŋ.” 15Biya binɔndi kɔ dɔma, na “Ilaiya na.” Awa binɔndi kɔ dɔma, na “Banabi wunthe na ŋaye ka tuka haŋ ka banabiŋ bi nde mayoŋ beŋ.” 16Naa yuye huŋ Hɛrɔdi, wundɛ dome, na “Yɔni wo Babiye wo ni yaŋ ba ndɛ thoŋo yaha woŋ na ŋaye hɛlɛŋ ka tuka haŋ.” 17Saanuŋ Hɛrɔdi ba thoŋa Yɔni na yaha, wundɛ niye nde nda yente Hɛrɔdiyasi na, wɔtɔ wɛndama Filipi wuthɔɔkitɛ. Kɛna key Yɔni wo Babiye woŋ ka kɔtɔkɔy ba niŋ tepe, na “Wuŋ sisandeta yi ba yɛnta Hɛrɔdiyasi na.” Awa huna niye Hɛrɔdi yamari ba Yɔni wo Babiye woŋ ka boho e ndɛ yuko e thiyo ka yeeli woŋ. 19Ba saabu baŋ baŋ huna kosine Hɛrɔdiyasi mathoŋ ba kɔra Yɔni na, kɛrɛ wo nde payɔ Hɛrɔdi na. 20Hɛrɔdi nɛnɛ wo nde payɔ Yɔni na baa ndɛ kute ba dɔma na wɔ ka Masaala woyɔhɔy na ndɛ. Bɛna ndɛ ni niŋ kisi baa wundɛ thimoŋ ba niŋ poniyɛ kuiha. Hali na niyɔy wuŋ na, timo tima ti ndɛ niŋ kɔ yuye si gbonkoy, thukuma nama haŋ hu kɔŋ teetuwɔ. 21Ka wumankɛ nagbɔŋ, yɛrɛmɛ wo ka Hɛrɔdi wo dɔma Hɛrɔdiyasi woŋ see kutu hɛɛra ba kore Yɔni na. Ka lɔkɔ ba ka siyuwa malɔkɔ ma mpoo nde Hɛrɔdi maŋ, wundɛ ni yakali bamandiŋ e thiya gbakuiŋ bi ni wali ka kuyɛkɛŋ nama koŋ, bayahɛŋ bi ka kurugbani beŋ, mɛnɛ bi kɛriŋiyɛ lasiriŋ ba ka kuyɛkɛŋ ku ka Kalili koŋ beŋ. 22Kɛna key hati ka Hɛrɔdiyasi woyɛrɛmɛ kaŋ wuyɔhɔy ka biyɛthɛŋ beŋ. Naa ndɛ kaŋ, wuŋ yehe gbaku woŋ Hɛrɔdi na mɛnɛ bi thiyi wundɛ ka yakali baŋ beŋ. Huna dome gbaku woŋ ka hati bɛthɔ woŋ, na “Ntha yo ntha ki thimo yi, yaŋ kɔŋ yina wuŋ dunkune.” 23Kɛna ni niŋ gbaku woŋ lahiri e ndɛ gbiŋa ba dɔma, na “Ntha yo ntha ki yama yi thɔnthɔŋɔŋ ba dunkuno, yaŋ kɔŋ yina wuŋ dunkune. Hali kuyɛkɛŋ niŋ koŋ yaŋ kɔŋ kuŋ hakinande mateete yaŋ yina dunkune.” 24Kɛna fuŋ hati bɛthɔ woŋ e kaa thɔnthiŋina nandama na, na “Mbɛ mu yaŋ ka thɔnthɔŋɔŋ gbaku woŋ ba dunkuno?” Nandama tepe niŋ ba ndɛ ka dɔma, na “Dunkune yama yaha hu ka Yɔni wo Babiye woŋ haŋ.” 25Hati bɛthɔ woŋ ni kuyaagba e kaa toloŋ ka gbaku woŋ ka e niŋ ka tepe, na “Yaŋ thimoŋ ka tete ba yama yi dunkune yaha hu ka Yɔni wo Babiye woŋ haŋ ka ntha.” 26Naa yuye huŋ gbaku woŋ, wuŋ niyɔy niŋ nkinikiniŋ wumandiŋ. Kɛrɛ ndɛ tha baŋaŋ ba huŋ dunkuna, baa ndɛ thanki nda niya lahiri e gbiŋa mateete ma ka sɛthɛ ba thuŋande baŋ. 27Kɛna ŋindi ndɛ kurugba wunthe yako e niŋ tepe ba ndɛ ka thoŋa yaha hu ka Yɔni haŋ ka ndɛ ka yeeli woŋ ka. Kurugba woŋ key yako ka yeeli ka, e ka thoŋa yaha hu ka Yɔni haŋ. 28Naa thoŋ ndɛ huŋ, ndɛ thiye huŋ ka ntha e huŋ si dunkune hati bɛthɔ woŋ. Hati bɛthɔ woŋ bohe yaha haŋ e huŋ kata ka nandama ka. 29Naa yuye bakarandeni bi ka Yɔni beŋ ba ndɛ koro, bindɛ key sɛkɛthi kubeli nama koŋ e bindɛ kuŋ ka mankuwa. 30Naa duu baseriŋ bithɔɔkɔ beŋ, bindɛ thuŋande ka tha banthe fooma e bindɛ tepe Yisɔs na bɛyiniŋ fooma ba thanki bindɛ niya iŋ ba thanki bindɛ thaninuwa. 31Biya muŋ see nda bɔyi haaŋ Yisɔs iŋ bakarandeni nama beŋ kuita nda hɛɛra ba thome, huna dome ndɛ ka bakarandeni nama beŋ, na “Miŋ kaayɛŋ ka tha ka nunɔkɔy ka miŋ ka hemuwe wuyete.” 32Kɛna thɔɔyɛ bindɛ ka gbe ba kaa ka tha ka nunɔkɔy. 33Kɛrɛ naa bindɛ key, biya bibɔyɛ ŋee ba dɔma na Yisɔs na key woŋ iŋ bakarandeni nama beŋ. Awa biya beŋ ka mɛtiŋ baŋ fooma thare ka kɔtɔkɔy e bindɛ kɔɔ ba thithɛ, e bindɛ yenke biyande ba Yisɔs ka ndɛ key ka iŋ bakarandeni nama beŋ. 34Naa fuŋ Yisɔs ka gbe baŋ, ndɛ kute sɛthɛ bamandiŋ baŋ awa ndɛ kutiye bindɛ nkinikiniŋ baa bindɛ athɔyande nɔŋ takɛŋ bi ka iŋ batɔli. Kɛna sɛsi ndɛ ba bindɛ thaninuwa bɛyiniŋ babɔyɛ. 35Mahɔnkɔlɛŋ, naa bohe kaŋ woŋ thɔɔ, bakarandeni nama beŋ see kɛnama e bindɛ dɔma, na “Dutha duyɔthiŋɔy duna dondo baŋ, awa kaŋ woŋ hɛlɛŋ ndɛ bohe thɔɔ. 36Niya ba sɛthɛ baŋ baŋ kaa ka thabikidiŋ tha tɔpɛ dondo thaŋ iŋ mɛtiŋ baŋ bi be ka boyiyɔkɔ muthɔmɛŋ.” 37Huna dome Yisɔs kɛnamɛŋ, na “Dunkuneŋ bindɛ muthɔma.” Bakarandeni beŋ thɔnthɔŋɔŋ niŋ, na “E thimoŋ ba miŋ ka boya ŋatoŋ ŋa mɔlɔŋ ba kuthunkuŋ ku ka wɔ wunthe ba sɛnkɛni bisɔŋ-bitaati ba thɔmina biya beŋ beŋ baŋ?” 38Yisɔs thɔnthɔŋɔŋ bindɛ, na “Tima ŋatoŋ ŋa iŋ beŋ? Kaaŋ hɛ dethi.” Naa dethe bindɛ, bindɛ tepe niŋ ba dɔma, na “Ŋatoŋ ŋasɔhi mɛnɛ muheni muye.” 39Huna dome Yisɔs kɛnamɛŋ, na “Niyaŋ ba biya beŋ dɔŋɔ ka hande haŋ ka kikiŋ.” 40Kɛna dɔŋɔy biya beŋ kikiŋ ba kɛmɛŋ-kɛmɛŋ, mɛnɛ kikiŋ ba kɔnthɔ kasɔhi-kɔnthɔ kasɔhi. 41Kɛna sekithe ndɛ ŋatoŋ ŋasɔhi ŋaŋ mɛnɛ muheni muye muŋ, e detha ka thinthi ka ariana, e thiya Masaala na maamo. Naa thanki ndɛ thiya maamo, ndɛ thinkinuwande e muŋ dunkune bakarandeni nama beŋ ba bindɛ muŋ hana sɛthɛ baŋ. Ndɛ thinkinuwande hɛlɛŋ muheni muye muŋ e muŋ bindɛ hana fooma. 42Naa thɔŋ bindɛ, womo woma ka bindɛ thimbɔy. 43Kɛna ŋutunuwande bakarandeni beŋ magbanthi maŋ e mɛŋ tɛŋa thadebe kɔhi iŋ thaye mu pɛyɛtɔy muŋ ka ŋatoŋ ŋaŋ mɛnɛ muheni muŋ. 44Biyɛthɛŋ bɛrɛ ba wuluiŋ bisɔhi mɛnɛ yɛrɛmɛŋ iŋ mpatiyɛŋ bi thɔmɛ beŋ. 45Kɛna dome Yisɔs ka bakarandeni beŋ ba bindɛ thɔɔ ka gbe baŋ ba bindɛ niŋ kɔtiyɔkɔ ka Bɛthɛseda thuhaŋ mankɔ maŋ, na hintiŋ ndɛ pɛyɔ kɛndɛ ba duututuwa sɛthɛ baŋ. 46Naa thanki ndɛ duututuwa biya beŋ, ndɛ dunkɔy ka kusɛri koŋ ba ka niya kuraminɛ. 47Naa thɔɔyɛ kaŋ woŋ, gbe baŋ tɛŋ ka mankɔ maŋ teete. Kɛrɛ Yisɔs kiŋ thuŋ ndɛ wuntheŋ ka thithɛ ka. 48Ka ndɛ ka thithɛ ka, ndɛ kute ba dɔma na bakarandeni beŋ bi kɔŋ niyɔ thɔɔrɔ ka ŋɛna gbe baŋ ka mankɔ maŋ ka teete, baa huru haŋ hu kɔŋ nde hɔŋ wumandiŋ ma sɔkinɔkɔ bindɛ. Naa kokori thɛɛ womayoŋ woŋ kuputhɔ ku kaŋ sanka, Yisɔs bohe kaande ka mankɔ maŋ ka thinthi e kɔ niya maŋ daŋande bindɛ. 49Kɛrɛ bindɛ kute niŋ si kaande ka mankɔ maŋ ka thinthi. Naa kute bindɛ niŋ, bindɛ dome, na “Kuyimɛy kuna.” Kɛna berintɔkɔy bindɛ sampɛrɛŋ batɔɔkɛ. 50Ba na kute bindɛ niŋ, bindɛ thooyo payɔ humandiŋ. Ka wuthurɔy wubɛina, Yisɔs tepe bindɛ ba dɔma, na “Kahaŋ thathukuma. Yama. Baŋ payɔ.” 51Kɛna thɔɔyɛ wundɛ ka gbe ba bindɛ baŋ. Ka wuthurɔy wubɛina, huru haŋ pɛyi hɔŋa haŋ. Bakarandeni beŋ ni ŋakabanɛ wumandiŋ, 52baa bindɛ tha metho wu ni nde Yisɔs ka ŋatoŋ ŋasɔhi ŋaŋ wuŋ. Bindɛ sa punku metho. 53Naa thuhande bindɛ mankɔ maŋ, bindɛ tɛŋ ka kuyɛkɛŋ ku dɔma na Kɛnɛsɛrɛti e bindɛ kɛndɛ yuka gbe baŋ. 54Naa fuŋ bindɛ ka gbe baŋ, biya beŋ ŋee Yisɔs na yako. 55Kɛna thare biya beŋ yako-yako kaŋ tepe biya ka kirinkiri hubɛina fooma. Kɛna bohe biya sisa bathoonani ka yalɛŋ e bindɛ bindɛ kɔ kata kamo kama ka bindɛ yuye Yisɔs na. 56Awa kamo kama ka Yisɔs kaaye ka thabikidiŋ thaŋ, ka mɛtiŋ baŋ, maa ka thani ka hɛna, bi kɔŋ ka dɛŋ bathoonani beŋ ka gbɔni baŋ niyo ka e niŋ theteke ba bathoonani beŋ hɔkɔŋ boheke kulɛmpi lɛmpi ku ka yaba nama baŋ koŋ. Awa hanimaa bi boheke kuŋ beŋ, bindɛ pethɔy fooma.

will be added

X\