Maki 4

1Yisɔs sɛsi hɛlɛŋ ba thaninuwa ka gbaraŋ ba ka mankɔ ma ka Kalili maŋ. Sɛthɛ bamandiŋ key niŋ pɛnkande haaŋ Yisɔs ŋaye ka ndɛ ka e ka thɔɔ ka gbe baŋ e kɛndɛ dɔŋɔ. Gbe baŋ baŋ ba kiŋ nde ka mankɔ ka, awa sɛthɛ bamandiŋ baŋ pɛyɛ kɔɔ ka gbaraŋ ba ka mankɔ maŋ baŋ ka detha niŋ. 2Wundɛ gbonkiye bindɛ ka mbɔrɔiŋ ba bindɛ thaninuwa bɛyiniŋ babɔyɛ, e tɛpa: 3na “Ponaŋ kuiha! Bapayi paka na kaayɛ nde ka paya paka ka dumgbu nama ka. 4Naa ndɛ payi, paka banɔndi ŋɔti ka gboŋa baŋ. Awa bɛna see bɛtiŋ beŋ bɛŋ thuu. 5Paka banɔndi ŋɔti ka kuthara koŋ, awa bɛŋ muku yako baa bɛŋ tha pututa iŋ kupati kubɔyɛ. 6Saathɛ ba na ka kupati kubɔyɛ, naa tɔɔki nthɔŋ kaŋ woŋ, paka baŋ baŋ thithi baa nthanthɛŋ kiŋ tha thɔɔ wusuŋɔy. 7Paka banɔndi ŋɔti ka hande hubasoy haŋ. Naa muku nthɔŋ bɛŋ, hande hubasoy haŋ nothite bɛŋ, awa bɛŋ tha sisi mutiŋ. 8Kɛrɛ paka banɔndi ŋɔti ka kuyɛkɛŋ kuyɔhɔy koŋ. Bɛŋ muku e bɛŋ yɔhɔ wumandiŋ. Naa fuŋuŋ bɛŋ, kuyantha kunɔndi ku kiŋ nde iŋ thathaa kɔnthɔ kataati, kunɔndi kɔnthɔ kasɔŋ-hanthe, kunɔndi kɛmɛ wunthe.” 9Naa gbanthaŋ Yisɔs, huna dome ndɛ, na “Ndo ba yuyɛ, pona kuiha.” 10Naa pɛyɛ Yisɔs ndɛ wuntheŋ, biya binɔndi bi yuyɛ niŋ beŋ mɛnɛ bakarandeni bikɔhi iŋ biye beŋ key kɛnama ka e bindɛ niŋ ka thɔnthiŋina ba mɛthina mbɔrɔiŋ kiŋ. 11Huna dome Yisɔs kɛnamɛŋ, na “Beŋ thanki kothino gbundu wo ka Hugbakine hu ka Masaala haŋ. Kɛrɛ biya bihɛna bi kiŋ bi tha kutu hɛɛra baŋ baŋ, bi kɔŋ yuyɛ bɛyiniŋ baŋ baŋ maŋaye ka mbɔrɔiŋ nagbɛti. 12Yaŋ gbonkitiyande bindɛ ka mbɔrɔiŋ, huna ‘Bi kɔŋ dethi e bindɛ detha, kɛrɛ bindɛ sa kutu. Bi kɔŋ poŋ kuiha e bindɛ pona kuiha, kɛrɛ bindɛ sa metho. Mɛnɛ bindɛ kute nde e bindɛ yuyɛ e bindɛ metho, bi kɔŋ nde sikiyɔkɔ ka Masaala, awa Masaala kɔŋ nde bindɛ pɛniyɛ hakɛŋ namɛŋ baŋ.’ ” 13Kɛna thɔnthɔŋɔŋ Yisɔs bindɛ, na “E beŋ methota mbɔrɔ kiŋ kiŋ baŋ? Mɛnɛ beŋ tha kiŋ metho, nama beŋ metho mbɔrɔ yo mbɔrɔ ki yaŋ tɛpi? 14Bapayi woŋ na thɔyande nɔŋ wɔ wo key kaŋ tɛpa thampa tha ka Masaala thaŋ woŋ. 15Biya binɔndi athɔyande iŋ paka ba ŋɔtɛ ka gboŋa baŋ. Biya beŋ beŋ bi kɔŋ yuyɛ thampa thaŋ yako; kɛrɛ naa bindɛ thanki nthɔŋ thɛŋ yuyɛ, Sithani see bindɛ kanati thampa tha yuye bindɛ thaŋ. 16Binɔndi athɔyande iŋ paka ba ŋɔtɛ ka kuthara koŋ baŋ. Bindɛ bina bi yuyɛ thampa tha ka Masaala thaŋ beŋ, e bindɛ thɛŋ yɛrɔkɔ yako iŋ mayehitɔkɔ. 17Kɛrɛ saathɛ ba na tha bindɛ thɔɔ wusuŋɔy ka thampa thaŋ e bindɛ thɛŋ yɛrɔkɔ wutɛŋɛ, naa thɔɔrɔiŋ maa nambarɛŋ penke nthɔŋ bindɛ saathɛ ba thampa thaŋ, bindɛ pɛyi niya lanɛya haŋ. 18Biya binɔndi beŋ athɔyande iŋ paka ba ŋɔtɛ ka hande hubasoy haŋ. Bindɛ bina bi yuyɛ thampa tha ka Masaala thaŋ beŋ, 19kɛrɛ thɔɔrɔiŋ iŋ bɛyiniŋ ba ka fado baŋ mɛnɛ kufiyo ku ba deethuwa nanhulu baŋ koŋ nothite thampa thaŋ, awa bindɛ tha punku ba sisa mutiŋ. 20Kɛrɛ biya binɔndi beŋ athɔyande iŋ paka ba payo ka kuyɛkɛŋ kuyɔhɔy koŋ. Bindɛ bina bi yuyɛ thampa thaŋ beŋ, e bindɛ thɛŋ yɛrɔkɔ, awa e bindɛ sisa mutiŋ: kuyantha kunthe kɔnthɔ kataati, kunɔndi kɔnthɔ kasɔŋ-hanthe, awa kunɔndi kɛmɛ wunthe.” 21Yisɔs key ka kɔtɔkɔy ba tɛpa, na “Wɔ ka wo mɔɔli mumɔɔli nama muŋ e muŋ pututa kuma maa e muŋ nɔra ka kuhinsi ka pothi. Kɛrɛ ndɛ kɔŋ muŋ tutu ka tha ka muŋ toŋine waŋ nama baŋ ka banka baŋ fooma. 22Ntha yo ntha ki nununɔy ki kɔŋ sisa ka nagberekethe, awa ntha yo ntha ki pututɔy ki kɔŋ kubunuwa. 23Ponaŋ kuiha, awa e beŋ yuyɛ.” 24Wundɛ tepe hɛlɛŋ bindɛ ba dɔma, na “Ponaŋ kuiha ka bɛyiniŋ ba beŋ yuyɛ baŋ. Siraŋ banthe ba beŋ konsiŋine biya bihɛna beŋ baŋ, bɛna Masaala bena konsiŋine. Kɛrɛ konsiŋino hukendeŋ haŋ hu kɔŋ yaŋ kahuwa. 25Wɔ wo iŋ ntha woŋ, wundɛ kɔŋ hɛlɛŋ ndintiya; kɛrɛ wo iŋ wuyete woŋ, hali wuyete wu iŋ ndɛ wuŋ, wundɛ kɔŋ wuŋ kanita e wundɛ peyo wu ka iŋ ntha.” 26Yisɔs key ka kɔtɔkɔy e dɔma, na “Hugbakine hu ka Masaala haŋ athɔyande nɔŋ mbɔrɔ ki ka wɔ wo payɛ thathaa ka dumgbu nama baŋ. 27Wɔ woŋ baŋ kɔŋ nine huyɛ yo huyɛ, e kɔŋ thɔhɔ sanka o sanka, awa thathaa thaŋ thaŋ baŋ see bɔɔti e thɛŋ muka. Kɛrɛ wundɛ tha kɔthɔ mu dɔmɛ thɛ be bɔɔti. 28Kuyɛkɛŋ koŋ kuna niyɛ ba muthuu muŋ bɔɔtuwa, e muŋ muka, e muŋ fuŋa yako-yako, e muŋ sɛnkina, e muŋ tima. 29Naa thithi mutiŋ mubɛina, wundɛ sɛsi ba ŋɔna, baa malɔkɔ ma ka ŋɔna haŋ maŋ tɛŋ.” 30Kɛna dome hɛlɛŋ Yisɔs, na “Mbɛ mu miŋ thɔyintande Hugbakine hu ka Masaala haŋ ndee? Yaŋ kɔŋ bena toŋine mu thɔyande iŋ Hugbakine hu ka Masaala haŋ. 31Huŋ athɔyande nɔŋ wɔ wunthe wo sɛkithɛ thaa humɛɛsɛ hu dɔma haŋ na ‘mɔstadi,’ awa e ndɛ huŋ thuuwa ka dumgbu nama ka. 32Naa nambe wuŋ, huŋ muku e muthuu muŋ muŋ baŋ thɔɔkuwa e muŋ yama muthuuni muŋ fooma. Muŋ see niyɔ muthuu mumandiŋ haaŋ e bɛtiŋ beŋ ka thooyuwa thahooti ka bathalɛŋ beŋ.” 33Yisɔs ni kɛwandi thampɛŋ tha ka Masaala thaŋ ka biya beŋ ka mbɔrɔiŋ nɔŋ kiŋ kiŋ. Ndɛ gbonkitiyande bindɛ ti bindɛ punku ba metho. 34Wundɛ tha bindɛ gbonkitiyande mahɛŋ ma ka mbɔrɔiŋ kutɛ. Kɛrɛ naa wundɛ pɛyɛ iŋ bakarandeni nama beŋ, wundɛ kɔŋ bindɛ methine bɛyi yo bɛyi. 35Bɛrɛ ba naa bohe kaŋ woŋ ba thɔɔ, Yisɔs tepe bakarandeni nama beŋ, na “Miŋ thuhandeŋ thuhaŋ mankɔ maŋ.” 36Huna pɛyi bindɛ sɛthɛ baŋ, e bakarandeni beŋ thɔɔ ka gbe ba thɔɔyɛ nde Yisɔs baŋ e bindɛ niŋ diŋa ka kaa. Gbeni bahɛna ba kiŋ nde kɛndɛ. 37Naa bindɛ ka gbe baŋ, huru humandiŋ penke bindɛ wuthinkande ka mankɔ maŋ awa thamunkulu thaŋ bohe ba gbantuwande gbe baŋ. Gbe baŋ bohe ba thiŋo mandi. 38Yisɔs kiŋ nde ka gbe baŋ mahɛŋ. Wundɛ kɔŋ nde nine e dɛntɔkɔ mudɛntɔkɔ muŋ. Kɛna thɔhɔŋ niŋ bakarandeni beŋ e bindɛ niŋ thɔnthiŋina, na “Karimɔkɔ, e hali miŋ tuukuwaŋ dondo baŋ fooma yi boheta sɛmbɛ?” 39Kɛna ŋaye Yisɔs ka kɔɔ e pinda huru haŋ, na “Thɛba nayeŋ!” Awa e tepe thamunkulu thaŋ ba thɛŋ thɛba nayeŋ. Awa ka wuthurɔy wubɛina, huru haŋ thebe nayeŋ, awa wuŋ niyɔy nayeŋ ka mankɔ ka. 40Yisɔs tepe ka bakarandeni beŋ ba dɔma, na “Mbɛ hu beŋ paye? E beŋ haaŋ hɛ beŋ ka iŋ lanɛya?” 41Kɛrɛ bindɛ fooma thooyo payɔ humandiŋ e bindɛ bɔha thɔnthiŋinuwande, na “Mbɛ hati wowathe woŋ baŋ, wo hali hintiŋ huru haŋ iŋ thamunkulu thaŋ amɛyiyɛ niŋ yamari?”

will be added

X\