Maki 16

1Naa daŋande malɔkɔ ma nde biYusu beŋ hemuwe maŋ, Mariyama wo ka mɛti ba ka Makadala, Salomi, mɛnɛ Mariyama nanda ka Yemisi boye mayɔ mathimɔy huru ba ka konke kubeli ku ka Yisɔs koŋ. 2Ka Sɔnde sanka-sanka naa thɛri theyaŋ haŋ, bindɛ key ka yoma ka. 3Naa bindɛ key, bindɛ bohe kaa kaŋ gbonkiya ka wunthe iŋ ntɔ nama, na “Mbɛ mina ka binkiliniyɛ raka haŋ maŋaye ka biyo hu ka yoma haŋ?” Raka huna nde humandiŋ-mandiŋ. Naa bindɛ hintiŋ wuthokiye wuyete, bindɛ kute ba dɔma na raka haŋ binkilino maŋaye ka yoma haŋ ka. 5Huna biyande bindɛ kaake ka yoma haŋ e bindɛ kuta kɛndɛ hati lamgba wunthe doŋe kuwaŋ ka yɔnkɔ huthome haŋ, wo thɔɔyɛ kuhɔli kuhuhɛ napooŋ. Kɛna ni bindɛ thakaba wumandiŋ. 6Hati lamgba woŋ tepe bindɛ, na “Baŋ ni thakaba; yaŋ kɔthɛŋ ba dɔma na beŋ kɔŋ dethi ba Yisɔs wo ka Nasarɛthi woŋ, wo yanto ka kuyeŋ kubariŋande koŋ woŋ. Wundɛ ka dondo baŋ; ndɛ ŋayino ka tuka haŋ. Saaŋ dethi du taaye nde bindɛ niŋ do. 7Bɛna kaaŋ e beŋ ka tɛpa huseri haŋ haŋ baŋ ka bakarandeni nama beŋ, thiyitaŋ Pita na: na ‘Wundɛ kɔŋ bena kɔtiyɔkɔ ka kuyɛkɛŋ ku ka Kalili koŋ; kɛna beŋ niŋ ka kute, nɔŋ na tepe nde nthɔŋ ndɛ bena na.’ ” 8Kɛna pɛyɛŋ bindɛ ka yoma ka e bindɛ kaa kaŋ thara iŋ gbɛki mɛnɛ payɔ humandiŋ. Bindɛ tha gbonkiye wɔ yo wɔ baa bi nde iŋ payɔ humandiŋ. 9Yɛrɛmɛŋ beŋ key ka Pita ka mɛnɛ binyathiki nama beŋ e toŋe bindɛ kuna kuthurɔy ba bɛyiniŋ fooma ba thanki bindɛ tepo baŋ. 10Naa daŋande wuŋ kɛndɛ, Yisɔs ka yɛthɛ nama wundɛ ŋindi bakarandeni nama beŋ iŋ huseri hu ka Masaala hu niyɔ ba kɔy yo kɔy haŋ ka fa woŋ fooma.] 11Naa yuye bindɛ Mariyama si dɔŋ na Yisɔs kiŋ wohɛmɛ awa ndɛ kutiyɔkɔi niŋ, bindɛ tha niŋ ni lanɛya. 12Naa daŋande wuŋ, Yisɔs tɔŋinɔkɔy ka bakarandeni nama biye ka maniyɔ mahɛna naa kooye nde bindɛ gboŋa maŋaye ka mɛti baŋ. 13Kɛna dapiyɔkɔy bindɛ ba ka tepe bakarandeni bihɛna beŋ, kɛrɛ bi tepo beŋ tha huŋ ni lanɛya. 14Ka wumankɛ nagbɔŋ, Yisɔs tɔŋinɔkɔy ka bakarandeni kɔhi iŋ wunthe beŋ naa nde bindɛ thɔŋ. Wundɛ tepe bindɛ ba bindɛ niya nde wunɛnɔy, baa bindɛ ka nde iŋ lanɛya awa banapiŋ bina nde hɛlɛŋ nɛŋ ba thana niya lanɛya hu tepe bi kutɛ niŋ naa ŋaye ndɛ ka tuka haŋ. 15Wundɛ tepe bindɛ, na “Kaaŋ ka fa woŋ fooma e beŋ kaa kaŋ niya kɛwandi Huseri Huyɔhɔy haŋ ka biyamɛti fooma. 16Wo ni lanɛya woŋ e ndɛ biyo biye hu ka Masaala haŋ, ndɛ kɔŋ niyɔ kisi; kɛrɛ wundɛ wo sa ni lanɛya woŋ, wundɛ kɔŋ thonkino. 17Balanɛyani beŋ bi kɔŋ dunkuno sɛmbɛ ba niya bɛyiniŋ bathakaba: bi kɔŋ kaninande biya mbayiŋ naa bindɛ hiŋ keŋ kukiyaŋ koŋ; bi kɔŋ gbonkoy ka thayuni thahɛna. 18Mɛnɛ bindɛ boheke bikɛkɛni maa bindɛ thiiye mayara yo mayara, bindɛ sa kutu bɛyi yo bɛyi; bi kɔŋ tutu bithoonɔy beŋ thɛnkɔ, awa bi kɔŋ pethɔ.” 19Naa thanki Mariki woŋ Yisɔs gbonkiya iŋ bakarandeni beŋ, ndɛ ŋatito ka ariana e ka dɔŋɔ ka yɔnkɔ huthome hu ka Masaala haŋ ka madoŋe mayiki maŋ. 20Kɛna fuŋ bakarandeni beŋ ba kaa kaŋ niya kɛwandi kamo kama, awa Mariki woŋ ni wali iŋ bindɛ haaŋ e wuŋ tɔŋina ba dɔma na kɛwandi namɛŋ woŋ woseŋa na maŋaye ka bɛyiniŋ bathakaba ba bindɛ ni baŋ.]

will be added

X\