Maki 14

1Naa pɛyɛ wuŋ hura kaye bindɛ ba dɔŋɔ ba siyuwa malɔkɔ ma puntiyando nde mbembɛŋ namɛŋ beŋ iŋ maleka wo ka tuka haŋ woŋ, iŋ wiki wo ka thɔma kutoŋ ku ka iŋ yisithi woŋ koŋ, bafodeni bibukuyuwɛ beŋ mɛnɛ karimɔkɔiŋ bi ka Siraŋ baŋ beŋ bohe deethuwa gboŋɛŋ ba bindɛ bohe Yisɔs na ka gbundu ba niŋ kɔra. 2Bindɛ dome, na “Miŋ bɛiŋ wuŋ ni ka wiki wo ka thɔma humandiŋ haŋ woŋ, baa thampo biya muŋ niya sɔnkɔ-sɔnkɔ.” 3Ka lɔkɔ babɛina Yisɔs kiŋ nde ka mɛti ba ka Bɛthani ka banka ba ka Saimɔŋ wo boho nde iŋ nthoonaŋ kinɛnɔy ki bohe ka kɔtɔ ku ka wɔmɛti koŋ ka thinthi. Naa dɔŋɔy Yisɔs ka thɔma haŋ, hati yɛrɛmɛ wunthe key ka Yisɔs wo iŋ bithira hu mayɔ ma thimɔy huru, awa e mɛŋ nde hɛlɛŋ niyɔ ma kahɛ mɔlɔŋ, ma dɔma maŋ na naadi. Bithira hubɛina hu yehinuwo maŋaye ka raka hu kahɛ mɔlɔŋ hu dɔma na alabasata. Hati woyɛrɛmɛ woŋ baŋ key pɛthi bithira haŋ e koŋe Yisɔs na mayɔ maŋ ka yaha ka doŋe ndɛ ka thɔma haŋ ka. 4Naa kute wuŋ biya binɔndi bi nde kɛndɛ beŋ, wuŋ thoŋ bindɛ e bindɛ dɔma ka wunthe iŋ ntɔ nama, na “Mbɛ hu teetuwe hati woyɛrɛmɛ woŋ mayɔ maŋ maŋ? 5Mayɔ maŋ maŋ ma kɔŋ nde niya gbɔŋ e mɛŋ fuŋuna kɔbiri wo bɛrɛ ba kuthunkuŋ ku ka wɔ wunthe ba nina hunthe, e bamɔnɛŋ beŋ dunkuno kɔbiri wobɛina.” Bindɛ tharatharani hati woyɛrɛmɛ woŋ baŋ wubɔyɛ-bɔyɛ ba huŋ. 6Huna dome Yisɔs kɛnamɛŋ, na “Penekeŋ hati woyɛrɛmɛ woŋ baŋ. Mbɛ hu beŋ niŋ niye thɔɔrɔ? Wundɛ thanki yama niyiyɛ bɛyi bayɔhɔy-yɔhɔy. 7Beŋ kiŋ iŋ bamɔnɛŋ beŋ timo tima. Awa timo tima ti thimo beŋ ba bindɛ niyiyɛ, beŋ kɔŋ punku bindɛ niyiyɛ. Kɛrɛ beŋ sa niyɔ iŋ yaŋ timo tima. 8Wundɛ ni ti punke wundɛ. Mayɔ ma koŋe ndɛ yama ka kɔtɔ maŋ, ndɛ ni wuŋ ba yama kɔsinɔkɔ haliko na yaŋ si mankuwo. 9Yaŋ thimoŋ ba beŋ siyuwa haŋ haŋ baŋ, kamo kama ka Huseri Huyɔhɔy haŋ haŋ baŋ niya kɛwandi ka fa woŋ baŋ fooma, ba ni hati woyɛrɛmɛ woŋ baŋ ba kɔŋ doŋe tepo ba niŋ siyuwa.” 10Kɛna ŋaye wunthe ka bakarandeni nama bikɔhi iŋ biye beŋ, wo dɔma Yudasi Isakariyɔti woŋ, e ndɛ kaa ka bafodeni bibukuyuwɛ beŋ ba ka dɛɛnka ba niyite bindɛ Yisɔs na gbɔŋ. 11Naa yuye bindɛ huŋ, wuŋ yehe bindɛ wumandiŋ e bindɛ niŋ niya lahiri ba niŋ dunkune kɔbiri. Kɛna bohe nda Yudasi deethuwa hɛɛra bayɔhɔy na ndɛ niye Yisɔs na gbɔŋ kɛnamɛŋ. 12Ka lɔkɔ bamayoŋ ka wiki wo thɔŋ bindɛ kutoŋ ku ka iŋ yisithi woŋ koŋ, ka lɔkɔ ba takɛŋ bimpatiyɛŋ beŋ fuŋuna saraka ba thɔma haŋ, bakarandeni bi ka Yisɔs beŋ thɔnthɔŋɔŋ niŋ ba dɔma, na “Kama thimo yi ba miŋ kosineke ba thɔma hu ka siyuwa malɔkɔ ma puntiyando nde siya ntuŋ baŋ iŋ maleka wo nde katitɔkɔ tuka haŋ woŋ?” 13Kɛna ŋindi Yisɔs bakarandeni biye e ndɛ bindɛ nunkunɔkɔ, na “Kaaŋ ka mɛti bamandiŋ baŋ ka Yɛrusalɛmi, awa beŋ kɔŋ pɛnki wɔ wathe tuteke mumune. Yemaŋ niŋ 14ka banka ba ndɛ biyande baŋ, e beŋ ka dɔma ka wo biyɛ banka baŋ woŋ: na ‘Karimɔkɔ woŋ dome, na kama makonko niŋ maŋ ka yaŋ iŋ bakarandeni niŋ beŋ thome thɔma humandiŋ haŋ?’ 15Wundɛ kɔŋ bena toŋine makonko mamandiŋ ka banka baŋ ka thinthi, ma yehinuwo nda wuyɔhɔy, ma beŋ ka kɔsinɔkɔ ntha yo ntha ba miŋ.” 16Bakarandeni beŋ key ka mɛti ka e bindɛ ka pɛnka ntha yo ntha nɔŋ na tepe nthɔŋ Yisɔs bindɛ na. Awa bindɛ kɔsinɔkɔy thɔma haŋ haŋ baŋ ba malɔkɔ ma puntiyande maŋ. 17Naa thɔɔyɛ kaŋ woŋ, Yisɔs tɛŋ iŋ bakarandeni nama kɔhi iŋ biye beŋ. 18Awa naa bindɛ thɔŋ, Yisɔs dome ka bakarandeni nama beŋ, na “Yaŋ kɔŋ bena tepe, wunthe ka beŋ wo miŋ thɔŋ ka tha banthe woŋ kɔŋ yama ni gbɔŋ ka hadeni niŋ beŋ.” 19Naa yuye bindɛ haŋ haŋ baŋ, wuŋ niyɔy bindɛ nkinikiniŋ wumandiŋ. Kɛna bohe bindɛ niŋ thɔnthiŋinuwa ka wunthe-wunthe, na “Mariki, yaŋ kutɛ ye.” 20Yisɔs ni bindɛ yaabi ba dɔma, na “Wunthe ka bendo kɔhi iŋ biye beŋ, wo yaŋ thiyitande yɔnkɔ ka karo banthe woŋ, ndɛ na yama ni gbɔŋ. 21Hati ka Wɔ woŋ kɔŋ tuke nɔŋ na gbalo nde wuŋ na ka magbali ma ka Masaala maŋ ba ndɛ. Kɛrɛ nambara ba kɔŋ see ka wɔ wo ni Hati ka Wɔ woŋ gbɔŋ. Wu kɔŋ nde niyɔ hita ba wɔ bɛina nde nɔŋ thana mpoo.” 22Naa nde bindɛ thɔŋ, Yisɔs sekithe kutoŋ koŋ, e ndɛ thiyiyɛ kuŋ maamo. Naa thankaŋ ndɛ, ndɛ thinkinuwande kuŋ, e kuŋ dunkune bakarandeni beŋ e bindɛ tepe ba dɔma, na “Sɛkithaŋ kutoŋ koŋ koŋ baŋ e beŋ kuŋ thɔma. Kɔtɔ niŋ koŋ kuna.” 23Ndɛ sekithe hɛlɛŋ kɔɔpu haŋ e ndɛ thiya Masaala na maamo. Naa thanki ndɛ thiya maamo, ndɛ dunkune bindɛ, awa bindɛ fooma thiiye. 24Yisɔs dome kɛnamɛŋ, na “Mampa maŋ maŋ mɛna wasi niŋ baŋ ba dunkuŋ yaŋ saathɛ ba biya bibɔyɛ. Wasi bakiyaŋ baŋ bɛna thiŋinɛ mayukunande ma ka Masaala maŋ. 25Yaŋ kɔŋ bena tepe ba dɔma na yaŋ sa nɔŋ nda thiiye mampa ma ka mutiŋ muŋ muŋ baŋ, yɔkɔŋ nda ti yaŋ thiiye maŋama maŋ ka Hugbakine hu ka Masaala haŋ.” 26Naa thanki bindɛ thɔma, bindɛ soŋe kuiŋa ku ka Masaala koŋ, kɛna pɛyɛŋ bindɛ kɛndɛ ba kaa ka kusɛri ku dɔma koŋ na Ɔlifisi. 27Kɛna dome Yisɔs kɛnamɛŋ, na “Beŋ fooma beŋ kɔŋ yama pɛyɛŋ e beŋ kita napooŋ. Wu kɔŋ niyɔ nɔŋ na tepe Masaala ka magbali nama maŋ na ba dɔma, na ‘Yaŋ kɔŋ kɔri batɔli woŋ, awa takɛŋ beŋ fooma ka kubinthi koŋ bi kɔŋ paŋande.’ 28Kɛrɛ naa yaŋ ŋayino ka tuka haŋ, yaŋ kɔŋ yenke kaa ka Kalili, kɛna beŋ yama penke.” 29Huna dome Pita kɛnama, na “Hali beŋ beŋ fooma bi pɛyɛnaŋ yina, yaŋ sa yina pɛyɛŋ.” 30Yisɔs dome kɛnama, na “Yaŋ kɔŋ yina tepe, saanuŋ koki woŋ ba kokira kaye huyɛ baŋ baŋ, yi kɔŋ yama buuhu dɔŋɔ kataati ba dɔma na yi kɔita yama.” 31Kɛna yame hɛlɛŋ Pita dɔma kɛnama, na “Hali wu pɛnkaŋ nthɔŋ ba dɔma na yaŋ kɔŋ tuku iŋ yi ka nanthe, yaŋ sa yina buuhu.” Bakarandeni bibintheŋ beŋ fooma dome hɛlɛmaŋ nɛŋ. 32Yisɔs mɛnɛ bakarandeni nama beŋ fuŋ ba kaa ka tha ka dɔma na ka Kɛthɛsɛmɛni. Naa tɛŋ bindɛ kɛndɛ, ndɛ tepe bakarandeni nama beŋ, na “Dɔŋɔŋ dondo baŋ. Yaŋ kɔŋ key kanka baŋ ba ka niya kuraminɛ.” 33Kɛna diŋe ndɛ Pita na, Yemisi, mɛnɛ Yɔni ka kaa. Ka lɔkɔ baŋ baŋ ndɛ bohe kutɔkɔ nkinikiniŋ, awa e thukuma nama haŋ kɔ niya thɔɔrɔ. 34Huna dome ndɛ kɛnamɛŋ, na “Yaŋ kiŋ iŋ nkinikiniŋ wumandiŋ ka thukuma niŋ haŋ, wu yama kɔ ba kɔra. Bɛna pɛyɔŋ dondo baŋ, beŋ be huru gbele ka nanthe iŋ yaŋ.” 35Kɛna key ndɛ ka kɔtɔkɔy hɛlɛŋ wuyete, e ndɛ putɔ nasɔli-sɔli ka niya kuraminɛ, ba mɛnɛ wu kɔŋ ŋɛnɔ, wakathi wo ka nambara baŋ woŋ be niŋ buthurɔ. 36Wundɛ ni kuraminɛ, na “Papaŋ, Fandaŋ woŋ, bɛyi yo bɛyi ba kiŋ baŋɛnɔy kɛnda. Bɛna niya ba kɔɔpu hu ka nambara haŋ haŋ hu be yama buthurɔ. Kɛrɛ wu bɛiŋ niyɔ ka mathimo niŋ nde, kɛrɛ wu niyɔyŋ ka mathimo makɛnda maŋ.” 37Naa thanki ndɛ niya kuraminɛ, ndɛ teŋiteke ka bakarandeni bitaati beŋ. Kɛrɛ ndɛ penke bi si nine. Huna dome ndɛ ka Pita, na “Saimɔŋ, e nine na beŋ nine? Mbɛ hu sa beŋ punku hure gbele hali ba wakathi wunthe?” 38Wundɛ dome kɛnamɛŋ, na “Huraŋ gbele e beŋ niya kuraminɛ wuna sa beŋ thiika ba niya hakɛ. Thukuma haŋ hu thimoŋ ba niya bɛyi bathumbɛ, kɛrɛ huwɔmɛtiya haŋ ka iŋ sɛmbɛ ba bɛŋ niya.” 39Kɛna teŋiteke hɛlɛŋ ndɛ ba ka niya kuraminɛ. Kuraminɛ kukunthe koŋ thuuŋ kuŋ ma key ka niya. 40Ndɛ key hɛlɛŋ ka bakarandeni beŋ e ndɛ pɛnka bi si nine; baa bi thiŋo nde mandɛ ka thaaya namɛŋ thaŋ. Ka lɔkɔ baŋ baŋ, bindɛ tha nda bohi hu bindɛ niŋ konde. 41Naa key hɛlɛŋ ndɛ hu tɛŋinɛ hutaati haŋ, ndɛ dome kɛnamɛŋ, na “E haaŋ hɛ nine na beŋ nine e beŋ kɔ hɛɛmuwa? Atɛŋ nda! Wakathi woŋ tɛŋ wo Hati ka Wɔ woŋ niyo gbɔŋ woŋ ka thɛnkɔ tha ka bahakɛŋ. 42Ŋayeŋ ka kɔɔ, miŋ beŋ key. Dethaŋ hɛ, wo yama ni gbɔŋ woŋ, ndɛ kiŋ nda mina wuthuriye.” 43Naa nde hintiŋ Yisɔs gbonkoy, kɛna see Yudasi, wo nde wunthe ka bakarandeni kɔhi iŋ biye beŋ, iŋ sɛthɛ babɔyɛ bi iŋ silanhiŋ mɛnɛ ŋagbemgbe, bi ŋindi bafodeni bibukuyuwɛ beŋ, karimɔkɔiŋ bi ka Siraŋ baŋ beŋ, mɛnɛ bakalani bibayahɛŋ beŋ. 44Saanuŋ bindɛ ba kaa ka bɔha Yisɔs na, Yudasi, banigbɔŋ woŋ, toŋine bindɛ na wundɛ ka ni na bindɛ kothiye Yisɔs na. Ndɛ tepe bindɛ ba dɔma, na “Hati wowathe wo nthɔŋ yaŋ dɔɔkɔ ka maana woŋ ndɛ na; bɔhaŋ niŋ e beŋ niŋ diŋa ka kaa.” 45Naa tɛŋ Yudasi, ndɛ key toloŋ ka Yisɔs ka e dɔma, na “Maande, Karimɔkɔ.” Awa ndɛ dɔɔkɔy niŋ ka maana. 46Kɛna key sɛthɛ baŋ ŋote Yisɔs na e bindɛ niŋ bɔha wukahɛ-kahɛ. 47Naa kute wuŋ wunthe ka bi kɔɔyɛ kɛndɛ kuwaŋ beŋ, ndɛ yose silanhi nama baŋ e ndɛ yuwa waayi wo ka bafode womandiŋ woŋ e gbaara kuiha nama koŋ. 48Kɛna dome Yisɔs ka sɛthɛ baŋ, na “E beŋ asee iŋ silanhiŋ mɛnɛ ŋagbemgbeŋ ka bɔha yama nɔŋ ka beŋ see ka bɔha wɔ wo sa putiyɔ siraŋ? 49Timo tima yaŋ kɔŋ dɔŋɔ iŋ beŋ ka banka bamandiŋ ba ka Masaala baŋ ka thaninuwa, kɛrɛ beŋ tha yama bohi. Kɛrɛ bɛyiniŋ baŋ baŋ niyɔy fooma haliko magbali ma ka Masaala maŋ ma be niyɔ nɔndi.” 50Ka lɔkɔ baŋ baŋ bakarandeni beŋ fooma pɛyɛŋ niŋ e bindɛ kita napooŋ. 51Naa bindɛ kati Yisɔs na, hati lamgba wunthe wo pithɛ nde thoombo yemeŋ nde Yisɔs na mahɛŋ. Kɛna yole bindɛ ba bɔha hati lamgba woŋ baŋ, 52kɛrɛ ndɛ thare bunthu napooŋ e ndɛ pɛya thoombo wo pithe nde wundɛ woŋ. 53Kɛna kato Yisɔs ka banka ba ka Bafode Womandiŋ woŋ, ka kɔmande nde fooma bafodeni bibukuyuwɛ beŋ, bakalani bibayahɛŋ beŋ, mɛnɛ karimɔkɔiŋ bi ka Siraŋ baŋ beŋ. 54Naa Yisɔs kata, Pita yeme kahɛŋ kɛrɛ wuthɔkiyande iŋ bindɛ. Naa biyande Pita, ndɛ key dɔŋɔ ka gbada hu ka banka ba ka Bafode Womandiŋ woŋ baŋ. Ndɛ key dɔŋɔ ka poye iŋ bi ni kantha beŋ ba detha ba niyɔ. 55Kɛna bohe bafodeni bibukuyuwɛ beŋ mɛnɛ bakaamani beŋ fooma deethuwa maseriŋ mahothi ma sɔkinɔkɔ Yisɔs na haliko na ndɛ koro. Kɛrɛ bindɛ tha kutu hu bindɛ niŋ thonkine. 56Biya bibɔyɛ key kɔɔ ka kɔtɔkɔy ba niŋ kɛriŋiyɛ hothi, kɛrɛ magbonkoy namɛŋ maŋ tha mɛyiyande hali. 57Yɔkɔŋ hu mankɛ nagbɔŋ baseriŋ binɔndi key kɔɔ ba kɛriŋiyɛ Yisɔs na hothi e bindɛ dɔma, na 58“Miŋ yuye nde si dɔŋ, na ‘Yaŋ punkeŋ teetuwa yikiya ba ka Masaala ba yeheni biyamɛti baŋ, awa e yaŋ hɛlɛŋ yehinuwa ba sa yehinuwa iŋ biyamɛti na gbɛɛŋ wotaati woŋ daŋande.’ ” 59Hali bindɛ hɛlɛŋ gbeeŋ magbonkoy namɛŋ maŋ tha mɛyiyande. 60Naa yuye huŋ Bafode Womandiŋ woŋ, ndɛ ŋaye e kɔɔ ka kɔtɔkɔy kɛnamɛŋ e thɔnthiŋina Yisɔs na, na “E yi ka iŋ yaabi ba yi ni ka maseri ma lamgbeŋ beŋ beŋ ni ma sɔkinɔkɔ yina maŋ?” 61Kɛrɛ Yisɔs tha hintiŋ nthɔŋ niŋ tɔtiyɔkɔ. Bafode Womandiŋ woŋ thɔnthɔŋɔŋ hɛlɛŋ niŋ, na “E yina Banikisi wo niyo nde lahiri woŋ, Hati ka Masaala wo biyamɛti gbuŋunu woŋ?” 62Yisɔs ni niŋ yaabi, na “Yama, awa beŋ fooma beŋ kɔŋ nɔŋ kutu Hati ka Wɔ woŋ doŋe kuwaŋ ka yɔnkɔ huthome hu ka Masaala wo biyɛ sɛmbɛŋ fooma woŋ e ndɛ kɔ thuha iŋ thawuruma thaŋ maŋaye ka ariana.” 63Naa yuye huŋ Bafode Womandiŋ woŋ, ndɛ saayaŋ ŋahɔli ŋa thooye ndɛ ŋaŋ ba tɔŋina ba ndɛ thɔɔ ka mathoŋ, e ndɛ dɔma, na “Miŋ thimota nda maseri yo maseri mahɛna. 64Beŋ fooma yuye magbonkoy manɛnɔy maŋ maŋ. Nama tepe beŋ?” Bindɛ fooma niyɔy hunthe ma sɔkinɔkɔ niŋ e bindɛ dɔma na ndɛ asisande ba koro. 65Kɛna sɛsi binɔndi ka bindɛ ba niŋ thuthe e bindɛ niŋ pututa thaaya ba niŋ thiika thɔkɔ e bindɛ niŋ kɔ haanka. Naa bindɛ haaŋe nthɔŋ niŋ, bindɛ thɔnthɔŋɔŋ niŋ, na “Tɔŋina hɛ wo haaŋɛ yina woŋ.” Kɛna ŋaye bi ni kantha beŋ e bindɛ niŋ thorinuwa. 66Ka lɔkɔ babɛina Pita doŋeŋ nde ka gbada ka. Kɛna key hati bɛthɔ wo nde wunthe ka bawaliŋ bi ka Bafode Womandiŋ woŋ kɛnama. 67Naa kute ndɛ Pita si poye, ndɛ dethe niŋ natiŋ e ndɛ dɔma, na “Yi hɛlɛŋ nɛŋ gbeeŋ yina nɔŋ iŋ Yisɔs wo ŋaye ka mɛti ba ka Nasarɛthi baŋ woŋ.” 68Kɛrɛ Pita buuhu e ndɛ dɔma, na “Yaŋ methota awa yaŋ hakiyandota hu yi gbonkoy haŋ.” Kɛna fuŋ ndɛ ka gbada ka. Naa fuŋ nthɔŋ ndɛ, koki woŋ kokori. 69Hati bɛthɔ wo bawali woŋ kute niŋ. Kɛna bohe hɛlɛŋ ndɛ dɔma ka bi kɔɔyɛ kɛndɛ kuwaŋ beŋ, na “Wunthe na ka bindɛ.” 70Kɛrɛ Pita buuhu hɛlɛŋ huŋ. Naa nambe nthɔŋ wuŋ wuyete, bi kɔɔyɛ kɛndɛ kuwaŋ beŋ dome ka Pita, na “Yi sa punku buuhuwa ba dɔma na yi ka wunthe ka bindɛ, baa yi hɛlɛŋ gbeeŋ wɔ na yi wo ŋaye ka kuyɛkɛŋ ku ka Kalili.” 71Kɛna bohe Pita thiyiyɔkɔ danka e ndɛ kɔ gbiŋa ba dɔma, na “Haliko Masaala gbasiŋita yama mɛnɛ hothi na yaŋ tɛpi haŋ. Yaŋ kɔita hati wowathe wo beŋ dɔŋ woŋ.” 72Naa gbanthaŋ nthɔŋ ndɛ, koki woŋ kokori hukaye. Kɛna siyi Pita hu tepe nde niŋ Yisɔs haŋ ba dɔma, na “Saanuŋ koki woŋ ba kokira kaye, yi kɔŋ yama buuhu dɔŋɔ kataati ba dɔma na yi kɔita yama.” Ka wuthurɔy wubɛina wundɛ sɛsi ba berina.

will be added

X\