Maki 1

1Huseri Huyɔhɔy haŋ ba Yisɔs Kraist, Hati ka Masaala woŋ, huna haŋ haŋ. 2Huŋ sɛsuwe nde nɔŋ na gbale nde nthɔŋ banabi woŋ Aisaya ka kuthagba nama koŋ ba dɔma na Masaala tepe nde, na “Yaŋ kɔŋ ŋindi baseri wokiyaŋ woŋ ka kɔtɔkɔy kɛnda ba sahuwa e mɛthina gboŋa baŋ ba yi.” 3Aisaya key ka kɔtɔkɔy ba tɛpa, na “Wɔ wunthe kɔŋ yɛli thampa ka wula baŋ, na ‘Kɔsinɔkɔ gboŋa baŋ ba Mariki woŋ; awa e beŋ bɛŋ thumbunuwa natoloŋ.’ ” 4Awa Yɔni tɔŋinɔkɔy nde ka wula baŋ e kɔ biye biya beŋ biye hu ka Masaala haŋ, e hɛlɛŋ kɔ niya biya beŋ kɛwandi ba dɔma, na “Sikinaŋ sɔkɔrɔ hakɛŋ bakendeŋ baŋ, awa e beŋ biyo biye hu ka Masaala haŋ, wuna Masaala bena pɛniyɛ hakɛŋ bakendeŋ baŋ.” 5Biya bibɔyɛ bi ŋaye ka kuyɛkɛŋ ku ka Yudiya iŋ ka mɛti bamandiŋ ba ka Yɛrusalɛmi baŋ key ba ka yuyɛ Yɔni na. Bindɛ key tɛŋinɔkɔ hakɛŋ bakɛnamɛŋ baŋ, awa ndɛ biye bindɛ biye hu ka Masaala haŋ ka mankɔ ma ka Yɔdaŋ maŋ. 6Awa Yɔni thooyeŋ nde yaba ba yehinuwo maŋaye ka bɔɔyɛ bu ka maama womandiŋ wo dɔma na nyɔkɔmɛ. Awa e ndɛ pitha mbumbusa ki ka nthagba ka hirika nama haŋ e wundɛ kɔ thɔma sisiŋ mɛnɛ tɔŋɔ. 7Wundɛ ni biya beŋ kɛwandi ba dɔma, na “Wɔ kiŋ wo see mahɛŋ makiyaŋ wo yamɛ ba yaŋ kaye-kaye. Awa yaŋ sisandeta hintiŋ nthɔŋ ba putɔ e pɛɛka nkalɛŋ ki ka dagbalɛŋ bakɛnama baŋ kiŋ. 8Yando bena biiye iŋ mandi, kɛrɛ wundɛ woŋ baŋ kɔŋ bena si biiye iŋ Yina wo ka Masaala woŋ.” 9Wuŋ tha hintiŋ nthɔŋ niye nambe Yisɔs see maŋaye ka mɛti ba ka Nasarɛthi ka kuyɛkɛŋ ku ka Kalili koŋ, e Yɔni niŋ ka biye ka mankɔ ma ka Yɔdaŋ maŋ. 10Ka wuthurɔy wu fuŋ Yisɔs ka mandi maŋ, wundɛ kute ka ariana si pɛthɔ, awa e Yina wo ka Masaala woŋ kɔ thuhe niŋ ka mathɔyande ma ka kurotho. 11Kɛna fuŋ thampa maŋaye ka ariana tha tɛpɛ ba dɔma, na “Yina Hati wokiyaŋ wowathe wo thimo yaŋ woŋ. Yi yeheŋ yama thukuma.” 12Ka wuthurɔy wubɛina, Yina wo ka Masaala woŋ ni ba wundɛ kaa ka wula ka. 13Wundɛ niyɔy kɛndɛ ba hura kɔnthɔ-kanaŋ, e gberiŋinuwo kɛndɛ iŋ Sithani. Awa maamiŋ bi ka hee fooma bi kiŋ nde kɛndɛ, kɛrɛ malekɛŋ beŋ key niŋ mase. 14Naa thiyo Yɔni wo Babiye biye hu ka Masaala haŋ ka yeeli, Yisɔs key ka kuyɛkɛŋ ku ka Kalili e kaa kaŋ niya kɛwandi Huseri Huyɔhɔy hu ŋaye ka Masaala haŋ. 15Yisɔs tepe bindɛ ba dɔma, na “Malɔkɔ magbeeŋ maŋ mɛna tɛŋɛ maŋ, awa Hugbakine hu ka Masaala haŋ thuriye. Sikinaŋ sɔkɔrɔ hakɛŋ bakendeŋ baŋ, awa e beŋ niya lanɛya ka Huseri Huyɔhɔy haŋ.” 16Naa nde Yisɔs kaande ka gbaraŋ ba ka mankɔ mamandiŋ ma ka Kalili maŋ, wundɛ kute bathithini biye, Saimɔŋ mɛnɛ wɛndama Anduru, e bindɛ kɔ yɔsa heni ka mankɔ maŋ iŋ ŋapɛli namɛŋ ŋaŋ. 17Yisɔs tepe bindɛ ba dɔma, na “Yemaŋ yama, awa yaŋ kɔŋ bena sikiŋ bayɔsiŋ biyamɛti.” 18Ka thagbɛmgbɛŋ thabɛina, bindɛ pɛyi ŋapɛli namɛŋ ŋaŋ e bindɛ yema Yisɔs na. 19Naa Yisɔs key biyasi nama haŋ ka kɔtɔkɔy, wundɛ kute hɛlɛŋ biya biye bi huwɛndiya, Yemisi mɛnɛ Yɔni, mpati bi ka Sɛbɛdi beŋ. Bi kiŋ nde ka gbe bakɛnamɛŋ baŋ e kɔ yehinuwa ŋapɛli namɛŋ ŋaŋ. 20Ka wuthurɔy wu kute Yisɔs bindɛ wuŋ, wundɛ thiyi bindɛ. Bindɛ pɛyi fandamɛŋ Sɛbɛdi na ka gbe baŋ mɛnɛ biya bigbako beŋ e bindɛ yema Yisɔs na. 21Yisɔs iŋ bakarandeni nama beŋ key ka mɛti ba ka Kapaniyɔmi. Naa puthɔy kaŋ ka Malɔkɔ Mahemuwe ma yeme maŋ, Yisɔs biyande ka banka bathuŋuyande ba ka biYusu beŋ baŋ e sɛsuwa ba thaninuwa biya beŋ. 22Biya bi yuyɛ niŋ beŋ ndɛ si thaninuwe na, bindɛ ni ŋakabanɛ wumandiŋ ba na wundɛ thanani. Bindɛ tepe ba dɔma na wundɛ thaninuweta nɔŋ na karimɔkɔiŋ bi ka Siraŋ ba ka dina namɛŋ woŋ thaninuwe na; kɛrɛ wundɛ kɔŋ thanani iŋ mayoho nama maŋ. 23Naa nambe wuŋ wuyete, hati lamgba wunthe wo boho iŋ wayi wonɛnɔy biyande kaŋ tɛntitɔkɔ ka banka bathuŋuyande baŋ ka nde Yisɔs ka. 24Ndɛ tepe, na “Mbɛ ba thimo yi ba mina niya, yindo Yisɔs wo ŋaye ka mɛti ba ka Nasarɛthi baŋ woŋ? E yi kiŋ dondo baŋ ba mina teetuwa? Yaŋ kɔthɛŋ yina; yina Wɔ Womɛthɛ wo ŋaye ka Masaala ka woŋ.” 25Kɛna ni Yisɔs wayi wonɛnɔy woŋ yamari e dɔma, na “Niya nayeŋ, awa e yi fuŋa ka hati lamgba woŋ baŋ.” 26Wayi wonɛnɔy woŋ thɛnɛŋ hati lamgba woŋ baŋ wumandiŋ a fuŋuna thampa thatɔɔkɛ saanuŋ wundɛ ntiŋ niŋ kɔ pɛyɛna. 27Biya beŋ fooma ni ŋakabanɛ e bindɛ bɔha thɔnthiŋinuwande ba dɔma, na “Mbɛ baŋ baŋ? E mathanani maŋama siiya mɛna tɛŋɛ hɛlɛŋ? Hati lamgba woŋ baŋ kiŋ iŋ mayoho ba niya mbayiŋ binɛnɔy beŋ yamari e bindɛ niŋ putiyɔ.” 28Wuŋ tha hintiŋ nthɔŋ nambi, bɛyiniŋ ba ni Yisɔs baŋ fooma thanki gbanthande ka kuyɛkɛŋ ku ka Kalili koŋ. 29Yisɔs iŋ bakarandeni nama beŋ, thiyitaŋ Yemisi na mɛnɛ Yɔni, fuŋ ka banka bathuŋuyande baŋ e bindɛ kaa toloŋ ka banka ba ka Saimɔŋ baŋ mɛnɛ Anduru. 30Ka lɔkɔ babɛina nanda ka wɔtɔ wo ka Saimɔŋ ŋoyeŋ kɛndɛ wo ŋɔtitɛ iŋ nthoonaŋ ki ka kɔtɔ kutɔɔkɛ. Ka wuthurɔy wu biyande Yisɔs wuŋ, wundɛ tepo ba mɔɔŋ woŋ baŋ. 31Kɛna biyande wundɛ ka ŋoye mɔɔŋ woŋ ka, e ndɛ niŋ ka bɔha yɔnkɔ e ŋayina niŋ ka kɔɔ. Ka thagbɛmgbɛŋ thabɛina, kɔtɔ kutɔɔkɛ koŋ pethɔy mɔɔŋ woŋ baŋ, awa wundɛ ni bindɛ barɛy. 32Naa thɔɔyɛ kaŋ woŋ ka thamamiŋa, biya beŋ kati ka Yisɔs ka bathoonani beŋ fooma mɛnɛ bi bɔhɔy iŋ mbayiŋ. 33Biya bi ka mɛti ka beŋ fooma key thuŋande ka gbada hu ka banka baŋ haŋ. 34Yisɔs puyi biya bibɔyɛ bi iŋ nthoonani kihakuwande e ndɛ kaninande biya mbayiŋ bibɔyɛ. Awa wundɛ tha mɛkɛŋ ba mbayiŋ beŋ gbonkiya sɔkɔ o sɔkɔ, baa bi kɔthɛŋ na Yisɔs nagberekethe. 35Naa kokori thɛɛni bimayoŋ beŋ, Yisɔs ŋaye e fuŋa ka banka ba nde wundɛ baŋ. Kɛna pɛyɛŋ wundɛ mɛti baŋ e kaa ka tha ka nayeŋ, kɛna key ndɛ niye kuraminɛ. 36Naa nambe wuŋ wuyete, Saimɔŋ mɛnɛ bintɔni nama beŋ key kaŋ deethuwa niŋ. 37Naa kute bindɛ niŋ, bindɛ tepe niŋ ba dɔma, na “Biya bibɔyɛ thɔkɔti hɛ nda yina kɔ deethuwa.” 38Kɛrɛ Yisɔs tepe bindɛ ba dɔma, na “Yɔkɔŋ miŋ be key ka mɛtiŋ ba pɛnkande dondo baŋ. Yɔkɔŋ yaŋ be key kɛndɛ kaŋ niya kɛwandi, baa saabu baŋ baŋ gbeeŋ bɛna see yaŋ.” 39Awa wundɛ kaande fooma ka kuyɛkɛŋ ku ka Kalili koŋ e wundɛ kaa kaŋ niya kɛwandi ka bankɛŋ bathuŋuyande ba ka biYusu beŋ baŋ, e wundɛ kaninande biya bibɔyɛ mbayiŋ. 40Awa kɛna key hati lamgba wunthe ka Yisɔs ka wo iŋ nthoonaŋ kinɛnɔy ki bohe ka kɔtɔ ku ka wɔmɛti koŋ ka thinthi. Wundɛ kunthuŋe e ndɛ theteke niŋ ba dɔma, na “Mɛnɛ yi kɔŋ thimo ba yama puya, yi kɔŋ punku ba yama pethina.” 41Yisɔs kutiye niŋ nkinikiniŋ e niŋ tuta yɔnkɔ e tɛpa ka hati lamgba woŋ ba dɔma, na “Yaŋ thimoŋ ba yina pethina; awa pethɔ nda.” 42Ka thagbɛmgbɛŋ thabɛina nthoonaŋ kiŋ pethɔy hati lamgba woŋ baŋ, awa kɔtɔ nama koŋ methe natharaŋ. 43Kɛna yeli niŋ Yisɔs wukahɛ-kahɛ, na “Pona kuiha. Ba tepe wɔ yo wɔ ba yi pethɔ, kɛrɛ kaa toloŋ e yi ka tɔŋinɔkɔ ka bafode woŋ, awa e yi fuŋuna saraka ba ni nde bena Musa yamari ba fuŋuna baŋ, ba tɔŋɔŋ ka biya beŋ ba yi pethɔ.” Awa kɛna dome ntiŋ niŋ Yisɔs ba wundɛ kaa. 45Kɛrɛ hati lamgba woŋ baŋ key kaŋ tɛɛpuwa bɛyiniŋ baŋ baŋ kamo kama ka wundɛ key. Hati lamgba woŋ baŋ gbonkoy nda ba Yisɔs haaŋ Yisɔs punketa nda ba biyande ka mɛti nɔŋ na thimo wundɛ. Wuŋ ni nda wundɛ, adɔŋɔ nda ka tha ka ndɛ wuntheŋ, awa biya beŋ bi kɔŋ see kɛnama maŋaye kamo kama.

will be added

X\