Luku 20

1Lɔkɔ banthe naa nde Yisɔs thanani biya beŋ ka banka bamandiŋ ba ka Masaala baŋ e ka niya kɛwandi Huseri Huyɔhɔy haŋ, bafodeni bibukuyuwɛ beŋ iŋ karimɔkɔiŋ bi ka Siraŋ baŋ beŋ, mɛnɛ bakalani bibayahɛŋ beŋ see niŋ pɛnkande. 2Bindɛ thɔnthɔŋɔŋ niŋ, na “Tepe hɛ mina, mbɛ mayoho ma iŋ yi ba niya bɛyiniŋ ba yi ni baŋ? Nkaana dunkune yina mayoho mabɛina?” 3Yisɔs mɛyiyɛ bindɛ, na “Yaŋ hɛlɛŋ kɔŋ bena thɔnthɔŋɔŋ kuthɔnthɔŋɔŋ kunthe; ka tete tepeŋ hɛ yama, 4kama ŋaye nde mayoho ma ka Yɔni maŋ ba biye biya, ka Masaala, maa ka wɔmɛti?” 5Bindɛ bohe gbonkiya ka mateete makɛnamɛŋ e ka tɛpa, na “Mɛnɛ miŋ tepe, na ‘Ŋaye ka Masaala,’ wundɛ kɔŋ tɛpi, na ‘Mbu mbɛ hu tha nde beŋ niŋ niye kulanɛya?’ 6Mɛnɛ miŋ tepe nɛnɛ, na ‘Ŋaye ka biyamɛti,’ biya beŋ fooma bi kɔŋ mina lɔɔpi tharaka haaŋ miŋ tuka, baa bi simekeŋ nde ba dɔma na Yɔni banabi na nde.” 7Huna meyiye bindɛ Yisɔs na, na “Miŋ kɔyta ka ŋaye nde mɛŋ.” 8Huna tepe Yisɔs, na “Yaŋ nɛnɛ, yaŋ sa bena tepe ka kute yaŋ mayoho ba niya bɛyiniŋ ba yaŋ ni baŋ.” 9Kɛna tepe wundɛ biya beŋ mbɔrɔ kɔŋ kɔŋ, na “Wɔ na mahɛ nde dumgbu e wundɛ thuuwa ŋayeŋ ŋatimɛ e bɛŋ dunkuna ka bawaliŋ, e bindɛ tepe ba niŋ kɔsiniyɛ mutiŋ munɔndi ba naa wundɛ tɛŋ nɔŋ, e kaa kubiyasi ka kuyɛkɛŋ kuthokiye ba wunambɛ. 10Naa tɛŋ lɔkɔ ba ka thada mutiŋ muŋ baŋ, bayɔy woŋ ŋindi waayi nama wunthe ka bawaliŋ bi peye wundɛ dumgbu baŋ beŋ, ba bi be niŋ ka dunkune mutiŋ munɔndi. Kɛrɛ bawaliŋ beŋ bohe baseri woŋ. Bindɛ gbuduŋe niŋ. Bindɛ tha niŋ dunkune ntha, nɛna duu wundɛ wu ka ntha. 11Huna ŋindi hɛlɛŋ wundɛ waayi wobiye woŋ. Bindɛ bohe hɛlɛŋ niŋ. Bindɛ gbuduŋe niŋ haaŋ bindɛ niŋ niya kuyaahu, nɛŋ duu ma hɛlɛŋ wu ka ntha. 12Wundɛ ŋindi hɛlɛŋ wotaati. Bindɛ bohe hɛlɛŋ niŋ. Bindɛ yɔmɔni niŋ e bindɛ niŋ gbanta ka kuyɔrɔ koŋ. 13Huna tepe bayɔy woŋ, na ‘Nama nda yaŋ ni ye? Hu kute yaŋ, yaŋ kɔŋ nda ŋindi hatiŋ wo thimo yaŋ woŋ gbeeŋ; thampo bi kɔŋ nda niŋ yɛrɔkɔ.’ 14Kɛrɛ naa kute niŋ bawaliŋ beŋ, bindɛ tepe ka yɛthɛ bakɛnamɛŋ, na ‘Woŋ ndɛ na si pɛyɛtɔ kɛɛ baŋ, nkɔraŋ niŋ haliko na kɛɛ baŋ peyiye kɛntuŋ.’ 15Kɛna fuŋutu bindɛ niŋ ka dumgbu baŋ e kɔra niŋ.” Huna thonthiŋine Yisɔs biya beŋ, na “Nama nda bayɔy woŋ ni bindɛ ye? 16Bayɔy woŋ kɔŋ see e si kɔɔruwa bawaliŋ beŋ beŋ fooma e dunkuna dumgbu nama baŋ ka bawaliŋ bihɛna.” Naa yuye bindɛ mbɔrɔ kɔŋ kɔŋ, bindɛ tepe, na “Haliko Masaala niya wuŋ thanka.” 17Kɛna dethe bindɛ Yisɔs natiŋ e tɛpa, na “Mbɛ kolo ba ka magbali maŋ maŋ ba dɔma, na ‘Raka hu baŋino iŋ bathoyini beŋ haŋ ba huŋ niyɔ mayɛini, huna see niyɔ raka hu yamɛ nthɔŋ nda niyɔ waŋ ka thoya haŋ’? 18Yaŋ tepe bena, wɔ yo wɔ wo ŋote raka hubɛina hu kɔŋ niŋ yɔmɔŋ, awa mɛnɛ ntiŋ raka hubɛina ŋote wɔ hu kɔŋ niŋ gbɔkɔlɔti.” 19Karimɔkɔiŋ bi ka Siraŋ baŋ beŋ iŋ bafodeni bibukuyuwɛ beŋ yole ba bɔha Yisɔs na kɔna iŋ kɔna, baa bi kɔthɛŋ ba dɔma na Yisɔs gbonkoy mbɔrɔ kɔŋ kɔŋ baŋ ba bindɛ sɔkinɔkɔ, kɛrɛ bi payɔ biya beŋ. 20Kɛna bohe bindɛ deethuwa gboŋa ba bindɛ niŋ bohe. Bindɛ gbake biya binɔndi ba bi be niyɔkɔ nɔŋ biya bi thimo ba thanuwe ka Yisɔs. Bindɛ ŋindi bindɛ ba ka bohe Yisɔs na ka ŋathɔnthɔŋɔŋ, ba haliko na bindɛ niŋ dunkune ka thɛnkɔ tha ka bayaha wo ka kuyɛkɛŋ koŋ woŋ, wo deŋo nde iŋ biRomaŋ beŋ woŋ. 21Biya beŋ beŋ see tɛpi ka Yisɔs, na “Karimɔkɔ, miŋ kɔthɛŋ ba dɔma na yi, karimɔkɔ na yi wothumbɛ; yi detheta makɔɔ ma ka wɔ, kɛrɛ yindo thanani toloŋ nɔndi ba ka Masaala baŋ iŋ madɛɛnki nama maŋ ba wɔmɛti. 22Tepe hɛ mina, e wu kɔŋ ma sɔkinɔkɔ Siraŋ bakɛntuŋ baŋ ba thunkuna duthu ka gbaku womandiŋ wo ka Romaŋ woŋ, wo dɔma na Siisa woŋ, maa wuŋ ka ma sɔkinɔkɔ Siraŋ bakɛntuŋ baŋ?” 23Kɛrɛ Yisɔs kute kɔɔtha kukɛnamɛŋ koŋ. Wundɛ tepe bindɛ, 24na “Toŋineŋ hɛ yama kɔbiri woŋ. Mbɛ yethi haŋ haŋ iŋ keŋ koŋ koŋ?” Huna tepe bindɛ, na “Gbaku woŋ Siisa na.” 25Huna tepe Yisɔs, na “Awa dunkune gbaku woŋ wu ka gbaku, e yi dunkune Masaala na wu ka Masaala.” 26Bindɛ tha kɛndɛ punku kuta gboŋa yo gboŋa ba bindɛ bohe Yisɔs na ka kupɛnkintiyande ku ka biya beŋ fooma. Kɛna daanɔkɔy bindɛ nayeŋ e niya kukabanɛ wumandiŋ ba yaabi ba ka Yisɔs baŋ. 27Kɛna see biSadusini binɔndi ka Yisɔs, bi tɛpɛ beŋ ba dɔma na biya sa nɔŋ nda ŋayi ka tuka haŋ, 28e tɛpa, na “Karimɔkɔ, Musa gbale nde siraŋ baŋ baŋ ba miŋ: Mɛnɛ wɔ wathe tuku awa e wundɛ pɛya wɔtɔ nama, kɛrɛ bindɛ tha niye mpee mpati, wɛndama wowathe woŋ kɔŋ ba pɛɛtɔ bagbokora woŋ bi be mpuu mpati bi nde nɔŋ wɛndama ba mpaa beŋ. 29Lɔkɔ banthe biya bisɔŋ-biye bi huwɛndiya bi kɔŋ nde ka tha banthe. Wokalaŋ woŋ yente yɛrɛmɛ, kɛrɛ wundɛ tuku wu ka hati. 30Wo biye woŋ pɛɛtɔy bagbokora woŋ. Wundɛ tuku hɛlɛŋ wu ka hati. 31Wotaati woŋ pɛɛtɔy hɛlɛŋ niŋ. Biya bisɔŋ-biye beŋ beŋ fooma thanki niŋ yɛnta e bindɛ tuka wu ka hati. 32Naa thanki bindɛ tuukuwa, woyɛrɛmɛ woŋ tuku ntiŋ. 33Ka mɔlɔkɔ ma ka ŋayi ka tuka haŋ maŋ nɔŋ, nkaana biyɔ woyɛrɛmɛ woŋ? Baa biya bisɔŋ-biye beŋ beŋ fooma thanki niŋ yɛnta.” 34Huna tepe Yisɔs kɛnamɛŋ, na “Beŋ, bendo biya bi ka dunia bahɛ baŋ beŋ ayɛnti, adunkuŋ ŋayɛntande. 35Kɛrɛ biya bi niyɔ bitɛŋɛ beŋ ba ŋayi ka hutuka haŋ e bindɛ nɔŋ niyɔ ka yamana ba biya beŋ ŋaye ka tuka haŋ baŋ, bindɛ yenteta, bindɛ dunkuneta yɛnta. 36Baa bindɛ sa nɔŋ nda tuku, baa bi kɔŋ nda nanthe iŋ malekɛŋ e nda niyɔ mpati bi ka Masaala, baa biya bina nda bi ŋayino ŋaye ka tuka haŋ. 37Musa tɔŋɔŋ wuŋ nagberekethe, ba dɔma na bitukɛ beŋ bi kɔŋ ŋayina ka tuka haŋ e bindɛ niyɔ iŋ sii. Ka gbonkiyo wuŋ kɛ ba kuyeŋ ku nde tɔɔki koŋ, e ndɛ kɛndɛ gbonkiya ba Mariki woŋ, ba wundɛ niyɔ Masaala wo ka Ebrahim, Aisaki, mɛnɛ Yakuba. 38Mariki wobɛina, wundɛ na Masaala wo ka bipethɔy beŋ, wuŋ ka wo ka bitukɛ beŋ, baa wu niyɔyŋ bipethɔy, maa bitukɛ, Masaala kute bindɛ ba bindɛ niyɔ iŋ sii ka kuwaŋ kukɛnama koŋ.” 39Binɔndi ka karimɔkɔiŋ bi ka Siraŋ baŋ beŋ tepe, na “Karimɔkɔ, yi gbonkoy wuyɔhɔy.” 40Baa bindɛ tha nda dɔinɔkɔ ba niŋ thɔnthiŋina hɛlɛŋ. 41Huna thonthiŋine bindɛ Yisɔs, na “Nama dɔmɛ wu be dɔma na Banikisi woŋ kɔŋ niyɔ hati ka gbaku woŋ Dauda? 42Baa wundɛ Dauda yaathi, wundɛ tepe ka buku wo ka Ŋaiŋa ŋaŋ woŋ, na ‘Mariki woŋ tepe ka Mariki niŋ woŋ: na Dɔŋɔ dondo ka yɔnkɔ niŋ huthome haŋ, ka madoŋe mayiki maŋ, 43haaŋ yaŋ thanka sisa bihadeni bikɛnda beŋ fooma ka pothi ka ŋathaki nda ŋaŋ!’ 44Dauda thiyi niŋ na Mariki. Nama hɛlɛŋ wuŋ niiye na Banikisi woŋ kɔŋ niyɔ hati ka Dauda?” 45Naa niŋ biya beŋ fooma poniyɛ kuiha, wundɛ yeli bakarandeni nama beŋ, 46na “Niyaŋ kuthɛgbɛ karimɔkɔiŋ bi ka Siraŋ baŋ beŋ, bi thimo ba pɛnkande iŋ ŋahɔli ŋathɔɔkuwɛ ba tɔŋina ba dɔma na bi kɔŋ kolo, e bindɛ kɔ kaa kaŋ maanuwo iŋ yiki ka thani ka wuŋ niyo gbɔni baŋ ka, e thimo ba kiiyo madoŋeŋ mathɔɔkɔ ka bankɛŋ bathuŋuyande baŋ iŋ madoŋeŋ ma yamɛ yɔhɔ maŋ nthɔŋ nda fooma ka thɔma. 47Bindɛ kɔŋ tutu bagbokorani beŋ sɛmbɛ, awa e bindɛ ka kaa kaŋ tuuta bindɛ bankɛŋ ba bindɛ peyo iŋ biwandamɛŋ beŋ baŋ, e bindɛ kɔ kaa kaŋ niya ŋaraminɛ ŋathɔɔkuwɛ haliko ba pututa bɛyiniŋ banɛnɔy ba bindɛ ni baŋ. Kugbasaŋati kukɛnamɛŋ koŋ ku kɔŋ niyɔ kumandiŋ ayaŋ ba wɔ yo wɔ.”

will be added

X\