Luku 19

1Naa tɛŋ Yisɔs ka Yɛriko, wundɛ bohe ba kɛriŋande mɛti baŋ. 2Bayaha wo ka thuuwa duthu wunthe kɔŋ nde kɛndɛ. Wundɛ kɔŋ dɔma na Sakiyɔsi, wo bananhulu womandiŋ. 3Wo thimo nde ba kutiyɔkɔ wo dɔma Yisɔs woŋ. Kɛrɛ wundɛ niyɔ wothurɔy. Wundɛ punketa ba kuta Yisɔs na, na sɛthɛ baŋ babɔyɛ. 4Huna thare wundɛ ka kɔtɔkɔy e ka dunkɔ ka kuyeŋ ba kuta Yisɔs na, wo nde ba fuŋe gboŋa babɛina woŋ. 5Naa see Yisɔs kɛndɛ tɛŋ, wundɛ dethe ka thinthi e tɛpa ka Sakiyɔsi, na “Kahina thuha Sakiyɔsi, baa ka banka bakɛnda baŋ na hɛ yaŋ niye yikiya.” 6Sakiyɔsi thuhe yako e yɛritɔ niŋ iŋ mayehitɔkɔ mamandiŋ. 7Biya beŋ fooma bi kutiyɔkɔy wuŋ beŋ bohe gbonkiyɔkɔ e kɔ tɛpa, na “Hati lamgba woŋ bohe kaa kaŋ thɔma ka banka ba ka bahakɛ!” 8Sakiyɔsi ŋayinɔkɔy e tepe Mariki woŋ, na “Detha, hɛmɔŋ, yaŋ kɔŋ haninande nanhulu niŋ baŋ mateete, e yaŋ dunkune bamɔnɛŋ beŋ. Mɛnɛ kanite wɔ ntha yo ntha ka kɔɔtha maa ka kansuŋ, yaŋ kɔŋ niŋ wuŋ dutiyɛ makɔɔni manaŋ.” 9Huna tepe niŋ Yisɔs, na “Hɛ kisi baŋ biyande ka banka baŋ baŋ, baa wundɛ hɛlɛŋ hati Ebrahim na. 10Hati ka Wɔ woŋ see ba saa ka deethuwa iŋ ba si niya kisi bipiriŋɛ beŋ.” 11Naa bindɛ poniyɛ bɛyiniŋ baŋ baŋ kuiha, wundɛ key ka kɔtɔkɔy kaŋ tepe bindɛ mbɔrɔ kɔŋ kɔŋ, baa ka lɔkɔ babɛina wundɛ bohe nda ba biyande ka Yɛrusalɛmi, awa biya beŋ fooma simɔkɔy nda ba dɔma na Hugbakine hu ka Masaala haŋ hu kɔŋ tete tɛŋ. 12Huna tepe wundɛ bindɛ, na “Wɔ ka bɔnsɔŋ ba ka hugbakine kɔŋ nde ba kaa wuthokiye napooŋ ba ka boho hugbakine. Wundɛ dɛɛnki ba duwa ka mɛti nama ka naa wundɛ key kutu hugbakine haŋ. 13Saanuŋ wundɛ ba kaa, wundɛ thiyi biya kɔhi ŋaye ka bawaliŋ nama beŋ, e dunkune bindɛ kɔbiri woboyi wunthe-wunthe, na ‘Pɛyɔŋ niŋ sikinuwande haaŋ yaŋ nɔŋ saa.’ 14Kɛrɛ biya bi doŋe wundɛ ka mɛti baŋ beŋ kaake tha niŋ thimo. Huna peyene bindɛ baseriŋ mahɛŋ nama ba ka tepe bayahɛŋ beŋ, na ‘Hati lamgba woŋ, miŋ thimota niŋ ba wundɛ niyɔ gbaku wokɛntuŋ.’ 15“Halisa hati lamgba woŋ key kutu hugbakine haŋ. Naa kute wundɛ huŋ, wundɛ duu. Wundɛ see thiyi bawaliŋ nama beŋ ba bi be si tɔŋ kuna ba wɔ yo wɔ si pɛyɛ wundɛ ka kuta. 16Womayoŋ woŋ see wundɛ tepe, na ‘Gbaku woŋ, ka kɔbiri wo dunkune nde yama yi woŋ, ya kɔbiriŋ biboyi kɔhi ka thinthi.’ 17Huna tepe wundɛ, na ‘Yi, bawali woyɔhɔy na yi. Mba na niyɔy yi wɔ thimɔy niyo lanɛya ka wuthahuwɔy wuŋ, yaŋ kɔŋ yina dunkuŋ ba kɛriŋiyɛ mɛtiŋ kɔhi.’ 18Bawali wobiye woŋ see. Wundɛ tepe, na ‘Gbaku woŋ, yaŋ kute kɔbiriŋ bisɔhi biboyi ka thinthi ka wo dunkune nde yi yama woŋ.’ 19Huna tepe wundɛ niŋ, na ‘Yi kɔŋ niyɔ bakɛrɛŋ ka mɛtiŋ basɔhi.’ 20Bawali wowuntheŋ woŋ see hɛlɛŋ. Wundɛ tepe, na ‘Gbaku woŋ, ya dondo kɔbiri woboyi wunthe wo dunkune nde yi yama woŋ. Yaŋ kosineŋ nɔŋ niŋ ka kulɛmpi-lɛmpi ku ka yankisa niŋ woŋ. 21Yando nde yina payɔ, baa yi, wɔ na yi wo thiyɛ dɛnkɛŋ. Yi kɔŋ sɛkɛthi wu ka wukɛnda; yi kɔŋ ŋɔŋ ka tha yi payi.’ 22Huna tepe gbaku woŋ, na ‘Yi, bawali wonɛnɔy na yi. Madunkunɔkɔy nda maŋ mɛna yaŋ sɛkɛthi ba yina thonkine. Yi, yi kɔthɛŋ ba yaŋ kɔ sɛkitha wu ka wukiyaŋ, e yaŋ kɔ ŋɔna ka tha yaŋ payi. 23Mbu mbɛ ba tha nde yi thohinuwe kɔbiri niŋ woŋ? Ka lɔkɔ babɛina, naa yaŋ duu nde nɔŋ yaŋ kɔŋ nde nɔŋ si tutiya ka thunkuno.’ 24Huna tepe wundɛ biya bi kɔɔyɛ nde kɛndɛ beŋ, na ‘Bohitaŋ niŋ kɔbiri woŋ, e beŋ niŋ dunkuna ka wo iŋ kɔbiriŋ biboyi kɔhi woŋ.’ 25Huna tepe bindɛ, na ‘Kɛrɛ wundɛ kɔŋ nda iŋ kɔbiriŋ biboyi kɔhi ye!’ 26Huna tepe wundɛ, na ‘Yaŋ tepe bena, wɔ yo wɔ wo iŋ ntha woŋ, ndɛ kɔŋ ndintiya wumandiŋ. Kɛrɛ wo ka iŋ ntha woŋ, hali wuyete wu iŋ wundɛ wuŋ, ndɛ kɔŋ wuŋ kanita. 27Ka tete, hadeni niŋ beŋ bi ka nde ba yaŋ niyɔ gbaku namɛŋ beŋ, sisaŋ bindɛ dondo e bindɛ si koro ka thaaya niŋ thaŋ!’ ” 28Naa thanki Yisɔs gbonkiya, wundɛ key kubiyasi nama koŋ ka kɔtɔkɔy ba kaa ka Yɛrusalɛmi. 29Naa bohe wundɛ thuriye ka mɛtiŋ ba ka Bɛthɛfɛki mɛnɛ ka Bɛthani, ka kusɛri ku dɔma na Ɔlifisi, Yisɔs ŋindi biya biye ŋaye ka bakarandeni nama beŋ ka kɔtɔkɔy. 30Wundɛ ŋindi bindɛ iŋ manunkunɔkɔ maŋ maŋ, na “Kaaŋ ka mɛti ba bena ka kɔtɔkɔy baŋ. Naa beŋ biyande kɛndɛ, beŋ kɔŋ kɛndɛ pɛnki maama wotutuyo wohatiyɛ yuke wo be hɛ tutuyo bahanthe; pɛɛkaŋ niŋ, e beŋ niŋ sisa dondo. 31Awa mɛnɛ wɔ yo wɔ thɔnthɔŋɔŋ bena ba beŋ niŋ peeke, tepeŋ niŋ ba dɔma, na ‘Mariki woŋ na thimo niŋ ba niŋ niye bɛyi.’ ” 32Bakarandeni biye beŋ key, awa bindɛ key pɛnki nɔŋ na tepo nthɔŋ bindɛ iŋ Yisɔs na. 33Naa bohe bindɛ pɛɛka maama woŋ, bibiyɛ niŋ beŋ thɔnthɔŋɔŋ bindɛ, na “Mbɛ ba beŋ peeke maama woŋ?” 34Huna tepe bindɛ, na “Mariki woŋ na thimo niŋ ba niŋ niye bɛyi.” 35Bindɛ sisi niŋ ka Yisɔs, e bindɛ yiinthuwa maama wohatiyɛ woŋ ŋahɔli e bindɛ tuta kɛndɛ Yisɔs na. 36Naa Yisɔs kata iŋ maama woŋ, biya binɔndi bohe taayuwa ŋahɔli ka gboŋa ba Yisɔs fuŋe baŋ. 37Naa thuriye Yisɔs ka Yɛrusalɛmi, ka thuhe gboŋa ba ŋaye ka kusɛri ku ka Ɔlifisi koŋ baŋ, bakarandeni beŋ fooma bohe thiya Masaala na maamo ka thampa thaŋatɛ ba bɛyiniŋ babukuyuwɛ ba thanki bindɛ kutiyɔkɔ baŋ. 38Bindɛ tepe, na “Masaala thiyiyɛŋ gbaku wobɛina thaduba wo see ka keŋ ku ka Mariki woŋ! Mathɛbɛ ka ariana! Yiki ka kuwaŋ ku ka Masaala!” 39Awa biFaresini binɔndi ka mateete ma ka biya muŋ tepe Yisɔs na, na “Karimɔkɔ, pinda bakarandeni nda beŋ.” 40Huna tepe wundɛ bindɛ, na “Yaŋ tepe bena, hali adaanɔkɔy na beŋ beŋ, tharaka thaŋ thaŋ gbeeŋ thɛ kɔŋ yɛli thampa.” 41Naa thuriye wundɛ mɛti ba ka Yɛrusalɛmi baŋ e bɛŋ detha, wundɛ bokoti bɛŋ. 42Wundɛ tepe, na “Wu niyɔyŋ nde hɛ ba dɔma na beŋ kɔthɛ bɛyiniŋ ba sisi mathɛbɛ! Kɛrɛ ka tete bɛyiniŋ baŋ baŋ fooma ba nunɔkɔy bena. 43Baa malɔkɔ mɛ kɔŋ nɔŋ bena see ma bohe hadeni bikendeŋ beŋ ba bena pɛnkande e bena lɔnkita kaake kufɛŋ ndo kufɛŋ. 44Bi kɔŋ teeti mɛti ndeŋ baŋ iŋ wɔ yo wɔ wo kaake ka thatha baŋ. Bindɛ sa pɛyi raka hunthe hu tute ka ntɔ nama, baa beŋ tha ŋee malɔkɔ ma see Masaala ba bena si niya kisi.” 45Kɛna biyande Yisɔs ka banka bamandiŋ ba ka Masaala baŋ, e bɔha kanthuwa biya beŋ fooma bi nde ni kɛndɛ gbɔni bahakuwande beŋ. 46Wundɛ tepe bindɛ, na “Wuŋ thanki nde gbalo ba dɔma na Masaala tepe, na ‘Banka niŋ baŋ, bɛ kɔŋ niyɔ banka ba ka kuraminɛ,’ kɛrɛ beŋ sikɔŋ bɛŋ ka tha ka batuwani nuneke.” 47Awa timo tima wundɛ kɔŋ thanani ka banka ba ka Masaala baŋ. Bafodeni bibukuyuwɛ beŋ, iŋ karimɔkɔiŋ bi ka Siraŋ baŋ beŋ, iŋ bayahɛŋ bi ka biya beŋ dethi gboŋa ba bindɛ kore Yisɔs na. 48Kɛrɛ bindɛ tha kutu bɛyi yo bɛyi ba bindɛ ni, baa biya beŋ fooma bi thimoŋ ba yuyɛ thampa tha ka Yisɔs thaŋ.

will be added

X\