Luku 17

1Huna tepe Yisɔs ka bakarandeni nama beŋ, na “Nɔndi yaathi, bɛyiniŋ ba thiiki biya ba ŋɔta ka hakɛ bɛ kɔŋ see, kɛrɛ nambara bɛ kɔŋ see ka wɔ bɛina wo bɛŋ sisi woŋ. 2Ba niya wunthe ka bithahuwɔy beŋ beŋ ba ŋɔta ka hakɛ, wu kɔŋ niyɔ kuhita ba wɔɔŋ yantino raka humandiŋ ka nkoyo e ka yelo ka mandi masunŋɔy-sunŋɔy. 3Bɛna niyaŋ kuthɛgbɛ ba ba beŋ ni. “Mɛnɛ wɛnda ni hakɛ, pinda niŋ; naa wundɛ sikɔŋ sɔkɔrɔ hakɛŋ nama baŋ, pɛniyɛ niŋ. 4Mɛnɛ wundɛ ni yina bɛyi banɛnɔy dɔŋɔ kasɔŋ-kaye e wundɛ yina theteke dɔŋɔ kasɔŋ-kaye ba gbɛɛŋ woŋ, yi kɔŋ ba niŋ pɛniyɛ.” 5Huna tepe baseriŋ bithɔɔkɔ beŋ ka Mariki woŋ, na “Yaandi, ndintiyɛ mina kulanɛya ntuŋ koŋ.” 6Huna tepe Mariki woŋ, na “Mɛnɛ beŋ niyɔy iŋ kulanɛya nɔŋ thaa humɛɛsɛ hu dɔma na mɔstadi, hu thɔyande nɔŋ mpende, e beŋ tepe kuyeŋ kumandiŋ koŋ koŋ na ‘Mukɔ dondo e yi ka kɔɔ ka mankɔ ka,’ ku kɔŋ bena putiyɔ. 7“Mbu na wuŋ niyɔy na wɔ wunthe ka beŋ kɔŋ iŋ bawali wunthe wo niŋ niyiyɛ wali ka yiya nama maa wo niŋ tɔliyɛ takɛŋ? Mɛnɛ bawali woŋ tɛŋ ŋaye ka dumgbu, e yi kɔŋ niŋ dɔŋ, na ‘Kahina, yi be sɛkɛthi muthɔma nda, yi be thɔŋ’? 8Wuŋ sa niyɔ! Yi kɔŋ hintiŋ niŋ yenke tepe, na ‘Yehinuwa muthɔma mukiyaŋ muŋ e yi sɛkitha muthɔɔ mukɛnda e yi yama dunkune muthɔma muŋ. Naa yaŋ muŋ thɔŋ e yaŋ kɔ thiiye, mahɛŋ mabɛina yi kɔŋ ntiŋ sɛkɛthi muthɔma mukɛnda muŋ ba thɔma.’ 9Wuŋ ka na yɔkɔŋ bawali woŋ thiyo maamo ba putiyɔ nama yamari haŋ. 10Nɛna hɛlɛŋ beŋ, naa beŋ thanki niya ba domo beŋ ba niya baŋ, tɛpaŋ, na ‘Miŋ kɔŋ hɔkɔŋ bawaliŋ; gbɛthɛŋ bakɛntuŋ bɛna ni miŋ baŋ.’ ” 11Naa wundɛ ka biyasi nama haŋ ba kaa ka mɛti ba ka Yɛrusalɛmi, wundɛ fuŋe mateete ma ka Sameriya iŋ ka Kalili. 12Naa bohe Yisɔs ba biyande ka mɛti banthe, kɛna penko wundɛ iŋ biya kɔhi bi iŋ nthoonaŋ kinɛnɔy ki bohe ka kɔtɔ ku ka wɔmɛti koŋ ka thinthi e bindɛ kɔɔ wuthokiye. 13Bindɛ yele thampa e tepe Yisɔs na, na “Mariki, kutiyɛ mina nkinikiniŋ.” 14Naa kute Yisɔs bindɛ, wundɛ tepe bindɛ, na “Kaaŋ tɔŋinɔkɔ bafodeni beŋ, ba bi be kɔthɔ na beŋ pethɔy.” Kɛrɛ naa bindɛ key, bindɛ kute ba dɔma na bindɛ pethɔy nagbelebe. 15Wunthe ka mateete namɛŋ, naa kute wundɛ ba dɔma na wundɛ pethɔy, wundɛ duu kaŋ thunkunuwa Masaala na iŋ thampɛŋ thatɔɔkɛ. 16Wundɛ see ŋɔti ka ŋathaki ŋa ka Yisɔs e niŋ thiya maamo, kɛrɛ hati lamgba woŋ, wɔ na nde wo ŋaye ka siya bayethitiyo ba dɔma baŋ na biSameriya. 17Huna tepe Yisɔs, na “E kɔhi kutɛ puyo? Mbu bisɔŋ-binaŋ beŋ? 18E wɔ yo wɔ wohɛna tha kutɔ ba si thiya Masaala na maamo yɔkɔŋ thahinɛ woŋ baŋ?” 19Huna tepe wundɛ hati lamgba woŋ, na “Ŋayi, kɔ, key ba ntha nda. Lanɛya bakɛnda petheŋ yina.” 20Naa thonthiŋino wundɛ iŋ biFaresini beŋ ba malɔkɔ ma Hugbakine hu ka Masaala haŋ see, wundɛ tepe, na “Hugbakine hu ka Masaala haŋ seeta iŋ bɛyiniŋ bathakaba ba tɔŋɔŋ ba dɔma na Hugbakine hu ka Masaala haŋ tɛŋ. 21Maa, ba hintiŋ tɛpa, na ‘Ya huŋ dondo,’ maa, ‘Ya huŋ kanka.’ Dethaŋ hɛ, Hugbakine hu ka Masaala haŋ hu kɔŋ mateete makendeŋ.” 22Huna tepe wundɛ ka bakarandeni nama beŋ, na “Malɔkɔ mɛ kɔŋ nɔŋ see ma beŋ thimo ba hɛlɛŋ kutiyɔkɔ Hati ka Wɔ woŋ iŋ malɔkɔ makɛnama maŋ, kɛrɛ beŋ sa mɛŋ kutu. 23Biya binɔndi bi kɔŋ bena tepe, na ‘Dethaŋ ka thuhaŋ ka,’ maa ‘Dethaŋ dondo,’ kɛrɛ baŋ kɛndɛ dethi, ba hintiŋ tɛpa na ba bindɛ yema. 24Naa nthɔŋ beŋ kutu naa kuwalani koŋ ni ka kuthahinɛ koŋ na, ku kɔŋ mɔɔlɔti kuthahinɛ koŋ ŋaye kuwaŋ kunthe makey ka kuwaŋ kukuntheŋ koŋ, nɛna hɛlɛŋ wuŋ niyɔ ka malɔkɔ ma ka Hati ka Wɔ woŋ maŋ. 25Kɛrɛ wundɛ boheŋ hintiŋ ba niyo thɔrɔ e baŋinoko iŋ biya bi ka yamana nama baŋ. 26Na nde nthɔŋ wuŋ ka yamana ba ka Nowa baŋ na, nɛna hɛlɛŋ wuŋ niyɔ ka yamana ba ka Hati ka Wɔ woŋ baŋ. 27Wɔ yo wɔ athɔŋ, athiiye, ayɛntuwande haaŋ saaŋ bohi malɔkɔ ma thɔɔyɛ Nowa ka gbe baŋ maŋ. Mandi matɛnkɛ maŋ bindɛ si kɔruwa fooma. 28Wu kɔŋ niyɔ nɔŋ na niyɔy nde wuŋ ka yamana ba ka Lɔti baŋ na. Wɔ yo wɔ athɔŋ, athiiye, aboyi, ani gbɔŋ, athuu, athoyi. 29Kɛrɛ ka malɔkɔ ma fuŋ Lɔti ka Sɔdɔmi, Masaala thuhuŋ kɛndɛ tharaka tha buu nɔŋ koyoŋ ŋaye ka kuthahinɛ koŋ e bindɛ si kɔɔruwa fooma. 30Nɛna hɛlɛŋ wuŋ niyɔ ka malɔkɔ ma Hati ka Wɔ woŋ see. 31“Ka lɔkɔ babɛina, wɔ yo wɔ wo penko ka gbada ka, ndɛ bɛiŋ nda biyande ba sɛkitha munki nama; nɛna hɛlɛŋ wɔ yo wɔ wo thɔthɔi ka dumgbu nama, ndɛ bɛiŋ nda kaho ba duwa. 32Simɔkɔŋ ba yɛrɛmɛ wo ka Lɔti woŋ! 33Wɔ yo wɔ wo gbɛrɛŋɛŋ ba niya sii nama baŋ kisi, wundɛ kɔŋ bɛŋ piriŋiŋ, kɛrɛ wɔ yo wɔ wo piriŋiŋ sii nama baŋ, wundɛ kɔŋ bɛŋ kutu. 34Ka huyɛ babɛina biya biye bi kɔŋ ŋɔɔ ka kuhinsi kunthe; wunthe kɔŋ si sɛkitha e wunthe kɛndɛ peyo. 35Yɛrɛmɛŋ biye bi kɔŋ kɔɔ ka yɔŋa ka kuthodo kunthe, wunthe kɔŋ sɛkitha e wunthe kɛndɛ peyo. [ 36Biyɛthɛŋ biye bi kɔŋ niyɔ ka dumgbu banthe; wunthe kɔŋ sɛkitha e wunthe kɛndɛ pɛyo.]” 37Kɛna thonthiŋine bindɛ niŋ, na “Thɔ kɛndɛ ka wuŋ niiye, Mariki?” Huna tepe Yisɔs bindɛ, na “Naa beŋ kute ŋabeli ŋa ŋoye, beŋ kɔŋ kɔthɔ ba dɔma na yibani bi kɔŋ ŋɔti kɛndɛ.”

will be added

X\