Luku 14

1Ka Malɔkɔ Mahemuwe manthe Yisɔs thiyo ba kaa ka thɔma ka banka ba ka bakɛrɛŋ wunthe ka biFaresini beŋ. Awa biya beŋ fooma lope niŋ thaaya. 2Kumaŋ, wɔ doŋeŋ niŋ ka kɔtɔkɔy wo thiinkɛ. 3Huna gbonkitiyande Yisɔs karimɔkɔiŋ beŋ iŋ biFaresini beŋ, na “E wu kɔŋ ma sɔkinɔkɔ Siraŋ baŋ ba puya wɔ ka Malɔkɔ Mahemuwe maŋ, maa wuŋ ka nɛŋ?” 4Kɛrɛ bindɛ tha gbonkoy bɛyi yo bɛyi. Kɛna sekithe Yisɔs hati lamgba woŋ; wundɛ puyi niŋ; wundɛ pɛyɛŋ niŋ ba wundɛ duwa. 5Huna thonthiŋine wundɛ bindɛ, na “Mɛnɛ wɔ wunthe ka beŋ kɔŋ iŋ hati, maa manaŋ, awa mɛnɛ wuŋ niyɔy na wundɛ key ŋɔti ka sobo ka Malɔkɔ Mahemuwe maŋ, e wundɛ sa niŋ ka fuŋuŋ yako ka Malɔkɔ Mahemuwe maŋ?” 6Kɛrɛ bindɛ tha punku niya yaabi kuthɔnthɔŋɔŋ koŋ koŋ. 7Naa thanki Yisɔs detha nɔŋ na biya bi thiyo ka thɔma haŋ beŋ yethe madoŋeŋ mayiki maŋ, wundɛ gbonkitiyande bindɛ fooma mbɔrɔ kɔŋ kɔŋ e tɛpa, 8na “Naa wɔ thiyi yina ka thɔma humandiŋ, ba yɛthiyɔkɔ ba dɔŋɔ ka gbɔdɔ huyiki haŋ, athamɔkɔ niyɔ wɔ yamɛ yiki ba yi thiyo ka thɔma hubɛina. 9Lɔkɔ hɛ wo thiyɛ bena ka thɔma haŋ ka nanthe woŋ kɔŋ see e yina si tepe, na ‘Ŋayiyɛ woŋ ka madoŋe maŋ. Hɛɛra yo ka, yɔkɔŋ yi be dɔŋɔ ka madoŋe ma ka pothi maŋ.’ Ka lɔkɔ babɛina yi kɔŋ kutɔkɔ kuyaahu. 10Huna mɛnɛ yi thiyo ka thɔma, kaa e ka dɔŋɔ ka madoŋe ma ka pothi maŋ, huna mɛnɛ wo thiyɛ yina woŋ see, ndɛ kɔŋ yina si tepe, na ‘Nyathiki, saa ka madoŋe ma yamɛ ka thinthi maŋ.’ Wuŋ, wu kɔŋ yina dunkuŋ yiki ka mateete ma ka biya fooma bi thiyo ka thɔma haŋ beŋ. 11Baa wɔ yo wɔ wo ŋatinɔkɔy, wundɛ kɔŋ thathina; awa wɔ yo wɔ nɛnɛ wo thathinɔkɔ, wundɛ kɔŋ ŋatina.” 12Huna tepe hɛlɛŋ Yisɔs ka hati lamgba wo thiyɛ niŋ ka thɔma haŋ woŋ, na “Naa yi kɔsinɔkɔy ba thiya biya ka thɔma humandiŋ, ba thiyi binyathikɔŋ bikɛnda, maa mbɛnda, maa mpoo kikɛnda, maa bintɔni nda bi bananhuluiŋ, baa bindɛ kɔŋ nɛnɛ yina thiyi ka thɔma, awa ka lɔkɔ babɛina yi kute kuthunkuŋ ba wu ni yi wuŋ. 13Kɛrɛ, naa yi kɔ thiyi biya ba thɔma, thiya bamɔnɛŋ beŋ, bagbɛthɛŋ beŋ, biyɔŋɛ beŋ, iŋ bi mankɔy thaaya beŋ. 14Yi kɔŋ nɔŋ kutu thaduba, baa bindɛ sa yina punku tɛnkiniyɛ, kɛrɛ Masaala kɔŋ nɔŋ yina thunkuŋ ka malɔkɔ ma biya bithumbɛ beŋ ŋayi ka hutuka haŋ.” 15Naa yuye huŋ wɔ wunthe ka bi nde thɔŋ iŋ Yisɔs beŋ, wundɛ tepe, na “Mayehitɔkɔ ma kɔŋ ka wɔ wo nɔŋ penkitiye ka thɔma hu ka Hugbakine hu ka Masaala haŋ.” 16Huna tepe niŋ Yisɔs mbɔrɔ kɔŋ kɔŋ, na “Wɔ na yehinuwɛ nde thɔma humandiŋ. Wundɛ see thiyi biya bibɔyɛ ba si penkitiye ka thɔma haŋ haŋ. 17Naa tɛŋ lɔkɔ ba ka thɔma haŋ baŋ, wundɛ ŋindi bawali nama woŋ ba si tepe bi thiyi wundɛ ka thɔma haŋ beŋ ba dɔma, na ‘Saaŋ, yaŋ thanki kɔsinɔkɔ ntha o ntha.’ 18Kɛrɛ naa key bawali woŋ, bindɛ fooma bi thiyo beŋ ka wunthe-wunthe thɛrɛŋ ba dunkuna kabariŋ bihakuwande. Womayoŋ woŋ tepe baseri woŋ, na ‘Yaŋ thanki boya yiya, yɔkɔŋ yaŋ be key ba huŋ ka detha. Yaandi, yɛrɔkɔ kabari wokiyaŋ woŋ.’ 19Wowuntheŋ woŋ tepe, na ‘Yaŋ boye manani kɔhi bi niye wali. Yaŋ kɔŋ nda gboŋa ba bindɛ ka gbɛriŋina. Yaandi yɛrɔkɔ kabari niŋ woŋ.’ 20Wowuntheŋ woŋ dome, na ‘Yando yɛntɛ wuŋama. Ba kolo babɛina yaŋ sa punku kaa ka thɔma haŋ.’ 21Bawali woŋ duu awa wundɛ key tepe mariki nama woŋ fooma bɛyiniŋ baŋ baŋ. Mariki nama woŋ thɔɔyɛ ka mathoŋ, wundɛ tepe ka bawali nama woŋ, na ‘Kaa yako ka gboŋɛŋ babukuyuwɛ baŋ iŋ ka thapɛthandeŋ thaŋ e yi ka thiya bamɔnɛŋ beŋ, bagbɛthɛŋ beŋ, bimankɔy thaaya beŋ, iŋ biyɔŋɛ beŋ fooma.’ 22Wundɛ key ni nɔŋ na nunkunoko wundɛ na. Kɛna duu wundɛ; ndɛ see tɛpi, na ‘Mariki, ba ni yi yamari baŋ, yaŋ thanki bɛŋ niya, kɛrɛ madoŋe pɛyɛ hɛlɛŋ kɛndɛ ba bihɛna.’ 23Huna tepe mariki woŋ ka bawali nama woŋ, na ‘Kaa ka kuyɛkɛŋ koŋ fooma, ka gboŋɛŋ baŋ, ka thapɛthandeŋ thaŋ; biita bindɛ haliko banka niŋ baŋ bɛ be thiŋ biya. 24Yaŋ tepe bena, wɔ wunthe ka bi yenke thiyo beŋ, wundɛ sa miŋ sisa niŋ baŋ.’ ” 25Yisɔs key ka kɔtɔkɔy biyasi nama haŋ e sɛthɛ bamandiŋ kɔ yema. Huna sikiyeke wundɛ. Ndɛ tepe bindɛ, 26na “Wɔ yo wɔ wo yama yeŋ, wundɛ sa punku ba niyɔ bakarandeŋ wokiyaŋ mɛnɛ wundɛ tha yenke sikina sɔkɔrɔ fandama, nandama, wɔtɔ nama, mpati nama, mbɛndama, iŋ yɛthɛ bakɛnama gbeeŋ. 27Wɔ yo wɔ wo sa yinthɔkɔ kuyeŋ nama kubariŋande ku ka nambara baŋ koŋ e yama yema, wundɛ sa niyɔ bakarandeŋ wokiyaŋ. 28Nkaana wɔɔŋ, wo ŋayi ba thoya banka, ndɛ tha hintiŋ yenke dɔŋɔ e kɔnda si niŋ bɛŋ yaki, ba mɛnɛ wundɛ kɔŋ iŋ wutɛŋɛ ba bɛŋ thankina? 29Mɛnɛ wundɛ tha wuŋ ni, wu kɔŋ niyɔ naa wundɛ thɛrɛŋ nthɔŋ bɛŋ, wundɛ thamɔi, awa fooma biya bi bɛŋ kutu beŋ, bi kɔŋ niŋ hɛthi, e bindɛ kɔ tɛpa, na 30‘Hati lamgba woŋ thɛrɛŋ nde ba thoya, kɛrɛ wundɛ tha bɛŋ punku thankina.’ 31Mbɛ hɛlɛŋ gbaku wobɛina wo ŋayi ba kaa ka dekiya gbaku wohɛna, ndɛ tha hintiŋ yenke dɔŋɔ e wundɛ simɔkɔ iŋ thukuma nama mɛnɛ ndɛ kɔŋ punku dekiye kurugbani wuluiŋ kɔhi gbaku wo see woŋ iŋ kurugbani wuluiŋ kɔnthɔ kaye? 32Mɛnɛ wuŋ ka nɛŋ, naa hintiŋ gbaku wowuntheŋ woŋ wuthokiye, wundɛ kɔŋ ŋindi baseri ba haliko bi be pɛyɔ ka mathɛbɛ.” 33Huna thuhune ntiŋ Yisɔs, na “Wɔ yo wɔ sa punku ba niyɔ bakarandeŋ wokiyaŋ mɛnɛ wundɛ tha sikɔŋ sɔkɔrɔ ntha yo ntha ki iŋ wundɛ. 34“Mɛɛti maŋ athimɔ, kɛrɛ mɛnɛ mɛɛti maŋ piriŋiŋ wuthimɔy wukɛnama wuŋ, mbɛ mu nda mɛŋ thimiŋ? 35Mɛŋ sa nda yɔhɔ ba bɛyi yo bɛyi yɔkɔŋ mɛ be yɛla. Wundɛ wo ba pona kuiha, wundɛ ponɛŋ kuiha.”

will be added

X\