1 Bendo bananhuluiŋ beŋ, poniyaŋ yama kuiha! Berinaŋ sampɛrɛŋ ba nambarɛŋ ba bɔhɛ ba bena pɛnka baŋ. 2 Nanhuluiŋ bakendeŋ baŋ thanki tuunuwa. Mɔki haŋ thanki thɔma yabɛŋ bakendeŋ baŋ. 3 Boyi bukendeŋ buŋ mɛnɛ kɔbiri wokendeŋ wosiliba woŋ thanki boho makenkeretiŋ, awa makenkeretiŋ mabɛina ma kɔŋ tɔŋɔŋ ba dɔma na biya binɛnɔy bina beŋ awa ma kɔŋ thɔŋ ŋakɔtɔ ŋakendeŋ ŋaŋ nɔŋ buu. Beŋ thanki kɔminande nanhuluiŋ bakendeŋ baŋ dondo ka malɔkɔiŋ mamankɛ maŋ maŋ. 4 Beŋ thunkuneta hɛ kuthunkuŋ hali ka biya bi ni wali ka dumgbuiŋ bakendeŋ baŋ beŋ. Yuyaŋ ŋafuŋutu ŋakɛnamɛŋ ŋaŋ! Awa Masaala wo Mariki wo biyɛ sɛmbɛŋ fooma woŋ yuye berina hu ka bi kɔminuwande mutiŋ mukendeŋ muŋ beŋ. 5 Beŋ tha ni wali bakahɛ kafaydo. Beŋ thanki niya bɛy yo bɛy ba thimo beŋ ba niya. Beŋ thanki nda niyɔkɔ ka yɛthɛ bakendeŋ nɔŋ maamiŋ bibukuyuwɛ bi see ka koro. 6 Beŋ thanki thonkine e beŋ kɔɔruwa biya bi pankɔy bɛy beŋ. Kɛrɛ bindɛ tha bena baŋinɔkɔ hali. 7 Mbɛndaŋ beŋ, niyaŋ muyuŋ haaŋ saa hu ka Mariki woŋ haŋ. Dethaŋ hɛ na bamahi woŋ yumbu haaŋ ndɛ kuta muthɔma maŋaye ka kuyɛkɛŋ nama koŋ. Wundɛ kɔŋ yumbu muŋ ba malɔkɔiŋ mathɔɔkuwɛ haaŋ e muŋ kuta koyoŋ womayoŋ woŋ iŋ womankɛ woŋ. 8 Nɛna hɛlɛŋ beŋ ba niya muyuŋ. Niyɔŋ iŋ thathukuma thakahɛ, baa lɔkɔ ba ka saa hu ka Mariki woŋ haŋ bohe thuriye. 9 Mbɛndaŋ beŋ, baŋ gbonkiyiyɔkɔ ma sɔkinɔkɔ wunthe iŋ ntɔ nama, wuna sa bena Masaala kɔnsɔŋɔŋ. Bakɔnsɔŋɔŋ woŋ kiŋ nda wuthuriye; wundɛ kooyeŋ nda ka biyo haŋ. 10 Mbɛndaŋ beŋ, siyuwaŋ hɛ banabiŋ bi gbonkiyɛ nde beŋ nɔŋ baseriŋ bi ka Mariki woŋ. Bi niyɔiŋ mathɔyande makendeŋ ma ka niya muyuŋ thɔrɔ baŋ. 11 Miŋ kɔŋ hɛ nda bindɛ dɔŋ biya bi iŋ mayehitɔkɔ baa bindɛ ni muyuŋ thɔrɔ namɛŋ baŋ. Beŋ yuye nde ba thɔrɔ ba ka Yobu baŋ iŋ na niye wundɛ bɛŋ muyuŋ. Awa beŋ kute ba niyiyɛ niŋ Mariki woŋ ka wumankɛ. Mariki woŋ kiŋ bankinikiniŋ iŋ bamase. 12 Mbɛndaŋ beŋ, ba ndinta ka thinthi ka bɛina, baŋ gbiŋ naa beŋ kɔ ni lahiri; baŋ gbiŋ ka ariana maa kafaydo, maa ka ntha yo ntha kihɛna. Dɔmaŋ hɔkɔŋ na “Ndo” mɛnɛ ndo na siyuwe beŋ, e beŋ dɔma na “Ade” mɛnɛ ade na siyuwe beŋ. Wuna sa beŋ thonkino iŋ Masaala. 13 Mɛnɛ wɔ wunthe ka beŋ kiŋ ka thɔrɔ, ndɛ niyɛŋ kuraminɛ. Mɛnɛ wɔ kiŋ ka beŋ wo iŋ mayehitɔkɔ, wundɛ sɔŋɛŋ kaŋ gbuŋunuwa Masaala na. 14 Mɛnɛ wɔ kiŋ ka beŋ wothoonɔy, ndɛ thiyɛŋ bakalani bibayahɛŋ bi ka makɔmande ma ka biya bi ka Masaala beŋ maŋ e bindɛ niya kuraminɛ ba wundɛ e bindɛ niŋ puina mayɔ kaŋ hina keŋ ku ka Mariki woŋ koŋ. 15 Kuraminɛ ku niyo ka lanɛya, ku kɔŋ petheŋ bathoonaŋ woŋ. Mariki woŋ kɔŋ hɛlɛŋ niŋ petheŋ kɔtɔ, awa hakɛŋ ba ni wundɛ baŋ, ndɛ kɔŋ bɛŋ pɛniya. 16 Bɛna tɛpiyandeŋ hakɛŋ bakendeŋ baŋ, awa niyandeŋ ŋaraminɛ, wuna beŋ pethina. Kuraminɛ ku ka wɔ wothumbɛ ku kiŋ iŋ sɛmbɛ. 17 Wɔmɛti na nde Ilaya nɔŋ na nthɔŋ miŋ na. Wundɛ ni kuraminɛ ku ka lanɛya ba koyoŋ be tha tiŋ, awa koyoŋ tha tiŋ ka kuyɛkɛŋ kubɛyna haaŋ ba thaninɛŋ thataati iŋ sɛnkɛni bisɔŋ-wunthe. 18 Awa wundɛ ni hɛlɛŋ kuraminɛ, e kuthahinɛ koŋ hɛlɛŋ tɔŋita koyoŋ awa e kuyɛkɛŋ koŋ ntiŋ punka ba sisa mutiŋ mukɛnama muŋ. 19 Mbɛndaŋ beŋ! Mɛnɛ wɔ wunthe ka beŋ fuŋ ka nɔndi baŋ e wɔ hɛna hɛlɛŋ niŋ duwa ka sisa, 20 kɔthɔŋ ba dɔma na wɔ yo wɔ wo duutu bahakɛ ŋaye ka gboŋa bakɛnama banɛnɔy baŋ, wɔ bɛina ni kisi bahakɛ wobɛina ŋaye ka tuka haŋ, awa wɔ bɛina ni ba bahakɛ woŋ baŋ peniyo hakɛŋ nama babɔyɛ baŋ.
