Yemisi 4

1Mbɛ mu dɔmɛ ŋadekey mɛnɛ ŋayuŋande kɔ niyɔ mateete makendeŋ? Ŋafiyoiŋ ŋa ka huwɔmɛtiya ŋa dekey kaake kendeŋ ŋaŋ ŋɛna ni ba beŋ kɔ dekiya e beŋ kɔ yuŋande. 2Bendo thimo ba kuta munki, kɛrɛ beŋ kuita muŋ, wuna biyɛ beŋ kɔ kɔra. Beŋ niyɔy milɛ wumandiŋ ba kuta munki, kɛrɛ beŋ sa muŋ punku kuta, wuna biyɛ beŋ kɔ yuŋande e beŋ kɔ dekiya. Beŋ sa kutu mu panke beŋ muŋ baa beŋ tha thɔnthɔŋɔŋ Masaala na ba muŋ. 3Awa naa beŋ thɔnthɔŋɔŋ, beŋ sa kutu, baa masiyi makendeŋ maŋ anɛnɔ; beŋ thɔnthɔŋɔŋ ba munki ba thiŋina ŋafiyoiŋ ndeŋ ŋa ka huwɔmɛtiya haŋ ŋaŋ. 4Beŋ teeti lahiriŋ bakendeŋ baŋ ka Masaala nɔŋ yɛrɛmɛ woyɛntɔy wo babɛy. E beŋ kɔthɛta ba dɔma na wɔ niyɔ hunyathikiya iŋ kafay woŋ na hadeŋ wo ka Masaala na? Wɔ yo wɔ wo thimo ba niyɔ nyathiki wo kafaydo, ndɛ kɔŋ niyɔ hadeŋ wo ka Masaala. 5Baŋ siyi ba dɔma na magbali ma ka Masaala maŋ piriŋinɔy, ma tɛpɛ maŋ na thathukuma tha thiye mina Masaala thaŋ, thathukuma thɛna tha thimo ba niyɔ iŋ kuhɔti. 6Kɛrɛ kutiyɛ hu ka Masaala haŋ hu yameŋ ba ŋafiyoiŋ ŋakɛntuŋ ŋaŋ. Wuna biyɛ magbali ma ka Masaala maŋ tɛpa ba dɔma, na “Masaala kɔŋ baŋinɔkɔ bibukuinɔkɔy beŋ, kɛrɛ ndɛ kɔŋ kutiyɛ bithathinɔkɔy beŋ nkinikiniŋ.” 7Bɛna mɛyiyaŋ Masaala na yamari. Baŋinɔkɔŋ Sithani na, awa ndɛ kɔŋ bena kiti. 8Thuriyeŋ Masaala na, awa wundɛ kɔŋ bena thuriye. Mɛthinɔkɔŋ, bendo bahakɛŋ beŋ! Bendo basikiyɔkɔiŋ beŋ, mɛthinaŋ thathukuma thakendeŋ thaŋ. 9Niyɔŋ nkinikiniŋ e beŋ berina; thikipaŋ gbaakani baŋ ka sampɛrɛŋ. Pɛyaŋ ba yehitɔkɔ haŋ. 10Thathinɔkɔŋ ka kɔtɔkɔy ka Mariki woŋ, awa wundɛ kɔŋ bena ŋataŋ ka thinthi. 11Mbɛndaŋ beŋ, baŋ tharinuwande. Wɔ yo wɔ wo tharatharani wɛndama wo bindɛ ka lanɛya baŋ maa ba niŋ kɔnsiŋina, Siraŋ baŋ bɛna tharatharani ndɛ e bɛŋ kɔnsiŋina. Mɛnɛ yi kɔnsɔŋɔŋ Siraŋ baŋ, yi sa nɔŋ nda niyɔ wɔ bɛŋ putiyɔ hali; kɛrɛ bakɔnsɔŋɔŋ bɛŋ na yi. 12Masaala nagbɛti ndɛ na dunkunɛ bɛŋ e ndɛ niyɔ bakɔnsɔŋɔŋ woŋ. Awa ndɛ wuntheŋ napethi ndɛ na ni wɔ kisi maa ndɛ teetuwa wɔ ka yahanama. Nama yi siyiyɔkɔ ka yɛthɛ bakɛnda ba kɔnsiŋina ntɔ nda na? 13Poniyaŋ nuŋ kuiha! Beŋ, bendo tɛpi beŋ ba dɔma, na “Hɛ maa mɛmpɛ miŋ kɔŋ key ka mɛti baŋ baŋ. Miŋ kɔŋ kɛndɛ ka dɔŋɔ ba nina hunthe. Miŋ kɔŋ kɛndɛ ka dɔŋɔ ba kɔ boya e miŋ kɔ niya gbɔŋ haaŋ e miŋ kuta kɔbiri wobɔyɛ.” 14Kɛrɛ beŋ kɔthɛta ba mɛmpɛ niyɔ ka siini bakendeŋ baŋ. Bendo nɔŋ hiti hu tɔŋinɔkɔ ba wuthurɔy e huŋ duwa ka piriŋa. 15Beŋ kiŋ ba dɔma, na “Mɛnɛ Masaala mɛy, miŋ kɔŋ niyɔ iŋ sii, awa miŋ kɔŋ ni fooma ba thanki miŋ dɛɛnka baŋ.” 16Kɛrɛ beŋ kɔŋ bukuinɔkɔ ka gbonkiya e beŋ kɔ gbuŋunɔkɔ; awa gbuŋunɔkɔ haŋ haŋ baŋ fooma huŋ anɛnɔ. 17Huna, wɔ yo wɔ wo kɔthɛ ba niya bayɔhɔy, kɛrɛ ndɛ tha bɛŋ ni, wɔ bɛina ni hakɛ.

will be added

X\