Yemisi 2

1Mbɛndaŋ, baa beŋ ni lanɛya ka Mariki woŋ Yisɔs Kraist, Mariki wo iŋ yiki woŋ, baŋ hakinande biyamɛti ka na beŋ bindɛ kute na. 2Thampo dinhaŋi wo thɔthɔkɔy gbɛtu huboyi iŋ yabɛŋ ba ŋahɔli ŋayɔhɔy see biyande ka makutande makendeŋ maŋ, awa e bamɔnɛ wo thɔɔyɛ yaba bannɛkithɛŋ hɛlɛŋ si biyande. 3Mɛnɛ beŋ dunkuŋ yiki bamandiŋ ka wo gbɛkitɔkɔi wuyɔhɔy woŋ, e beŋ dɔma kɛnama, na “Dɔŋɔ dondo baŋ ka gbɔdɔ huyɔhɔy haŋ,” kɛrɛ beŋ dɔma ka bamɔnɛ woŋ, na “Kɔɔ kɛndɛ, maa dɔŋɔ dondo kɛkɛŋ kuwaŋ ka gbɔdɔ niŋ haŋ,” 4bendo thonko bina beŋ, baa beŋ thiye kuhakinande mateete makendeŋ. Beŋ kɔnsɔŋɔŋ kukɔnsɔŋɔŋ ku ŋaye ka masiyi manɛnɔy. 5Ponaŋ kuiha bendo mbɛndaŋ bi thimo yaŋ beŋ. Masaala na yɛthɛ bamɔnɛŋ bi kafaydo beŋ ba niyɔ dinhaŋiŋ ka kulanɛya mɛnɛ ba niyɔ mpati mpuu ka Hugbakine nama hu ni wundɛ lahiri haŋ ka bindɛ bi thimo niŋ beŋ. 6Kɛrɛ bendo yethitɔ bamɔnɛŋ beŋ. Mbɛ bi bena ni nakasi e bindɛ bena kata ka bakɔnsɔŋɔni beŋ ba bena ka pithita ba thunkuna dɔɔnthɔiŋ ndeŋ baŋ? Dinhaŋiŋ beŋ bina. 7Bindɛ bina hɛlɛŋ gbonkoy wunɛnɔy ma sɔkinɔkɔ keŋ kuyɔhɔy ku ka Mariki woŋ Yisɔs Kraist ku dunkuno beŋ koŋ. 8Beŋ kɔŋ ni bɛy bayɔhɔy mɛnɛ beŋ putiyɔy siraŋ ba ka Hugbakine hu ka Masaala haŋ, ba kuto ka magbali ma ka Masaala maŋ, ma tɛpɛ maŋ ba dɔma, na “Thimo ntɔ nda na nɔŋ na thimo yi yɛthɛ bakɛnda baŋ na.” 9Kɛrɛ mɛnɛ beŋ diŋe biya bihɛna beŋ nɔŋ na beŋ bindɛ kute na, Siraŋ baŋ ba kɔŋ bena thonkine baa beŋ niyɔybahakɛŋ bi ka hakinuwande. 10Wɔ yo wɔ wo thinki siraŋ banthe maŋaye ka Sirani ba dunkuŋ Masaala ka yɔnkɔ hu ka Musa haŋ baŋ, wɔ thonko na ka thinka bɛŋ fooma. 11Masaala wo dɔmɛ woŋ, na “Ba ni kubɛy,” ndɛ na dɔmɛ hɛlɛŋ, na “Ba kɔri wɔmɛti.” Hali yi tha ni kubɛy, kɛrɛ mɛnɛ yi kore, yi thinke Siraŋ baŋ. 12Bɛna, gbonkiyaŋ e beŋ niya nɔŋ biya bi bɔhɛ ba konsiŋino ka siraŋ ba bɔhɛ ba dunkune wɔ hukɔɔriya baŋ. 13Masaala sa nɔŋ niyɔ iŋ nkinikiniŋ naa ndɛ kɔ nɔŋ kɔnsɔŋɔŋ wɔ yo wɔ wo tha niyɔ iŋ nkinikiniŋ; kɛrɛ mɛnɛ wɔ niyɔy nde iŋ nkinikiniŋ, wu kɔŋ ni ba wundɛ buthurɔ thonkino nama haŋ. 14Mbɛndaŋ beŋ, mbɛ wuyɔhɔy wu kɛndɛ, wɔ ba dɔma, na “Yaŋ kiŋ iŋ kulanɛya,” mɛnɛ wundɛ tha ni bɛyiniŋ bayɔhɔy ba mbɛndama ba tɔŋɔŋ ba ndɛ niya lanɛya? E kulanɛya kubɛyna siiya ku kɔŋ niŋ ni kisi? 15Mbu na wuŋ niyɔy na mbɛnda bibiyɛthɛŋ maa biyɛrɛmɛŋ bindɛ ka iŋ muthɔɔ, lɔkɔ hɛ bi kaho ŋakɔnthɔ? 16Mbɛ wuyɔhɔy wu wuŋ bindɛ ni ba hɔkɔŋ dɔma kɛnamɛŋ, na “Haliko beŋ kaa wuthɛbinɛ thukuma! Haliko beŋ kuta muthɔɔ e beŋ kuta muthɔma,” kɛrɛ yi tha bindɛ dunkune mu panke bindɛ ba yɛthɛ namɛŋ baŋ muŋ? 17Nɛna hɛlɛŋ lanɛya, mɛnɛ wɔ niyɔyiŋ lanɛya kɛrɛ wundɛ tha ni bɛyiniŋ bayɔhɔy ba mbɛndama, lanɛya batukɛ bɛna. 18Kɛrɛ binɔndi bi kɔŋ tɛpi, na “Biya binɔndi bi kiŋ iŋ kulanɛya koŋ, awa biya bihɛna kɔ niya bɛyiniŋ bayɔhɔy baŋ.” Yaabi bakiyaŋ baŋ bɛna baŋ baŋ: na “Toŋine yama na wɔ punku ba niiye iŋ kulanɛya ku be ni bɛyiniŋ bayɔhɔy. Yaŋ kɔŋ nɛnɛ yina toŋine kulanɛya ku iŋ yaŋ koŋ ka bɛyiniŋ bayɔhɔy ba yaŋ ni baŋ.” 19E yi niyeŋ kulanɛya ba dɔma na Masaala wunthe napethi ndɛ na kɛndɛ? Ayɔhɔ. Kɛrɛ hali mbayiŋ beŋ hɛlɛŋ bi niyeŋ huŋ kulanɛya, e bindɛ thɛna iŋ payɔ. 20Wɔ thɔkɔy na yi. E yi thimoŋ ba toŋino ba dɔma na kulanɛya ku sa ni bɛyiniŋ bayɔhɔy kumayɛini kuna? 21Nama kuto nde mbemba wokɛntuŋ woŋ Ebrahim nɔŋ wɔ thumbɛ iŋ Masaala? Ndɛ kuto nde nɔŋ wɔ thumbɛ saathɛ ba bɛyiniŋ bayɔhɔy ba ni wundɛ baŋ, naa yɛrɔkɔy wundɛ ba fuŋuna hati nama Aisaki na saraka ka bɛsɛ ba yeheni wundɛ baŋ. 22Yi kute ntiŋ na ni kulanɛya nama koŋ iŋ bɛyiniŋ bayɔhɔy ba ni wundɛ baŋ wali ka tha banthe. Kulanɛya kukɛnama koŋ niyɔy kuthankinuwɛ saathɛ ba bɛyiniŋ bayɔhɔy ba ni wundɛ baŋ. 23Awa soora wo ka magbali ma ka Masaala maŋ see niyɔ nɔndi wo tɛpɛ woŋ ba dɔma, na “Ebrahim ni Masaala na lanɛya, awa ba saathɛ ba ka lanɛya babɛina nɛnɛ, Masaala yɛrɔkɔy niŋ nɔŋ wɔ thumbɛ.” Wuna biyɛ Ebrahim nde kɔ domo, na “Nyathiki wo ka Masaala.” 24Awa yi kute ntiŋ ba dɔma na wɔmɛti kɔŋ kuto nɔŋ wɔ thumbɛ iŋ Masaala saathɛ ba bɛyiniŋ ba ndɛ ni baŋ, wuŋ ka hɔkɔŋ saathɛ ba kulanɛya nama koŋ kuŋ kuthɔ nagbɛti. 25Nɛna niyɔy nde hɛlɛŋ wuŋ ba Rehabu, yɛrɛmɛ na nde wo katitoko namo nama. Kɛrɛ wundɛ kuto nɔŋ wɔ thumbɛ iŋ Masaala saathɛ ba bɛy bayɔhɔy ba ni wundɛ baŋ, naa key ndɛ yɛritɔ biYusu bi bayiliŋ bi ŋindo nde beŋ ba ka kɔthɔ na kɛndɛ e ndɛ bindɛ fuŋutiye gboŋa bahɛna haaŋ ndɛ niya bindɛ niyɔ kisi. 26Nɔŋ na nthɔŋ kɔtɔ koŋ na. Mɛnɛ kuŋ ka iŋ yina woŋ, kutukɛ kuna. Nɛna hɛlɛŋ kulanɛya koŋ. Mɛnɛ kuŋ ka iŋ bɛyiniŋ bayɔhɔy ba ku ni, kutukɛ kuna.

will be added

X\