biHiburu beŋ 6

1Bɛna miŋ pɛyɛŋ hintiŋ mathananini mamatherine ma ba Kraist maŋ, awa e miŋ kaa ka kɔtɔkɔy ka mathananini ma ba biya bi thankɛ fuŋa ka kuwaŋ ku ka Kraist koŋ maŋ. Miŋ bɛiŋ hɛlɛŋ nda thanani mathananini mamatherine maŋ ma ba sɔkɔ hu ka sikina sɔkɔrɔ bɛyiniŋ ba kati wɔ ka tuka mɛnɛ ba sɔkɔ hu ka niya Masaala na lanɛya, 2iŋ ba mathanani ma ba biye hu ka Masaala haŋ mɛnɛ thabiye thahɛna thaŋ ka dina woŋ, ma ba tuto thɛnkɔ thaŋ maŋ, ma ba ŋayi ka tuka haŋ maŋ, mɛnɛ ma ba kukɔnsɔŋɔŋ ku kɔy yo kɔy koŋ maŋ. 3Miŋ kaayɛŋ ka kɔtɔkɔy! Nɛna miŋ ba niya mɛnɛ Masaala kɔŋ mɛy. 4Nama bi thankɛ sikina Masaala na sɔkɔrɔ beŋ punku niyo ba hɛlɛŋ bindɛ sikina hakɛŋ namɛŋ baŋ sɔkɔrɔ? Bi kiŋ nde ka waŋ ba ka Masaala baŋ, awa bindɛ miŋ nde munkii mu ka ariana muŋ e bindɛ kuta kufɛŋ namɛŋ ka Yina wo ka Masaala woŋ. 5Bindɛ kute ba dɔma na thampa tha ka Masaala thaŋ ayɔhɔ, awa bindɛ kutɔkɔy sɛmbɛ ba ka lɔkɔ ba nɔŋ see baŋ. 6Hali na kute bindɛ muŋ muŋ na fooma, bindɛ sikiŋ Masaala na sɔkɔrɔ. Bindɛ sa nda punku niyo ba hɛlɛŋ bindɛ sikina hakɛŋ namɛŋ baŋ sɔkɔrɔ, baa, ma sɔkinɔkɔ yɛthɛ namɛŋ baŋ, Hati ka Masaala woŋ na hɛlɛŋ bindɛ duu ka yanta ka kuyeŋ kubariŋande koŋ iŋ kuyaahu ka biya ka teete. 7Masaala thiyiyɛ thaduba kuyɛkɛŋ ku ka koyoŋ wo tiŋ timo tima woŋ biileke kɛ, kuyɛkɛŋ ku mukuŋ muthuu muyɔhɔy ba bi kuŋ ni wali beŋ. 8Kɛrɛ mɛnɛ basoy mɛnɛ hande hunɛnɔy muku kɛndɛ, kuyɛkɛŋ kubɛina ka nda munahaŋ hali. Wuŋ thuriye kuyɛkɛŋ kubɛina ba thiyiyo danka iŋ Masaala; wuŋ pɛyɛ nda kuŋ ba toonuwo iŋ buu. 9Binyathikiŋ ntuŋ bi thimo miŋ, kɛrɛ hali miŋ gbonkiyaŋ naŋ naŋ baŋ, miŋ niyeŋ bena lanɛya. Miŋ kɔthɛŋ ba dɔma na beŋ kiŋ iŋ thaduba thahita tha ka kisi ndeŋ baŋ thaŋ. 10Masaala wɔ na ndɛ wo kɔnsɔŋɔŋ wuthumbɛ. Wundɛ sa piitɔ wali ba thanki beŋ niya baŋ maa thimo hu tɔŋɔŋ beŋ haŋ ba wundɛ ka kumase ku thanki beŋ dunkuna koŋ iŋ ku beŋ dunkuŋ koŋ ka bintɔni ndeŋ biKristɛŋ beŋ. 11Kufiyo ntuŋ kumandiŋ kuna ba womo woma ka beŋ ndɛ be ni sɔbɛ bakɛnama ba tɛŋa ka mapeye maŋ, wuna nɔŋ beŋ kutu bɛyiniŋ ba kahe beŋ thukuma baŋ. 12Miŋ thimota ba beŋ niyɔ biya bimayɛini, kɛrɛ ba beŋ yemitɔ biya bi niyɛ lanɛya iŋ bi ni muyuŋ, awa wuna beŋ kutu mu ni nde Masaala lahiri muŋ. 13Naa ni Masaala lahiri nama baŋ ka Ebrahim, ndɛ gbiŋe ba niya ba thanki ndɛ niya lahiri baŋ. Na ka wɔ wo yamɛ ba Masaala, bɛna ndɛ gbiŋɔkɔy ka niya lahiri baŋ. 14Wundɛ tepe, na “Yaŋ ni yina lahiri ba dɔma na yaŋ kɔŋ yina thiyiyɛ thaduba e yaŋ yina dunkune komisinɛ humandiŋ.” 15Ebrahim ni nde muyuŋ wunambɛ, awa ndɛ kute nɛnɛ mu ni nde Masaala lahiri muŋ. 16Naa wɔ gbiŋe, ndɛ kɔŋ gbiŋ ka wɔ yamɛ niŋ kaye-kaye, awa gbiŋa haŋ huna thankaŋ kugbakali koŋ. 17Ka bindɛ bi ba kuta mu thanki ndɛ niya lahiri muŋ beŋ, Masaala tepe huŋ nagberekethe ba dɔma na ndɛ sa thikipi madɛɛnki nama maŋ. Huna tute ndɛ kugbiŋ ka lahiri baŋ ka thinthi. 18Bɛyiniŋ babaye baŋ baŋ sa thikipi awa Masaala sa punku kɛriŋa hothi ba bɛŋ. Huna mindo kutɛ thɛbina thukuma beŋ kɛnama miŋ kahino thathukuma ba bohitɔkɔ wukahɛ-kahɛ kukahe ntuŋ thukuma ku deŋiyo miŋ ka kɔtɔkɔy koŋ. 19Miŋ kiŋ iŋ kukahe ntuŋ thukuma koŋ koŋ baŋ ku miŋ bohitɔkɔ ba siini bakɛntuŋ baŋ nɔŋ ntha ki bohitoko ki sa ŋɛnɔkɔ. Ntha kibɛina kiŋ ayɔhɔ piitoko awa ki kiŋ seŋa. Awa kiŋ daŋande thika babimɛ ba yanto baŋ ka biyo hu ka makonko ma ka kupɛnkintiyande ku ka Masaala koŋ maŋ ka doŋe ndɛ ka. 20Saathɛ bakɛntuŋ, Yisɔs kɔtiyɔkɔy mina kɛndɛ, awa ndɛ niyɔy Bafode Womandiŋ ba kɔy yo kɔy wo sɛkithɛ makooye ma ka Mɛlikisidɛki maŋ.

will be added

X\