biHiburu beŋ 4

1Na thanki nda mina Masaala niya lahiri ba ka biyande ba hɛmuwa iŋ wundɛ, awa lahiri babɛina ba kiŋ nthuŋ, niyaŋ kuthɛgbɛ haliko wunthe ka beŋ be tha dɔma ba ndɛ thana niyɔ wɔ sisande ba biyande ka hɛmuwa hu ni Masaala lahiri haŋ haŋ baŋ. 2Ba miŋ thanki yuyɛ Huseri Huyɔhɔy haŋ, nɔŋ na nde mbembɛŋ ntuŋ beŋ na. Bindɛ yuye nde huseri hu ka Masaala haŋ kɛrɛ huŋ tha bindɛ ni munahaŋ, baa naa yuye bindɛ huŋ, bindɛ tha huŋ yɛrɔkɔ e bindɛ huŋ niya lanɛya. 3Mindo niyɛ lanɛya beŋ, mina kutu hɛmuwa hu ni nde Masaala lahiri haŋ. Nɔŋ na tepe nthɔŋ ndɛ ka magbali nama maŋ na, na “Yaŋ thɔɔyɛ nde ka mathoŋ awa yaŋ gbiŋe ba dɔma, na ‘Haaŋ nɔŋ bindɛ sa biyande ba si hɛmuwa iŋ yaŋ.’ ” Wundɛ tepe nde haŋ haŋ baŋ hali na thanki nde nda wali bakɛnama baŋ na there ka malɔkɔ ma yehinuwe nde wundɛ kafay woŋ maŋ. 4Ba wuŋ gbonkiyo ka tha ka nɔndi ka magbali ma ka Masaala maŋ ba malɔkɔ ma tɛŋinɛ kasɔŋ-kaye maŋ: na “Masaala hɛmi ka gbɛɛŋ wo tɛŋinɛ kasɔŋ-kaye woŋ ŋaye ka wali nama baŋ fooma.” 5Bɛy banthe babɛina bɛŋ gbonkiyo hɛlɛŋ ba dɔma: na “Haaŋ nɔŋ bindɛ sa biyande ba si hɛmuwa iŋ yaŋ.” 6Bi yenke nde yuyɛ Huseri Huyɔhɔy haŋ beŋ tha nde biyande ba ka hɛmuwa iŋ Masaala, baa bindɛ tha nde ni lanɛya. Huna, miŋ kute ba dɔma na bihɛna bi kiŋ bi mekino ba biyande ba ka hɛmuwa iŋ wundɛ. 7Huna Masaala deŋe hɛlɛŋ lɔkɔ bahɛna ba dome ndɛ baŋ, na “Hɛ.” Naa daŋande wuŋ thaninɛŋ thabɔyɛ, ndɛ gbonkoy huŋ maŋaye ka Gbaku woŋ Dauda ka magbali ma ka Masaala ma tɛpɛ maŋ ba dɔma, na “Mɛnɛ beŋ yuye hɛ thampa tha ka Masaala thaŋ, baŋ niyɔ bathanthini.” 8Mɛnɛ Yɔsuwa nde nɔŋ dunkune biya beŋ hɛmuwa hu ni nde Masaala lahiri haŋ, Masaala sa nde hɛlɛŋ duu ka gbonkiya ba lɔkɔ bahɛna. 9Namo nama na wuŋ niiye, hɛmuwa hu kiŋ kɛndɛ ba biya bi ka Masaala beŋ nɔŋ na hɛmi nde ndɛ na ka gbɛɛŋ wo tɛŋinɛ kasɔŋ-kaye woŋ. 10Ba wɔ wo kutɛ hɛmuwa hu ni Masaala lahiri haŋ, wundɛ kɔŋ hɛmi ka wali nama baŋ, nɔŋ na hɛmi nde Masaala ka bakɛnama baŋ na. 11Miŋ yɔlɛŋ ti punke miŋ ba kuta hɛmuwa haŋ haŋ baŋ. Wɔ wunthe ka miŋ bɛiŋ baŋaŋ ba putiyɔ yamari wo ka Masaala woŋ nɔŋ na ni nde bindɛ na awa e bindɛ thana punka ba biyande. 12Thampa tha ka Masaala thaŋ tha kiŋ thapethɔy awa tha kiŋ iŋ sɛmbɛ, thabilɛ-bilɛ ayaŋ ba silanhi babilɛ ŋawaŋ ŋaye. Tha kɔŋ ŋɛli toloŋ e thɛŋ hakinande ka thuŋuyande hɛma iŋ yina wo ka wɔmɛti kɛ, ka bohiyande masɔkuwandeŋ mɛnɛ mathuluŋ ma ka wɔmɛti ka tha banthe kɛ. Tha kɔŋ kɔnsɔŋɔŋ ŋafiyoiŋ mɛnɛ masiyini ma ka thukuma hu ka wɔmɛti. 13Bɛy yo bɛy ka ba punku nunɔkɔ Masaala na; ntha o ntha kafaydo ki kutɔy awa ki ŋoyeŋ nagberekethe ka kɔtɔkɔy ka thaaya nama thaŋ. Awa kɛnama kɛna bohe miŋ fooma ba toŋe ŋakuna ba yɛthɛŋ bakɛntuŋ. 14Huna, miŋ bɔhɛŋ wukahɛ-kahɛ lanɛya ba miŋ gbonkiyiyɛ baŋ. Baa miŋ kiŋ nda iŋ Bafode Womandiŋ wo kaayɛ ka kupɛnkintiyande ku ka Masaala koŋ. Ndɛ na Yisɔs, Hati ka Masaala woŋ. 15Bafode wokɛntuŋ woŋ ka wo sa punku mina kutiyɛ nkinikiniŋ ka thana ntuŋ punka haŋ. Kɛrɛ miŋ kiŋ iŋ Bafode Womandiŋ wo thankɛ nda gberiŋinuwo gboŋa yo gboŋa na nthɔŋ miŋ na, kɛrɛ ndɛ tha ni hakɛ. 16Miŋ bɛiŋ payɔ, awa miŋ thuriyeŋ yensi hu ka Masaala haŋ, ka makutiyɛ maŋ kɛ. Kɛna miŋ kutiyo nkinikiniŋ awa miŋ kɔŋ niyɔ iŋ makutiyɛ ka lɔkɔ ba thimo miŋ ba kuta kumase.

will be added

X\