biHiburu beŋ 2

1Huna yɔkɔŋ miŋ be yaŋ bɔha nɔndi ba ka huseri haŋ ba thanki miŋ yuyɛ baŋ wukahɛ-kahɛ, wuna sa miŋ fuŋ ka nɔndi baŋ. 2Huseri hu dunkuno nde mbembɛŋ ntuŋ beŋ haŋ iŋ malekɛŋ beŋ toŋino nde ba huŋ niyɔ huseŋa, awa wɔ yo wɔ wo tha huŋ yeŋ maa ndɛ tha huŋ putiyɔ, ndɛ kɔŋ kutu kugbasaŋati ku sisande ndɛ ba kuta. 3Nama miŋ buthuriye kugbasaŋati koŋ koŋ baŋ mɛnɛ miŋ tha poniyɛ kuiha huseri humandiŋ hu ka kisi baŋ haŋ? Wundɛ Mariki woŋ gbeeŋ ndɛ na yenke koyiŋa ba kisi bamandiŋ baŋ baŋ, awa bi yuyɛ nde niŋ beŋ toŋine mina ba dɔma na huseŋa huna. 4Ka lɔkɔ banthe babɛina Masaala ndinti maseri makɛnama maŋ ka makɛnamɛŋ maŋ maŋaye ka niya bɛyiniŋ bathakaba fooma bahakuwande mɛnɛ babukuyuwɛ. Awa wundɛ nɛŋ hana munkii mu ka Yina nama woŋ muŋ, nɔŋ na yɛthi nde wundɛ ba hane na. 5Malekɛŋ kutɛ deŋo nde iŋ Masaala ba niyɔ bakɛrɛni bi kafay woŋama wo nɔŋ see woŋ, kafay wo miŋ gbonkiyiyɛ woŋ. 6Kɛrɛ, nɔŋ na thanki nde nthɔŋ wuŋ gbalo ka magbali ma ka Masaala maŋ na ka tha na ba dɔma, na “O Masaala, mbɛ mu wɔmɛti, yi ba siyuwa ba wundɛ; wɔmɛti hɔkɔŋ nthɔŋ, yi ba niŋ tute thukuma? 7Yi yeheni wɔmɛti ba malɔkɔ mathurɔy wu yamɛ niyɔ ka pothi ayaŋ ba malekɛŋ beŋ; yi huite niŋ gbakine ba niyɔ iŋ yiki bamandiŋ, 8awa yi ni ba ndɛ kɛriŋiyɛ ntha yo ntha.” Wuŋ tepo ba dɔma na Masaala ni wɔmɛti ba wundɛ “kɛriŋiyɛ ntha yo ntha”; wuŋ baŋ tɔŋɔŋ nagberekethe ba dɔma na ntha yo ntha thiyito. Kɛrɛ miŋ kuita hɛ biyamɛti bi si kɛriŋiyɛ ntha yo ntha. 9Kɛrɛ miŋ kute Yisɔs wo niyo nde ka pothi woŋ, ba malɔkɔ mathurɔy, wuŋ yama ba malekɛŋ beŋ si kɛriŋiyɛ ntha yo ntha, wuna maŋaye ka makutiyɛ ma ka Masaala maŋ ba miŋ, ndɛ be si tuku ba womo woma. Ka tete miŋ kute nda niŋ wo huitɔy gbakine ba niyɔ iŋ yiki bamandiŋ, ba saathɛ ba tuka hunambara hu tuku ndɛ haŋ. 10Wuŋ athɛmande nde ba Masaala, wo yehinuwɛ e ndɛ bɔha ntha yo ntha ka yɔnkɔ nama haŋ, ba niya ba Yisɔs niyɔ wɔ thankinuwɛ maŋaye ka nambarɛŋ nama baŋ, haliko ba sisa mpati nama bibɔyɛ ka bindɛ punku ba niiye iŋ kufɛŋ ka yiki nama baŋ. Baa Yisɔs na bindɛ katitɔkɔ ka bindɛ kute kisi. 11Yisɔs kɔŋ mɛthɛŋ biya ŋaye ka hakɛŋ namɛŋ baŋ, awa wundɛ iŋ bi thanki ndɛ mɛthina beŋ bindɛ niyɔy nda iŋ Fandamɛŋ wunthe. Wuna biyɛ Yisɔs ka iŋ kuyaahu ba bindɛ dɔma mbɛndama. 12Wundɛ dome ka Masaala, na “Yaŋ kɔŋ tepe mbɛndaŋ beŋ ba thanki yi niya baŋ; Yaŋ kɔŋ yina gbuŋunu ka mathuŋande makɛnamɛŋ maŋ.” 13Wundɛ dome hɛlɛŋ nɛŋ, na “Yaŋ kɔŋ piteke Masaala na.” Awa ndɛ dome hɛlɛŋ nɛŋ, na “Yaŋ kiŋ dondo baŋ iŋ mpati bi dunkune yama Masaala beŋ.” 14Bi dome ndɛ beŋ na mpati biyamɛti bina, huna biyɛ Yisɔs gbeeŋ ndɛ see niyɔ nɔŋ bindɛ e ndɛ niyɔ iŋ kɔtɔ ku ka wɔmɛti. Wundɛ ni wuŋ baŋ haliko ndɛ be teeti Wayi Womandiŋ woŋ Sithani na, wo iŋ sɛmbɛ ba ka tuka haŋ woŋ, ba saathɛ ba tuka hu ka wɔmɛti hu tuku wundɛ haŋ. 15Ka gboŋa baŋ baŋ, kɛna bakiŋe ndɛ bi nde ka huwaayine beŋ ka malɔkɔ makɛnamɛŋ fooma kafaydo baa bi nde payɔ tuka haŋ. 16Ba wuŋ kothiyo nagberekethe ba dɔma na malekɛŋ beŋ kutɛ mase ndɛ. Kɛrɛ wuŋ niyɔy nɔŋ na tepe magbali ma ka Masaala maŋ na ba dɔma, na “Wundɛ mase bɔnsɔŋ ba ŋaye ka Ebrahim baŋ.” 17Wuŋ thɔyande ba dɔma na ndɛ boheŋ nde ba niyɔ nɔŋ mbɛndama beŋ ka gboŋa yo gboŋa, haliko ba na ndɛ si niiye Bafode namɛŋ Womandiŋ, wo yɔhɔy niyo lanɛya awa wo iŋ nkinikiniŋ, ba niyiyɛ Masaala na wali, wuna biya pɛniya hakɛŋ bakɛnamɛŋ baŋ. 18Awa wundɛ kɔŋ nda punku ba mase bi thiika ba niya hakɛ beŋ baa wundɛ gbeeŋ ndɛ thiiko e ndɛ niyɔ nambara.

will be added

X\