biKaletiya beŋ 4

1Ka tete, ba kaa ka kɔtɔkɔy, hati yo hati wo iŋ mayoho ba pɛyɛtɔ kɛɛ ba ka fandama baŋ, ka malɔkɔ ma wundɛ hatiyɛ, kɔŋ hintiŋ yenke niyo nɔŋ waayi, wo ka iŋ sɛmbɛ ba dɛɛnkiyɔkɔ, hali na niyɔy wuŋ na ndɛ na nɔŋ biyɔ kɛɛ baŋ fooma. 2Ka malɔkɔ ma wundɛ hatiyɛ, wɔ kɔŋ kɛndɛ niyɔ ba niŋ diinka e sɛkitha gbɛthɛŋ ba dethiteke kɛɛ baŋ haaŋ malɔkɔ maŋ nɔŋ tɛŋa ma deŋe nde fandama woŋ maŋ ba ndɛ be dunkuno kɛɛ baŋ. 3Miŋ hɛlɛŋ nɛna nde miŋ, naa nde miŋ nɔŋ mpatiyɛŋ miŋ kiŋ nde mbaayiŋ bi ka mbayiŋ bi simoko ba bindɛ kɔ kɛriŋa ka kuthahinɛ koŋ. 4Kɛrɛ naa see malɔkɔ maŋ kunthu, Masaala ŋindi Hati wokɛnama woŋ e wundɛ si mpoo iŋ wɔ yɛrɛmɛ e niyɔ ka pothi ka makɛrɛŋ ma ka Siraŋ ba ka biYusu beŋ baŋ, 5ba haliko ba si bakiŋa bi ka pothi ka makɛrɛŋ ma ka Siraŋ baŋ maŋ, ba Masaala be mina sikiŋ mpati bikɛnama. 6Ba tɔŋina ba dɔma na beŋ kiŋ nda mpati bi ka Masaala, Masaala toŋite Yina wo ka Hati nama woŋ ka thathukuma thakɛntuŋ thaŋ fooma, Yina wo ka Masaala, wo mina ni ba miŋ niŋ bokite woŋ, na “Papaŋ, Fandaŋ woŋ.” 7Bɛna beŋ ka nda mbaayiŋ, kɛrɛ beŋ kiŋ nda mpati mpuu. Awa naa see nda Masaala bena sikiŋ mpati nama, wundɛ kɔŋ bena dunkune ntha yo ntha ki kɔsɔŋ wundɛ ba mpati nama beŋ. 8Ka malɔkɔ ma daŋande nde, beŋ kɔita nde Masaala na, huna nɛnɛ beŋ kiŋ nde ka pothi ka makɛrɛŋ ma ka mbayiŋ bi ka iŋ sɛmbɛ nɔŋ sɛmbɛ ba ka Masaala baŋ. 9Kɛrɛ ka tete, naa kɔthɛ nda beŋ Masaala na na, yaŋ tɛpɛŋ nda na na thanki nda Masaala bena kɔthɔ na, nama hɛlɛŋ beŋ duwe ka keriŋiyo iŋ mbayiŋ bi simoko ba bindɛ kɔ kɛriŋa ka kuthahinɛ koŋ? Mbɛ ba beŋ ba hɛlɛŋ sikineke mbaayiŋ ka bindɛ? 10Beŋ kiŋ iŋ gbɛɛni bithɔɔkɔ, sɛnkɛni bithɔɔkɔ, malɔkɔiŋ mathɔɔkɔ ka nina haŋ, mɛnɛ thaninɛŋ thathɔɔkɔ ba niye Masaala na kubatho. 11Yando ka yaagba ba beŋ ba thampo wali bakiyaŋ baŋ kendeŋ kaa ba gboŋ. 12Yaŋ theteke bena, mbɛndaŋ beŋ, yemitɔŋ yama, baa yaŋ sikiyɔkɔy nda nɔŋ bendo biya bi ka siyani bahɛna baŋ beŋ. Beŋ tha yama ni wunɛnɔy. 13Simɔkɔŋ bɛy bawaŋ ba dɔmɛ yaŋ niya Huseri Huyɔhɔy haŋ kukɛwandi mayoŋ kendeŋ. Nthoonaŋ kikiyaŋ kiŋ dunkuŋ yama hɛɛra ba bena niya Huseri Huyɔhɔy haŋ kukɛwandi ka kaa niŋ kaŋ maanuwa humayoŋ haŋ. 14Hali na niyɔy wuŋ makɔɔ ma ka kɔtɔ kukiyaŋ koŋ maŋ niyɔy kugbɛrɛŋɛŋ kumandiŋ ka kuwaŋ kukendeŋ, beŋ tha yama yethitɔ maa ba yama baŋina. Beŋ yɛrɔkɔy yama nanthe nathesi nɔŋ maleka wo ŋaye ka Masaala na yaŋ. Beŋ yɛrɔkɔy yama nɔŋ na yereke beŋ Kraist Yisɔs na na. 15Ba saathɛ ba ba thankɛ bena niyɔ baŋ, beŋ see nda niyɔ iŋ mayehitɔkɔ mamandiŋ. Kɛrɛ ka tete, kama kaaye nda mayehitɔkɔ mabɛina? Yaŋ yaathi, yaŋ kɔŋ nda kutu na mɛnɛ beŋ kiŋ nde iŋ sɛmbɛ beŋ kɔŋ nde fuŋuŋ thaaya ndeŋ thaŋ e beŋ yama thɛŋ dunkune. 16E yaŋ see nda ka sikiyɔkɔ hadeŋ na ba na tepe yaŋ bena nɔndi baŋ? 17Biya binɔndi bi kɔŋ tɔŋinɔkɔ ba bindɛ niyɔ iŋ makutɔkɔ ba beŋ, kɛrɛ masimɔkɔ namɛŋ maŋ ba beŋ mɛŋ ka mayɔhɔy. Hu thimo bindɛ, huna ba mina paŋinande iŋ beŋ, ba haliko beŋ be niyɔ iŋ makutɔkɔ manthe ba bindɛ nɔŋ na bindɛ kuteke ba beŋ na. 18Wu kiŋ wuyɔhɔy ba niyɔ iŋ makutɔkɔ masuŋɔy maŋ maŋ siiya, mɛnɛ kolo baŋ kaake ba kiŋ bayɔhɔy. Nɔndi yaathi, beŋ kiŋ ba niyɔ iŋ makutɔkɔ maŋ maŋ siiya hali mahɛŋ makiyaŋ. 19Mpatiŋ beŋ, nɔŋ na nthɔŋ komisa wo dɔŋɔy ka kugbomgboki ku ka mpaa kuteke na, nɛna hɛlɛŋ yaŋ kuteke wuthoonɛ ba beŋ haaŋ yɔkɔŋ beŋ mpuu maniyɔ ma ka Kraist maŋ ŋaye ka thathukuma ndeŋ thaŋ kaake. 20Yaŋ kiŋ nda kufiyo ba niyɔ iŋ beŋ haliko yaŋ be bena toŋine ŋaye ka magbonkoy makiyaŋ ba na yaŋ kuteke ba beŋ. 21Yaŋ thɔnthiŋinɛŋ hɛ bena, bendo thimo ba niyɔ beŋ ka pothi ka makɛrɛŋ ma ka Siraŋ baŋ maŋ beŋ: E beŋ tha nde yuyɛ na tepe nde magbali ma ka bukuiŋ bi ka Siraŋ baŋ beŋ na? 22Wuŋ gbalo nde kɛndɛ ba dɔma na Ebrahim kiŋ nde iŋ mpati biye bibiyɛthɛŋ, wunthe woŋ mpoo iŋ hati bɛthɔ wo nde waayi ka banka ba ka Ebrahim baŋ, wo wuntheŋ woŋ mpoo iŋ wɔtɔ nama woŋ, wokɔɔrɔ woŋ. 23Ebrahim kute hati iŋ hati bɛthɔ wo waayi nama woŋ nɔŋ na nthɔŋ biya kute mpati na. Ebrahim see hɛlɛŋ mpuu hati wathe wohɛna iŋ yɛrɛmɛ wokɔɔrɔ woŋ. Wuŋ niyɔy baa Masaala ni nde niŋ lahiri ba nɛŋ wuŋ kɔŋ niiye. 24Bɛyiniŋ baŋ baŋ ba kiŋ mathɔyande. Yɛrɛmɛŋ bibiye beŋ beŋ bi kooyeŋ ba mayukunandeŋ maye maŋ. Wo mpati nama bi mpoo ka huwaayine beŋ ndɛ na Heka, awa wundɛ mathɔyande ma ka mayukunande ma yehinuwo nde ka kusɛri ku dɔma koŋ na Sainay maŋ mɛna. 25Heka, wo kɔɔyɛ mathɔyande ma ka kusɛri ku ka Sainay ka kuyɛkɛŋ ku ka Arebiya, ndɛ na kɔɔyɛ mathɔyande ba biYusu beŋ fooma, bi mɛti namɛŋ bamandiŋ baŋ bɛna ka Yɛrusalɛmi, bi nda ka huwaayine beŋ. 26Kɛrɛ Yɛrusalɛmi ba ka ariana baŋ, ba kiŋ kuyankaŋ; awa Yɛrusalɛmi baŋ baŋ ba kiŋ nɔŋ nanda ntuŋ, 27baa magbali ma ka Masaala maŋ tepe, na “Niyɔ iŋ mayehitɔkɔ, yindo wɔ yɛrɛmɛ wo ka iŋ hati woŋ! Yɛla thampa e yi berina iŋ mayehitɔkɔ, yi, yindo be hɛ kutɔkɔ wuthoonɛ wu ka mpaa woŋ, baa yɛrɛmɛ wo ka nda ka maŋooye ma ka wandama woŋ kɔŋ niyɔ iŋ mpati ayaŋ ba yɛrɛmɛ wo ka maŋooye ma ka wandama woŋ.” 28Masaala ni nde lahiri ba nɛŋ wuŋ kɔ niiye, huna beŋ, bendo mbɛndaŋ beŋ, beŋ see nda niyɔ mpati bi ka Masaala nɔŋ na mpee nde nthɔŋ Ebrahim Aisaki na na baa Masaala ni nde lahiri ba nɛŋ wuŋ kɔŋ niiye. 29Ka lɔkɔ babɛina hati wo mpoo woŋ nanthe nɔŋ na mpati bihɛna mpoo na bohe niya thɔrɔ hati wo mpoo woŋ ba thiŋina ba thanki nde Yina wo ka Masaala woŋ niya lahiri baŋ, awa wuna hɛ niyɔ wuŋ. 30Kɛrɛ mbɛ hu tepe magbali maŋ? Magbali maŋ tepe na, “Kantha yɛrɛmɛ wowaayi woŋ iŋ hati nama, baa hati wo ka yɛrɛmɛ wowaayi woŋ ndɛ sa niyɔ iŋ kufɛŋ ka kɛɛ ba ka fandamɛŋ baŋ ka nanthe iŋ hati wo mpuu yɛrɛmɛ wokɔɔrɔ woŋ.” 31Bɛna mbɛndaŋ beŋ, miŋ ka mpati bi ka yɛrɛmɛ wo waayi woŋ, kɛrɛ miŋ kiŋ mpati bi ka yɛrɛmɛ wokɔɔrɔ woŋ gbeeŋ.

will be added

X\