biKaletiya beŋ 3

1Bendo biKaletiya beŋ athɔkɔ! Wuŋ athɔyande nɔŋ ka thiyiyo beŋ thadanka ba nda thana siyuwa wukele. Ka thaaya thakendeŋ iŋ biya fooma, yaŋ methine bena nagberekethe ba tuka hu ka Yisɔs Kraist haŋ ka kuyeŋ kubariŋande koŋ. 2Tepeŋ hɛ yama hunthe: E beŋ kute nde Yina wo ka Masaala woŋ saathɛ ba ka putiyɔ ndeŋ Siraŋ baŋ haŋ, maa saathɛ ba ka yuyɛ Huseri Huyɔhɔy haŋ iŋ ka niya huŋ kulanɛya? 3Mbɛ mu thiyɛ nɛŋ bena thɔkɔ yako? Beŋ therine ka Yina wo ka Masaala woŋ. E beŋ kɔŋ nda see ka thankine ka sɛmbɛ bakendeŋ? 4E ba hɔŋ bɛyiniŋ ba niyɔy bena baŋ tha bena mase ba hakiyando? Wuŋ ka nɛŋ, bɛŋ mase bena yaathi. 5Masaala tha bena dunkune Yina wokɛnama woŋ e niya bɛyiniŋ bathakaba ka mateete makendeŋ ba na putiyɔy beŋ Siraŋ baŋ, kɛrɛ ndɛ ni wuŋ ba na yuye beŋ Huseri Huyɔhɔy haŋ e beŋ huŋ niya lanɛya. 6Ka tete simɔkɔŋ hɛ ba Ebrahim nɔŋ na tepe magbali ma ka Masaala maŋ na, na “Ebrahim ni Masaala na lanɛya. Ba saathɛ ba kulanɛya nama koŋ nɛnɛ, Masaala yɛrɔkɔy niŋ nɔŋ wɔ thumbɛ.” 7Huna beŋ kiŋ ba metho ba dɔma na bɔnsɔŋ ba ŋaye ka Ebrahim baŋ gbeeŋ bɛna biya bi iŋ lanɛya beŋ ka Masaala. 8Magbali maŋ gbonkoy nde huŋ ba dɔma na Masaala kɔŋ kutu biya bi ka siyani bahɛna baŋ beŋ ba bindɛ niyɔ bithumbɛ ka kuwaŋ nama koŋ saathɛ ba na ni bindɛ niŋ lanɛya. Awa magbali maŋ koyoŋ nde Huseri Huyɔhɔy haŋ ka Ebrahim ba dɔma, na “Maŋaye kɛnda, Masaala kɔŋ thiyiyɛ siyani baŋ fooma thaduba.” 9Ebrahim, naa ni wundɛ Masaala na lanɛya, Masaala thiyiyɛ nɛnɛ niŋ thaduba. Huna Masaala kɔŋ thiyiyɛ biya fooma thaduba bi niyɛ niŋ lanɛya beŋ nɔŋ na thiyiyɛ nde ndɛ Ebrahim na thaduba na. 10Bindɛ bi dekinteke ba putiyɔ Siraŋ ba ka biYusu beŋ baŋ bi kiŋ ka danka ka tete, baa magbali ma ka Masaala maŋ tepe, na “Wɔ yo wɔ wo sa putiyɔ bɛyiniŋ fooma ba gbalo ka buku wo ka Siraŋ ba ka Masaala baŋ woŋ wundɛ kiŋ timo tima ka danka ba ka Masaala baŋ!” 11Ka tete wu kiŋ nda nagberekethe ba dɔma na wɔ ka wo punku kuto iŋ Masaala nɔŋ wɔ thumbɛ saathɛ ba ka putiyɔ nama Siraŋ baŋ haŋ, baa magbali maŋ tepe, na “Yɔkɔŋ wɔ wo Masaala kutu ba wundɛ niyɔ wɔ thumbɛ saathɛ ba na ni wundɛ kulanɛya nape, ndɛ na kutu sii.” 12Kɛrɛ putiyɔ Siraŋ baŋ haŋ huŋ ka hunthe iŋ niya lanɛya Masaala na haŋ, nɔŋ na tepe magbali maŋ na, na “Wɔ yo wɔ wo ni fooma ba tepe Siraŋ woŋ baŋ, wundɛ kɔŋ niyɔ iŋ sii.” 13Kɛrɛ Kraist see sikiyɔkɔ wɔ badanka ba saathɛ ba kɛntuŋ ba haliko ba mina bakiŋa ka danka ba mina Siraŋ baŋ sisiyɛ baŋ, baa magbali ma ka Masaala maŋ tepe, na “Wɔ yo wɔ wo yanto ka kuyeŋ koŋ, wɔ bɛina kiŋ nda ka danka ba ka Masaala baŋ.” 14Kraist ni wuŋ ba haliko thaduba tha ni nde Masaala Ebrahim na lahiri thaŋ tha be dunkuna ka siyani bahɛna baŋ saathɛ ba ka Kraist Yisɔs haliko saathɛ ba ka niya lanɛya, miŋ be kutu Yina wo ka Masaala woŋ wo ni nde wundɛ mina lahiri woŋ. 15Mbɛndaŋ biKristɛni, yaŋ kɔŋ bena sisiyɛ mathɔyande ma niyɔ timo tima: naa biya biye yuku sɔkɔ ka tha banthe e bindɛ lɔnkande, wɔ wunthe ka bindɛ ka ba teetuwa mayuku mabɛina ba gbinkinande maa ba ndinta ntha yo ntha kɛndɛ. 16Kɛrɛ dɛŋa thɛnkɛ, Masaala naa ni nde ndɛ lahiri Ebrahim na iŋ wɔ wunthe ka bɔnsɔŋ ba ŋaye kɛnama baŋ, magbali ma ka Masaala maŋ tha nde gbonkoy ba biya bibɔyɛ, kɛrɛ mɛŋ gbonkoy ba wɔ wunthe napethi naa tepe mɛŋ, na “wɔ wunthe ka bɔnsɔŋ ba ŋaye kɛnama baŋ,” awa wɔ bɛina ndɛ na dɔma Kraist. 17Mathɔyande ma ka mayuku maŋ maŋ mɛna thɔyande iŋ mayuku ma yuku Masaala maŋ iŋ Ebrahim e niya lahiri ba mɛŋ kɔsina. Siraŋ ba manke dunkuno bɛrɛ ba thaninɛŋ kɛmɛŋ binaŋ e kɔnthɔ kataati sa punku teetuwa mayuku mabɛina e puuthuwa lahiri ba ka Masaala baŋ. 18Mɛnɛ munkii mu ka Masaala muŋ kɔŋ kuta ba saathɛ ba ka kɔsina Siraŋ baŋ, wuŋ thɔyande muŋ kutota nda saathɛ ba ka lahiri ba ka Masaala baŋ. Halisa ba saathɛ ba lahiri nama baŋ wundɛ dunkuŋ munkii muŋ muŋ ka Ebrahim. 19Mbɛ nde ntiŋ wali ba ka Siraŋ baŋ baŋ? Siraŋ baŋ ndinto nde ka mayukunande maŋ iŋ Ebrahim ba toŋine biyamɛti mu domo hakɛ. Awa Siraŋ baŋ dunkuno nde ba kɛriŋa haaŋ saa hu ka wɔ wunthe wo ka bɔnsɔŋ ba ka Ebrahim baŋ woŋ haŋ, wo ba niye nde Masaala lahiri baŋ woŋ. Masaala dunkuŋ nde Siraŋ baŋ ka thɛnkɔ tha ka malekɛŋ e wɔmɛti kɔɔ nɔŋ baŋathɔ mateete ma ka Masaala iŋ biyamɛti. 20Kɛrɛ ka bɛy ba ka wɔ wunthe, baŋathɔ ka ba kɛndɛ niyɔ, awa Masaala ndɛ na dunkuniyɔkɔy lahiri baŋ ka Ebrahim. 21E wuŋ, wu kiŋ ba dɔma na Siraŋ baŋ kiŋ ka sɔkinɔkɔ lahiri ba ka Masaala baŋ? Ade, wuŋ ka nɛŋ hali, baa mɛnɛ Masaala dunkune nde biyamɛti siraŋ ba bindɛ sisiyɛ sii, wɔ yo wɔ kɔŋ nde kuta iŋ Masaala ba wundɛ niyɔ wothumbɛ saathɛ ba ka putiyɔ bɛŋ haŋ. 22Kɛrɛ magbali maŋ tepe ba dɔma na dunia babunthu fooma ba kiŋ ka makɛrɛŋ ma ka hakɛ, huna munkii mu niyo lahiri muŋ saathɛ ba ka niya lanɛya ka Yisɔs Kraist mu kɔŋ dunkuna ka bi niyɛ lanɛya beŋ. 23Kɛrɛ saanuŋ lɔkɔ ba ka lanɛya baŋ ba tɛŋa, Siraŋ baŋ ba boheŋ nɔŋ mina nɔŋ biya bilɔŋɔy haaŋ yɔkɔŋ na tɛŋ lɔkɔ ba toŋino biya ba niya lanɛya ka Yisɔs Kraist. 24Huna Siraŋ baŋ bɛna nde mina diinki haaŋ yɔkɔŋ naa see Kraist ba haliko Masaala be mina kutu ma biya bithumbɛ ka kuwaŋ nama koŋ saathɛ ba niya ntuŋ lanɛya haŋ. 25Ka tete, naa tɛŋ nda malɔkɔ ma ka lanɛya baŋ maŋ, miŋ ka nda ba niyɔ ka pothi ka badiinki. 26Saathɛ ba ka lanɛya ndeŋ baŋ, bendo biKaletiya beŋ fooma see nda niyɔ mpati bi ka Masaala saathɛ ba ka bɔhande ndeŋ haŋ ka tha banthe iŋ Kraist Yisɔs. 27Beŋ biyo nde biye hu ka Masaala haŋ. Ba saathɛ babɛina beŋ see nda bɔhande ka tha banthe iŋ Kraist, awa beŋ see nda niyɔ nɔŋ Kraist. 28Bɛna mahakande ka nda mateete ma ka biYusu beŋ iŋ siyani bahɛna baŋ, maa mateete ma ka mbaayiŋ iŋ kɔɔrɔiŋ beŋ, maa mateete ma ka biyɛthɛŋ iŋ yɛrɛmɛŋ. Ka bɔhande namɛŋ haŋ iŋ Kraist, beŋ beŋ fooma bi kiŋ binthe. 29Mɛnɛ beŋ kiŋ bi ka Kraist, beŋ kiŋ bɔnsɔŋ ba ka Ebrahim, awa beŋ kɔŋ kutu mu ni nde Masaala lahiri muŋ ka bɔnsɔŋ ba ka Ebrahim baŋ.

will be added

X\