biKaletiya beŋ 2

1Naa daŋande wuŋ thanina kɔhi iŋ thanaŋ kabi na fuŋ yaŋ ka Yɛrusalɛmi, yaŋ duu hɛlɛŋ kɛndɛ iŋ Banabasi. Ka kaa hubɛina miŋ diŋe Taitɔsi na ka kaa. 2Yaŋ duu kɛndɛ baa Masaala tepe yama ba yaŋ be duu. Ka magbɔma ma bohe miŋ iŋ bayahɛŋ bi ka balanɛyani beŋ, yaŋ methine bindɛ nagberekethe Huseri Huyɔhɔy hu bare yaŋ niya kɛwandi ka biya bi ka siyani bahɛna baŋ beŋ, baa yaŋ thimota ba wali ba thanki yaŋ niya baŋ iŋ ba yaŋ ni baŋ ba thana yeroko. 3Taitɔsi, wo nde miŋ kaande woŋ, hali na ka wundɛ woYu na, wundɛ tha pithita ba thiyo ka bintɔni nama nɔŋ na biYusu beŋ na, 4hali na niyɔy wuŋ binɔndi bi thimoŋ nde ba nɛŋ wuŋ niiye. Bindɛ niyɔkɔy nɔŋ balanɛyani e mina si thɔɔtɔ nɔŋ bayiliŋ, ba haliko ba kɔthɔ na bakiŋo miŋ ka Siraŋ ba ka dina wo ka biYusu beŋ woŋ saathɛ ba na bɔhande miŋ ka tha banthe iŋ Kraist Yisɔs. Awa bindɛ thimoŋ hɛlɛŋ ba mina niya mbaayiŋ bi ka Siraŋ babɛina. 5Kɛrɛ miŋ tha yɛrɔkɔ mathimo namɛŋ maŋ hali, babiyɛ miŋ thimoŋ ba bena kɔsiniyɛ nɔndi ba ka Huseri Huyɔhɔy hu ka Masaala haŋ. 6Kɛrɛ bindɛ bi domo beŋ na bayahɛŋ tha nda tutu bɛy yo bɛy bahɛna ka magbonkoy niŋ maŋ. Ka kuwaŋ kukiyaŋ koŋ, namo nama na wɔ, wuŋ ka yama bɛy baa Masaala konsiŋineta wɔmɛti nɔŋ na biya niŋ kute na. 7Ka thinthi ka bɛina bindɛ kute ba dɔma na Masaala thanki yama dunkune doni ba ka niya Huseri Huyɔhɔy haŋ kukɛwandi ka biya bi ka siyani bahɛna baŋ beŋ, awa e thana niya kukɛwandi ka biYusu beŋ. 8Ŋaye ka sɛmbɛ ba ka Masaala baŋ yaŋ niyo baseri wothɔɔkɔ ka siyani bahɛna baŋ nɔŋ na niyo Pita baseri wothɔɔkɔ na ka biYusu beŋ. 9Yemisi, Pita, mɛnɛ Yɔni bi thɔyande beŋ nɔŋ bakɔtɔkɔiŋ, bi kɔthɛŋ ba dɔma na Masaala thanki yama dunkune gbɛthɛŋ bathɔɔkɔ baŋ baŋ. Ba tɔŋina ba dɔma na miŋ kiŋ nda wali banthe iŋ bindɛ, bindɛ gbathiyande iŋ Banabasi mɛnɛ yaŋ. Miŋ yɛrɔkɔy ka tha banthe ba Banabasi mɛnɛ yaŋ ba niya wali ka siyani bahɛna baŋ e bindɛ nɛnɛ niya wali ka biYusu beŋ. 10Sɔkɔ hunthe huna tepe hɔkɔŋ bindɛ mina, na ba miŋ thana piitɔ bamɔnɛŋ beŋ ka mateete ma ka balanɛyani beŋ kɛndɛ, bɛy ba nɔŋ nthɔŋ nda yaŋ kufiyo ba niya baŋ. 11Kɛrɛ naa see Pita tɛŋ ka Antiyɔkɔ, yaŋ pinde niŋ kɛndɛ ka thaaya ka balanɛyani beŋ fooma, baa wundɛ ni wusikɔy. 12Saanuŋ biya bi ŋindo nde iŋ Yemisi beŋ ba tɛŋa kɛndɛ, Pita wo nde thɔŋ ka tha banthe iŋ biya bi ka siyani bahɛna bi niyɛ nda lanɛya beŋ. Kɛrɛ naa tɛŋ nthɔŋ biya beŋ beŋ, wundɛ fuŋ kupootɛ. Wundɛ meyeta nda ba thɔma iŋ bi bare nde ndɛ thɔma beŋ, baa wo nde payɔ biya bi tɛpɛ beŋ na yɔkɔŋ lamgbeŋ bi ka siyani bahɛna bi niyɛ kulanɛya beŋ thiyo ka bintɔni namɛŋ nɔŋ na biYusu beŋ na. 13BiYusu bi balanɛyani bi kɛndɛ ka Antiyɔkɔ ka beŋ bohe hɛlɛŋ ba yemitɔ Pita na ka payɔ hubɛina. Hali Banabasi gbeeŋ wundɛ diŋito iŋ payɔ namɛŋ haŋ. 14Naa kute yaŋ ba dɔma na bindɛ kooyeta wuthumbɛ ka nɔndi ba ka Huseri Huyɔhɔy haŋ, yaŋ tepe Pita na ka thaaya namɛŋ fooma, na “Yi, woYu na yi, kɛrɛ e yi nɔŋ kɔ niya ba siyani bahɛna baŋ ni baŋ. Yi niyeta nɔŋ ma woYu. Nama dɔmɛ yi be kɔ yɔli ba pithita balanɛyani bi ŋaye ka siyani bahɛna baŋ beŋ ba putiyɔ sirani ba ka dina wo ka biYusu beŋ woŋ?” 15Yaathi, miŋ mindo biYusu beŋ ka mpoo, miŋ ka nɔŋ biya bi ka siyani bahɛna baŋ beŋ bi dɔma beŋ na “bahakɛŋ.” 16Halisa miŋ kɔthɛŋ ba dɔma na ba niya lanɛya ka Yisɔs Kraist huna gboŋa ba thankɛ nape ka masimɔkɔ ma ka Masaala maŋ ba wundɛ kute wɔmɛti ba wundɛ niyɔ wɔ thumbɛ. Wuŋ ka ka putiyɔ nda Sirani ba dunkuŋ Masaala baŋ ka yɔnkɔ hu ka Musa haŋ. Miŋ hɛlɛŋ, miŋ ni kulanɛya ka Kraist Yisɔs, haliko Masaala be kutu gboŋa ba wundɛ mina kute nɔŋ biya bithumbɛ saathɛ ba ka niya ntuŋ kulanɛya haŋ ka Kraist. Wuŋ ka ka niya mathimo ma ka Sirani baŋ baŋ maŋ, baa wɔ ka wo Masaala kutu wothumbɛ saathɛ ba ka bɔha nama Sirani baŋ haŋ. 17Mindo dekiyɔkɔ ba kuto bithumbɛ iŋ Masaala saathɛ ba na bɔhande miŋ ka tha banthe iŋ Kraist. Naa miŋ wuŋ ni na, miŋ kɔŋ ŋee ba miŋ niyɔ bahakɛŋ nɔŋ na nthɔŋ biya bi ka siyani bahɛna baŋ beŋ na. E wuŋ, wu kiŋ ba dɔma na Kraist bahɛŋɛti biya na ba niya hakɛ? Ade, wuŋ ka nɛŋ. 18Mɛnɛ yaŋ thɛrɛŋ hɛlɛŋ ba tepe biya ba dɔma na bi kɔŋ kuta iŋ Masaala ba bindɛ niyɔ nɔŋ bithumbɛ saathɛ ba ka putiyɔ namɛŋ haŋ Sirani ba ka Masaala baŋ, madɛɛnki magbeeŋ ma thanki nde nda yaŋ teetuwa maŋ, yaŋ asisande ba domo bahakɛ. 19Ka kuwaŋ ku ka Siraŋ baŋ koŋ, yaŋ kiŋ nda yando tukɛ ka bɛŋ. Yaŋ ka nda ka pothi ka makɛrɛŋ ma ka Siraŋ baŋ maŋ. Siraŋ baŋ bɛna niyɛ ba yaŋ tuka, haliko yaŋ be niyɔ yando pethɔy ba Masaala. Yaŋ nda iŋ Kraist, miŋ koro nda ka kuyeŋ kubariŋande koŋ. 20Yaŋ ka nda ka yɛthɛ bakiyaŋ ka sii ba iŋ yaŋ baŋ, kɛrɛ Kraist na nda kaake kiyaŋ. Sii ba nda iŋ yaŋ baŋ, yaŋ niyɔy iŋ bɛŋ saathɛ ba na ni yaŋ lanɛya ka Hati ka Masaala wo thimo yama woŋ haaŋ e dunkuna sii nama baŋ ba yaŋ. 21Yaŋ sa mɛy ba baŋina nkinikiniŋ ki kutiye yama Masaala kiŋ. Kɛrɛ mɛnɛ saathɛ ba ka putiyɔ Siraŋ baŋ wɔ kɔŋ punku kuto iŋ Masaala ba wundɛ niyɔ wɔ thumbɛ, wuŋ thɔyande Kraist tuku ba gboŋ.

will be added

X\