biKaletiya beŋ 1

1Yama Pɔli na, wo yetho ba niyo baseri wothɔɔkɔ iŋ Yisɔs Kraist mɛnɛ Masaala wo Fanda ntuŋ woŋ, wo ŋayinɛ nde Yisɔs Kraist na ka tuka haŋ woŋ. Wɔmɛti kutɛ yɛthɛ yama, awa yaŋ tha nde yetho maŋaye ka sɛmbɛ ba ka wɔmɛti. 2Mbɛndaŋ beŋ dondo fooma ka wali ba ka Masaala baŋ thɔɔtɔy yama ka tɔŋita ŋamaani ka bendo ka makɔmandeŋ ma ka balanɛyani beŋ maŋ ka kuyɛkɛŋ ku ka Kaletiya. 3Haliko Masaala, wo Fanda ntuŋ woŋ, iŋ Yisɔs Kraist, Mariki ntuŋ woŋ, toŋine bena mathimo e dunkune bena mathɛbɛŋ. 4Kraist ni ba thimo Masaala, wo Fanda ntuŋ woŋ, ba wundɛ niya. Wundɛ dunkuŋ sii bakɛnama baŋ ba haliko ba mina niya kisi ŋaye ka makɛrɛŋ ma ka hakɛ mɛnɛ ba mina niya kisi maŋaye ka lɔkɔ banɛnɔy bahɛ baŋ. 5Haliko biyamɛti bi thunkunuwa Masaala na timo tima. Amiina. 6Wu ni beŋ wuŋ, wuŋ niyɔy yama thɛrɛnaŋ, ba beŋ ba sikina Masaala na sɔkɔrɔ ka wuthurɔy, wo thiyɛ bena saathɛ ba na kutiye bena Kraist nkinikiniŋ, e beŋ nda kɔ kaa kaŋ yɛrɔkɔ Huseri Huhɛna hu siyuwe beŋ ba huŋ niyɔ huseri huyɔhɔy. 7Yaathi, yaŋ tepe bena, huseri huyɔhɔy huhɛna ka. Kɛrɛ, biya bihɛna hiŋ bi yɔli ba bena thiya kɔnthɔhili iŋ ba thikipa Huseri Huyɔhɔy hu gbonkiyɛ ba Kraist haŋ. 8Kɛrɛ hali na aniyɔy na hintiŋ wuŋ na miŋ dondo maa maleka na sɛɛ ŋaye ka ariana e si niya bena kukɛwandi huseri hu hakande iŋ Huseri Huyɔhɔy hu ba Kraist hu thanki yaŋ bena niya kukɛwandi haŋ, haliko wundɛ yelo ka yahanama. 9Miŋ tepe nde bena huŋ mayoŋ. Ka tete yaŋ kɔŋ hɛlɛŋ huŋ tɛpi: mɛnɛ wɔ yo wɔ ni bena kukɛwandi huseri hu hakande iŋ huseri hu thanki beŋ yɛrɔkɔ haŋ, haliko wundɛ yelo ka yahanama. 10E wuŋ, wuŋ thɔyande nɔŋ ka yaŋ yɔli ba yehina biyamɛti thathukuma? Ade, wuŋ ka nɛŋ. Yaŋ thimoŋ ba yehina Masaala na thukuma. Awa mɛnɛ yando nde yɔli na ba gbonkiyiyo wuyɔhɔy iŋ biyamɛti, yaŋ sa nde niyɔ bawali wo ka Kraist. 11Yaŋ kɔŋ hɛlɛŋ bena tepe, bendo mbɛndaŋ beŋ ka kulanɛya koŋ beŋ, ba dɔma na Huseri Huyɔhɔy hu yaŋ ni kɛwandi haŋ huŋ tha there ka wɔmɛti. 12Yaŋ tha huŋ kute ka biyamɛti, ba hintiŋ tɛpa na wɔmɛti na thaninuwɛ yama huŋ. Yisɔs Kraist gbeeŋ ka yɛthɛ nama ndɛ na toŋine yama huŋ. 13Beŋ tepo nde nɔŋ na nde maniyɔ makiyaŋ na nde yaŋ, nɔŋ na kahe nde yaŋ ka dina wo ka biYusu beŋ woŋ, nɔŋ na nde yaŋ niye thɔrɔ bi niyɛ lanɛya ka Masaala beŋ wuthoonɛ-thoonɛ e yɔla gboŋa yo gboŋa ba bindɛ pankitinuwande. 14Yaŋ bohe dina wo ka biYusu beŋ woŋ wuŋ yama ba bibɔyɛ ka bintɔni niŋ beŋ, awa yaŋ kiŋ nde hɛlɛŋ basɔbɛ ka yema mathananini ma peyo nde miŋ maŋ iŋ mbembɛŋ ntuŋ beŋ. 15Kɛrɛ Masaala kutiye yama nkinikiniŋ ba yama yɛtha saanuŋ yaŋ ba mpoo e yama thiya ba niya wali nama baŋ. Awa naa thanki Masaala dɛɛnka 16ba yama toŋine hati nama woŋ, haliko yaŋ be kutu na niye kɛwandi Huseri Huyɔhɔy haŋ ka biya bi ka siyani bahɛna baŋ beŋ, wuŋ ka ka biYusu beŋ, yaŋ tha thɔnthɔŋɔŋ wɔ yo wɔ ba yama tepe ba yaŋ ba niya, 17ba hintiŋ tɛpa na yaŋ key ka Yɛrusalɛmi ba ka kutiyɔkɔ bi yenke nde niyɔ baseriŋ bithɔɔkɔ ba yaŋ beŋ. Kɛrɛ naa ŋaye yaŋ kɔɔ hanthe, yaŋ key ka kuyɛkɛŋ ku ka Arebiya. Naa ŋaye yaŋ kɛndɛ, yaŋ duu ka mɛti ba ka Damasakɔsi. 18Naa daŋande wuŋ thanina thataati, yaŋ key ntiŋ ka Yɛrusalɛmi ba ka kutiyɔkɔ Pita na, awa kɛna niyɔy yaŋ iŋ wundɛ ba wikiŋ biye hɔkɔŋ nagbɛti. 19Yaŋ tha kutiyɔkɔ baseri wothɔɔkɔ wohɛna kɛndɛ yɔkɔŋ Yemisi wo wɛnda ka Mariki wokɛntuŋ woŋ. 20Nɔndi bɛna yaŋ bena tepe baŋ. Masaala kiŋ maseri ba yaŋ ba dɔma na yaŋ keriŋeta bena hothi. 21Naa daŋande wuŋ, yaŋ key ka kuyɛkɛŋ ku ka Siriya iŋ ku ka Silisiya. 22Ka lɔkɔ babɛina makɔmandeŋ ma ka biya bi niyɛ lanɛya ka Kraist maŋ ka kuyɛkɛŋ ku ka Yudiya kɔita hɛ yama. 23Bindɛ kɔthɛŋ hɔkɔŋ nagbɛti bɛyiniŋ ba bindɛ tepo iŋ bintɔni namɛŋ ba dɔma, na “Wɔ wo dɔma na Pɔli woŋ wo bare nde mina niya thɔrɔ woŋ, bohe tepe biya ba piteke Kraist na, wu nde wundɛ yɔli ba pinda biya ba wuŋ niya wuŋ.” 24Kɛna thunkunu bindɛ Masaala na ba ba thanki wundɛ niya baŋ maŋaye ka yɔnkɔ hukiyaŋ haŋ.

will be added

X\