biƐfɛsɔsi beŋ 6

1Bendo mpati, putiyɔŋ biya bikendeŋ beŋ, baa wuŋ asisande awa wu kɔŋ yehe Mariki woŋ. 2Siraŋ bamayoŋ ba iŋ lahiri baŋ ka magbali ma ka Masaala maŋ fooma bɛna baŋ baŋ: “Thiya fanda na iŋ nanda na yiki, 3wuna wuŋ yɔhɔ ba yi awa yi kɔŋ thɔɔki sii ka faido.” 4Bendo komisɛŋ bibiyɛthɛŋ beŋ, baŋ thiyi mpati ndeŋ beŋ ka mathoŋ ka sisinuwa bindɛ timo tima. Kɛrɛ dinkaŋ bindɛ ka mathananini mɛnɛ madinki ma ka Mariki woŋ maŋ. 5Bendo mbaayiŋ beŋ, mɛyaŋ yamari ka marikiŋ ndeŋ bi ka faido beŋ, iŋ payɔ mɛnɛ thɛna, iŋ thathukuma ndeŋ fooma, nɔŋ Kraist na beŋ niyiyɛ wali; 6wuŋ ka ba dɔma na yɔkɔŋ ka thaaya namɛŋ na beŋ niye wali haliko ba yɔhɔ keŋ, kɛrɛ niyaŋ wali nɔŋ bawaliŋ bi ka Kraist, bi ni mathimo ma ka Masaala maŋ ŋaye ka thathukuma namɛŋ thaŋ. 7Niyaŋ wali ndeŋ baŋ iŋ thathukuma ndeŋ fooma, nɔŋ ka beŋ ni wali ba Mariki woŋ, wu be tha niyɔ ba dɔma na ba wɔmɛti na beŋ wuŋ niye. 8Siyuwaŋ ba Mariki woŋ kɔ thunkuna wɔ yo wɔ ba bayɔhɔy ba ni wundɛ baŋ; niyɔŋ waayi maa kɔɔrɔ, ndɛ kɔŋ thunkuna. 9Bendo marikiŋ beŋ, nɛna hɛlɛŋ beŋ ba diŋe mbaayiŋ ndeŋ beŋ, awa pɛyaŋ bindɛ gbuŋa haŋ. Siyuwaŋ ba dɔma na beŋ iŋ mbaayiŋ ndeŋ beŋ bendo biiyo bina ka nanthe iŋ Mariki wunthe ka ariana, awa wundɛ kɔŋ kɔnsɔŋɔŋ wɔ yo wɔ ka nanthe. 10Ba nda gbanthina, niyɔŋ bendo kahɛ ka bɔhande ndeŋ ka Mariki woŋ haŋ mɛnɛ ka sɛmbɛ nama bamandiŋ baŋ. 11Thɔɔŋ fooma mugbɛkitɔkɔ mu dunkune bena Masaala muŋ ba dekiya haŋ, wuna beŋ punku kɔɔ ba sɔkinɔkɔ ŋakɔɔthani ŋa ka Wayi Womandiŋ woŋ ŋaŋ Sithani. 12Ba miŋ dekiyeta ma sɔkinɔkɔ biyamɛti, kɛrɛ ma sɔkinɔkɔ yinɛŋ binɛnɔy bi ka kufenaŋ koŋ beŋ, bakɛrɛni beŋ, bi iŋ mayoho maŋ beŋ, mɛnɛ basɛmbɛŋ bi ka fai woŋ baŋ beŋ wo thiŋo iŋ huntuma woŋ. 13Huna, thɔɔŋ nda mugbɛkitɔkɔ mu ka dekiya haŋ mu dunkune bena Masaala muŋ. Huna, naa malɔkɔ manɛnɔy maŋ tɛŋ, beŋ kɔŋ punku niyɔkɔ kantha naa hadeŋ woŋ sɔkinɔkɔy bena; awa naa beŋ thankaŋ dekiya haŋ fooma, beŋ kɔŋ punku kɔɔ wukahɛ. 14Huna, kɔɔŋ madekiye, e beŋ sɛkitha nɔndi baŋ nɔŋ ka wɔ yukɔkɔ mbumbusa ka hirika, mɛnɛ mathumbɛ nɔŋ ka wɔ thɔɔ yaba bathawɛ ba pama kanka nama baŋ. 15Awa dagbalɛŋ ndeŋ baŋ ba niyɔyŋ kufiyo ku ba tɛpa Huseri Huyɔhɔy hu ka mathɛbɛ maŋ haŋ. 16Lɔkɔiŋ fooma kaaŋ iŋ lanɛya nɔŋ ntha ki wɔ bohi ka yɔnkɔ ba pama kɔtɔ nama koŋ maŋaye ka thahiyo thatɔɔni tha Wɔ Nɛnɔi woŋ thahi thaŋ. 17Sɛkitha kisi baŋ nɔŋ kuhaka kuthawɛ ku wɔ tutɔkɔ ba pama yaha nama haŋ, mɛnɛ thampa tha ka Masaala thaŋ tha nɔŋ silanhi ba Yina nama woŋ yina dunkune baŋ. 18Niyaŋ wuŋ fooma iŋ ŋaraminɛ, e beŋ thɔnthiŋina Masaala na ba bena mase. Niyaŋ kuraminɛ lɔkɔiŋ fooma nɔŋ na bena Yina wo ka Masaala woŋ katiteke na. Ba saabu baŋ baŋ, niyɔŋ bendo thɔhɔy awa e beŋ thana thamɔ; niyaŋ kuraminɛ timo tima ba biya bi ka Masaala beŋ fooma. 19Niyaŋ hɛlɛŋ kuraminɛ ba yaŋ haliko Masaala be yama dunkune huseri naa yaŋ kɔsinɔkɔi ba gbonkiya, wuna yaŋ gbonkoy iŋ kaha thukuma e yaŋ toŋine biya gbundu ba ka Huseri Huyɔhɔy haŋ baŋ. 20Ba saathɛ ba ka Huseri Huyɔhɔy haŋ haŋ baŋ huna niyiye yaŋ baseri, hali na nda yaŋ ka yeeli na. Niyaŋ kuraminɛ haliko yaŋ be thunku ba gbonkiya ba huŋ, nɔŋ na sisande yaŋ ba gbonkiye na. 21Taikikɔsi, wo thimo miŋ woŋ, wo wɛnda ntuŋ wo yɔhɔy niyo lanɛya ka wali ba ka Mariki woŋ baŋ, ndɛ kɔŋ bena tepe bɛyniŋ fooma ba yaŋ, wuna beŋ kɔthɔ na nda wuŋ yama iŋ ba yaŋ ni. 22Yaŋ kɔŋ niŋ ŋindi kendeŋ ka ba bena tepe na miŋ dondo baŋ fooma, iŋ ba bena kahina thathukuma. 23Haliko Masaala Fanda ntuŋ woŋ mɛnɛ Mariki woŋ Yisɔs Kraist dunkuna mathɛbɛ, mathimo, mɛnɛ lanɛya ka mbɛnda ntuŋ beŋ. 24Haliko makutiyɛ ma ka Masaala maŋ ma niyɔ iŋ biya fooma bi thimo Mariki ntuŋ woŋ Yisɔs Kraist na mathimo ma sa thanki maŋ.

will be added

X\