biƐfɛsɔsi beŋ 4

1Huna, yaŋ Pɔli, wo thiyo ka yeeli ba na yaŋ niyiyɛ Mariki woŋ wali, yaŋ theteke bena ba beŋ niyɔ nɔŋ biya bi thiyi Masaala ba nɛŋ bindɛ niyiye. 2Niyɔŋ bendo thathinɔkɔy lɔkɔiŋ fooma awa baŋ niyɔ biya bi ŋatinɔkɔy. Tɔŋinaŋ thimiyande ndeŋ haŋ maŋaye ka niyande ndeŋ muyuŋ haŋ. 3Yɔlaŋ ti punke beŋ ba kaa ka kɔtɔkɔy bohinande hu bohinande bena Yina wo ka Masaala woŋ haŋ, maŋaye ka mathɛbɛ ma bohinande bena ka tha banthe maŋ. 4Kɔtɔ kunthe kuna miŋ fooma, awa Yina wo ka Masaala wunthe napethi ndɛ na kɛndɛ, nɔŋ na kahe nthɔŋ beŋ fooma ntha kinthe kibɛina thukuma na, ki ni nde Masaala lahiri ba bena dunkune kiŋ naa thiyi ndɛ bena. 5Mariki wunthe na iŋ miŋ, wɔ wunthe na niye miŋ lanɛya, awa biyo hunthe hu ka Masaala huna iŋ miŋ. 6Masaala wunthe na iŋ miŋ, awa ndɛ na Fanda ka biyamɛti fooma. Wundɛ na Mariki wo ka biyamɛti fooma, ndɛ kɔŋ mina niye wali fooma, awa ndɛ kiŋ mina kaake fooma. 7Kɛrɛ wɔ yo wɔ ka miŋ dunkuno munkii muthɔɔkɔ mu thubuto iŋ Kraist wo muŋ dunkuŋ woŋ. 8Nɔŋ na tepe magbali ma ka Masaala maŋ na, na “Naa ŋate ndɛ ka thinthi-ka thinthi ka, ndɛ diŋe ka kaa biya bi boho ka kuyombo bibɔyɛ; e ndɛ dunkune biyamɛti munkii.” 9Ka tete, mbɛ mu miŋ dɔŋ, “ndɛ ŋate ka thinthi-ka thinthi”? Wuŋ thɔyande ba dɔma ndɛ yenke saa ka pothi-ka pothi ka faido. 10Huna, ndɛ wo thuhɛ ka pothi-ka pothi woŋ, ndɛ wunthe wobɛina na ŋatɛ ka thinthi-ka thinthi e daŋande arianɛŋ beŋ e kaa ka Masaala ka, haliko ba kuntheeke kamo kama. 11Wundɛ wunthe wobɛina na “dunkunɛ munkii ka biyamɛti.” Munkii mubɛina muna muŋ muŋ baŋ: biya binɔndi baseriŋ bithɔɔkɔ, binɔndi banabiŋ, binɔndi ba kaa kaŋ niya kɛwandi Huseri Huyɔhɔy haŋ, awa binɔndi ba dethiteke biya bi ka Masaala beŋ mɛnɛ ba bindɛ thaninuwa. 12Wundɛ ni wuŋ baŋ haliko ba kɔsinɔkɔ biya bi ka Masaala beŋ ba niya wali bakɛnama baŋ, mɛnɛ ba bukuyina kɔtɔ ku ka Kraist koŋ. 13Wuna miŋ fooma see ka tha banthe ka lanɛya ntuŋ banthe babɛina iŋ kɔthɔ ntuŋ Hati wo ka Masaala woŋ haŋ. Miŋ kɔŋ niyɔ kalani bi thiyɛ thathukuma e miŋ doŋe nanthe iŋ Kraist ka kusaŋa. 14Wuna sa nɔŋ nda miŋ niyɔ nɔŋ mpatiyɛŋ bi katitoko iŋ thamunkulu tha gbantando iŋ huru hu hɔŋ namo nama haŋ. Huru hubɛina huna mathanani ma ka biya bi thɔkɔŋ biya beŋ e bindɛ kɔ kata biya ka bindɛ niye hakɛ ka ŋakɔɔthani ŋa bindɛ ni ŋaŋ. 15Mɛnɛ miŋ gbonkoy nɔndi baŋ e miŋ thimiyande, miŋ kɔŋ niyɔ kalani bi thiyɛ thathukuma ba kɔthɔ bɛyniŋ fooma nɔŋ na Kraist na, wo bayaha woŋ ka kɔtɔ koŋ. 16Ka kɛriŋa nama haŋ, kɛna sɔkuwande ŋafɛŋ ŋahakuwande ŋa ka kɔtɔ koŋ ŋaŋ fooma ka tha banthe. Awa kɔtɔ kubunthu koŋ bohinando ka tha banthe maŋaye ka masɔkuwande yo masɔkuwande ma ka kɔtɔ koŋ maŋ. Huna, naa kufɛŋ ndo kufɛŋ ni wali nɔŋ na kuŋ ba niye wali, kɔtɔ kubunthu koŋ ku kɔŋ kutu kusaŋa e kuŋ bukuya maŋaye ka mathimo. 17Huna, ka keŋ ku ka Mariki woŋ koŋ, yaŋ tepe bena ba bena yela, baŋ nda niyɔ nɔŋ biya bi be kɔthɔ Masaala na beŋ, bi masiyi namɛŋ mamayɛini maŋ, 18bi haaŋ hɛ bi kiŋ ka huntuma haŋ ba thana hakiyando bɛy yo bɛy. Bindɛ ka iŋ kufɛŋ ka sii ba Masaala dunkuŋ baŋ, baa ŋanapi namɛŋ ŋaŋ ni ba bindɛ thana hakiyando bɛy yo bɛy. 19Bindɛ ka nda iŋ kuyaahu hali, awa bindɛ thanki dɛŋɔkɔ gbai. Lɔkɔiŋ fooma bi thimoŋ ba niya bɛyniŋ baŋayaahu. 20Nɛŋ kutɛ thanuwe nde beŋ ba Kraist. 21Beŋ thanki nde yuyɛ ba wundɛ, awa beŋ, nɔŋ biya bi niŋ yeŋ, beŋ thanki nde thaninuwo nɔndi ba kuto ka Yisɔs baŋ. 22Baŋinɔkɔŋ maniyɔ ndeŋ ma ka huwɔmɛtiya haŋ matiyɔ maŋ, ma niyɛ nde bena ba beŋ niyɔ nɔŋ na nde beŋ na, maniyɔ matiyɔ ma teetuwo iŋ ŋafiyoiŋ ŋathɔkɔŋ ŋaŋ. 23Yɔkɔŋ thathukuma mɛnɛ masiyini ndeŋ maŋ niyo muŋama. 24Niyɔŋ iŋ maniyɔ maŋama ma yehinuwo ka mathɔyande ma ka Masaala maŋ, ma tɔŋinɔkɔ maŋ ka sii baseŋa, bathumbɛ, iŋ bamɛthɛ baŋ. 25Pɛyaŋ kɛriŋa hothi haŋ! Womo woma ka beŋ gbonkiyɛŋ nɔndi baŋ ka wɛndama wo bindɛ ka lanɛya baŋ, baa biya binthe bina miŋ fooma ka kɔtɔ ku ka Kraist koŋ. 26Mɛnɛ wɔ wunthe ka beŋ thɔɔyɛ ka mathoŋ, ndɛ bɛiŋ ni ba mathoŋ mabɛina niŋ niya ba ndɛ niya hakɛ; awa ndɛ bɛiŋ yiŋ iŋ mathoŋ mabɛina. 27Wɔ bɛina bɛiŋ dunkune Sithani na, Wayi Womandiŋ woŋ, hɛɛra ba niya wali nama baŋ. 28Yindo barɛ ba tuwe woŋ, pɛya ba tuwe haŋ awa bɔha ba niya wali bayɔhɔy iŋ thɛnkɔ thakɛnda thaŋ, haliko yi be punku ba mase bamɔnɛŋ beŋ. 29Baŋ gbonkoy thasɔkɔiŋ tha thoŋ wɔ. Kɛrɛ gbonkiyaŋ thasɔkɔiŋ tha ni wɔ kuthɔnthɔ ba niya bayɔhɔy, thasɔkɔiŋ tha sisande ka lɔkɔ baŋ baŋ, wuna thasɔkɔiŋ tha beŋ tɛpi thaŋ ni bayɔhɔy ka bi bena poniyɛ kuiha beŋ. 30Baŋ ni ba Yina wo ka Masaala woŋ ŋura, baa Yina nama woŋ na thɛnkɛi ba tɔŋɔŋ ba Masaala bena biyɔ. Yina nama woŋ na kahitinɛ ba dɔma na lɔkɔ ba kɔŋ nɔŋ see, Masaala kɔŋ bena bakaŋ. 31Pɛyaŋ kɔsina mathoni maŋ ba bintɔni ndeŋ, baŋ tɔɔki thukuma, baŋ thɔɔ ka mathoŋ. Pɛyaŋ bɛnda ka gbonkiya haŋ maa mayakiŋ maŋ. Pɛyaŋ thambiyande haŋ. 32Kɛrɛ niyɔŋ bendo niyande bayɔhɔy iŋ thathukuma tha ba niya bayɔhɔy. Pɛniyandeŋ banɛnɔy bakendeŋ baŋ nɔŋ na pɛniyɛ bena Masaala na saathɛ ba Kraist.

will be added

X\