biƐfɛsɔsi beŋ 3

1Ba saabu baŋ baŋ, yaŋ, Pɔli, yaŋ ni kuraminɛ ba bendo biya bi ka siyani bahɛna baŋ beŋ. Kraist Yisɔs ni ba yaŋ niyɔ dondo baŋ ka yeeli woŋ saathɛ ba kendeŋ. 2Yaŋ niyeŋ lanɛya ba dɔma na beŋ yuye ba Masaala dunkune yama wali ba ka sisiyɛ bena makutiyɛ nama maŋ. 3Masaala toŋine nde yama madɛɛnki nama magbundu maŋ awa ndɛ ni ba yaŋ mɛŋ metho. Yaŋ thanki nda bena gbalita wuyete ba mɛŋ, 4awa naa beŋ ni wuŋ karaŋ beŋ kɔŋ punku kuta makɔthɔ makiyaŋ maŋ ba madɛɛnki magbundu ma ka Kraist maŋ. 5Ka malɔkɔ ma thankɛ daŋande maŋ biya tha nde metho gbundu baŋ baŋ, kɛrɛ ka tete Masaala thanki niye Yina nama woŋ wali ba tɔŋina bɛŋ ka baseriŋ bithɔɔkɔ mɛnɛ banabiŋ nama bithɔɔkɔ beŋ. 6Gbundu baŋ bɛna ba Masaala niye wali Huseri Huyɔhɔy haŋ ba dunkune biya bi ka siyani bahɛna baŋ beŋ kufɛŋ ka thaduba nama thaŋ ka nanthe iŋ biYusu beŋ. Bindɛ fooma tikitande ka kɔtɔ kunthe; bi kɔŋ kutu ka nanthe lahiri ba ni nde Masaala baŋ saathɛ ba bɔhande hu ka wɔ haŋ iŋ Kraist Yisɔs. 7Masaala niye nde wali munkii mu ka makutiyɛ nama maŋ muŋ ba yaŋ niyo bawali wo ka Huseri Huyɔhɔy haŋ. Ndɛ dunkune yama munkii muŋ muŋ baŋ maŋaye ka wali ba ka sɛmbɛ nama baŋ. 8Yama yamɛ nthɔŋ nda niyɔ ka pothi woŋ ka biya bi ka Masaala beŋ fooma, kɛrɛ ndɛ kutiye yama awa e ndɛ dunkune yama wali ba ka niya siyani bahɛna baŋ kɛwandi huseri hu ka bɛyniŋ ba ka Kraist ba nɔŋ hudinhaŋiya hu sa wɔmɛti punku ba metho, 9awa ba ni ba biyamɛti fooma kuta na Masaala niye wali madɛɛnki nama magbundu maŋ. Masaala, wo yehinuwɛ bɛyniŋ fooma woŋ, kɔsɔŋ nde gbundu nama baŋ ka malɔkɔ madaŋande maŋ, 10haliko, ka tete, ndɛ be niye wali biya nama beŋ ba tɔŋina kele nama humandiŋ haŋ ka malekɛŋ bi kɛrɛŋ mɛnɛ bi iŋ sɛmbɛŋ ka ariana beŋ. 11Masaala ni nde wuŋ baŋ maŋaye ka madɛɛnki nama ma kɔy o kɔy maŋ, ma ndɛ kati ka kɔtɔkɔy ka Kraist Yisɔs, Mariki ntuŋ woŋ. 12Baa na bɔhande nda miŋ iŋ wundɛ, maŋaye ka niya niŋ lanɛya haŋ, miŋ kute mayoho ba biyande ka kupɛnkintiyande ku ka Masaala koŋ iŋ kaha thukuma. 13Huna yaŋ theteke bena, baŋ teetuwɔ thathukuma ba na yaŋ niyɔ thɔrɔ ba beŋ; ba wuyɔhɔy wukendeŋ bɛna fooma. 14Ba saabu baŋ baŋ, huna yaŋ kunthuŋe ka kɔtɔkɔy ka Fanda ntuŋ woŋ ba niya kuraminɛ, 15wo ka kubɔri yo kubɔri ku ka ariana mɛnɛ ka faido gbanthinto kɛ. 16Yaŋ theteke Masaala na, ŋaye ka yiki nama bamandiŋ baŋ, haliko ndɛ be bena dunkune sɛmbɛ beŋ be kahi thathukuma ba kahita ka mathumbɛ maŋ maŋaye ka Yina nama woŋ, 17awa wuna Kraist ni yikiya ka thathukuma ndeŋ thaŋ ba na ni beŋ niŋ lanɛya. Yaŋ ni kuraminɛ ba beŋ lɔɔpa nthanthɛŋ ka thimiyande ndeŋ haŋ awa beŋ kahita wukahɛ-kahɛ ka thimiyande hubɛina, 18wuna beŋ iŋ biya bi ka Masaala beŋ fooma kutu sɛmbɛ ba punka metho ti peye ŋarina, thɔkiyande, thɔɔkuwa, mɛnɛ suŋɔ mathimo ma ka Kraist maŋ ba miŋ. 19Haliko beŋ be kɔthɔ mathimo nama maŋ, hali na sa mɛŋ punku thanka kothiyo na, wuna beŋ niyɔ bithankinuwɛ nɔŋ Masaala. 20Haliko Masaala, wo punku niya bɛyniŋ ba yamɛ ba ba thɔnthɔŋɔŋ miŋ niŋ baŋ, maa ba be hintiŋ nthɔŋ miŋ siyi baŋ, maŋaye ka sɛmbɛ ba ni wali ka siini ntuŋ baŋ, 21haliko ndɛ niyo yiki bamandiŋ ka makɔmande ma ka biya bikɛnama beŋ mɛnɛ ka Kraist Yisɔs, lɔkɔiŋ fooma, kɔy o kɔy. Amiina.

will be added

X\