biƐfɛsɔsi beŋ 2

1Ka malɔkɔiŋ ma thankɛ daŋande maŋ, Masaala kɔŋ nde bena dethi nɔŋ biya bitukɛ bina beŋ saathɛ ba thana ndeŋ mɛya yamari haŋ iŋ hakɛŋ bakendeŋ baŋ. 2Ka lɔkɔ babɛina, beŋ kɔŋ nde yeŋ gboŋɛŋ banɛnɔy ba ka faido baŋ; bendo putiyɔy nde bakɛrɛŋ wo iŋ sɛmbɛ ka kufenaŋ koŋ woŋ, yina wo nda kɛriŋiyɛ biya bi tha putiyɔ Masaala na beŋ. 3Miŋ hɛlɛŋ fooma miŋ thanki nde niyɔ nɔŋ bindɛ malɔkɔ manthe, e miŋ nde kɔ thiŋina ŋafiyoiŋ ŋanɛnɔy ŋa ka huwɔmɛtiya haŋ ŋaŋ, e miŋ nde kɔ niya bɛy yo bɛy ba thimo ŋakɔtɔ ntuŋ ŋaŋ mɛnɛ masiyini ntuŋ maŋ. Huna, maŋaye ka huwɔmɛtiya ntuŋ haŋ, miŋ hɛlɛŋ nɛŋ gbeeŋ, mathoŋ ma ka Masaala maŋ tutɔy nde mina nɔŋ biya bihɛna beŋ. 4Kɛrɛ nkinikiniŋ ki ka Masaala kiŋ aboy, awa ndɛ athimo mina wumandiŋ, 5wuna biyɛ naa nde miŋ bitukɛ ba thana ntuŋ mɛya yamari haŋ, ndɛ niye Kraist na wali ba miŋ niyɔ iŋ sii. Ka makutiyɛ ma ka Masaala maŋ kɛna niyo beŋ kisi. 6Ka bɔhande ntuŋ haŋ iŋ Kraist Yisɔs, Masaala ŋataŋ mina ka thinthi iŋ Kraist ba kɛriŋa iŋ wundɛ ka ariana. 7Masaala ni wuŋ baŋ haliko ba tɔŋina, ka lɔkɔiŋ fooma ba nɔŋ see baŋ, ti peye makutiyɛ nama mamandiŋ maŋ ma toŋine ndɛ mina maŋ ka thimo mina haŋ maŋaye ka Kraist Yisɔs. 8Ka makutiyɛ ma ka Masaala maŋ kɛna niyo beŋ kisi, maŋaye ka niya ndeŋ lanɛya haŋ. Wuŋ ka ka bɛy ba thanki beŋ niya baŋ, kɛrɛ munkii mu ka Masaala muna. 9Bɛyi yo bɛy ka dondo baŋ ba miŋ gbuŋuneke, baa yɔlɔkɔ hukɛntuŋ kutɛ niyɛ mina kisi. 10Masaala na yehinuwɛ mina. Ka bɔhande ntuŋ haŋ ka tha banthe iŋ Kraist Yisɔs, ndɛ yeheni mina wuna miŋ ni bɛyniŋ bayɔhɔy, ba thanki nde ndɛ dɛɛnka ba miŋ niya baŋ. 11Beŋ mpoo nde ka siyani bahɛna baŋ, bi dɔma iŋ biYusu beŋ, na “biya bi be thiyɔ ka bintɔni namɛŋ beŋ.” BiYusu bi dɔmɔkɔ beŋ, na “Miŋ, mina biya bi thiyɔy ka bintɔni ntuŋ beŋ.” Ba thiyo ka bintɔni nda, bɛy bɛna ba wɔmɛti hɔkɔŋ ni. Siyuwaŋ na nde beŋ mayoŋ nde. 12Ka lɔkɔ babɛina beŋ athɔkiyande nde iŋ Kraist. Thahinɛŋ bina nde beŋ, awa beŋ ka nde ka biya bi yɛthi nde Masaala beŋ. Beŋ ka nde iŋ kufɛŋ ka mayukunandeŋ ma Masaala dunkune lahiri baŋ ka biya nama beŋ. Beŋ kiŋ nde ka faido wu ka iŋ ka beŋ kahe thukuma, wu ka iŋ Masaala. 13Kɛrɛ ka tete, ka bɔhande ndeŋ haŋ iŋ Kraist Yisɔs, bendo nde wuthokiye beŋ thurintiyo maŋaye ka tuka hu ka Kraist haŋ. 14Ba Kraist, ka yɛthɛ nama gbeeŋ, ndɛ na sisɛ mathɛbɛ, maŋaye ka niya biya bi ka siyani bahɛna baŋ mɛnɛ biYusu beŋ biya binthe. Ndɛ na thinkɛ thatha ba hakinande nde bindɛ baŋ e bindɛ niyɔ bithayande. 15Kraist thɔnkɔŋ Siraŋ ba ka biYusu beŋ baŋ, mɛnɛ yamariŋ iŋ thɔni babɛina, haliko ba yehinuwa siyani babaye baŋ siya banthe baŋama ka bɔhande iŋ wundɛ haŋ. Ka gboŋa baŋ baŋ, kɛna ndɛ thiye mathɛbɛ. 16Maŋaye ka tuka nama ka kuyeŋ kubariŋande koŋ haŋ, Kraist teeti thayande haŋ; maŋaye ka kuyeŋ kubariŋande koŋ, ndɛ bohinande siyani babaye baŋ kɔtɔ kunthe e ndɛ bindɛ sisa hɛlɛŋ ka Masaala. 17Huna, Kraist see e ndɛ si niya kɛwandi Huseri Huyɔhɔy hu ka mathɛbɛ maŋ haŋ ka bendo biya bi ka siyani bahɛna baŋ bi thokiye nde Masaala na beŋ, mɛnɛ ka biYusu bi thuriye nde Masaala na beŋ. 18Saathɛ ba Kraist, kɛna punke miŋ fooma ba kaa ka kupɛnkintiyande ku ka Masaala koŋ maŋaye ka Yina nama wunthe woŋ napethi. 19Huna, bendo biya bi ka siyani bahɛna baŋ beŋ, beŋ ka nda thahinɛŋ maa biya bi sɛɛ; beŋ kiŋ nda lasiriŋ iŋ biya bi ka Masaala beŋ, awa beŋ tikitande nda iŋ kubɔri ku ka Masaala koŋ. 20Beŋ athɔyande iŋ banka ba thoyo tharaka, ba thoyo ka thinthi ka kudɛɛnkɛti ku deŋe nde baseriŋ bithɔɔkɔ beŋ koŋ mɛnɛ banabiŋ beŋ. Kraist Yisɔs gbeeŋ ndɛ na thɔyande iŋ raka humayoŋ humandiŋ hu dɛŋa ka doŋ haŋ. 21Wundɛ na bohinande banka babunthu baŋ ka tha banthe e ndɛ niya ba bɛŋ bukuya, e bɛŋ niyɔ banka bathɔɔkɔ ba niye Mariki woŋ kubatho. 22Ka bɔhande ndeŋ haŋ iŋ Kraist, beŋ hɛlɛŋ nɛŋ gbeeŋ, beŋ thoyitando iŋ biya bihɛna beŋ fooma ka banka ba Masaala niye yikiya baŋ maŋaye ka Yina nama woŋ.

will be added

X\