biKalasi beŋ 2

1Yaŋ thimoŋ ba beŋ kɔthɔ nɔŋ na niye yaŋ wali wukahɛ-kahɛ ba beŋ mɛnɛ ba biya bi ka mɛti ba ka Leyodisiya iŋ ba biya bihɛna bi be yama kɔthɔ beŋ. 2Yaŋ ni wuŋ haliko beŋ fooma beŋ be niyɔ iŋ kukahe thukuma e beŋ bɔhande baa beŋ thimiyande. Ka gboŋa babɛina beŋ kɔŋ niyɔ iŋ kukahe thukuma kutɛŋɛ baa beŋ metho nɔndi baŋ ba Masaala. Ka niya nɛŋ beŋ kɔŋ kɔthɔ gbundu ba ka Masaala baŋ, bɛna Kraist. 3Wundɛ na tɔŋinɛ kele mɛnɛ kɔthɔ hu ka Masaala haŋ, mu thɔyande muŋ nɔŋ munki mukahɛ mɔlɔŋ mu ŋayanti wundɛ biyamɛti fooma. 4Yaŋ tepe bena ba beŋ thana mɛya ba wɔ yo wɔ thɔkina bena kaŋ tepe bena thahothi, hali ayɔhɔy na thɛŋ ka yuyɛ. 5Hali yaŋ thanaŋ kɛndɛ penkitiye, kɔthɔŋ ba dɔma na yando siyi ba beŋ. Wuŋ ayehe yama ba kuta beŋ bɔhande wukahɛ-kahɛ e beŋ kɔɔ ka tha banthe ka lanɛya ndeŋ baŋ ka Kraist. 6Niyɔŋ nda nɔŋ biya bi bɔhande iŋ Kraist Yisɔs, baa beŋ thanki nda niŋ yɛrɔkɔ nɔŋ Mariki wokendeŋ. 7Lɔpaŋ nthanthɛŋ ndeŋ kiŋ wukahɛ ka Kraist, e beŋ kɔɔ wukahɛ kɛnama, wuna beŋ niŋ yaŋ piteke, nɔŋ na thanki beŋ thaninuwo na. Niyɔŋ biya bi thiyi Masaala na maamo timo tima. 8Baŋ mɛkɛŋ ba wɔ yo wɔ bena niya mbaayiŋ maŋaye ka masiyi ma biya siyi ma sa mase biya kɛrɛ ba thokine biya. Masiyi mabɛina maŋ maŋ siiya mɛŋ tha ŋaye ka Kraist; mɛŋ ŋaye ka mathanani ma ka mbembɛŋ beŋ maŋ, awa mɛŋ ŋaye ka mbayiŋ bi simoko ba bindɛ kɔ kɛriŋa ka kuthahinɛ koŋ. 9Kraist kiŋ nɔŋ na nthɔŋ Masaala na awa wundɛ see niyɔ ka faydo nɔŋ wɔmɛti. 10Masaala dunkune bena sii ba sa panki ntha yo ntha ka bɔhande ndeŋ haŋ iŋ Kraist, wo yamɛ ba mbayiŋ beŋ fooma bi kɛrɛŋ beŋ e bindɛ niyɔ iŋ sɛmbɛŋ. 11Kraist thiye bena ka bintɔni ndeŋ ka gboŋa baŋama awa bathɔɔkɔ baa beŋ bɔhande iŋ wundɛ. Beŋ tha thiya ka bintɔni ndeŋ nɔŋ na biyamɛti thiyo na. Beŋ peyo ka yɛthɛ bakendeŋ maŋaye ka sɛmbɛ ba ka hakɛ ba ka thathukuma ndeŋ thaŋ baŋ. Wuŋ baŋ wuna thiyɛ bena ka bintɔni ndeŋ ka gboŋa baŋama. 12Wuŋ thɔyande nɔŋ ka mankitando beŋ iŋ Kraist, baa na biyo beŋ biye hu ka Masaala haŋ. Ka biyo biye hu ka Masaala haŋ, beŋ ŋayino iŋ Kraist maŋaye ka tuka haŋ baa beŋ ni lanɛya ka sɛmbɛ ba ka Masaala baŋ, wo ŋayinɛ Kraist na ka tuka haŋ woŋ. 13Malɔkɔ thanki daŋande, beŋ kathiŋo nde ka biya bi ka Masaala beŋ baa beŋ thiyɔyta nde ka bintɔni ndeŋ nɔŋ na biYusu beŋ na. Hakɛŋ bakendeŋ baŋ ni bena nɔŋ biya bitukɛ, kɛrɛ Masaala dunkune bena sii nɔŋ na ni wundɛ Kraist na na. Wundɛ pɛniyɛ mina fooma hakɛŋ ntuŋ baŋ. 14Wundɛ puuthu magbali ma tɔŋinɛ ti miŋ ba thunkuna ba hakɛŋ ntuŋ baŋ iŋ magbali ma tɔŋinɛ ti kugbasaŋati kubɛina ba niyiye. Wundɛ ni ba bɛŋ thana nda niyɔ iŋ sɛmbɛ ka lɔŋa bɛŋ ka kuyeŋ kubariŋande koŋ ka koro Kraist ka. 15Ka kuyeŋ kubariŋande koŋ koŋ baŋ, Kraist kane sɛmbɛ ba ka mbayiŋ bi kɛrɛŋ beŋ. Wundɛ ni ba wɔ o wɔ kuta bindɛ naa bindɛ niŋ yeŋ kahɛŋ biyukɔy thɛnkɔ ba tɔŋina ba wundɛ punka bindɛ. 16Wuna wɔ yo wɔ bɛŋ bena dɛŋiyɛ sirani ba mu beŋ thɔŋ maa ba mu beŋ thiiye, maa ba malɔkɔiŋ ma ka nina haŋ ma deŋe biya ba niye kubatho, maa ba bɛyiniŋ ba biya ni ka malɔkɔ ma ka sɛnkɛ woŋama woŋ maŋ, maa ba malɔkɔ ma ka hɛmuwa haŋ maŋ. 17Bɛyiniŋ baŋ baŋ fooma ba kiŋ nɔŋ sumuiŋ ba bɛyiniŋ ba manke niyɔ baŋ. Kraist na gbeeŋ baŋ. 18Wɔ yo thimo ba niyɔkɔ woŋ nɔŋ wɔ thathinɔkɔy na wundɛ, e wundɛ thimo ba niya malekɛŋ kubatho, wundɛ bɛŋ mɛkina ba bena tuuta kuthunkuŋ ndeŋ koŋ. Wɔ bɛina woŋ siiya kɔŋ dɔŋ ba wundɛ niyɔ wɔ waŋ, baa wundɛ kute bɛyiniŋ ba ka Masaala baŋ ka maniyɔ mathɔɔkɔ nɔŋ mandɛ. Wundɛ kɔŋ ŋatinɔkɔ kaŋ bukuinɔkɔ ka siyuwa nama ka huwɔmɛtiya haŋ, kɛrɛ mahɛŋ mabɛina wundɛ ka ntha kiwaŋ. 19Wɔ bɛina woŋ siiya wundɛ piteketa nda Kraist na, wo yaha haŋ woŋ ka biya bi ka Masaala beŋ, bi thɔyande iŋ kɔtɔ nama koŋ. Kɔtɔ koŋ koŋ baŋ ku kiŋ ka pothi ka makɛrɛŋ ma ka Kraist maŋ. Wundɛ kɔŋ kuŋ thɛriyɛ awa kɛna bohiniyando kuŋ ka tha banthe e kuŋ kuta kusaŋa nɔŋ na thimo kuŋ Masaala na. 20Beŋ thanki nda tuka iŋ Kraist e beŋ nda peyo ka yɛthɛ bakendeŋ ka makɛrɛŋ ma ka mbayiŋ bi simoko ba bindɛ kɔ kɛriŋa ka kuthahinɛ koŋ. Mbɛ ba beŋ niye nɔŋ biya bi ka faydo beŋ? Mbɛ ba beŋ putiye sirani babɛina nɔŋ baŋ baŋ: 21Baŋ boheke muthɔma muŋ muŋ baŋ; baŋ miŋ muthɔma muŋ muŋ baŋ; baŋ hintiŋ nthɔŋ sɛkɛthi muthɔma muhɛna muŋ. 22Sirani baŋ baŋ fooma ba kiŋ ba munki mu teetuwɔ naa muŋ thanki thomo; wɔmɛti na dɛŋɛ sirani baŋ baŋ mɛnɛ mathanani maŋ maŋ. 23Huseŋa huna ba dɔma na biya bibɔyɛ siyi ba dɔma na sirani baŋ baŋ deŋo iŋ biya bikele. Bɛŋ tepe biya ba niya malekɛŋ kubatho, ba tɔŋinɔkɔ ka biya bihɛna na bithathinɔkɔy bina bindɛ, mɛnɛ ba niya ŋakɔtɔ namɛŋ ŋaŋ thɔrɔ. Kɛrɛ bɛŋ tha mase ba kɛriŋiyɛ ŋafiyo ŋanɛnɔy ŋa ka ŋakɔtɔ namɛŋ ŋaŋ.

will be added

X\