biKalasi beŋ 1

1Kuthagba koŋ koŋ baŋ ŋaye kiyaŋ, yaŋ Pɔli. Kraist Yisɔs na yɛthɛ yama ba niyɔ baseri wothɔɔkɔ maŋaye ka madɛɛnki ma ka Masaala maŋ. Wɛnda ntuŋ Timothi thɔɔtɔy hɛlɛŋ yama ka gbala kuthagba koŋ koŋ baŋ kendeŋ. 2Yaŋ kɔŋ gbali kuthagba koŋ koŋ baŋ ka bi biiyo iŋ Masaala beŋ ka mɛti ba ka Kalasi. Beŋ dunkunɔkɔy ka Masaala awa beŋ niyɔy nda nɔŋ mbɛnda ntuŋ, baa beŋ thɔɔtɔy nda ka mabohinande maŋ iŋ Kraist. Haliko Masaala wo Fanda ntuŋ woŋ toŋine bena mathimo e ndɛ bena dunkune thɛbina thukuma. 3Naa miŋ kɔ ni kuraminɛ ba beŋ, timo tima mindo thiyi Masaala na maamo, Masaala wo Fanda ka Mariki wokɛntuŋ woŋ Yisɔs Kraist. 4Miŋ thiyi Masaala na maamo ba na yuye miŋ ba lanɛya ndeŋ baŋ ka Kraist Yisɔs iŋ na thimo beŋ fooma biya bi ka Masaala beŋ. 5Lɔkɔ bamayoŋ ba tepo beŋ huseri huseŋa haŋ, Huseri Huyɔhɔy haŋ, beŋ yuye ba matute thukuma ma huŋ dunkuŋ maŋ. Mutute beŋ thukuma muŋ ni ba beŋ niya Kraist na lanɛya e beŋ thimo biya bi ka Masaala beŋ. Masaala kɔsiniyɛ bena mutute beŋ thukuma muŋ ka ariana. 6Huseri Huyɔhɔy haŋ hu kɔŋ key ka kɔtɔkɔy thuŋ ba sisa thaduba ka biyamɛti iŋ ba gbanthande ka fay woŋ fooma, nɔŋ na wuŋ ka mateete ndeŋ maŋ there ka malɔkɔ mamayoŋ ma yuye beŋ ba makutiyɛ ma ka Masaala maŋ e beŋ mɛŋ kutɔkɔ ka thathukuma thakendeŋ thaŋ. 7Beŋ thani ba makutiyɛ ma ka Masaala maŋ maŋaye ka Ɛpafarasi, wo thimo miŋ woŋ e ndɛ niya wali ka tha banthe iŋ miŋ. Miŋ piteke niŋ awa e miŋ niŋ ŋinda kendeŋ ka nɔŋ bamase ka wali ba ka Kraist baŋ. 8Ndɛ tepe mina nɔŋ na ni bena Yina wo ka Masaala woŋ ba beŋ thimo bintɔni ndeŋ bi beŋ ka lanɛya baŋ. 9Saabu baŋ baŋ miŋ key ka kɔtɔkɔy thuŋ ba bena niyiyɛ kuraminɛ, kabi naa yuye miŋ ba beŋ. Miŋ thɔnthɔŋɔŋ Masaala na ba beŋ kɔthɔ madɛɛnki nama maŋ ba beŋ. Miŋ thimoŋ ba Yina nama woŋ bena dunkune kele e ndɛ niya ba beŋ metho bɛy yo bɛy ba thimo Masaala ba beŋ niya baŋ. 10Wuna beŋ punku niya bɛyiniŋ ba sisi yiki ka Mariki ndeŋ woŋ, awa e beŋ niŋ yehinuwa thukuma. Bɛyniŋ bayɔhɔy ba beŋ ni baŋ ba kɔŋ niyɔ nɔŋ mutiŋ muyɔhɔy, awa siini ndeŋ baŋ ba kɔŋ niyɔ nɔŋ ŋayeŋ ŋa timɛ mutiŋ muŋ muŋ ŋaŋ. Awa beŋ kɔŋ yaŋ kɔthɔ Masaala na. 11Masaala kɔŋ ni ba beŋ punka niya muyuŋ bɛyiniŋ baŋ baŋ fooma. Sɛmbɛ nama bathakaba baŋ ba kɔŋ ni ba beŋ punka niya muyuŋ. Yehitɔkɔŋ e beŋ thiya Masaala wo Fanda ntuŋ woŋ maamo ba sɛmbɛ baŋ baŋ. Ndɛ ni ba beŋ niyɔ bitɛŋɛ ba niyɔ iŋ kufɛŋ ka kɛɛ ba kɔsinɔkɔy ndɛ baŋ ba biya nama beŋ ka hugbakine hu ka waŋ baŋ haŋ. 13Wundɛ ni mina kisi ka sɛmbɛ ba ka hugbakine hu ka huntuma haŋ e sisa mina wuthɛbinɛ thukuma ka hugbakine hu ka Hati nama woŋ, wo thimo wundɛ woŋ. 14Hati nama woŋ bakaŋ mina naa pɛniyɛ ndɛ mina hakɛŋ ntuŋ baŋ. 15Kraist wo kutiyɔkɔi miŋ woŋ na mathɔyande ma ka Masaala wo sa miŋ kutiyɔkɔ woŋ. Wundɛ na Hati wowathe wo ka Masaala womayoŋ, baa ndɛ na yamɛ ba ntha yo ntha ki yehinuwo. 16Ka yɔnkɔ nama Masaala yeheni ntha yo ntha ki ka ariana mɛnɛ ki ka faydo, ki kuta mɛnɛ ki sa kutiyoko, thiyitaŋ mbayiŋ bi iŋ sɛmbɛŋ, bi marikiŋ, bi bakɛrɛni, mɛnɛ bayahɛŋ. Masaala yeheni ntha yo ntha ka yɔnkɔ nama iŋ ba wundɛ. 17Kraist yenke nda niyɔ saanuŋ ntha yo ntha ba niyɔ, awa wundɛ na bohinande ntha yo ntha. 18Wundɛ na yaha haŋ ka makɔmande ma ka biya bi ka Masaala beŋ, ma thɔyande iŋ kɔtɔ kukɛnama koŋ maŋ. Wundɛ ni ba kɔtɔ koŋ koŋ baŋ niyɔ. Wundɛ na Hati wowathe wo ka Masaala womayoŋ, wo ŋayino ka tuka haŋ woŋ, wuna wundɛ wuntheŋ napethi wundɛ na kɛriŋiyɛ ntha yo ntha. 19Wundɛ Masaala ka yɛthɛ nama baŋ gbeeŋ wundɛ na dɛɛnkɛ ba Hati nama woŋ niyɔ na nthɔŋ wundɛ na. 20Ka yɔnkɔ hu ka Hati nama woŋ haŋ, Masaala dɛɛnki hɛlɛŋ ba sisa ntha yo ntha ka yɛthɛ nama. Masaala sisi mathɛbɛ maŋaye ka tuka hu ka Hati nama woŋ haŋ ka kuyeŋ kubariŋande koŋ. Ka gboŋa babɛina kɛna sise wundɛ hɛlɛŋ ntha yo ntha ka yɛthɛ nama ki ka faydo mɛnɛ ka ariana. 21Saanuŋ beŋ ba niya Kraist na lanɛya, bendo thokiye nde Masaala na e beŋ niyɔ hadeni nama, baa bendo nde ni bɛyiniŋ banɛnɔy e beŋ kɔ siyuwa wunɛnɔy. 22Kɛrɛ ka tete, maŋaye ka tuka hu ka kɔtɔ ku ka Hati nama woŋ koŋ, wuŋ yɔhɔy nda bena mateete iŋ Masaala. Masaala ni wuŋ haliko ba bena sisa kɛnama nɔŋ biya bikɛnama, bimɛthɛ, iŋ bi ka iŋ ka bindɛ boho thɛkɛ, ka kɔtɔkɔy kɛnama. 23Kɛrɛ beŋ kiŋ ba kaa ka kɔtɔkɔy iŋ lanɛya ba ka huseri haŋ baŋ iŋ makɔɔ makahɛ, e beŋ thana mɛya ba gbonino ka kukahe thukuma ku kute beŋ koŋ ka lɔkɔ ba yuye beŋ Huseri Huyɔhɔy haŋ. Yaŋ, Pɔli, niyɔy bawali wo ka huseri haŋ haŋ hu thankɛ tepo haŋ ka wɔ yo wɔ ka faydo. 24Yaŋ yehitɔkɔy ba na yaŋ niya nambara ba beŋ. Yando mase ba thankina nambarɛŋ ba ka thunkuteke haŋ baŋ nɔŋ na niyɔy nde nthɔŋ Kraist nambara na ba kɔtɔ nama koŋ, ku biya bi ka Masaala beŋ koŋ. 25Yaŋ see nda niyɔ bawali wo ka biya bi ka Masaala beŋ, wo dunkune yama wali baŋ baŋ woŋ ba niya, wali ba ka koyiŋa huseri nama haŋ wutɛŋɛ, haliko ba bena mase. 26Huseri haŋ huna gbundu ba ŋayanti wundɛ biyamɛti fooma ka malɔkɔiŋ madaŋande maŋ, kɛrɛ e ndɛ nda huŋ si toŋine biya nama beŋ. 27Masaala dɛɛnki ba tɔŋina gbundu nama baŋ ka biya nama beŋ, gbundu bamandiŋ ba bohe wundɛ ba biya fooma. Gbundu baŋ bɛna ba Kraist niyɔ kaake ka thathukuma thakendeŋ thaŋ, awa wundɛ kɔŋ ni ba beŋ tute thukuma ba Masaala bena kɔ dunkune hudinhaŋiya nama haŋ. 28Wuna biyɛ miŋ kɔ tɛpa ba Kraist ka wɔ yo wɔ. Maŋaye ka kele hu iŋ miŋ haŋ fooma, miŋ kɔŋ yeli e thaninuwa haliko na miŋ sise wɔ yo wɔ ka kupɛnkintiyande ku ka Masaala koŋ nɔŋ wɔ wotewɛ nda ka bohinande nama haŋ iŋ Kraist. 29Ka niya wali babɛina, yaŋ yɔlɔkɔy kaŋ dekiyɔkɔ iŋ sɛmbɛ bamandiŋ ba dunkune yama Kraist ba niye wali baŋ.

will be added

X\