Baseriŋ Bithɔɔkɔ beŋ 9

1Ka lɔkɔ babɛina gbeeŋ, Sɔli key ka kɔtɔkɔy kaŋ gbuŋa ba kɔɔruwa bakarandeni bi ka Mariki woŋ beŋ. Huna kaaye wundɛ ka Bafode Womandiŋ woŋ, 2e wundɛ niŋ ka thɔnthiŋina ba dunkuno ŋathagba ŋa niŋ ka tɔŋ kuna ka bankɛŋ bathuŋuyande baŋ ka mɛti ba ka Damasakɔsi baŋ. Huna mɛnɛ wundɛ kɔŋ kutu kɛndɛ biya bi yeŋ Gboŋa ba ka Mariki woŋ baŋ, wundɛ be kutu hɛɛra ba bindɛ boohuwa, biyɛthɛŋ beŋ ndo mɛnɛ yɛrɛmɛŋ beŋ, awa e ndɛ bindɛ diŋa ka kaa ka Yɛrusalɛmi. 3Naa bohe Sɔli thuriye ka Damasakɔsi, ka wuthurɔy wubɛina waŋ bamandiŋ maŋaye ka kuthahinɛ koŋ tɔŋinɔkɔy ka kooye wundɛ kɛ. 4Kɛna ŋɔti wundɛ ka kuyɛkɛŋ koŋ awa e yuyɛ thampa tha tɛpɛ kɛnama, na “Sɔli, Sɔli, mbɛ ba yi yama niye thɔrɔ?” 5Sɔli thɔnthɔŋɔŋ, na “Mbɛ yina, Mariki?” Thampa thaŋ tepe, na “Yama yaŋ Yisɔs, yando yi ni thɔrɔ woŋ. 6Kɛrɛ ŋaye ka kɔɔ, awa e yi kaa ka mɛti ka; kɛndɛ kɛna yi ka tepo ba bohe yi ba niya baŋ.” 7Biya bi nde iŋ Sɔli beŋ ka biyasi haŋ kɔɔyɛ nayeŋ, awa bindɛ tha gbonkoy sɔkɔ yo sɔkɔ, bindɛ yuye thampa thaŋ kɛrɛ bindɛ tha kutu wɔ yo wɔ. 8Sɔli ŋaye ka ŋɔti wundɛ kɛ e wundɛ mayina thaaya, kɛrɛ wundɛ tha kutu ntha yo ntha. Awa kɛna bohe bindɛ niŋ kugbeke e bindɛ niŋ kata ka Damasakɔsi ka. 9Hura kataati wundɛ punketa kuta. Ka lɔkɔ babɛina hɛlɛŋ nɛŋ wundɛ thiiyeta maa ba hintiŋ nthɔŋ thɔma ntha yo ntha. 10Bakarandeŋ wunthe kiŋ nde ka Damasakɔsi, keŋ nama koŋ kuna Ananaiyasi. Mariki woŋ tɔŋinɔkɔy niŋ ka maniyɔ mathɔɔkɔ nɔŋ mandɛ e tɛpa, na “Ananaiyasi!” Ananaiyasi mɛyi, na “Mariki, yama woŋ baŋ.” 11Mariki woŋ tepe kɛnama, na “Kɔsinɔkɔ e yi kaa ka gboŋa ba dɔma na Bathumbɛ baŋ, e yi ka thɔnthiŋina ka banka ba ka Yudasi baŋ ba hati lamgba wo ŋaye ka Tasɔsi woŋ, keŋ nama kuna Sɔli. Wundɛ kɔŋ nde ni kuraminɛ. 12Awa yaŋ ni nde ba wundɛ kuta ka maniyɔ mathɔɔkɔ nɔŋ mandɛ wɔ wathe wunthe wo dɔma na Ananaiyasi. Wundɛ be biyande e wundɛ niŋ tuta thɛnkɔ nama thaŋ ba wundɛ be kutu hɛlɛŋ.” 13Ananaiyasi tepe niŋ, na “Mariki, biya bibɔyɛ thanki yama tepe ba hati lamgba woŋ baŋ mɛnɛ ba bɛyiniŋ fooma bamasibo ba thanki wundɛ daŋitande biya bikɛnda beŋ ka Yɛrusalɛmi. 14Awa wundɛ see ka Damasakɔsi do iŋ mayoho ma dunkuno wundɛ iŋ bafodeni bimandiŋ beŋ ba si boohuwa fooma bi ni kuraminɛ e bindɛ kɔ hina keŋ nda koŋ.” 15Mariki woŋ tepe kɛnama, na “Ŋaye e kaa, bɛyi bahɛna kutɛ yaŋ thanki niŋ yɛtha ba niya wali ba yaŋ, haliko wundɛ be ni ba keŋ kukiyaŋ koŋ kothiyo iŋ siyani bahɛna baŋ, gbakuiŋ, mɛnɛ biya bi ka Isirɛli beŋ. 16Awa yaŋ hɛlɛŋ ka yɛthɛ bakiyaŋ gbeeŋ, yaŋ kɔŋ niŋ toŋine ba dɔma na wundɛ kiŋ ba niyo thɔrɔ saathɛ ba kiyaŋ.” 17Kɛna ŋaye Ananaiyasi e kaa, e wundɛ ka biyande ka banka baŋ ka nde Sɔli ka, awa wundɛ tute niŋ thɛnkɔ e tɛpa, na “Wɛndaŋ woŋ Sɔli, Mariki woŋ Yisɔs ŋindi yama, wundɛ wo tɔŋinɔkɔy yina woŋ ka gboŋa naa yi see dondo. Wundɛ ŋindi yama ba yi be hɛlɛŋ kutu e yi dunkuno Yina wo ŋaye ka Masaala woŋ.” 18Ka thagbɛmgbɛŋ thabɛina ntha ki nɔŋ ŋathempetha ŋa ka he ŋɔti ŋaye ka thaaya nama thaŋ. Wundɛ punke ba kute hɛlɛŋ. Wundɛ kɔɔ e biyo biye hu ka Masaala haŋ. 19Naa thɔŋ wundɛ, wundɛ kute hɛlɛŋ sɛmbɛ. Sɔli niyɔy iŋ bi niyɛ lanɛya beŋ ka Damasakɔsi ba mandɛni makɔndande. 20Wundɛ key toloŋ ka banka bathuŋuyande ba ka biYusu beŋ baŋ e wundɛ sɛsuwa ba niya kɛwandi ba dɔma, na “Yisɔs na Hati ka Masaala woŋ.” 21Bindɛ fooma bi niŋ poniyɛ kuiha beŋ ni ŋakabanɛ awa e bindɛ thɔnthiŋina ba dɔma, na “E wundɛ kutɛ yeheŋ kɔɔri biya bi ni kuraminɛ e bindɛ kɔ hina keŋ ku ka Yisɔs koŋ beŋ ka Yɛrusalɛmi? E ba saabu babɛina kutɛ see wundɛ dondo ba si boohuwa biya beŋ e wundɛ bindɛ kata ka bafodeni bimandiŋ beŋ?” 22Kɛrɛ kɛwandi wo ka Sɔli woŋ yame niyɔ iŋ sɛmbɛ bamandiŋ. Wundɛ tɔŋɔŋ nagberekethe ba dɔma na Yisɔs wundɛ na Banikisi woŋ. Wundɛ hakiniyande bindɛ wuŋ wuyɔhɔy haaŋ biYusu bi ka Damasakɔsi beŋ tha nda punku kuta hu bindɛ gbonkoy. 23Naa huruku wuŋ haaŋ, biYusu beŋ kɔmande ka tha banthe e bindɛ dɛɛnka madɛɛnki ba kɔra Sɔli na. 24Kɛrɛ wundɛ tepo madɛɛnki maŋ maŋ baŋ. Bi kɔŋ dethi gbɛɛŋ iŋ piripiri thabiyo tha ka mɛti baŋ thaŋ ba kuta na bindɛ niŋ bohe ba niŋ kɔra. 25Kɛrɛ huyɛ banthe bindɛ bi nde yemande Sɔli na beŋ thiye niŋ ka sansa haŋ e bindɛ niŋ fuŋuntande ka mahenkeya ma ka thinthi maŋ ka thatha ba ka mɛti baŋ, awa bindɛ thuhuta niŋ kuthɛgbɛ. 26Sɔli key ka Yɛrusalɛmi awa e wundɛ ka yɔla ti punke wundɛ ba thɔɔtɔ bakarandeni beŋ. Kɛrɛ bindɛ niyeta kulanɛya ba dɔma na wundɛ kiŋ hɛ bakarandeŋ woseŋa, bɛna bindɛ fooma bi payɔy nde niŋ. 27Kɛna see Banabasi ba niŋ si mase ba niŋ tɔŋina ka baseriŋ bithɔɔkɔ beŋ. Wundɛ methine bindɛ nagberekethe nɔŋ na kutee Sɔli Mariki woŋ ka gboŋa mɛnɛ nɔŋ na gbonkitiyande niŋ Mariki woŋ. Wundɛ key hɛlɛŋ ka kɔtɔkɔy ba tɔŋina thunka hu ni Sɔli haŋ ba niya kɛwandi ka keŋ ku ka Yisɔs koŋ ka Damasakɔsi. 28Awa bɛna Sɔli niyɔy iŋ bindɛ e wundɛ kaande fooma ka Yɛrusalɛmi, kaŋ niya kɛwandi iŋ thunka ka keŋ ku ka Mariki woŋ koŋ. 29Wundɛ hɛlɛŋ gbonkiya bɛyiniŋ babɔyɛ awa e wundɛ gbakila iŋ biYusu bi gbonkoy huKiriki haŋ beŋ. Kɛna yole bindɛ ba niŋ kɔra. 30Naa thanki mbɛndama bi ka kulanɛya koŋ beŋ huŋ kɔthɔ, bindɛ kati Sɔli na ka Sɛsariya e bindɛ duuta niŋ ka Tasɔsi. 31Awa biya bi ka Masaala beŋ ka Yudiya, ka Kalili, mɛnɛ ka Sameriya bi kiŋ nde iŋ mathɛbɛ ka lɔkɔ babɛina. Bindɛ ndintɔy e bɔya maŋaye ka mamase ma ka Yina wo ka Masaala woŋ maŋ e biya nama beŋ kɔ dunkuna yiki ka Mariki woŋ. 32Pita kaande kamo kama, awa malɔkɔ manthe wundɛ key ba ka maana biya bi ka Masaala bi ka mɛti ba ka Lida baŋ beŋ. 33Kɛna penke wundɛ hati lamgba wunthe wo dɔma na Iniyɔsi, wogbɛsinkɔy na nde wo sa hintiŋ nthɔŋ punku ŋaye ka ŋoye wundɛ kɛ ba thaninɛŋ thasɔŋ-thataati. 34Pita tepe kɛnama, na “Iniyɔsi, Yisɔs ni ba yi pethɔ. Ŋayi ka kɔɔ awa e yi huyuwa kuwatha nda koŋ.” Ka thagbɛmgbɛŋ thabɛina Iniyɔsi ŋaye ka kɔɔ. 35Naa kute wuŋ biya beŋ fooma bi nde ka Lida mɛnɛ ka bompi wo ka Sarɔŋ, bindɛ fooma ni kulanɛya ka Mariki woŋ. 36Wɔ yɛrɛmɛ kiŋ nde ka Yɔpa keŋ nama koŋ kuna Tabitha, wundɛ kiŋ nde wo niyɛ kulanɛya. Keŋ nama ka huKiriki haŋ koŋ ku kɔŋ dɔma na Dɔkasi, wu thalintando na ‘Bathaha.’ Timo tima wundɛ kɔŋ ni bayɔhɔy e wundɛ kɔ mase bamɔnɛŋ beŋ. 37Ka lɔkɔ babɛina wundɛ see ka thoono wukahɛ awa e wundɛ tuka. Kubeli nama koŋ biyo e kuŋ tayo ka makonko ma ka banka ba ka thinthi baŋ. 38Ka Yɔpa wuŋ thɔkiyandeta iŋ ka Lida, awa na yuye bakarandeni beŋ ba dɔma na Pita kiŋ ka Lida, bindɛ ŋindi baseriŋ biye kɛnama iŋ huseri haŋ haŋ baŋ, na “Yaandi, ba dɔŋɔ; saa yako kɛntuŋ do.” 39Pita kɔsinɔkɔy awa wundɛ see iŋ bindɛ. Naa biyande bindɛ, bindɛ kati Pita na ka makonko maŋ ka ŋoye kubeli koŋ ka. Bagbokorani beŋ fooma pɛnkande niŋ kaŋ boka, e bindɛ niŋ kɔ toŋine yabɛŋ iŋ ŋahɔli ŋa thanki wundɛ yehinuwa ŋaŋ wundɛ tha niye tuke. 40Pita funkutu bindɛ fooma ka makonko maŋ, awa wundɛ kunthuŋe e bindɛ niya kuraminɛ, kɛna dethe wundɛ ka kubeli koŋ ka e tɛpa, na “Tabitha, ŋaye ka kɔɔ!” Kubeli koŋ mayaŋ thaaya, awa wundɛ kute Pita na, wundɛ ŋayintɔkɔy e wundɛ dɔŋɔ. 41Pita mase niŋ ba ŋaye ka kɔɔ. Kɛna thiyi wundɛ bagbokorani beŋ mɛnɛ biya bihɛna bi ka Masaala beŋ, awa wundɛ toŋine bindɛ Dɔkasi na wopethɔy nagbelebe. 42Maseri ma ka bɛy baŋ baŋ thanki gbanthande fooma ka Yɔpa, awa biya bibɔyɛ ni kulanɛya ka Mariki woŋ. 43Pita niyɔy ka Yɔpa ba lɔkɔ bathɔɔkuwɛ iŋ bakaranke wo dɔma woŋ na Saimɔŋ.

will be added

X\