Baseriŋ Bithɔɔkɔ beŋ 28

1Naa tɛŋ miŋ ka thithɛ, miŋ thɛbɛŋ thathukuma, awa miŋ kɔthɛ ntiŋ ba dɔma na thiki hubɛina huna dɔma na Malita. 2Biya bi kɛndɛ beŋ key niyɔ biya biyɔhɔy kɛntuŋ. Koyoŋ woŋ sɛsi ba saa iŋ haka humandiŋ. Bindɛ ŋindiyɛ mina buu awa e bindɛ mina yɛritɔ. 3Pɔli pope ŋayeŋ ŋathithɛ mɔlɔŋ ba tanka e wundɛ ŋɛŋ thiya ka buu buŋ. Kɛna fuŋ wokɛkɛŋ ka ŋayeŋ ŋaŋ naa penke niŋ wuluwulu ba ka buu buŋ baŋ e kahita ka ŋaaka Pɔli na ka yɔnkɔ nama haŋ. 4Naa kute wuŋ biMalita beŋ, bindɛ tepe ba dɔma, na “Hati wowathe woŋ baŋ bakɔri na wundɛ.” Bindɛ tepe hɛlɛŋ, na “Wayi wo ba kɔnsɔŋɔŋ biya woŋ sa ni ba wundɛ niyɔ kisi, hali na tha wundɛ pɛyɔ ka mandi na.” 5Pɔli yithiŋ yɔnkɔ nama haŋ, kɛna ŋɔti wokɛkɛŋ woŋ ka buu buŋ, awa Pɔli tha niyɔ ntha o ntha. 6Huna dome bindɛ Pɔli na na wundɛ kɔŋ thiŋ e ŋɔta wotukɛ, kɛrɛ naa nambe wuŋ haaŋ, bindɛ tha kutu bɛy yo bɛy ba be niyɔ Pɔli na, awa bindɛ sikinande magbonkoy e bindɛ tɛpa, na “Wundɛ ka wɔmɛti wuthɔ!” 7Dumgbu ba ka gbaku wo ka thiki haŋ woŋ wo dɔma woŋ na Pubiliyɔsi ba kiŋ nde kɛndɛ wuthuriye. Wundɛ yɛritɔy mina; bɛrɛ ba hura kataati miŋ kiŋ thahinɛŋ nama. 8Fanda ka Pubiliyɔsi woŋ ŋoyeŋ nde kɛndɛ wo ŋɔtitɛ iŋ kɔtɔ kutɔɔkɛ mɛnɛ kotho hu ka hee. Pɔli biyande ka makonko nama ka, e wundɛ ka niya kuraminɛ, e niŋ tuta yɔnkɔ, e niŋ puya. 9Wuŋ see ka niyɔ nda, biya bi ka thiki haŋ bi thoonɔy beŋ fooma see kɛnama e wundɛ bindɛ puya fooma. 10Bindɛ nkee mina munkii mubɔyɛ ba mina thiya maamo. Naa manke miŋ thɔɔ ka gbe bahɛna, bindɛ dunkune mina munki mu thimo miŋ ba biyasi ntuŋ haŋ. 11Naa thankaŋ miŋ sɛnkɛni bitaati, miŋ thɔɔyɛ ka gbe ba ŋaye ka Alɛsandiya ba iŋ kuthɔrintɔkɔ ku ka biyamɛti bi bathemɛŋ e kuŋ tuto ka mapɛrɛŋ ma ka gbe baŋ maŋ, ba nde nda kɛndɛ kabi ka malɔkɔ ma ka thamɔ baŋ maŋ. 12Miŋ biyande ka mɛti ba ka Sirakusi e miŋ niyɔ kɛndɛ ba hura kataati. 13Maŋaye kɛndɛ miŋ biyande ka mɛti ba ka Rɛkiyɔmi. Ka gbɛɛŋ wo yemɛ woŋ, huru haŋ bohe hɔŋa maŋaye ka yɔnkɔ huthome haŋ naa yi siseke ka bekede. Naa huru wuŋ kaye hɛlɛŋ, miŋ tɛŋ ka mɛti ba ka Putiyoli. 14Miŋ penke kɛndɛ balanɛyani bi thɔnthiŋinɛ mina ba miŋ niyɔ iŋ bindɛ ba hura kasɔŋ-kaye. Kɛna key miŋ biyasi ntuŋ haŋ ka kɔtɔkɔy ba kaa ka Romaŋ. 15Balanɛyani beŋ ka Romaŋ yuye ba miŋ, e bindɛ kaa ka Apiyɔsi, mɛti ba ba niye gbɔŋ baŋ, haaŋ ka mɛti ba dɔma baŋ na Yikiyani Bataati ba mina si pɛnka kɛndɛ. Naa kute Pɔli bindɛ, wundɛ thiyi Masaala na maamo e wuŋ niŋ kahinuwa thukuma. 16Naa tɛŋ miŋ ka mɛti ba ka Romaŋ, Pɔli dunkuno hɛɛra ba niyɔ wundɛ wuntheŋ e kurugba woŋ niŋ kɔ dethiteke haliko wundɛ be tha kiti. 17Naa daŋande wuŋ hura kataati, Pɔli thiyi biYusu bi bayahɛŋ beŋ makutande. Naa thuŋande bindɛ, wundɛ tepe bindɛ, na “Biyaŋ biIsirɛli, hali na tha yaŋ ni bɛy ba sɔkinɔkɔ biya ntuŋ beŋ mɛnɛ maniyɔ ma kute miŋ ka mbembɛŋ ntuŋ beŋ maŋ, yaŋ boho ka Yɛrusalɛmi e yaŋ dunkuno ka biRomaŋ beŋ. 18Naa thɔnthɔŋɔni bindɛ yama, biRomaŋ beŋ bi kiŋ nde ba yama pɛyɛna, baa bindɛ kute ba yaŋ thana niya ba tɛŋɛ yaŋ ba koro. 19Kɛrɛ naa thɔɔyɛ huŋ biYusu beŋ, yaŋ tha punku niya bɛy yo bɛy, huna thonthiŋine yaŋ ba ka kutiyɔkɔ Gbaku womandiŋ woŋ, hali na niyɔy wuŋ na yaŋ ka iŋ hu yaŋ gbonkoy ba sɔkinɔkɔ biya niŋ biYusu beŋ. 20Wuna biyɛ yaŋ thɔnthiŋina ba bena kuta iŋ ba gbonkitiyande bena. Nɔndi yaathi, yaŋ loŋo yɔlɔnkɔiŋ saathɛ ba Banikisi wo biya bi ka Isirɛli beŋ kufiyo ba kuta woŋ.” 21Bindɛ tepe niŋ, na “Miŋ tha kutu kuthagba ku ŋaye ka kuyɛkɛŋ ku ka Yudiya ba yi, ba hintiŋ tɛpa na wunthe ka mbɛnda ntuŋ beŋ ŋaye kɛndɛ iŋ maseri manɛnɔy, maa ba tɛpa bɛyi ba yina sɔkinɔkɔ. 22Kɛrɛ miŋ kɔŋ thimo ba kɔthɔ hu yina ka thukuma, baa miŋ kɔŋ yuyɛ kamo kama biya bi si gbonkoy wunɛnɔy ma sɔkinɔkɔ kiki ba iŋ yi baŋ.” 23Bindɛ deŋe malɔkɔ iŋ Pɔli, e bindɛ saa bibɔyɛ ka lɔkɔ babɛina ka tha ka niye Pɔli yikiya ka. There sanka haaŋ huyɛ wundɛ methine bindɛ huseri nama haŋ ba Hugbakine hu ka Masaala haŋ. Pɔli yole ba bindɛ niya lanɛya ba dɔma na Banikisi woŋ na Yisɔs wo ba ni bindɛ karaŋ ka Siraŋ ba ka Musa baŋ mɛnɛ magbali ma ka banabiŋ beŋ maŋ. 24Binɔndi ni lanɛya maŋaye ka thampɛŋ nama thaŋ, kɛrɛ binɔndi tha ni lanɛya. 25Bindɛ paŋande ka thana bohinande ka mathuŋande maŋ. Huna dome Pɔli kɛnamɛŋ, na “Yina wo ka Masaala woŋ gbonkoy nɔndi baŋ maŋaye ka banabi woŋ Aisaya ka mbembɛŋ ndeŋ beŋ! 26Wundɛ tepe, na ‘Kaa kaŋ tepe biya beŋ beŋ baŋ: na Beŋ kɔŋ poŋ kuiha e pona kuiha, kɛrɛ beŋ sa metho; beŋ kɔŋ dethi e detha, kɛrɛ beŋ sa kutu. 27Baa biya beŋ beŋ baŋ masiyi namɛŋ maŋ apimɔ, bindɛ lɔnkɔti ŋaiha namɛŋ ŋaŋ e bindɛ manka thaaya namɛŋ thaŋ. Mɛnɛ huŋ kutɛ, thaaya namɛŋ thaŋ tha kɔŋ nde kutu, awa ŋaiha namɛŋ ŋaŋ ŋa kɔŋ nde yuyɛ, awa thathukuma namɛŋ thaŋ tha kɔŋ nde metho, awa bi kɔŋ nde sikiyɔkɔ kiyaŋ do, awa yaŋ kɔŋ nde bindɛ puyi.’ ” 28Pɔli gbanthaŋ, na “Beŋ kiŋ ba kɔthɔ ba dɔma na huseri hu ka Masaala hu iŋ kisi baŋ haŋ toŋito ka siyani bahɛna baŋ, awa bi kɔŋ poŋ kuiha!” [ 29Naa thanki nɛŋ Pɔli gbonkiya, biYusu beŋ pɛyɛŋ makutande maŋ iŋ kuyuŋande kumandiŋ-mandiŋ ka mateete namɛŋ.] 30Bɛrɛ ba thaninɛŋ thaye Pɔli niyɔy ka banka ba sekithe wundɛ baŋ e wundɛ kɔ thunkuna. Kɛna niyɔy wundɛ e kɔ yɛritɔ bi see kɛnama beŋ fooma. 31Wundɛ ni kɛwandi ba Hugbakine hu ka Masaala haŋ e thaninuwa ba Mariki woŋ Yisɔs Kraist, ka gbonkiya iŋ thunka humandiŋ awa wɔ yo wɔ pindeta niŋ ba gbonkiya.

will be added

X\