1 Naa sekithe wuŋ hura kataati naa tɛŋ Fɛsɛtɔsi ka kuyɛkɛŋ koŋ, wundɛ ŋaye ka Sɛsariya ba kaa ka Yɛrusalɛmi. 2 Kɛna see bafodeni bimandiŋ beŋ mɛnɛ bayahɛŋ bi ka biYusu beŋ ka fuŋutuyɛ Pɔli na. Bindɛ theteke Fɛsɛtɔsi na ba bindɛ peniyo Pɔli na, haliko ndɛ be see ka Yɛrusalɛmi, baa bindɛ thanki nde nda dɛɛnka ba niŋ kɔra ka gboŋa. 4 Fɛsɛtɔsi mɛyiyɛ bindɛ, na “Pɔli thanki nda kosino ka yeeli woŋ ka Sɛsariya, awa yaŋ yaathi yando hɛlɛŋ kɛndɛ key kayeŋ baŋ. 5 Niyaŋ ba bayahɛŋ ndeŋ beŋ kaa iŋ yaŋ ka Sɛsariya e bindɛ ka fuŋutuyɛ hati wowathe woŋ baŋ, mɛnɛ wundɛ ni bɛy yo bɛy banɛnɔy.” 6 Fɛsɛtɔsi sekithe hura kasɔŋ-kataati maa kɔhi ka Yɛrusalɛmi iŋ bindɛ e wundɛ ntiŋ kɔ kaa ka Sɛsariya. Ka gbɛɛŋ wo yemɛ woŋ, wundɛ dɔŋɔy ka kaama wokonsiŋine woŋ e dɔma ba Pɔli be sisa kaake. 7 Naa biyande Pɔli, biYusu bi ŋaye ka Yɛrusalɛmi beŋ pɛnkande niŋ e bindɛ kɔ gbonkiya wubɔyɛ-bɔyɛ ma sɔkinɔkɔ niŋ, magbonkoy ma sa bindɛ punku ba tɔŋina maseri. 8 Kɛrɛ Pɔli tɛnkɛŋ magbonkoy na, na “Yaŋ tha ni bɛy yo bɛy ma sɔkinɔkɔ siraŋ ba ka biYusu beŋ baŋ, maa ka banka bamandiŋ ba ka Masaala baŋ, maa ka Gbaku wo ka biRomaŋ beŋ woŋ.” 9 Kɛrɛ Fɛsɛtɔsi thimoŋ nde ba yɔhɔ keŋ ka biYusu beŋ, huna thonthiŋine wundɛ Pɔli na, na “E yi yɛrɔkɔy ba kaa ka Yɛrusalɛmi ba kɛndɛ ka konsiŋino ba bɛyiniŋ baŋ baŋ ka kɔtɔkɔy kiyaŋ?” 10 Pɔli mɛy, na “Yaŋ kooyeŋ ka kaama wokonsiŋine wo ka Gbaku wo ka biRomaŋ beŋ do, du sisande yaŋ ba konsiŋino do. Yaŋ tha ni bɛy yo bɛy banɛnɔy ka biYusu beŋ, nɔŋ na kɔthɛ nthɔŋ yi na. 11 Mɛnɛ yaŋ teeti siraŋ e yaŋ niya bɛy ba sisande yaŋ ba koro, yaŋ thonthiŋineta ba peniyo. Kɛrɛ mɛnɛ nɔndi ka, ka ba tepiye bindɛ yama baŋ, wɔ ka wo iŋ mayoho ba yama dunkuna kɛnamɛŋ. Ka tete, dunkuneŋ yama hɛɛra ba ka kutiyɔkɔ Gbaku womandiŋ woŋ ka Romaŋ.” 12 Naa thanki Fɛsɛtɔsi dɛɛnka iŋ bayeliŋ nama biya beŋ, wundɛ mɛy e tɛpa, na “Ka tete yi thɔnthɔŋɔŋ ba ka kutiyɔkɔ Gbaku womandiŋ woŋ ka Romaŋ, awa yi kɔŋ kɛndɛ key.” 13 Naa sɛsi wuŋ hurukuta, Gbaku wo ka kuyɛkɛŋ ku tɔpɛ kɛndɛ koŋ wo dɔma na Akiripa mɛnɛ wɛndama woyɛrɛmɛ woŋ Bɛnisi see ka Sɛsariya ba yɛritɔ Fɛsɛtɔsi na. 14 Naa niyɔy bindɛ kɛndɛ ba hura hukɔndande, Fɛsɛtɔsi methine gbaku woŋ sɔkɔ hu ka Pɔli haŋ, na “Wɔ wowathe kiŋ dondo baŋ wo peyo ka yeeli woŋ iŋ Filisi. 15 Naa key yaŋ ka Yɛrusalɛmi, bafodeni bimandiŋ beŋ iŋ bakalani bibayahɛŋ bi ka biYusu beŋ see ka fuŋutuyɛ niŋ e bindɛ thɔnthiŋina yama ba niŋ thonkine. 16 Kɛrɛ yaŋ tepe bindɛ ba dɔma na mindo biRomaŋ bina miŋ, awa miŋ ka iŋ naamu wo ka thonkine wɔ yo wɔ wo thankɛ fuŋutuyo ba bɛy yo bɛy mɛnɛ wundɛ teŋinuweta hɛ iŋ bifuŋutuyɛ niŋ beŋ, e wundɛ niyɔ iŋ hɛɛra ba tɛnkina magbonkoy ma sɔkinɔkɔ bifuŋutuyɛ niŋ beŋ. 17 Bɛna naa see bayahɛŋ bi ka biYusu bi fuŋutuyɛ niŋ beŋ dondo baŋ, yaŋ tha teeti lɔkɔ, kɛrɛ ka gbɛɛŋ wo yemɛ woŋ, yaŋ dɔŋɔy ka kaama woŋ e yaŋ niya yamari ba wundɛ be sisa. 18 Bisɔkɔnɔkɔy niŋ beŋ ŋaye ka kɔɔ, kɛrɛ bindɛ tha niŋ fuŋutuyɛ ba bɛy yo bɛy banɛnɔy ka ba tute yaŋ thukuma baŋ. 19 Mu ni bindɛ, ayuŋande mɛŋ ba sɔkɔ hu ka dina wokɛnamɛŋ woŋ mɛnɛ ba wɔ wo dɔma na Yisɔs, wo thankɛ tuka woŋ, kɛrɛ Pɔli tepe ba wundɛ niyɔ iŋ sii hɛlɛŋ. 20 Wuŋ baŋ niyɔy nde yama kɔnthɔhili ba ka yaŋ kute maseri managberekethe ba sɔkɔ haŋ haŋ baŋ, wuna biyɛ yaŋ thɔnthiŋina Pɔli na mɛnɛ wundɛ kɔŋ yɛrɔkɔ ba kaa ka Yɛrusalɛmi e kɛndɛ ka konsiŋino ba bɛyiniŋ baŋ baŋ fooma. 21 Kɛrɛ Pɔli thɔnthɔŋɔŋ ba wundɛ be kɔsina hintiŋ haaŋ nɔŋ e sɔkɔ nama haŋ gbonkiyo iŋ Gbaku womandiŋ woŋ ka Romaŋ. Huna niye yaŋ yamari ba wundɛ kɔ dethitoko haaŋ nɔŋ e yaŋ kuta hɛɛra ba niŋ tɔŋita ka Gbaku womandiŋ woŋ ka Romaŋ.” 22 Akiripa tepe Fɛsɛtɔsi na, na “Yaŋ thimoŋ ba yuyɔkɔ hati wowathe woŋ baŋ.” Fɛsɛtɔsi yɛrɔkɔy, na “Yi kɔŋ niŋ yuyɛ mɛmpɛ.” 23 Ka gbɛɛŋ wo yemɛ woŋ, Akiripa mɛnɛ Bɛnisi key ka kaama woŋ. Bindɛ niyo yiki wumandiŋ iŋ biya beŋ, e bindɛ biyande ka kaama woŋ, wo thiŋe iŋ bayahɛŋ bi ka kurugbani beŋ, mɛnɛ bayahɛŋ bi ka mɛti baŋ beŋ. Fɛsɛtɔsi ni ba Pɔli siso kaake ka kaama woŋ. 24 Fɛsɛtɔsi tepe, na “Gbaku woŋ Akiripa, mɛnɛ biya bi dondo baŋ beŋ fooma, beŋ kuteŋ hati wowathe woŋ baŋ wo key fuŋutuya kiyaŋ ka woŋ iŋ biYusu beŋ fooma ka Yɛrusalɛmi mɛnɛ dondo baŋ. Bindɛ thiye masɔnkɔ ba dɔma na wundɛ kɔrɛŋ. 25 Kɛrɛ yaŋ tha kutu ba dɔma na wundɛ ni ba sisande wundɛ ba koro. Bɛna naa thɔnthɔŋɔŋ wundɛ ba ka kutiyɔkɔ Gbaku womandiŋ woŋ ka Romaŋ, yaŋ dɛɛnki ba niŋ tɔŋita kɛndɛ. 26 Kɛrɛ bɛyi ka bagbeeŋ ba yaŋ gbalite Gbaku womandiŋ woŋ. Wuna sise yaŋ niŋ dondo baŋ ka kɔtɔkɔy kendeŋ mɛnɛ yi, gbaku woŋ Akiripa! Mɛnɛ yi dethe na sɔkɔ nama haŋ, ka lɔkɔ na yaŋ kɔŋ kutu hu yaŋ gbali. 27 Yaŋ kute ba dɔma na kele ka kɛndɛ ba tɔŋita wɔ bɔhɔy mɛnɛ yaŋ tha tɔŋɔŋ nagberekethe bɛyiniŋ ba teeti wundɛ baŋ.”
